Yeremi 5 - WE NU GALE 1995

Owi Yeruzalɛmɛ wa dɛa 'dã mɔ

¹ NWA tɔ̃a na: “Nɛ, owi kɔ le Yeruzalɛmɛ, nɛ yɛ́nggɛ́ kɔ le 'da nɛ vɛ̃, nɛ nɛ kɛnggɛlɛ kɔ nɛ. Nɛ fá falanɔ vɛ̃, tabi nɛ we sɛ we kpa wele kpo kɛ a dɛ mɔ do bɔlɔ nɛ, nɛ a fa we ɔ dia wi li mi Gale ni nde? Fala kɛ nɛ kpa wele ɔ na mɛ ni, nɛ mi NWA, mi fo sɛ ku'da 'dã mɛnɔ zu nɛ.”

² Aa nwa, winɔ wa kana tɛ wa do zu li mɔ, nɛ nde wa dɛ́ olo nu wa gɔ.

³ Ĩ na, mɔ NWA, mɔ kɔ̃a bɔlɔ zu dɛa mɔ. Mɔ hã etumbu hã wa, nɛ nde wa lénggé nɛ gɔ. Mɔ zɛlɛ tɛ wa, nɛ nde wa zélé mɔ gɔ. Wa dɛ mɛnɔ vɛ̃ do nga zu, nɛ wa bɛ̃ we kpolo tɛ wa 'da mɔ.

⁴ Mi lingga zi na, winɔ wa dɛ mɛ ni, wi tati a Owi kɔ lenɔ iko. We kɛ wa ĩ̀ ti mɛ zã mɔ Gale kɔ̃a ni gɔ, nɛ wa ĩ̀ 'bɔ ti mbulanɔ 'da mɔ gɔ. Ma hã wa dɛ mɛnɔ do ta zu wa iko ni.

⁵ Nɛ mi nɛa 'da ogã winɔ, we wele we do wa. We kɛ wa ĩ ti mɛ zã mɔ kɔ̃a ni, nɛ wa ĩ 'bɔ ti mbulanɔ 'da mɔ. Nɛ nde wa wia kɔ̃ do owi kɔ lenɔ iko. Wa bɛ̃a tɛ mɛ 'bɔ gɛnɛ mɔ nwa, nɛ wa la fala dɛ na do mɔ do'do.

⁶ Gulu nɛ a ogbɔgbɔ wa yolo sɛ tɛ fala ɔi 'da wa, nɛ wa tɛ we gbɛ winɔ ni. Ogbokologboe wa yolo sɛ li zɔ̃nɔ, nɛ wa tɛ, nɛ wa kala winɔ ni, nɛ wa ɛ̃ sanga wa. Nɛ ogɔ̃̀ wa usu sɛ tɛ wa dɛ 'do lenɔ, nɛ wa kala sɛ wanɔ wa hɔ nza ni, nɛ wa 'bili sanga wa sikili sikili. Mba gɔ, 'dã mɛnɔ 'da wa ma la li, nɛ zu wa tɛ nganda dɛ dati nganda fai.

⁷ NWA tɔ̃a na: “Mi nɛ dɛ fala fo ku'da 'dã mɛnɔ zu owinɔ 'da mi nɛ nde? Wa la fala mi do'do, nɛ wa nɛa 'dɔkɔlɔ ogale bɛlɛnɔ, nɛ wa kana tɛ wa do zu li wa. Mi hã zi mɛnɔ vɛ̃ kɛ ma wia do wa ni hã wa. Nɛ nde wa dɛa mɔ tɛ wa ɔ nɛ wuko, kɛ a ɔa do gele wili ni. Wa yɛnggɛ 'dɔkɔlɔ ogele galenɔ ɔ nɛ kɛ wuko ndumba yɛnggɛ 'dɔkɔlɔ wi wili ni.

⁸ Wɔ wuko gã li sila wa ɔ nɛ kɛ 'da ozagbãlã mbalata ni. Wa kɔ̃a we ɔ do wukonɔ vɛ̃, gɛnɛ kɔ ko mɔ́ wili, nɛ wa fa a iko.

