Yeremi 49 - WE NU GALE 1995

NWA wila we dɛ ngɔ Oamoni

¹ Nɛ zélé wenɔ kɛ NWA Gale wila dɛ ngɔ Oamoni gɛ. A na: “Gulu kɛ Owi dɔnggɔ gale Milkɔmɛ, wa kala olenɔ 'da nu kpala Gadɛ, nɛ wa ɔ kɔ nɛ ni we ge nde? Ní a obe Israɛlɛ wa zɔlɔ obulu be we dungu ngɔ mɛnɔ olo obaa wa ni zɔla nde?

² Nɛ nde mbe ngba soe kpo, nɛ mi nwa, mi dɛ sɛ na, owinɔ kɔ le Raba, kɛ mɛ a gã le 'da Oamoni ni, wa zele giti hiamɔ bolo kɔ le 'da wa. Nɛ gã le ni ma kifi sɛ bili tɔa, nɛ olenɔ kɛ zã nɛ ni, ma bɛlɛ sɛ vɛ̃. Nɛ obe Israɛlɛ wa kala sɛ 'bɔ lenɔ 'da wa dɛ olo nɛ.

³ “Mi NWA, mi tɔ̃a na, aa nɛ, Owi kɔ le Hɛsɛboni, nɛ gá zuma 'bako! We kɛ le Ai ma 'danga do'do! Nɛ nɛ, owukonɔ kɔ le kɛ zã Raba ni, nɛ hé'dé tulu gɛla, nɛ nɛ yɛ́nggɛ́ do kɔ ngbonɔ 'da nɛ, nɛ nɛ gá zuma ala nu. We kɛ wa ba sɛ gale 'da nɛ Milkɔmɛ, fala nɛ kpo do onganganɔ, do okumunɔ 'da a, nɛ wa la do wa kɔlɔ 'duli.

⁴ Aa nɛ, owi kɔ le Raba, nɛ a owi nga zu! Nɛ dɔnggɔ zi tɛ nɛ do dia nùi kɔ gbangɔlɔ̃ɛ 'da nɛ, nɛ nɛ gbini zi zã nɛ do kpamɛnɔ 'da nɛ. Nɛ nɛ tɔ̃ zi na, wele kpo wè we bi nɛ gɔ!

⁵ Nɛ nde mi Gale, NWA ngɔ mɔ nyanga nza vɛ̃, mi nɛ tombo omɔ na, ma hã gã tili hã nɛ. Nɛ mɛnɔ ni ma yolo sɛ tɛ falanɔ vɛ̃, nɛ ma tɛ dɛ kɔ le 'da nɛ. Nɛ nɛ vɛ̃, nɛ a sɛ nyanga nɛ tɛ yu, nɛ fo sɛ wi ngɛmɛ li nɛ bina.

⁶ “Nɛ nde dɛ 'do nɛ, nɛ mi hã sɛ 'bɔ dia dungu hã nɛ Oamoni. Mi NWA, mi tɔ̃a ni.”

NWA wila we dɛ ngɔ Oedɔmɛ

⁷ NWA ngɔ mɔ nyanga nza vɛ̃ wila we dɛ ngɔ Oedɔmɛ. A na: “Fo 'bɔ Owi hã zã kɔ le Temanɛ bina nde? Gbãlã zã Owi hãnɔ ma bi, nɛ hã zã wa ma busu do'do nde?

⁸ Nɛ nɛ, Owi kɔ le Dedanɛ, obe zã Ezau, nɛ yú hã nɛ si. Nɛ úsú tɛ nɛ kɔ ta, we kɛ mi nɛ kumu nɛ. Ngba soe hã etumbu hã nɛ ma wia ia.

⁹ Owi 'bi wala te vinɔ, wa la tala wala nɛ la. Nɛ fala kɛ owi zũ wa le kɔ tɔa do tũ, nɛ wa kala tati a mɛ kɛ zã wa kɔ̃a ni iko. Nɛ nde Owi sɛnɛ nɛ wa dɛ́ sɛ do nɛ ní gɔ, wa kumu sɛ nɛ vɛ̃, wa lá sɛ tala nɛ gɔ.

