Yeremi 4 - WE NU GALE 1995

NWA kɔ̃a na obe Israɛlɛ wa kifi sila wa

¹ NWA tɔ̃a na: “Nɛ, obe Israɛlɛ, fala kɛ nɛ kɔ̃ we kpolo tɛ nɛ 'da mi, nɛ nɛ kpolo tɛ nɛ. Fala kɛ nɛ fo okpikimanɔ ngɔ li mi do'do, nɛ nde nɛ yɛ́nggɛ́ sɛ 'bɔ nde nde gɔ.

² Fala kɛ nɛ kana tɛ nɛ do zu li mi, kɔ nɛ hɔ wi bɔlɔ zu, do wi tɔ̃ gbãlã we, do wi dɛ olo nu mi, nɛ ogele winɔ wa zɔ sɛ ni, nɛ wa aka mi na, mi wele nu mi tɛ wa, nɛ wa dɔnggɔ sɛ tɛ wa do mi.”

³ Nɛ NWA tɔ̃a 'bɔ hã owi ngɔ nù Yuda, do owi kɔ le Yeruzalɛmɛ na: “Nɛ kpóló dɛa to tɛ nɛ, nɛ nɛ fó 'dã linggamɔ kɔ sila nɛ, ɔ nɛ kɛ wa fo do 'dã wɔkɔsɔ kɔ fɔ dati mi kpalɛ ni.

⁴ Nɛ, owi ngɔ nù Yuda, do Owi kɔ le Yeruzalɛmɛ, nɛ 'dáfá gba tɔkɛ 'da nɛ do mi, nwa 'da nɛ, nɛ nɛ ha tɛ nɛ hã mi. Ní gɔ, nɛ nɔ̃lɔ̃ zã 'da mi ma za'da sɛ nɛ́ nyɛa we ni, nɛ ma bɛlɛ mɛnɔ vɛ̃, we duzu 'dã mɛnɔ nɛ dɛa ni, nɛ wele kpo wé sɛ we bi ma gɔ.”

Ogele winɔ wa bi Oyuda

⁵ Nɛ dámá mbala, nɛ ma wele kpa ngɔ nùi vɛ̃! Nɛ hé mɔ do nga gɛlɛ, nɛ nɛ mbese na, bolo boe! Nɛ tɔ̃́ hã Owi ngɔ nù Yuda, do owi kɔ le Yeruzalɛmɛ na, wa yú, hã wa usu tɛ wa kɔ lenɔ kɛ gba ngbo zĩ ma takpa ni.

⁶ Nɛ bá bɛndɛlɛ dɛ ngɔ, nɛ nɛ bé do wala ngɔ kala Sioni! Nɛ yú, hã nɛ usu tɛ nɛ! Nɛ da dɛ kɔ wele 'báná dɛ kpo fala gɔ! We kɛ nwa nɛ tombo ngamɔ, kɛ nɛ kpà mbe kuti nɛ gɔ ni hã nɛ. Ngamɛ ni ma yolo sɛ si gbãlã ngɔ, nɛ ma 'danga sɛ nùi 'da nɛ vɛ̃.

⁷ Wi 'danga nùnɔ, a kulu ngɔ ia, kɔ a tɛ tɛ ma. A ɔ nɛ gbɔgbɔ kɛ a hɔa nza tɛ fala ɔi 'da a ni. A tɛ we 'danga nù Yuda. A fi sɛ we tɛ lenɔ 'da nɛ, nɛ wele 'báná sɛ 'bɔ kɔ nɛ gɔ.

⁸ We duzu ma, nɛ hé'dé tulu gɛla, nɛ á kɔ̃ nɛ zu nɛ, nɛ nɛ hé kɔ̃a 'bako. We kɛ NWA Gale, a là fala nɔ̃lɔ̃ zã 'da a dɛ tɛ nɛ, Oyuda gɔ.

