Yeremi 46 - WE NU GALE 1995

Oezipeto wa tia li bolo tɛ kɔ le Karkemisi

¹ NWA wila we hã mi si ngɔ onu kɔnggɔ winɔ.

² A ndua do Neko, nwa ngɔ nù Ezipeto. Nwa Neko nɛa zi do osodanɔ 'da a tɛ kɔ le Karkemisi, tɛ nu gba lì Efratɛ. Nɛ Nabukɔdɔnɔzɔrɛ, nwa ngɔ nù Babilonia bi wa, nɛ a nɛ ngɔ wa. Mɛ ni dɛa zi tɛ̃ ɛ do kɔ nalɛ sabɛlɛ dɛa to nwa 'da Yoakimɛ, be 'da Yoziasi tɛ ngɔ nù Yuda.

³ Nɛ NWA Gale tɔ̃a hã mi na: “Ogã wi ngɔ osoda Ezipeto wa tɛ he mɔ na: “Nɛ kálá ngelenɔ 'da nɛ, nɛ kálá be kɛnɔ do gã kɛnɔ vɛ̃, hã nɛ la bole!

⁴ Aa nɛ, owi kũ mbalatanɔ, nɛ 'dáfá ombalatanɔ 'da nɛ, nɛ nɛ kũ dɛ ngɔ wa! Nɛ gú ndasanɔ 'da nɛ, nɛ nɛ yóló dɛ 'do ngba nɛ. Nɛ bɛ́ngɛ́ li sɛlɛnɔ 'da nɛ, nɛ nɛ hé'dé tulu mɔ bolo!’

⁵ Kɔ ma dɛa nɛ nde? Ki ni a ge nde? Kili ba osoda Ezipeto do'do, kɔ wa tɛ kpolo tɛ wa 'do. Bole gana onga sodanɔ, hã wele do wele tɛ yu we kpasa kili tɛ̃ ɛ, nɛ fo wi ka mɔ 'do ɛ bina. Falanɔ vɛ̃ mɛ a kili do kili.” NWA Gale tɔ̃a ni.

⁶ Gɛnɛ kɔ wanɔ wa ĩ zi ti yu yu wena ni, wa wè 'bɔ we yu ma gɔ, gɛnɛ kɔ onga wi bolonɔ ngboo, wa wè 'bɔ we kpasa li bole gɔ. Wa hɔa nu gba lì Efratɛ do si gbãlã ngɔ, nɛ wa kɔa zu nyanga wa, nɛ wa te nù.

⁷ Owinɔ kɛ wa tɛa, nɛ wa pɛsa do ngɔ nùi, nɛ wa do ngawi ɔ nɛ hɛ̃a lì Nilɛ ni, wi a wio nde?

⁸ Wi a osoda Ezipeto. Wa ɔ nɛ gba lì Nilɛ do 'da fala kɛ ma dunu kɔ kungba nɛ ni. Nwa ngɔ wa tɔ̃a na: “Lɛ kpa sɛ ngɔ nùi vɛ̃, nɛ lɛ 'danga sɛ lenɔ, nɛ lɛ gbɛ Owi kɔ nɛ.

⁹ Aa nɛ, owi kũ mbalatanɔ, do owi ba ngilingilinɔ, nɛ yú nganda we bi bole! Nɛ, onga wi bolonɔ, nɛ kpé dati! Nɛ, Okusi do Oputɛ, nɛ kálá ngelenɔ dɛ kɔ nɛ, nɛ nɛ, Oludɛ, nɛ máná nzabelenɔ 'da nɛ!

¹⁰ “NWA ngɔ mɔ nyanga nza vɛ̃, a nɛ bili nu gbã hã owi sɛnɛ a. Kɔ tũ nɛ wia ia, a nɛ hã etumbu hã wa. Du kɔya 'da a ma gbɛ sɛ wa, nɛ ma nɔ sɛ tɔkɔ tɛ wa gbaa, nɛ ma we do wɛ. Sɔɛ gɛ, NWA ngɔ mɔ nyanga nza vɛ̃ tɛ gbɛ Owi sɛnɛ a, tɛ nu gba lì Efratɛ do si gbãlã ngɔ.

¹¹ Aa nɛ, Oezipeto, nɛ nɛ́ hã nɛ fá ina tɛ Galadɛ i! Nɛ nde inanɔ ni vɛ̃ ma dɛ́ sɛ mɔ gɔ, fo sɛ ina ɛ̃ daninɔ 'da nɛ bina.

¹² Onu kɔnggɔ winɔ wa zila we sape 'da nɛ, nɛ hia kɔ̃a 'da nɛ kpa zala winɔ vɛ̃. Soda lo li a do ngba a, nɛ wa mba bɔa nɛ, nɛ wa ala nù.”

Nwa Nabukɔdɔnɔzɔrɛ nɛa we bi Oezipeto

¹³ NWA Gale wila we hã mi do 'da fala nwa Nabukɔdɔnɔzɔrɛ nɛa we bi Oezipeto ni na:

¹⁴ “Mɔ tɔ̃́ toe gɛ tɛ kɔ lenɔ tɛ ngɔ nù Ezipeto. Mɔ tɔ̃ ma hã Owi kɔ le Migdɔlɛ, Mɛmfisi do Tapanɛsi na: ‘Nɛ kúlú ngɔ, hã nɛ 'dafa tɛ nɛ we bi bolo, we kɛ owinɔ kɛ zã nɛ gɛ, bole gbɛa wa vɛ̃ ia!