⁹ Kɛ wa dɛ na mɛ ni, nɛ mi wè mbe tɛ hã etumbu hã wa gɔ nde? Mi wè tɛ bili nu gbã nɛ hã wa gɔ nde?

¹⁰ Mi tombo sɛ owi sɛnɛ wa, nɛ wa kũ ngɔ kalanɔ, nɛ wa 'danga ofɔ vinɔnɔ 'da wa. Nɛ nde wa 'dángá sɛ ma vɛ̃ gɔ. Wa 'bili sɛ ogbakɔ̃ te vinɔnɔ dɛ nù, we kɛ mɛ 'bɔ a mɔ́ mi gɔ.

¹¹ Oisraɛlɛ do Oyuda wa la zi fala dɛ olo nu mi do'do. Mi NWA, mi tɔ́a ni.”

NWA bɛ̃a gɛnɛ obe Israɛlɛ

¹² Owinɔ 'da nwa wa bɛ̃a gɛnɛ a, nɛ wa na: “A dɛ́ sɛ mɔ kpo do lɛ gɔ. Lɛ kpá sɛ ngamɔ gɔ, nɛ bolo tabi gba wɔ ma té sɛ gɔ.

¹³ Owi gba olo nu a wa wele we, nɛ nde gbãlã we lɛnggɛ nu wa bina, wa to tati a bɛlɛ iko. E kɔ wa do tɛ wa, wa kpa ngamɛnɔ wa tɔ̃ we nɛ ni!”

¹⁴ Gale, NWA ngɔ mɔ nyanga nza vɛ̃ sa mɔ hã mi Yeremi, nɛ a na: “Ɔ nɛ kɛ wa tɔ̃ ní ni, mi nɛ tombo toe gɛ hã wa, nɛ ma hɔ sɛ kɔ nu mɔ nɛ́ we ni, ma bɛlɛ sɛ winɔ vɛ̃ ɔ nɛ kɛ we bɛlɛ do kula te ni.”

¹⁵ NWA tɔ́a 'bɔ na: “Nɛ, Oisraɛlɛ, mi sa sɛ mɔ hã Owele ndũu ngɔ nùi 'da wa, nɛ wa tɛ we bi nɛ. Mɛ a owele kɛ nu kpala wa zi ngɔ nù gɛ belee, nɛ wa nganda wena, nɛ nɛ ĩ̀ ti lɛnggɛ nu wa gɔ.

¹⁶ Owi da nzabelenɔ 'da wa, wa dá kɔtɔ gɔ, nɛ osodanɔ 'da wa vɛ̃, wa a onga wi bolo.

¹⁷ Wa nyɔngɔ sɛ Okpalɛnɔ do nyɔngɔmɛnɔ 'da nɛ, nɛ ma e vɛ̃. Nɛ wa gbɛ sɛ obulu benɔ do oboko benɔ 'da nɛ. Wa kumu sɛ obatanɔ do ongɔmbɔnɔ 'da nɛ, nɛ wa gɔmɔ sɛ te vinɔnɔ do te figɛnɔ 'da nɛ dɛ nù. Nɛ wa 'danga sɛ olenɔ 'da nɛ kɛ gba ngbonɔ zĩ ma takpa, nɛ nɛ usu tɛ nɛ kɔ nɛ ni.”

¹⁸ NWA tɔ̃a na: “Do fala ni, nɛ nde mi kúmú sɛ owinɔ 'da mi vɛ̃ gɔ.

