Yeremi 47 - WE NU GALE 1995

NWA wila we dɛ ngɔ Ofilisti

¹ Dati kɛ nwa ngɔ nù Ezipeto tɛ bà zi Gaza gɔ ni, nɛ NWA Gale wila we hã mi si ngɔ Ofilisti.

² A na: “Owi sɛnɛ nɛ wa yolo sɛ si gbãlã ngɔ, nɛ wa tɛ sɛ ɔ nɛ gba lì ni, nɛ wa nɛ ngɔ nɛ fɛɔɔ. Nɛ owinɔ wa zɛ sɛ nu wa, nɛ wa he sɛ kɔ̃a do 'bako.

³ Owinɔ wa zele sɛ giti nyanga ombalatanɔ, do giti kolo ongilingilinɔ tɛ yu nɛ, nɛ gbãlã zã wa ma bi sɛ, nɛ zu owi ko be vĩ, nɛ ta zu wa ma ele sɛ ngɔ benɔ 'da wa.

⁴ Mba gɔ, kɔ̃ tũ 'danga lenɔ 'da Ofilisti ma wia ia, nɛ wele kpo 'báná sɛ 'bɔ na, a gala Owi kɔ le Tirɛ do Sidoni gɔ. Mi NWA, mi kumu sɛ tala Ofilisti vɛ̃. Wa a tala owinɔ kɛ wa yula zi tɛ ngolo lì Kaftɔrɛ.

⁵ Owi kɔ le Gaza wa kɛlɛ zu wa, nɛ wa dungu gɛla. Nɛ ngɔ tɛ owi kɔ le Askaloni gɛ̃a kpi kpi kpi. Aa nɛ, otala be zã Anakɛ, nɛ 'bana sɛ 'bili tɛ nɛ, nɛ nɛ dɛ 'bako gbaa soe ki nge nde?

⁶ Nɛ tɛ he mɔ na: ‘Ee, du kɔya 'da NWA, mɔ nɛ ɔmɔ tɛ mɔ soe ki nge nde? Mɔ kpóló tɛ mɔ dɛ li foko, nɛ mɔ 'bana dɛ di ni!’

⁷ Nɛ nde du kɔya ni nɛ dɛ fala ɔmɔ tɛ̃ ɛ nɛ nde? Mi NWA, mi hã to hã ma! Mi ba nu mi hã ma na, ma bi le Askaloni, do owinɔ kɛ wa ɔ nu gba lì ni.”