Yeremi 44 - WE NU GALE 1995

NWA tumba Yeremi hã obe Yuda tɛ ngɔ nù Ezipeto

¹ NWA tumba mi do to hã obe Yuda vɛ̃, kɛ wa kulu zi dɛ ngɔ nù Ezipeto i, nɛ wa ɔ kɔ le Migdɔlɛ, Tapanɛsi, Mɛmfisi, do ngɔ 'bili tɛ nù Patrosi ni.

² NWA ngɔ mɔ nyanga nza vɛ̃, Gale 'da obe Israɛlɛ tɔ̃a na: “Nɛ ngboo, nɛ zɔa ngamɛnɔ vɛ̃ kɛ mi tumba dɛ ngɔ le Yeruzalɛmɛ, do ngɔ gele lenɔ tɛ ngɔ nù Yuda ni. Lenɔ ni vɛ̃ ma dɛa olo tɔa gbaa tia do sɔɛ gɛ, nɛ wele kpo wè 'bɔ tɛ ɔ kɔ nɛ gɔ.

³ Mi dɛa ni, we duzu kɛ owinɔ di ni ni, wa dɛa 'dã mɔ, nɛ wa nɔ̃lɔ̃ zã mi. Wa dɔngga ogele gale, nɛ wa dɛa to hã wa. Ĩ na, mɛ a ogale kɛ nɛ, do oyaa nɛ, nɛ ĩ̀ zi ti wa gɔ ni.

⁴ Nɛ mi là fala tombo Owi tonɔ 'da mi we gba olo nu mi hã nɛ gɔ. Mi tombo zi wa hã nɛ, takɔ nɛ la fala dɛ 'dã mɛnɔ, we kɛ mi sɛnɛ ma sɛna.

⁵ Nɛ nde nɛ zèlè we nu mi gɔ, nɛ nɛ gɛ̀ mbe zala nɛ tɛ wenɔ mi tɔ̃a ni gɔ. Nɛ là fala dɔnggɔ ogele galenɔ gɔ.

⁶ Ma kɛ mi sulu dã 'da mi, do gã nɔ̃lɔ̃ zã 'da mi, nɛ ma bele lenɔ tɛ ngɔ nù Yuda, do tɔanɔ kɛ zã walanɔ tɛ kɔ le Yeruzalɛmɛ ni, nɛ ma dɛa olo tɔa vɛ̃. Ma hɔa mɔ a kili tɛ wele, nɛ ma 'bana ní tia do sɔɛ gɛ.

⁷ “Na mɛ ni, mi NWA ngɔ mɔ nyanga nza vɛ̃, Gale 'da nɛ obe Israɛlɛ, mi aka nɛ na, gulu kɛ nɛ hã gã ngamɔ hã kili tɛ nɛ wele nɛ we ge nde? Nɛ kɔ̃a na, be Yuda kpo, wi wili, tabi wuko, tabi be nzɔ be tɛ 'bànà 'bɔ nza gɔ nde? Nɛ kɔ̃a na, nɛ kumu vɛ̃ nde?

⁸ Gulu kɛ nɛ dɔnggɔ osɛa te, nɛ nɛ hã odɔnggamɔ hã ogele gale ngɔ nù Ezipeto, kɛ nɛ kulu dɛ ngɔ nɛ ni we ge nde? Nɛ ĩ̀ na, nɛ dɛ ní, nɛ ma nɔ̃lɔ̃ zã mi wena ni gɔ nde? Nɛ kɔ̃a na, li nɛ mbiti ngɔ nù gɛ, nɛ nɛ hɔ mɔ gbɔlɔ mɔmu li ogele winɔ, nɛ wa sa li nɛ kɔ fɔmba nde?

⁹ Ta zu nɛ ila ngɔ 'dã mɛnɔ vɛ̃ kɛ nɛ, do owukonɔ 'da nɛ, do Onwanɔ 'da nɛ, do Owi olo li wa, nɛ dɛa zi kɔ lenɔ ngɔ nù Yuda, do li walanɔ kɔ le Yeruzalɛmɛ ni nde?

¹⁰ Gbaa tia do sɔɛ gɛ, wi sa tɛ̃ ɛ ngɔ ma bina. Nɛ dɔ́nggɔ́ mi gɔ, nɛ nɛ dɛ́ mbulanɔ kɛ mi ia zi hã nɛ do oyaa nɛ ni gɔ.

