Yeremi 48 - WE NU GALE 1995

NWA Gale wila we dɛ ngɔ Omoabɛ

¹ Nɛ zélé toe kɛ NWA ngɔ mɔ nyanga nza vɛ̃, Gale 'da obe Israɛlɛ tumba hã Omoabɛ gɛ. A na: “'Bako do owi kɔ le Nebo. Owi sɛnɛ wa wa 'danga le 'da wa do'do! 'Bako do Owi kɔ le Kiriataimɛ. Mɛ zi a le kɛ gba ngbo zĩ ma takpa, nɛ nde wa yala gba ngboe ni do'do, nɛ owi kɔ nɛ wa dunu do sape, nɛ ngɔ tɛ wa gɛ̃a kpi kpi kpi.

² Dɔ̃lɔ̃ li 'da Omoabɛ sɔkpa! Owi sɛnɛ wa wa ba le Hɛsɛboni do'do. Nɛ yolo dɛ di ni, wa ba zã zu bisi Moabɛ ngɔ nù gɛ do'do. Ma sɛ 'bɔ na mɛ ni we owi kɔ le Madmɛnɛ. Bole ma ndaka sɛ 'do wa, nɛ ngɔ tɛ wa ma gɛ̃ sɛ kpi kpi kpi!

³ Owi kɔ le Horonaimɛ, wa tɛ he mɔ na: ‘Kɛ ge a ngamɔ ge nde! Le 'danga vɛ̃ do'do!’

⁴ “Nù Moabɛ 'danga vɛ̃! Mbé dia mɔ 'bànà 'bɔ di ni gɔ. Nɛ zélé giti gɛlɛ benɔ.

⁵ Nɛ zélé giti gɛlɛ tala winɔ kɛ wa tɛ kũ kala Luhitɛ do mili kɔ̃a ni, do wanɔ wa tɛ zɛ nu wa tɛ zĩlĩ kala Horonaimɛ ni.

⁶ Wa he mɔ na: ‘Nɛ yú fala gɛ do'do! Wele do wele fá na a kpasa! Nɛ yú nganda ɔ nɛ punda li gba zɔ̃ ni!’

⁷ “Aa nɛ, Omoabɛ, nɛ gbini zi zã nɛ do ngawi 'da nɛ, do kpamɛnɔ 'da nɛ. Kɔ nɛ zɔ́, wa ba sɛ nùi 'da nɛ! Nɛ wa ba sɛ 'bɔ gale 'da nɛ Kɛmɔsi, nɛ wa la do a kɔlɔ 'duli, fala nɛ kpo do onganganɔ, do okumunɔ 'da a.

⁸ Wi 'danga nù Moabɛ a tɛ sɛ, nɛ a 'danga lenɔ vɛ̃. Le kpo 'báná sɛ olo kɔ̃ a gɔ. Gbangɔlɔ̃nɔ do mbɛ nùnɔ vɛ̃, ma 'danga sɛ. Mi NWA, mi tɔ̃a ni.

⁹ Nɛ zĩ́ ta ngɔ zunu Omoabɛ, we kɛ ma 'bana sĩ, nɛ fo sɛ 'bɔ wa bina. Lenɔ 'da wa ma dɛ sɛ olo tɔa, nɛ ma kifi sɛ li go kɛ wele ɔ́ tɛ nɛ gɔ ni.”

¹⁰ Wi kɛ a nɛ bole hã Gale do mbuma ni, nɛ e kɔ Gale fɔmbɔ a! Wi kɛ a dɛ na, tɔkɔ tɛ ɔ́ li du kɔya 'da Gale gɔ ni, nɛ fɔmba 'da Gale te ngɔ a!

Lenɔ ngɔ nù Moabɛ ma 'danga

¹¹ NWA tɔ́a 'bɔ na: “Yolo do kɛ nu kɔnggɔ Omoabɛ ndua zi nɛ ni, fo mɔ yɛkɛ zi wa bina. Wa nɛ zi mbe kɔlɔ 'duli fala kpo gɔ. Wa dungu zi dungi 'da wa nzee, ɔ nɛ daka dɔ́ kɛ wa yàkà ma gɔ, kɔ gbɛtɛ nɛ dungu nù dɛ go'do kpana i ni. Wa ɔ zi nɛ dɔ́ kɛ wa kìfì ma dɛ kɔ gele kpana gɔ, kɔ ma 'bana do ɛ̃fɛ̃ nɛ, nɛ fala tɛ nɛ 'bana unu do dia nɛ ni.

