Yeremi 40 - WE NU GALE 1995

Yeremi kulu dɛ 'da Gɛdalia tɛ kɔ le Mispa

¹ 'Do kɛ Nɛbuzaradanɛ, gã wi ngɔ Owi zɔ mɔ tɛ nwa Nabukɔdɔnɔzɔrɛ da zi kɔ̃ a tɛ mi tɛ kɔ le Rama i ni, nɛ NWA Gale wila 'bɔ we hã mi Yeremi. Do 'da fala ni, nɛ nde osoda Babilɔnɛ wa ba zi mi, nɛ wa ɛnzɛ kɔ̃ mi do dɔkpɔ, nɛ wa e mi fala nɛ kpo do Owi kɔ le Yeruzalɛmɛ, do Oyuda kɛ wa 'bɔ zi we la kɔlɔ 'duli tɛ ngɔ nù Babilonia i ni.

² Nɛ Nɛbuzaradanɛ ba mi dɛ gele fala, nɛ a tɔ̃ hã mi na: “NWA Gale 'da mɔ tɔ̃ zi we tombo ngamɔ dɛ ngɔ le gɛ,

³ nɛ ngangga ni, a dɛa kɛ a handa zi we dɛ ma ni. Mɛnɔ ma dɛa tɛ̃ ɛ ní, we duzu kɛ owinɔ 'da nɛ wa dɛa 'dã mɔ dɛ 'da NWA, nɛ wa zèlè nu a gɔ.

⁴ Ngangga ni, mi nɛ yala fɛlɛ nu kɔ̃ mɔ, nɛ mi da kɔ̃ mi tɛ mɔ. Kɔ fala kɛ mɔ kɔ̃ we nɛ do mi tɛ Babilɔnɛ i, nɛ nde ma a dia, nɛ mi fɔmɔ sɛ mɔ. Kɔ fala kɛ mɔ kɔ̃ we nɛ i mɔ gɔ, nɛ nde ma dɛ́ mɔ gɔ. Nùi gɛ vɛ̃ ma we duzu mɔ, mɔ sáká le kɛ mɔ kɔ̃a we ɔ se'de ni.”

⁵ Nɛ mi gèsè lɛnggɛ hã a gɔ. Kɔ a nɛa we zɔ ní, nɛ a na: “Fala kɛ mɔ kɔ̃̀ we 'bana do mi gɔ, nɛ mɔ kpolo tɛ mɔ dɛ 'da Gɛdalia, be 'da Ahikamɛ, kɛ a a be yaa Safanɛ ni. Nwa ngɔ nù Babilonia ia a do wi fɔmɔ lenɔ tɛ ngɔ nù Yuda. Mɔ wia we 'bana do a dɛ sanga Oyuda, tabi mɔ wia we nɛ tɛ fala kɛ zã mɔ kɔ̃a ni.” A tɔ̃a ni do'do, nɛ a hã nyɔngɔmɔ hã mi, nɛ a 'dɔlɔ 'bɔ odia mɔ hã mi, nɛ a hã wala hã mi na, mi la.

⁶ Ma kɛ mi kulu dɛ 'da Gɛdalia tɛ kɔ le Mispa i, nɛ mi ɔ dɛ sanga Oyuda kɛ wa 'bana dɛ ngɔ nùi 'da wa ni.

Oyuda wa ngɛmɛ ngba wa dɛ kɛ zã Gɛdalia

⁷ Ombe kɔ gã wi ngɔ osoda Yuda do osodanɔ 'da wa, wa ha zi tɛ wa hã osoda Babilɔnɛ gɔ. Kɔ wa nɛa we zele na, nwa ngɔ nù Babilonia ia Gɛdalia, be 'da Ahikamɛ, do wi fɔmɔ lenɔ tɛ ngɔ nù Yuda, mba do Owi sãnɔ vɛ̃ kɛ wa 'bana di ni ni,

⁸ nɛ wa kulu ngɔ do owinɔ 'da wa, nɛ wa nɛ 'da Gɛdalia tɛ Mispa i. Winɔ ni zi a: Ismaɛlɛ, be 'da Nɛtania, Yohananɛ do Yonatanɛ, benɔ 'da Karea, Sɛraya, be 'da Tanɛhumɛtɛ, do obenɔ 'da Ɛfai, wi kɔ le Nɛtofa, do Yazania wi Maka.

