Yeremi 41 - WE NU GALE 1995

Ismaɛlɛ gbɛa 'bu wele ngbɛ'dɛ'dɛ

¹ Ma nɛa we la 'do nɛ zɛkɛ sambo, nɛ Ismaɛlɛ, be 'da Nɛtania, nɛ a 'bɔ a be yaa Elisama, a nɛ tɛ 'da Gɛdalia tɛ Mispa i. Ismaɛlɛ zi a wi nu fɛlɛ nwa, nɛ a zi 'bɔ a mbe kpo kɔ ogã winɔ 'da nwa. A kulu zi ngɔ do Owele 'bu, nɛ a la do wa. Kɔ 'da fala kɛ wa tɛ nyɔngɔ mɛ fala nɛ kpo ni,

² nɛ Ismaɛlɛ do owinɔ 'da a 'bu ni wa gbɔtɔ du kɔyanɔ 'da wa, nɛ wa dumu do Gɛdalia, nɛ wa gbɛ a.

³ Ismaɛlɛ gbɛa 'bɔ Oyudanɔ, do osoda Babilɔnɛ kɛ wa zi do Gɛdalia tɛ kɔ tɔa 'da a ni.

⁴ Gɛdalia fia, nɛ ma la tũ bɔa, nɛ nde wele kpo zèlè we nɛ gɔ.

⁵ Nɛ Owele 'bu wa ngbɛ'dɛ'dɛ, wa yula kɔ le Sikɛmɛ, do Silo, do Samaria we nɛ tɛ Yeruzalɛmɛ. Owinɔ ni wa kɛlɛ zi nzɛlɛ wa, nɛ wa he'de ɛ̃a tulu, nɛ wa 'bili tɛ wa do dani bɔ̃ liɔ̃ we be na, wa dungu gɛla. Wa kala zi okpalɛ, do fũ yɔmbɔ, nɛ wa nɛ do ma we dɔnggɔ do Gale tɛ kɔ Tɛmpɛloe 'da a tɛ Yeruzalɛmɛ i. Wa nɛa, nɛ wa kɔlɔ do Mispa,

⁶ nɛ Ismaɛlɛ kulu ngɔ tɛ Mispa do kɔ̃a, nɛ a ma ngɔ gɔnɔ dati wa. A nɛa we kpa wa, nɛ a tɔ̃ hã wa na: “Nɛ kɔ̃, nɛ nɛ tɛ mbe 'da Gɛdalia nga sɛ.”

^7-8 Nɛ wa nɛa, hã wa nɛ hɔ dɛ gbogbo le Mispa i, nɛ Ismaɛlɛ do owinɔ 'da a, wa tɔ̃ hã wa na, lo nɛ gbɛ wa gbɛa. Nɛ ombe 'bu kɔ winɔ ni, wa tɔ̃ hã Ismaɛlɛ na: “Mɔ kɔ̃̀, nɛ mɔ tɛ gbɛ lɛ gɔ! Mba gɔ, lɛ usu nyɔngɔmɔ tɛ kɔ fɔnɔ i. Mɛ a okpalɛ ble, do ɔrzɛ, do nɔ olivɛ, do nɔ gɔlɔ.” Ismaɛlɛ zila ni, nɛ a gbɛ wa gɔ.

⁹ Nɛ a do owinɔ 'da a, wa kala otala wanɔ ni, nɛ wa gbɛ wa, nɛ wa da wɔlɔ wa kɔ kɔ̃ lì, nɛ ma dunu. Kɔ̃ lì ni zi a kɛ nwa Asa zã ma, do 'da fala kɛ a tɛ bi do nwa Basa tɛ ngɔ nù Israɛlɛ ni.

¹⁰ Dɛ 'do nɛ, nɛ Ismaɛlɛ kala obe zɔnga benɔ 'da nwa Sedekiasi, mba do otala winɔ vɛ̃ kɛ Nɛbuzaradanɛ, gã wi ngɔ owi zɔ mɔ tɛ nwa Nabukɔdɔnɔzɔrɛ la zi wa hã Gɛdalia tɛ Mispa i ni, nɛ a kulu ngɔ do wa, nɛ wa la si ngɔ nùi 'da Oamoni.

¹¹ Nɛ Yohananɛ, be 'da Karea, do ogã wi ngɔ sodanɔ vɛ̃, wa zila we 'dã mɛ kɛ Ismaɛlɛ dɛa ni,

¹² nɛ wa kulu ngɔ do osodanɔ 'da wa, nɛ wa ndaka 'do Ismaɛlɛ, nɛ wa kpa a nu ndɔ tɛ Gabaoni.

¹³ Owi bɔlɔkɔnɔ 'da Ismaɛlɛ wa nɛa we zɔ Yohananɛ, do ogã wi ngɔ sodanɔ vɛ̃ ni, nɛ wa dɛ yangga,

¹⁴ nɛ wa gbɔtɔ tɛ wa dɛ 'do, nɛ wa yu dɛ 'da Yohananɛ i.

¹⁵ Kɔ Ismaɛlɛ nɛa we zɔ ni, nɛ a kulu ngɔ do Owele ngbɛ'dɛ'dɛ, nɛ wa yu Yohananɛ, nɛ wa la dɛ 'da Oamoni.

¹⁶ 'Do nɛ, nɛ Yohananɛ do ogã wi ngɔ sodanɔ, wa kala tala winɔ kɛ Ismaɛlɛ kala zi wa do bɔlɔkɛ tɛ Mispa i, 'do kɛ a gbɛa Gɛdalia ni, nɛ wa si do wa. Wa kala zi a: osodanɔ do owukonɔ, do obenɔ do Owi dɛa tonɔ 'da nwa, kɛ wa yula zi do wa tɛ Gabaoni i ni.

^17-18 Wa dɛa kili osoda Babilɔnɛ, we kɛ Ismaɛlɛ gbɛa zi Gɛdalia, kɛ nwa ngɔ nu Babilonia ia zi a do wi fɔmɔ nùi ni. Nɛ wa fa we yu dɛ ngɔ nù Ezipeto. Wa nɛa, nɛ wa hɔ tɛ Kimɛhamɛ dɔ̃ɔ do Bɛtleɛmɛ, nɛ wa ɔmɔ tɛ wa di ni.