¹² Nɛ nde mbe tũ kpo, nɛ mi tombo sɛ Owele, takɔ wa gbɛ Omoabɛ, nɛ wa kumu sɛ wa vɛ̃. Wa dɛ sɛ do wa ɔ nɛ kɛ wa a dɔ̃ nù, nɛ wa o sanga kpana olo nɛ kisi kisi ni.

¹³ Kɛmɔsi, gale 'da Omoabɛ, a hã sɛ sape hã wa, ɔ nɛ kɛ gale kɔ le Betɛlɛ, kɛ obe Israɛlɛ wa gbini zi zã wa do a ni, a hã zi sape hã wa ni.

¹⁴ “Aa nɛ, Omoabɛ, kɔdɛ kɛ nɛ wia we tɔ̃ na, lo a onga soda, nɛ lo a Owele bolo ni nɛ nde?

¹⁵ Wi 'danga nùi 'da nɛ tɛ bi lenɔ 'da nɛ, a tɛ gbɛ osaka zagbãlãnɔ 'da nɛ, ɔ nɛ kɛ wa gbɛ do osa'denɔ ni. Mi Nwa, kɛ li mi a NWA ngɔ mɔ nyanga nza vɛ̃ ni, mi tɔ̃a ni.

¹⁶ “Kɔ̃ tũ 'danga nù Moabɛ ma kɔlɔ ia! 'Bako kɔlɔ do Omoabɛ dɔ̃ɔ!

¹⁷ Aa nɛ, owinɔ vɛ̃, kɛ nɛ ɔ kɛ zã nùi 'da Omoabɛ, nɛ nɛ ĩ ti wa de wena ni, nɛ nɛ́ we ɔ do wa olo fionɔ 'da wa. Nɛ nɛ tɔ̃ hã wa na: ‘Ngawi mɔ mbati 'da nɛ ma ia! Ngawi 'da nɛ do dɔ̃lɔ̃ li 'da nɛ, ma 'bànà 'bɔ gɔ.’

¹⁸ “Aa nɛ, Owi kɔ le Diboni, nɛ kùlù ngɔ ngɔ kpongbo dɔ̃lɔ̃ li 'da nɛ, hã nɛ dungu dɛ bulu nù. Mba gɔ, wi 'danga nù Moabɛ tɛ tɛ we bi nɛ. A tɛ gbini gba ngbonɔ 'da nɛ dɛ nù.

¹⁹ Aa nɛ, owi kɔ le Arɔɛrɛ, nɛ yóló dɛ li walanɔ, nɛ nɛ ngɛ'dɛ ma. Nɛ áká owanɔ wa yu mi ni na: ‘Mɛ ma la ni a ge nde?’

²⁰ Nɛ wa gese sɛ na: ‘Nùi 'da Omoabɛ tia dɛ kɔ̃ owi sɛnɛ wa do'do, nɛ wa hã sape hã wa wena. Nɛ hé mɔ, nɛ nɛ mbese owinɔ tɛ nu lì Arnoni na, nù Moabɛ 'danga do'do!’

²¹ “NWA Gale tɛ 'bili ngbangga 'da owinɔ tɛ ngɔ mbɛ nù, do owinɔ kɔ le Holoni, Yahasi, Mefatɛ,

²² Diboni, Nebo, Bɛtɛ-Diblataimɛ,

²³ Kiriataimɛ, Bɛtɛ-Gamulɛ, Bɛtɛ-Meoni,

²⁴ Keriɔtɛ do Bɔsra. Ma kpa sɛ zu winɔ kɔ lenɔ ngɔ nù Moabɛ vɛ̃, kɛnɔ ma kɔlɔ dɔ̃ɔ, do kɛnɔ ma nyɛlɛ ndũu ni.