¹⁰ Wi a mi nwa hã mi gbɛ sɛ nɛ, obe zã Ezau. Mi hɔ sɛ ngɔ nɛ tɛ falanɔ nɛ usu do tɛ nɛ ni, nɛ nɛ wé sɛ 'bɔ we usu tɛ nɛ gɔ. Mi kumu sɛ nɛ do owi nu kpala nɛ vɛ̃. Nɛ wele kpo 'báná sɛ 'bɔ we tɔ̃ na:

¹¹ ‘Aa nyae, fala kɛ mɔ fe, nɛ mi kala sɛ owukonɔ olo mɔ, nɛ mi zɔ mɔ tɛ obenɔ 'da mɔ’ gɔ.

¹² “Gɛnɛ kɔ ogele winɔ kɛ wa wè sɔ tɛ kpa etumbu gɔ ni, nɛ nde wa nɔa bila dɔ̃ɛ kɛ ma dunu do nɔ̃lɔ̃ zã 'da mi ni. Ní a tɔlɔ do nɛ Oedɔmɛ nde? Nɛ lengge na, mi la sɛ nɛ do lɔa tɛ nɛ nde? Fala kpo gɔ, nɛ nɔ sɛ tɛ mɛ 'bɔ bila dɔ̃ nɔ̃lɔ̃ zã 'da mi.

¹³ Mi kana tɛ mi na, fala kɛ mi a Gale kpaa, nɛ gã le 'da nɛ Bɔsra ma 'danga sɛ putu putu, nɛ Owele wa ɔngbɔ sɛ, nɛ wa we ma do we kɔ fɔmba. Nɛ olenɔ kɛ zã nɛ ni vɛ̃, ma kifi sɛ olo tɔa kɔ sabɛlɛ do sabɛlɛ. Mi NWA, mi tɔ̃a ni.”

¹⁴ NWA tɔ̃a hã mi Yeremi na, ɛ tumba to we mbese nu kɔnggɔ winɔ ngɔ nù gɛ na: “Nɛ ngɛ́mɛ́ ngba nɛ, hã nɛ nɛ́, hã nɛ bi Oedɔmɛ!

¹⁵ Aa nɛ Oedɔmɛ, mi dɛ sɛ na, nɛ hɔ tala nda go'do ongba nɛ vɛ̃, nɛ wa zɔ nɛ li wa yala.

¹⁶ Nɛ zɔ zi tɛ nɛ na, nɛ nɛa ngɔ winɔ vɛ̃, nɛ nɛ nɔ̃lɔ̃ zi zã winɔ vɛ̃. Nɛ nde nɛ ɔkɔlɔ zi tɛ nɛ wele nɛ. Nɛ dɛa le 'da nɛ tɛ ngɔ tanɔ zu kala i. Nɛ nde mi NWA, mi tɔ̃a na, gɛnɛ kɔ nɛ kũ sɔ dɛ ngɔ i, ɔ nɛ ziki ni, hã nɛ dɛ sɔ tɔanɔ 'da nɛ dɛ sanga sɔlanɔ li nza i, nɛ mi dɛ sɔ na nɛ zĩlĩ.”

¹⁷ NWA tɔ̃a na: “Nù Edɔmɛ ma dɛ sɛ olo tɔa. Nɛ owi la walanɔ wa zɔ sɛ ma, nɛ wa dɛ kili, nɛ wa zɛ nu wa do ɔngbamɔ.

¹⁸ Mɛ ma kpa sɛ Oedɔmɛ ni, ma we sɛ kɔ̃ do kɛ ma kpa zi owinɔ kɔ le Sodɔmɛ, do Gomɔrɛ, do olenɔ kɛ zã nɛ ni. Wele kpo ɔ́ sɛ 'bɔ di ni gɔ. Mi NWA, mi tɔ́a ni.