¹⁵ Gulu kɛ Apisi, gale kɛ a zɔ mɔ tɛ nɛ ni, a tia nù we ge nde? We kɛ NWA Gale ili a, nɛ a fi a nù.’

¹⁶ Ogba gili wele wa ala nù, nɛ wa tɔ̃ dɛ sanga tɛ ngba wa na: ‘Lɛ kùlù ngɔ, hã lɛ si dɛ kɔ le 'da lɛ i, lɛ yú du kɔya 'da Owi sɛnɛ lɛ!’

¹⁷ Nɛ é li nwa ngɔ nù Ezipeto na, ‘Wi tɔ̃ gã nu yala iko!’

¹⁸ Mi, NWA ngɔ mɔ nyanga nza vɛ̃, mi a Nwa, nɛ mi a Gale wele kpasi. Wi sɛnɛ nɛ a tɛ sɛ we bi nɛ. A ɔ nɛ kala Tabɔrɛ, kɛ ma ngala nɛa ngɔ kalanɔ vɛ̃ ni. A ɔ nɛ kala Karmɛlɛ ngɔ gba lì ni.

¹⁹ “Aa nɛ, Oezipeto, nɛ kálá mɛnɔ 'da nɛ we la kɔlɔ 'duli. Mba gɔ, le Mɛmfisi ma dɛ sɛ olo tɔa, ma kifi sɛ li go kɛ wele wè we ɔ se'de gɔ ni.

²⁰ Nù Ezipeto ɔ zi nɛ be zɔnga ngɔmbɔ kɛ a gã de wena ni! Nɛ nde ofĩ wa yula si gbãlã ngɔ, kɔ wa tɛa we nyɔngɔ a.

²¹ Wa lɛlɛ zi osodanɔ kɛ wa dɛ to ngɔ nu Ezipeto we mbili ni, ɔ nɛ kɛ wa lɛlɛ do obe ngɔmbɔ ni. Ĩ na, wa yòlò ti bole gɔ, wa yu vɛ̃, nɛ wa si. Ma nɛa we hɔ kɔ̃ tũ ngamɛ do kɔ̃ tũ etumbui mi hã hã wa ni, nɛ wele kpo yòlò dati bole gɔ.

^22-23 Owi sɛnɛ Oezipeto wa nɛa, nɛ wa tingbi dɛ ngɔ wa gbululu. Wa dɛa do wa ɔ nɛ kɛ owi gɔmɔ gua wa kala do kpɛnɛmɔ dɛ ngɔ, nɛ wa gɔmɔ do ogã te dɛ nù ni. Owinɔ ni wa dɛlɛ ɔ nɛ tia odɔla kɛ wa wè tɛ tɔlɔ wa gɔ ni. Nɛ ngɔ gili osodanɔ 'da wa wa dɔndɔ lɛ̃a, ɔ nɛ kɛ gɔ̃ zɔ wele, nɛ a dɔndɔ do ma ni.

²⁴ Oezipeto wa dunu do sape, we kɛ wa tia dɛ kɔ̃ owi sɛnɛ wa, kɛ wa yula si gbãlã ngɔ ni. Mi NWA, mi tɔ̃a ni.”

²⁵ Nwa ngɔ mɔ nyanga nza vɛ̃, Gale 'da obe Israɛlɛ tɔ̃a na: “Mi nɛ hã etumbu hã Amoni, gale kɔ le Tɛbɛsi, mba do tala Oezipeto, do ogalenɔ 'da wa, do Onwanɔ 'da wa vɛ̃. Mi nɛ ba nwa ngɔ nù Ezipeto, mba do owinɔ kɛ wa gbini zã wa do a ni,

²⁶ nɛ mi 'dɔlɔ wa hã winɔ wa kɔ̃a we gbɛ wa ni. Mi 'dɔlɔ sɛ wa hã Nabukɔdɔnɔzɔrɛ, nwa ngɔ nù Babilonia, do osodanɔ 'da a. Nɛ nde do 'do nza, nɛ Oezipeto wa kpolo sɛ tɛ wa dɛ ngɔ nùi 'da wa, nɛ wa ɔ sɛ dɛ di ni, ɔ nɛ kɛ zi dati ni. Mi nwa, mi tɔ̃a ni.”

NWA a kpasa sɛ owinɔ 'da a

²⁷ “Aa nɛ, Oisraɛlɛ, owinɔ 'da mi, nɛ tɛ dɛ̀ kili gɔ, nɛ nɛ tɛ zɛ̀ nu nɛ gɔ. Mba gɔ, mi nɛa we kpasa nɛ tɛ ngɔ nùnɔ nyɛlɛ ndũu ni. Mi nɛa we kpasa obe zã nɛ tɛ ngɔ nù kɛ wa 'dɔlɔ do wa ni. Nɛ, Oisraɛlɛ, nɛ kpa sɛ gɛ̃a dungu, nɛ fo sɛ 'bɔ wi tulu nɛ bina.

²⁸ Nɛ, Oisraɛlɛ, owinɔ 'da mi, nɛ tɛ dɛ̃ kili gɔ, we kɛ mi NWA, mi do nɛ boe. Mi kumu sɛ nu kɔnggɔ winɔ vɛ̃ kɛ mi pɛsɛ zi nɛ dɛ ngɔ nùi 'da wa ni, nɛ nde mi kúmú sɛ nɛ gɔ. Mi hã mɛ gɛ etumbu hã nɛ, nɛ nde mi hã sɛ ma do li zuma nɛ, we kɛ nɛ wè we zɔlɔ ma gɔ. Mi nwa, mi tɔ̃a ni.”