²⁵ Ngawi 'da Omoabɛ ma ia, nɛ mɔ mbati 'da wa ma sɔkpa. Mi NWA, mi tɔ̃a ni.”

²⁶ NWA tɔ̃a na: “Omoabɛ wa lengge na, wa nɛa ngɔ mi NWA, kɔ nɛ bá bila dɔ̃ɛ kɛ ma dunu do nɔ̃lɔ̃ zã 'da mi gɛ, hã nɛ ísí dɛ nu wa, hã wa nɔ, hã ma ba wa. 'Do nɛ, nɛ wa ɔ̃lɔ̃ sɛ, nɛ wa kimili tɛ wa do ɔ̃lã ni, nɛ winɔ wa mɔmɔ sɛ wa.

²⁷ Aa nɛ, Omoabɛ, ta zu nɛ ila ngɔ kɛ nɛ mɔmɔ zi do obe Israɛlɛ ni nde? 'Da fala kɛ nɛ tɔ̃ zi lɛnggɛ mɔ́ wa, nɛ nɛ yaka zu nɛ ɔ nɛ kɛ nɛ kpa wa tɛ zũ mɔ ni.

²⁸ “Aa nɛ Omoabɛ, nɛ kúlú kɔ lenɔ 'da nɛ, hã nɛ lá dɛ ngɔ tanɔ tɛ zu kalanɔ i, nɛ nɛ dɛ tɔanɔ 'da nɛ dɛ di ni, ɔ nɛ kɛ ogbakulĩnɔ wa dɛ ni.

²⁹ Li Omoabɛ dɔ̃lɔ̃ na, wa a owi dɛ ngatɛ, owi wali, owi gã zu, do owi ba tɛ wi ngɔ ngba wa.

³⁰ Nɛ mi NWA, mi ĩ na, wa zɔ tɛ wa wena. Nɛ nde mɛnɔ wa dɛ ni, ma do gulu nɛ bina.

³¹ Gulu nɛ a mi lengge wa ia, nɛ mi ma ngɔ ga zuma 'bako we wa, nɛ mi zɛ nu mi, nɛ mi he kɔ̃a we owi kɔ le Kirɛ-Herɛsi.

³² Mi ga sɛ 'bɔ zuma 'bako we owi kɔ le Sibma, nɛ ma nɛ sɛ ngɔ kɛ 'da Owi kɔ le Yazɛrɛ. Le Sibma ɔ zi nɛ fɔ vinɔ, kɛ gbakɔ̃ nɛ dulu, nɛ ma kũ ngɔ Ndɔ Fio, nɛ ma nɛ gbaa, nɛ ma to le Yazɛrɛ ni. Nɛ nde ngangga ni, wa gbini sɛ gbakɔ̃ nɛ, nɛ wa 'danga wala nɛ.

³³ Wa zélé 'bɔ zuma yangga 'da Owi kala wala te vinɔ tɛ ngɔ nù Moabɛ gɔ. Fo dɔ̃ kɔ kpananɔ bina, nɛ wi ma 'bɔ wala te vinɔ we kpĩlĩ dɔ̃ nɛ bina. Nɛ fo wi he 'bɔ mɔ yangga bina.

³⁴ “Owi kɔ le Hɛsɛboni wa tɛ ala nu wa, nɛ wa he mɔ nganda wena. Nɛ giti gɛlɛ wa dɔ̃lɔ̃, nɛ ma hɔ gbaa kɔ le Elale, Yahasi, Soarɛ, Horonaimɛ, do Eglatɛ-Sɛlisia. Mba gɔ, lìnɔ ɔ̃sã vɛ̃. Nɛ gɛnɛ kɔ 'de kɔ le Nimrimɛ, nɛ nde ma ɔ̃sɔ̃ 'bɔ do'do.

³⁵ Mi kumu sɛ Omoabɛ, kɛ wa hã dɔnggamɛnɔ hã ogalenɔ 'da wa, tɛ falanɔ wa dɔnggɔ do wa ni. Mi NWA, mi tɔ̃a ni.