¹⁹ Mi ɔ sɛ nɛ gbɔgbɔ, kɛ a yula zamɛ nu lì Yɔrdanɛ, kɔ a hɔa nza, hã a nɛ tɛ fala wa dala do osa'denɔ ni. Mi hɔ sɛ hiaa, nɛ mi ndaka Oedɔmɛ ngɔ nùi 'da wa, nɛ wa yu vɛ̃. Nɛ mi e sɛ nwa kɛ mi saka a ni ngɔ Oedɔmɛ. Mba gɔ, wi wia kɔ̃ do mi a wio nde? Wi wia do aka mi na, mi tɔ̃ gulu we dati ɛ ni a wio nde? Nɛ nwa kɛ a wia we yolo dati mi ni a wio nde?

²⁰ “Na mɛ ni, nɛ zélé mɛ mi nwa, mi 'dafa we dɛ do Oedɔmɛ do owi kɔ le Temanɛ gɛ. Gɛnɛ kɔ obenɔ 'da wa, nɛ Owele wa kala sɛ wa 'bɛdɛ 'bɛdɛ ɔ nɛ onadalamɔ ni, nɛ wa la do wa kɔlɔ 'duli. Nɛ owinɔ vɛ̃ wa zɔ sɛ wa, nɛ wa tana kili.

²¹ 'Da fala kɛ Oedɔmɛ wa te, nɛ nùi ma tana sɛ. Nɛ hiamɔ gɛlɛ wa ma dɔ̃lɔ̃ sɛ, nɛ ma hɔ gbaa tɛ nu gba lì Sala Tɔ̃.

²² Owi sɛnɛ Oedɔmɛ wa tingbi sɛ dɛ ngɔ owi kɔ le Bɔsra, ɔ nɛ kɛ oziki wa tata 'baka wa, nɛ wa bũlũ, nɛ wa tingbi dɛ ngɔ wɔlɔ ni. Do kɔ̃ tũi ni, nɛ sila onga soda Edɔmɛ, ma ɔ sɛ ngɔ ngbũu nɛ́ sila wuko, kɛ a do zɛlɛ kula ni.”

NWA wila we dɛ ngɔ Odamasi

²³ NWA wila we dɛ ngɔ Odamasi na: “Owi kɔ le Hamatɛ do Arpadɛ, wa zila 'dã sako, nɛ zu wa vĩ, nɛ 'bako ba wa. Sila wa dɛ ngɔ ngbũu, nɛ fo wala na, wa mbɔkɔ sila wa bina.

²⁴ Owi kɔ le Damasi wa mbɔkɔ do'do. Wa tana kili, nɛ zu wa vĩ, nɛ wa yu. Wa kpa zɛlɛ tɛ, nɛ kili ba wa ɔ nɛ wuko kɛ a do zɛlɛ kula ni.

²⁵ Kɔdɛ kɛ Owele wa wia we yu le gɛ, kɛ ma zi do dɔ̃lɔ̃ li wena, nɛ mɛ zi a le yangga ni nɛ nde?

²⁶ Do kpo kɔ̃ tũi ni, Owele wa gbɛ sɛ ozagbãlã sodanɔ 'da wa vɛ̃, nɛ wɔlɔ wa ma kpa sɛ do li walanɔ kɔ le ni.

²⁷ Nɛ mi fi sɛ we tɛ le Damasi, do tɛ tɔa 'da nwa Bɛnɛ-Hadadɛ, nɛ ma bɛlɛ. Mi nwa wele ngawi, mi tɔ̃a ni.”