¹⁹ Kɔ wa aka na: ‘Gulu kɛ NWA Gale 'da lɛ hã ngamɛnɔ gɛ hã lɛ we ge nde?’ Nɛ mɔ, Yeremi, mɔ gese sɛ na: ‘Nɛ la zi fala dɔnggɔ NWA 'da lɛ, nɛ nɛ dɔnggɔ ogele gale dɛ ngɔ nùi 'da nɛ ngboo. Na mɛ ni, nɛ la sɛ tɛ mɛ 'bɔ we dɛ ngbá ti ogele wele, tɛ ngɔ nùi kɛ mɛ a mɔ nɛ gɔ ni.’ ”

Obe Yuda wa dɛ 'bɔ kili Gale gɔ

²⁰ NWA tumba toe gɛ hã Oyuda, obe zã Yakɔbɔ na:

²¹ “Nɛ, oyɔnda winɔ kɛ nɛ ĩ̀ ti mɔ gɔɛ gɛ, nɛ zélé we gɛ: Nɛ do gbali nɛ boe, nɛ nde nɛ zɔ́ mɔ gɔ. Zala nɛ boe, nɛ nde nɛ zélé we gɔ.

²² Mi a NWA 'da nɛ, kɔ gulu kɛ nɛ dɔ́nggɔ́ mi gɔ we ge nde? Gulu kɛ nɛ táná kili dati mi gɔ we ge nde? Mi a mi ngɛmɛ zi kɛnzɛ dɛ nu lì, takɔ ma ɔ do ngbala we gba lì, nɛ ngbala ni, ma ɔ sɛ fai. Gba lì wè we kũ ngɔ nɛ gɔ. Gɛnɛ kɔ ma yaka tɛ̃ ɛ wena, nɛ nde ma kṹ sɛ 'do nɛ gɔ. Nɛ Ongele lìnɔ ma wia we bũlũ dɛ ngɔ wena, nɛ nde ma lá sɛ ngɔ nɛ gɔ.

²³ Nɛ nde nɛ, Owele, nɛ a Owi nga zu do Owi bɛ̃ we. Nɛ siki 'do nɛ hã mi, nɛ nɛ la fala mi do'do.

²⁴ Nɛ lénggé we hã dɔlɔ li hã mi, NWA Gale 'da nɛ fala kpo gɔ. Ĩ na, mi tombo kolo hã nɛ do li zɔlɔ nɛ, nɛ mi dɛ na, nɛ kpa nyɔngɔmɔ kɔ sabɛlɛ do sabɛlɛ.

²⁵ Nɛ nde ngangga gɛ, 'dã mɛnɔ 'da nɛ ma kpia wala dia dɛa mɛnɔ ni vɛ̃.

²⁶ “Owi dɛ 'dã mɔ wa dɛlɛ kɔ owinɔ 'da mi wena. Wa dɛ mɔ tɛ wa ɔ nɛ wi ndɔ bili, kɛ a gu nù tɛ fala usu tɛ wi, kɔ a 'bɔ we kala onɔɛ ni. Ĩ na, wa ndɔ bilinɔ ni we kala Owele.

²⁷ Tɔanɔ 'da wa ma dunu do mɔ zũ, ɔ nɛ onɔɛ wa dunu kɔ fã ni. Gulu nɛ a wa hɔa Owi ngawi do Owi kpamɔ,

²⁸ nɛ wa hɔ ogã kili tɛ wele. 'Dã mɛnɔ 'da wa ma la li do'do. Wa 'bili wenɔ 'da ongba wa do bɛlɛ, nɛ wa ɔlɔ obe gulanɔ, sɛ a wa do tɛ wa, wa kpa mɔ de. Nɛ wa lénggé mbe do kpasi 'da owi sãnɔ gɔ.

²⁹ “Ní a ma wè na, mi hã etumbu hã winɔ ni, nɛ mi bili nu gbã hã wa gɔ nde?

³⁰ Mɛ ma la kɔ le gɛ, mɛ a sɔ dɛa mɔ, do 'dã mɔ hã kili hã wele.

³¹ Owi gba olo nu mi Gale wa 'bili bɛlɛ iko, onganganɔ wa fa tati a kpasi 'da wa wele nɛ. Nɛ nɛ, owinɔ 'da mi, nɛ zɔa ma, nɛ nɛ kɔ̃a gɛnɛ nɛ wena. Kɔ ngba soe mɛnɔ ni ma e, nɛ nɛ dɛ sɛ nɛ nɛ nde?”