¹¹ “Ma kɛ mi NWA ngɔ mɔ nyanga nza vɛ̃, Gale 'da nɛ obe Israɛlɛ, mi tombo sɛ ngamɔ hã nɛ, nɛ mi kumu sɛ nɛ obe Yuda vɛ̃.

¹² Mi hã sɛ etumbu hã tala nɛ obe Yuda, kɛ nɛ kulu dɛ ngɔ nù Ezipeto gɛ ni. Nɛ nɛ vɛ̃, be tabi kpasa wi, nɛ fe sɛ li bolo, tabi do gba wɔ dɛ dɛ. Nɛ kumu sɛ vɛ̃, nɛ nɛ hɔ sɛ mɔ gbɔlɔ mɔmu li ogele winɔ, nɛ wa sa sɛ li nɛ kɔ fɔmba, nɛ nɛ kpa sɛ sape.

¹³ Mi hã sɛ etumbu hã nɛ winɔ kɛ nɛ kulu dɛ ngɔ nù Ezipeto ni, kpasaa ɔ nɛ kɛ mi hã zi hã Owi kɔ le Yeruzalɛmɛ, nɛ wa fia li bolo, tabi do gba wɔ, tabi do 'dã zɛlɛ ni.

¹⁴ Nɛ, obe Yuda kɛ nɛ 'bana nza, nɛ nɛ kulu dɛ ngɔ nù Ezipeto gɛ ni, wele kpo kɔ nɛ 'báná sɛ gɔ, wele kpo yú sɛ gɔ. Nɛ gɛnɛ kɔ nɛ do wɔ wena we kpolo tɛ nɛ dɛ ngɔ nù Yuda i, nɛ nde wele kpo kpóló sɛ tɛ̃ ɛ gɔ, fo tati a ombe winɔ wa yu sɛ li bole ni.”

¹⁵ 'Da fala mi tɔ̃a do wenɔ ni, nɛ nde ogba gili wele wa mba zi ngba wa. Wi zi a obe Yuda kɛ wa ɔ kɔ 'bili te nù Patrosi tɛ Ezipeto ni, fala nɛ kpo do owukonɔ 'da wa. Nɛ́ kɛ owi wilinɔ vɛ̃ wa ĩ na, owukonɔ 'da wa, wa dɔ fũ yɔmbɔ hã ogele galenɔ ni, nɛ wa gese hã mi na:

¹⁶ “Lɛ ĩ na, mɔ tɔ̃ wenɔ ni hã lɛ do zu li NWA, nɛ nde lɛ zélé sɛ we nu mɔ gɔ.

¹⁷ Lɛ dɛ sɛ tati a kɛ lɛ saka we dɛ ma ni. Lɛ dɔ sɛ fũ yɔmbɔ we dɔnggɔ do Astarte, nwa wuke tɛ li nza i ni. Nɛ lɛ hã sɛ 'bɔ dɔnggamɔ dɔ̃ hã a, ɔ nɛ kɛ lɛ, do oyaa lɛ, do Onwanɔ 'da lɛ, do owi olo li wa, lɛ dɛ zi ma tɛ kɔ lenɔ ngɔ nù Yuda, do li walanɔ kɔ le Yeruzalɛmɛ i ni. Mba gɔ, lɛ dɛa zi ni, nɛ lɛ zɔlɔ zi nyɔngɔmɔ gɔ. Lɛ dungu zi dia dungu, nɛ lɛ zɔ̃ zi ngamɔ gɔ.

¹⁸ Nɛ nde yolo do ngba soe kɛ lɛ la fala dɔ fũ yɔmbɛ we dɔnggɔ do a, nɛ lɛ dɔ́nggɔ́ 'bɔ a do dɔ̃ gɔ ni, nɛ lɛ ma ngɔ zɔlɔ nyɔngɔmɔ, nɛ lɛ tɛ fe li bolo, tabi do gba wɔ.”

¹⁹ Nɛ owukonɔ wa 'bɔ na: “Owili lɛ wa ĩ na, lɛ dɔ fũ yɔmbɛ we dɔnggɔ do nwa wuke tɛ li nza i. Nɛ wa ĩ 'bɔ de wena na, lɛ dɛ omukate kɛ wa gɛzɛ hi a tɛ nɛ ni hã a, nɛ lɛ dɔnggɔ 'bɔ a do dɔ̃. Nɛ wa kɔ̃a gɛnɛ nɛ.”