⁹ Wa hɔa i mɔ, nɛ Gɛdalia tɔ̃ hã wa na: “Nɛ tɛ dɛ̃ kili hã tɛ nɛ hã osoda Babilɔnɛ gɔ. Nɛ 'báná dɛ ngɔ nùi 'da nɛ, nɛ nɛ dɛ̃ mbulanɔ 'da nwa ngɔ nù Babilonia. Mi tɔ̃ hã nɛ do gbãlã we na, nɛ dɛ ní, nɛ nɛ dungu sɛ do dia nɛ.

¹⁰ Kɛ 'da mi, mi 'bana sɛ dɛ Mispa gɛ, nɛ mi sɛ a wi sanga nɛ do Obabilɔnɛ. Nɛ nde nɛ, nɛ nɛ́ kɔ fɔnɔ i, nɛ nɛ 'bí wala te vinɔ, do figɛ, do olivɛ, nɛ nɛ nyɔngɔ, nɛ nɛ e mbe ngɔ we nyɔngɔ do 'do, nɛ nɛ 'báná dɛ kɔ lenɔ 'da nɛ.”

¹¹ Do 'da fala ni, nɛ obe Yuda kɛ wa ɔ zi tɛ 'da Omoabɛ, Oamoni, Oedɔmɛ, do kɔ ogele lenɔ ni, wa zila na, nwa ngɔ nù Babilonia la mbe owinɔ dɛ ngɔ nù Yuda, nɛ a ia Gɛdalia do wi fɔmɔ wa.

¹² Ma kɛ Oyudanɔ ni wa yula tɛ falanɔ kpi do kpi, kɛ wa pɛsɛ zi nɛ ni, nɛ wa kpolo tɛ wa, nɛ wa nɛ 'da Gɛdalia tɛ kɔ le Mispa i, nɛ wa dɛ tɔanɔ 'da wa dɛ di ni. Nɛ wa kpa ogba dɔa owala te vinɔ, do ogele wala te tɛ li fɔnɔ.

Ismaɛlɛ gbɛa Gɛdalia

¹³ Mbe ngba soe kpo, nɛ Yohananɛ, be 'da Karea, do ogele gã wi ngɔ osoda Yuda, kɛ wa ha zi tɛ wa hã Obabilɔnɛ gɔ ni, wa kulu ngɔ, nɛ wa nɛ 'da Gɛdalia tɛ Mispa i,

¹⁴ nɛ wa tɔ̃ hã a na: “Mɔ ĩ na Balisi, nwa 'da Oamoni tumba Ismaɛlɛ we gbɛ mɔ.” Nɛ nde Gɛdalia kɔ̃̀ zi we zele wa gɔ.

¹⁵ Nɛ Yohananɛ tɔ̃a hã a do usu nɛ na: “Mɔ kɔ̃, nɛ mɔ hã wala hã mi, hã mi nɛ we gbɛ Ismaɛlɛ, nɛ wele kpo ĩ sɛ fala nɛ gɔ. Gulu kɛ mɔ kɔ̃a na, a gbɛ mɔ we ge nde? Fala kɛ a gbɛ mɔ, nɛ ma dɛ sɛ na, Oyudanɔ kɛ wa ngɛmɛ ngba wa dɛ kɛ zã mɔ gɛ, wa vɛ̃ wa pɛsɛ. Nɛ ki ni ma hã sɛ 'bɔ ngamɔ hã owinɔ vɛ̃ kɛ wa 'bana ngɔ nù Yuda gɛ.”

¹⁶ Nɛ nde Gɛdalia gisa na: “Mɔ tɛ dɛ̃ ni gɔ! Wenɔ kɛ mɔ tɔ̃ do zu li Ismaɛlɛ gɛ, mɛ a bɛlɛ iko!”