Yeremi 43 - WE NU GALE 1995

Wa ba Yeremi la do a dɛ Ezipeto

¹ Mi wila wenɔ kɛ NWA Gale 'da lɛ tumba mi we tɔ̃ ma hã winɔ ni, kɔ ma nɛa we e nɛ,

² nɛ Azaria, be 'da Hokaya, do Yohananɛ, be 'da Karea, do ogele winɔ vɛ̃ wa dɛa gã zu, nɛ wa tɔ̃ hã mi na: “Mɔ 'bili bɛlɛ iko! NWA Gale 'da lɛ tòmbò mɔ na, mɔ ga lɛ, dɔ lɛ kúlú dɛ ngɔ nù Ezipeto i gɔ ni gɔ.

³ Wi a Barukɛ, be 'da Neria hã a sɔ̃ɛ mɔ dɛ tɛ lɛ. A kɔ̃a sɔ we 'dɔlɔ lɛ hã osoda Babilɔnɛ, takɔ wa gbɛ lɛ, tabi wa si do lɛ kɔlɔ 'duli dɛ 'da wa i.”

⁴ Na mɛ ni, nɛ Yohananɛ, be 'da Karea, do ogã wi ngɔ sodanɔ, do owinɔ vɛ̃, wa kɔ̃̀ zi we zele we nu NWA, kɛ a tɔ̃a hã wa na, wa 'bana dɛ ngɔ nù Yuda ni gɔ.

⁵ Nɛ Yohananɛ do ogã wi ngɔ sodanɔ ni vɛ̃, wa kulu ngɔ, nɛ wa kala owinɔ kɛ wa 'bana ngɔ nù Yuda ni, nɛ wa la do wa dɛ Ezipeto i. Wa la zi 'bɔ mba do owinɔ kɛ wa yula ngɔ nùnɔ wa pɛsɛ zi dɛ tɛ nɛ, nɛ wa kpula tɛ wa dɛ ngɔ nù Yuda nga ni.

⁶ Wi zi a owi wili, owuko, obe, do obe zɔnga benɔ 'da nwa. Wa kala zi 'bɔ owanɔ vɛ̃ kɛ Nɛbuzaradanɛ, gã wi ngɔ owi zɔ mɔ tɛ nwa Nabukɔdɔnɔzɔrɛ la zi wa dɛ kɔ̃ Gɛdalia, be 'da Ahikamɛ, nɛ a 'bɔ a be yaa Safanɛ ni. Nɛ wa ba 'bɔ mi, fala nɛ kpo do Barukɛ, nɛ wa la do lɛ.

⁷ Na mɛ ni, wa bɛ̃a we nu NWA, nɛ wa kulu dɛ ngɔ nù Ezipeto, nɛ wa nɛa gbaa tɛ kɔ le Tapanɛsi.

⁸ Nɛ NWA wila we hã mi tɛ Tapanɛsi i na:

⁹ “Mɔ kálá mbe ogã ta, hã mɔ nɛ, hã mɔ mi ma tɛ nu di, dɔ̃ɔ do nu tɔa 'da nwa tɛ kɔ le Tapanɛsi gɛ. Nɛ mɔ dɛ ma dɛ gbali obe Israɛlɛ.

¹⁰ Mɔ dɛ ní do'do, nɛ mɔ tɔ̃ hã wa na, NWA ngɔ mɔ nyanga nza vɛ̃, Gale 'da obe Israɛlɛ nɛ tombo wi toe 'da a Nabukɔdɔnɔzɔrɛ, nwa ngɔ nu Babilonia tɛ dɛ. Nɛ a e sɛ kpongbo nwa 'da a dɛ ngɔ tanɔ mi mi gɛ, nɛ a zĩ sɛ 'bɔ tɔa tande 'da a dɛ ngɔ ma.

¹¹ Nwa Nabukɔdɔnɔzɔrɛ a tɛ sɛ, nɛ a bi nù Ezipeto, nɛ a 'danga ma vɛ̃. Nɛ kɔ Oezipeto, ombe wa fe sɛ fio tɔa, nɛ ombe nɛ wa la sɛ kɔlɔ 'duli, nɛ ombe nɛ wa fe sɛ fio bolo.

¹² Nɛ a fi sɛ we tɛ tɛmpɛlonɔ 'da ogalenɔ 'da Oezipeto, nɛ a dɔ sɛ ogalenɔ ni, tabi a kala sɛ wa si do wa. A dɔlɔ sɛ mɛnɔ tɛ ngɔ nù Ezipeto 'bɛdɛ 'bɛdɛ, ɔ nɛ kɛ wi zɔ mɔ tɛ bata dɔlɔ do ongbanza tɛ tuli tɛ̃ a ni. 'Do nɛ, nɛ a la sɛ do lɔa tɛ̃ a.

¹³ A gbini sɛ 'bɔ sanga okpikima tanɔ tɛ kɔ le Heliopolisi, nɛ a fi sɛ we tɛ otɛmpɛlonɔ 'da ogale ngɔ nù Ezipeto.”