⁹ NWA Gale tɔ̃a na: “Do kɔ̃ tũi ni, nɛ ngawi 'da nwa 'da nɛ, do Owi olo li a ma e sɛ. Onganganɔ wa dɛ sɛ kili, nɛ zu Owi gba olo nu mi Gale ma vĩ sɛ.”

¹⁰ Ma kɛ mi Yeremi, mi tɔ̃a na: “Aa NWA Gale, gulu kɛ mɔ ɔkɔlɔ li Owi kɔ le Yeruzalɛmɛ we ge nde? Mɔ tɔ̃a zi na, wa kpa sɛ dungu fio, kɔ mɔ zɔ, wa 'bɔ́ fio iko!”

¹¹ Do fala nɛ ni, nɛ owi kɔ le Yeruzalɛmɛ wa zele sɛ NWA tɛ tɔ̃ na: “Owi sɛnɛ nɛ wa tɛ tɛ ma. Wa ɔ nɛ bawe bũ, kɛ ma yula li gba zɔ̃ i, kɔ ma tɛ dɛ ngɔ nɛ ni. Mɛ a be sele bũ, ɔ nɛ kɛ ma dɛ, nɛ wa pɛpɛ do tɛ kpalɛ ni gɔ.

¹² Mɛ a gba bũ kamba, ma yolo si li gba zɔ̃ i, nɛ ma fi. Mi NWA, mi tɛ sɛ we 'bili ngbangga 'da owinɔ 'da mi.”

Owi sɛnɛ obe Yuda wa linggi wa

¹³ Owinɔ wa tɔ̃a na: “Nɛ zɔ́, Owi sɛnɛ lɛ wa tɛ tɛ ma. Wa tũ li wala ɔ nɛ lĩ kolo ni. Ongilingilinɔ 'da wa ma yu ɔ nɛ gba bũ ni, nɛ ombalatanɔ 'da wa, wa yu nɛa ngɔ ziki. Ma ia wá do lɛ ia, lɛ fia ia!”

¹⁴ Nɛ, owi kɔ le Yeruzalɛmɛ, nɛ kɔ̃ we kpasa ma, nɛ nɛ bɛ̃ gɛnɛ 'dã mɛnɔ 'da nɛ vɛ̃. Nɛ la sɛ fala lengge 'dã linggamɔ soe ki nge nde?

¹⁵ Nɛ zélé, owi nɛ to wa yula tɛ kɔ le Danɛ, do tɛ ngɔ kalanɔ tɛ Efraimɛ, kɔ wa tɛa do 'dã sako.

¹⁶ Wa tɛa we mbese owi kɔ le Yeruzalɛmɛ, do winɔ vɛ̃ na, owi sɛnɛ wa, wa yula ndũu, kɔ wa tɛ tɛ ma. Wa he hiamɔ bolo, nɛ wa tɛ we bi olenɔ ngɔ nù Yuda.

¹⁷ Nɛ wa linggi sɛ le Yeruzalɛmɛ, ɔ nɛ Owi zɔ mɔ tɛ kpalɛ li fɔ wa linggi ma we 'bɔ onɔɛ ni. Nɛ nwa tɔ̃a na: “Ki ni a si olo bɛ̃a we kɛ owi kɔ le Yeruzalɛmɛ wa bɛ̃a nu mi ni.”

¹⁸ Nɛ, owi kɔ le Yeruzalɛmɛ, mɛ ma kpa nɛ gɛ, mɛ a si olo 'dã dɛa to tɛ nɛ, do 'dã mɛnɔ nɛ dɛa ni. Nɛ ngamɛ ni ma zɛlɛ tɛ nɛ, nɛ ma ba nɛ ɔ nɛ kpili ni.

