Yeremi 42 - WE NU GALE 1995

Winɔ wa aka Yeremi na a sambala NWA we wa

¹ Nɛ Yohananɛ, be 'da Karea, do Azaria, be 'da Hokaya, do ogã wi ngɔ sodanɔ vɛ̃, wa mba ngba wa do tala winɔ vɛ̃,

² nɛ wa tɛ, nɛ wa tɔ̃ hã mi na: “Yeremi, mɔ kɔ̃, nɛ mɔ zele lɛ sɛ! Mɔ sámbálá NWA Gale 'da lɛ we duzu lɛ! Mɔ sámbálá we tala lɛ kɛ lɛ 'bana gɛ. Mɔ ĩ na, lɛ dɛlɛ zi wena, nɛ nde ngangga ni, tala lɛ 'bana be sĩ iko.

³ Mɔ sámbálá na, NWA Gale 'da lɛ be wala kɛ lɛ wia we ba ma ni, do mɛ kɛ lɛ wia we dɛ ma ni hã lɛ.”

⁴ Nɛ mi gisa hã wa na: “Ma de wena! Mi sambala sɛ NWA Gale 'da lɛ, ɔ nɛ kɛ nɛ aka ni. 'Do nɛ, nɛ mi tɔ̃ sɛ gisa nu we 'da a hã nɛ. Mi úsú sɛ we kpo do nɛ gɔ.”

⁵ Nɛ wa tɔ̃ 'bɔ hã mi na: “E kɔ NWA do tɛ̃ a ngboo, a dungu temɔɛ kana tɛ wi, kɛ lɛ nɛ kana ma ni. Lɛ kana tɛ lɛ na, lɛ dɛ sɛ mɛnɔ vɛ̃ kɛ NWA Gale 'da lɛ a tɔ̃ sɛ hã mɔ na, lɛ dɛ ni.

⁶ Lɛ dɛ sɛ mbulanɔ vɛ̃, kɛ a nɛ ba nu a hã lɛ na, lɛ dɛ ni. Gɛnɛ kɔ mbulanɔ ni ma de li lɛ, tabi ma dè li lɛ gɔ, nɛ lɛ dɛ sɛ ma. We kɛ mɛ a wenɔ 'da NWA Gale 'da lɛ, kɛ lɛ aka mɔ na, mɔ sambala a we duzu lɛ ni. Kɔ fala kɛ lɛ dɛ olo nu a, nɛ mɛnɔ ma la sɛ do lɛ vɛ̃ do dia nɛ.”

NWA gisa nu sambala 'da Yeremi

⁷ Olo nɛ la tũ 'bu, nɛ nwa gese nu sambala 'da mi.

⁸ Nɛ mi sa mɔ hã Yohananɛ, be 'da Karea, do ogele gã wi ngɔ sodanɔ, do tala owinɔ zi di ni ni vɛ̃, mi là mbamba wele kpo gɔ.

⁹ Nɛ mi tɔ̃ hã wa na: “NWA Gale 'da obe Israɛlɛ, kɛ nɛ tumba zi mi hã a ni tɔ̃a na:

¹⁰ ‘Fala kɛ nɛ kpolo tɛ nɛ dɛ ngɔ nùi 'da nɛ, nɛ nɛ ɔ sɛ li mi ɔ nɛ te li fɔ ni. Mi 'dángá sɛ 'bɔ ma gɔ, nɛ nde mi 'dafa sɛ ma dɛ olo nɛ. Mi zú'dú sɛ 'bɔ ma gɔ, nɛ nde mi mi sɛ ma dɛ olo nɛ. Nɛ mi yulu sɛ nu ngamɛ kɛ mi tumba zi hã nɛ ni nù.

¹¹ Nɛ lá fala dɛ kili nwa ngɔ nù Babilonia. Mi NWA Gale, mi do nɛ boe, nɛ mi kpasa sɛ nɛ ti mbulanɔ 'da a. Mi tɔ̃ 'bɔ hã nɛ na, nɛ tɛ dɛ̀ kili a gɔ.