²⁰ Nɛ mi tɔ̃a hã owi wilinɔ do owukonɔ vɛ̃, kɛ wa gisa we hã mi ní ni na:

²¹ “Nɛ lengge na, ta zu nwa ila ngɔ odɔnggamɛnɔ kɛ nɛ do oyaa nɛ, do Onwanɔ 'da nɛ, do Owi olo li wa, do ogã winɔ 'da nɛ, nɛ dɔ zi ma kɔ lenɔ ngɔ nù Yuda, do li walanɔ kɔ le Yeruzalɛmɛ ni nde? Nɛ lengge na, ta zu NWA ngɔ ma bina nde?

²² NWA wè zi 'bɔ we kunu sila a ngɔ 'dã mɛnɔ 'da nɛ, do osɔ̃ dɛa mɛnɔ kɛ nɛ dɛ zi ma ni gɔ. Gulu nɛ hã a dɛa na, nùi 'da nɛ ma 'danga putu putu, nɛ owinɔ 'da nɛ wa kumu, nùi ma kifi olo tɔa, nɛ winɔ wa sa li ma kɔ fɔmba ni.

²³ Ngamɛ nɛ zɔ sɔɛ gɛ, ma yula ngɔ kɛ na, nɛ bɛ̃a zi mbulanɔ 'da NWA, nɛ hã odɔnggamɔ hã ogele gale, nɛ nɛ dɛa 'dã mɔ gbali a ni.”

^24-25 Nɛ mi tɔ̃a 'bɔ hã owi wilinɔ do owukonɔ vɛ̃ na, NWA ngɔ mɔ nyanga nza vɛ̃, Gale 'da obe Israɛlɛ tɔ̃a hã obe Yuda kɛ wa ɔ ngɔ nù Ezipeto gɛ na: “Nɛ do owukonɔ 'da nɛ, nɛ tɔ̃a na, nɛ dɛ sɛ mbuli kɛ nɛ kpua hã Nwa wuke tɛ li nza i ni. Nɛ tɔ̃a 'bɔ na, nɛ dɔ sɛ fũ yɔmbɔ we dɔnggɔ do a, nɛ nɛ dɔnggɔ sɛ a do dɔ̃. Nɛ nɛ dɛa na mɛ ni. Kɔ nɛ dɛ́ wá mbuli nɛ kpua ni iko! Nɛ dɛ́ olo nu nɛ!

²⁶ Nɛ nde nɛ zélé we mi NWA, mi tɔ̃a gɛ. Mi kana tɛ mi do zu li mi wele nɛ na, be Yuda kpo tɛ ngɔ nù Ezipeto káná sɛ 'bɔ tɛ̃ a do zu li mi fala kpo gɔ́. Wele kpo tɔ̃́ sɛ 'bɔ na, ɛ kana tɛ̃ ɛ do zu li NWA Gale, wele kpasi gɔ.

²⁷ Mi dɛ sɛ na, nɛ tɛ kpà dia dungu gɔ, nɛ nde nɛ kpa tati a ngamɔ. Nɛ, obe Yuda kɛ nɛ ɔ ngɔ nù Ezipeto gɛ, nɛ fe sɛ li bolo, tabi do gba wɔ gbaa nɛ nɛ kumu vɛ̃.

²⁸ Tati a ombe kɔ nɛ sĩ, wa kpasa sɛ li bole, do kɔ gba wɛ, nɛ wa yolo sɛ ngɔ nù Ezipeto, nɛ wa si dɛ ngɔ nù Yuda. Nɛ tala obe Yuda kɛ wa 'bana sɛ nza ni, wa zɔ sɛ na, mɛ dɛa gbãlã we, mɛ a olɛnggɛnɔ 'da mi, tabi kɛnɔ 'da nɛ nde.

²⁹ Mi NWA, mi nɛ dɛ mɛ kɛ ma be sɛ hã nɛ na, wi a mi a mi tɛ hã etumbu hã nɛ dɛ fala gɛ ni. Nɛ nɛ ĩ sɛ na, mi tɛ tombo ngamɛ kɛ mi handa zi we tombo hã nɛ ni.

³⁰ Mɛ mi nɛ dɛ nɛ ni, ma kɛ: Mi 'dɔlɔ sɛ Hofra, nwa ngɔ nù Ezipeto hã wanɔ kɛ wa kɔ̃a we gbɛ a ni. Mi dɛ sɛ do a ɔ nɛ kɛ mi dɛa zi do Sedekiasi, nwa ngɔ nù Yuda, kɛ mi 'dɔla zi a hã gã wi sɛnɛ a Nabukɔdɔnɔzɔrɛ, nwa ngɔ nù Babilonia ni. Mi NWA, mi tɔ̃a ni.”