³⁶ Gulu nɛ hã mi ga zuma 'bako hã Omoabɛ, do Owi kɔ le Kirɛ-Herɛsi, nɛ kɔ gɛlɛ mi dɔ̃lɔ̃ ɔ nɛ giti kpangge ni. We kɛ mɛnɔ wa kpa zi vɛ̃ ni, ma 'danga do'do.

³⁷ Owinɔ vɛ̃ wa kɛlɛ zu wa, nɛ wa kɛlɛ 'bɔ nzɛlɛ wa. Wa 'bili tɛ kɔ̃ wa liɔ̃ liɔ̃, nɛ wa he'de tulu gɛla.

³⁸ Tɛ nu dinɔ, do tɛ li fandanɔ ngɔ nù Moabɛ vɛ̃, wa zele tati a hia kɔ̃a, we kɛ mi ua sanga Omoabɛ ɔ nɛ kɛ wele o do kpana kɛ a dɛ́ 'bɔ do to gɔ ni.

³⁹ Nɛ gá zuma 'bako na: ‘Omoabɛ wa mbɔkɔ do'do! Sape ba li wa, nɛ wa da li wa zamɔ!’ Owinɔ ngɔ nùnɔ kɛ zã Omoabɛ ni, wa zɔ sɛ Omoabɛ, nɛ wa ɔngbɔ, nɛ wa dɛ 'bako. Mi nwa, mi tɔ̃a ni.”

⁴⁰ NWA tɔ̃a na: “Owele wa tingbi sɛ dɛ ngɔ Omoabɛ, ɔ nɛ kɛ oziki wa tata 'baka wa, nɛ wa bũlũ, nɛ wa tingbi dɛ ngɔ wɔlɔ ni.

⁴¹ Nɛ ole gba ngbonɔ do ogele lenɔ ma te sɛ dɛ kɔ̃ owinɔ ni. Do kɔ̃ tũi ni, nɛ sila onga soda Moabɛ, ma ɔ sɛ ngɔ ngbũu nɛ sila wuko, kɛ a do zɛlɛ kula ni.

⁴² Omoabɛ wa kumu sɛ, nɛ li wa ma bisi sɛ ngɔ nù gɛ, we kɛ wa lingga na, wa nɛa ngɔ mi NWA.

⁴³ “Aa nɛ Omoabɛ, kili ma ba sɛ nɛ, nɛ nɛ yu, nɛ nɛ te kɔ 'du kɔ̃, tabi nɛ ba sɛ bili. Mi NWA, mi tɔ̃a ni.

⁴⁴ Wele kɛ kili ngamɛ ni ba a, hã a yu, nɛ a te sɛ kɔ gba 'du kɔ̃. Nɛ wele kɛ a hɔ nza kɔ kɔ̃ɛ ni, nɛ a ba sɛ bili. Mɛnɔ kɛ ma kpa sɛ Omoabɛ, 'da fala mi hã sɛ etumbui hã wa gɛ a ni.

⁴⁵ “Owanɔ kɛ wa yu ngamɛ, kɔ wa mbɔkɔ do'do ni, nɛ wa fa sɛ fala ɔmɔ tɛ wi kɔ le Hɛsɛboni. Kɔ wa hɔ i mɔ, nɛ gba nyɛa we ma yolo sɛ kɔ tɔa 'da nwa Sihoni, nɛ ma te tɛ le, nɛ ma bɛlɛ wa, Omoabɛ kɛ wa dɛa zi nu we nɛ ge nde ni. Ma bɛlɛ sɛ wa yolo tɛ li ngbalanɔ gbaa we hɔ gbogbo le nga.

⁴⁶ Aa nɛ Omoabɛ, owinɔ 'da gale Kɛmɔsi, 'bako do nɛ! Nɛ kumu ia. Obulu benɔ, do oboko benɔ 'da nɛ wa la kɔlɔ 'duli.”

⁴⁷ Nɛ nde mbe tũ kpo, nɛ nwa a hã sɛ 'bɔ dia dungu hã Omoabɛ. Kɛ gɛ a ndɔti mɛnɔ kɛ NWA tɔ̃a na, ma dɛ sɛ Omoabɛ ni.