NWA wila we dɛ ngɔ Oarabɛnɔ

²⁸ NWA wila we dɛ ngɔ Oarabɛnɔ ngɔ nù Kedarɛ, do Hasɔrɛ, kɛ Nabukɔdɔnɔzɔrɛ, nwa ngɔ nù Babilonia nɛa zi ngɔ wa li bole ni na: “Nɛ nɛ́, hã nɛ bi Oarabɛnɔ, kɛ wa ɔ li gba zɔ̃ tɛ Kedarɛ i ni! Nɛ nɛ 'dángá mɛnɔ 'da wa vɛ̃.

²⁹ Nɛ kálá otandenɔ do onadalamɛnɔ 'da wa! Nɛ nɛ kala 'bɔ otolenɔ do osamonɔ 'da wa, nɛ nɛ si nɛ. Nɛ hé mɔ do zu li wa na: ‘Falanɔ vɛ̃, mɛ a kili do kili!’

³⁰ “Aa nɛ, owi kɔ le Hasɔrɛ, mi NWA, mi tɔ̃a na, nɛ yú, hã nɛ usu tɛ nɛ ndũu kɔ tanɔ i. We kɛ Nabukɔdɔnɔzɔrɛ, nwa ngɔ nù Babilonia 'dafa we dɛ 'dã mɔ do nɛ.

³¹ A tɔ̃a hã winɔ 'da a na: ‘Lɛ kúlú ngɔ, hã lɛ nɛ́ we bi owinɔ kɛ wa lengge do mɔ gɔɛ ni. Wa nyɛlɛ do ngba wa wena, nɛ wa lengge na, lo kpa gɛ̃a dungu ia, fo gulu kpe nu tɔanɔ 'da lo bina.’ ”

³² NWA Gale tɔ̃a na: “Nɛ kálá osamonɔ, do ogba dɛlɛ nadalamɛnɔ 'da wa li bole ni. Mi NWA, mi kala sɛ owinɔ, kɛ wa kɛlɛ tati a dati wa, we dɔnggɔ galenɔ 'da wa ni, nɛ mi pɛsɛ wa dɛ falanɔ vɛ̃. Mi dɛ sɛ na, ngamɔ yolo tɛ falanɔ kpi do kpi, nɛ ma tɛ dɛ ngɔ wa.

³³ Le Hasɔrɛ ma hɔ sɛ fala ɔi 'da o'banggo. Ma kifi sɛ li go kɛ wele ɔ́ sɛ 'bɔ se'de gɔ kɔ sabɛlɛ do sabɛlɛ.”

NWA wila we dɛ ngɔ Oelamɛ

³⁴ 'Do kɛ Sedekiasi hɔa nwa ngɔ nù Yuda ni la be sĩ, nɛ NWA ngɔ mɔ nyanga nza vɛ̃ wila we hã mi Yeremi dɛ ngɔ Oelamɛ.

³⁵ A na: “Mi gbini sɛ nzabelenɔ kɛ ma hã ngawi hã Oelamɛ ni, nɛ mi gbɛ sɛ wa vɛ̃.

³⁶ Mi dɛ sɛ na, gba bũ ma yolo si 'biti falanɔ vɛ̃, nɛ ma mba ngbɛ ɛ dɛ ngɔ Oelamɛ. Ma pɛsɛ sɛ wa do zu nza gɛ vɛ̃.

³⁷ Mi dɛ sɛ na, Oelamɛ wa dɛ kili owi sɛnɛ wa, kɛ wa fa we gbɛ wa ni. Gã nɔ̃lɔ̃ zã 'da mi ma gbɛ sɛ Oelamɛ, nɛ mi tombo sɛ osoda na, wa bi wa gbaa na, wa kumu vɛ̃ sɛ nɛ de.

³⁸ Mi gbɛ sɛ nwa ngɔ nù Elamɛ, do Owi olo li a, nɛ mi dungu sɛ nwa ngɔ nùi 'da wa.

³⁹ Nɛ nde mbe ngba soe kpo, nɛ mi NWA, mi hã sɛ 'bɔ dia dungu hã Oelamɛ. Mi NWA, mi tɔ́a ni.”