¹² Mi dɛ sɛ 'bako hã nɛ, nɛ mi dɛ sɛ 'bɔ na, a ĩ 'bako hã nɛ, nɛ a la nɛ, hã nɛ si dɛ ngɔ nùi 'da nɛ. Mi NWA, mi tɔ̃a ni.’ ”

^13-15 Nɛ mi tɔ̃ 'bɔ hã wa na: “Nɛ, owinɔ kɛ nɛ 'bana dɛ ngɔ nù Yuda gɛ, fala kɛ nɛ bɛ̃ we nu NWA Gale 'da nɛ, hã nɛ bɛ̃ we ɔ dɛ ngɔ nùi gɛ, hã nɛ tɔ̃ na: ‘Gɔ, lɛ kɔ̃a we kulu dɛ ngɔ nù Ezipeto i, we duzu kɛ i mɔ, lɛ dungu sɛ do dia nɛ, lɛ zɔ̃ sɛ 'bɔ bolo gɔ, lɛ zélé sɛ 'bɔ giti hiamɔ bolo gɔ, nɛ lɛ fé sɛ wɔ gɔ.’ Kɔ fala kɛ nɛ tɔ̃ ni, nɛ NWA ngɔ mɔ nyanga nza vɛ̃, Gale 'da obe Israɛlɛ, a tɔ̃ sɛ na: ‘Fala kɛ nɛ kɔ̃ we kulu dɛ tɛ ngɔ nù Ezipeto i gbãlã we,

¹⁶ nɛ bole nɛ dɛ kili ma wena ni, ma te sɛ ngɔ nɛ i mɔ. Nɛ gba wɛ kɛ ma hã linggamɛ hã nɛ wena ni, ma ndaka sɛ 'do nɛ, nɛ nɛ fe sɛ dɛ i mɔ.

¹⁷ Owinɔ vɛ̃ kɛ wa kɔ̃a we kulu dɛ ngɔ nù Ezipeto i ni, wa fe sɛ li bolo, tabi do gba wɔ, tabi do 'dã zɛlɛ. Wele kpo sanga wa ni 'báná sɛ nza gɔ, nɛ wele kpo wé sɛ we yu ngamɛ, kɛ mi nɛ tombo dɛ ngɔ wa ni gɔ.’ ”

¹⁸ Nɛ mi tɔ̃a 'bɔ na: “NWA Gale 'da obe Israɛlɛ tɔ̃a na: ‘Mi tumba zi gã nɔ̃lɔ̃ zã 'da mi dɛ ngɔ Owi Yeruzalɛmɛ. Nɛ mi dɛ sɛ 'bɔ do nɛ kpasaa na mɛ ni, fala kɛ nɛ kulu dɛ Ezipeto i ni. Nɛ Owele wa zɔ sɛ nɛ, nɛ wa ɔngbɔ. Nɛ wa sa sɛ li nɛ kɔ fɔmba, nɛ nɛ hɔ sɛ wi sape. Nɛ nɛ zɔ́ sɛ 'bɔ le 'da nɛ fala kpo gɔ!’ ”

¹⁹ Nɛ mi tɔ́a 'bɔ na: “Wi tɔ́a hã nɛ, owinɔ kɛ nɛ 'bana dɛ ngɔ nù Yuda na, nɛ tɛ kùlù dɛ ngɔ nù Ezipeto i gɔ ni, wi a NWA. Ma kɛ sɔɛ gɛ mi mbese 'bɔ nɛ we nɛ ni.

²⁰ Mba gɔ, nɛ dɛa 'dã mɔ. Nɛ aka zi mi na, mi sambala NWA Gale 'da lɛ we nɛ, nɛ nɛ kpua mbulu na, nɛ dɛ sɛ wenɔ kɛ a nɛ tɔ̃ nɛ ni vɛ̃.

²¹ Nɛ nde ngangga ni, mi tɔ̃a wenɔ kɛ NWA Gale 'da lɛ tumba mi we to hã nɛ ni, nɛ nɛ bɛ̃a.

²² Kɔ nɛ ĩ na, nɛ fe sɛ li bolo, tabi do gba wɔ, tabi do 'dã zɛlɛ tɛ ngɔ nùi kɛ nɛ kɔ̃a we kulu dɛ ngɔ nɛ ni.”