Sila Yeremi zɛla we ngamɛ ma kpa sɛ owinɔ 'da a ni

¹⁹ Ee, kɔ zã mi zɛ zɛla! Mi tɛ bi do ngamɔ, nɛ sila mi to ɔ nɛ ma nɛ gɔ gɔna ni. Mi wè we dungu fio gɔ. Mi wè we kpe nu mi gɔ. We kɛ mi zila giti mɔtũlũ, do hiamɔ bolo.

²⁰ Mɛ a ngamɔ dɛ 'do ngbɛ ɛ do 'do ngbɛ ɛ, nɛ nùi ma 'danga vɛ̃. Tɔa tandenɔ 'da lɛ ma tia do ti, nɛ otulu nɛ ma ɛ̃a sikili sikili.

²¹ Mi nɛ zɔ bɛndɛlɛ bolonɔ gɛ, nɛ mi zele giti mɔtũlũnɔ fai nde?

²² NWA tɔ̃a na: “Owinɔ 'da mi, wa a oyɔnda wi, we kɛ wa ĩ̀ ti mi gɔ. Wa a obe kɛ wa zɔlɔ hã zã, nɛ wa ĩ̀ ti mɔ gɔ. Mɛ wa ĩ ti nɛ a dɛ 'dã mɔ iko. Nɛ nde we dɛ dia mɔ, wa ĩ̀ ti mɔ kpo kɔ nɛ gɔ.”

Yeremi zɔa ngamɛ ma hɔ sɛ ni do li yalɛ

²³ Mi zɔa nùi, nɛ nde mɛ a olo tɔa iko. Kɔ mi nɛ ka mɔ li nza i, nɛ nde fo 'bɔ nyɛa we bina.

²⁴ Mi zɔa okalanɔ, ma tana, nɛ ma gbɛsɛ dɛ nù.

²⁵ Mi zɔa, nɛ nde fo 'bɔ Owele bina, nɛ onɔɛnɔ wa bũlũ vɛ̃.

²⁶ Nɛ mi zɔa nùi, kɛ ma ko zi kpalɛ wena ni, nɛ nde ma hɔa li gba zɔ̃ do'do. Nɛ lenɔ vɛ̃ ma kifi bili tɔa. Ngamɛnɔ ni wi dɛa ma, wi a NWA, we kɛ zã a nɔ̃lɔ̃ zi wena.

²⁷ NWA tɔ̃a na: “Nùi vɛ̃ ma kifi sɛ li gba zɔ̃, nɛ nde ɛ 'dángá sɛ mɛnɔ vɛ̃ gɔ.

²⁸ Gulu nɛ a, nùi ma dungu gɛla, nɛ li nza ma tũ ni. Mi tɔ̃a ia, mi kpóló sɛ 'bɔ nu mi gɔ, nɛ mi sí sɛ 'bɔ 'do gɔ.”

²⁹ Giti ongilingilinɔ, do Owi da nzabelenɔ nɛa we dɔ̃lɔ̃ nɛ, nɛ owi kɔ lenɔ vɛ̃ wa yu. Ombe wa yu, nɛ wa le kɔ ta, nɛ ombee nɛ wa yu, nɛ wa kũ ngɔ okpangba tanɔ. Lenɔ vɛ̃ ma dɛa olo tɔa, nɛ mbé wele 'bɔ kɔ nɛ bina.

³⁰ Le Yeruzalɛmɛ ɔ nɛ wuko kɛ a hi'da fila tulu, do omɔ mbali, nɛ a kɔ tũ tili li a, we gɔnɔ sila Owi wilinɔ ni. Nɛ nde a 'dafa tɛ̃ a do yala iko. We kɛ owinɔ wa kɔ̃a zi gɛnɛ a ni, wa bɛ̃a 'bɔ a do'do, nɛ wa fa we gbɛ a iko.

³¹ Mi zila hiamɔ, ɔ nɛ hiamɔ gɛlɛ wuko kɛ a do zɛlɛ kula ni. Mi zila hiamɔ, ɔ nɛ hiamɔ gɛlɛ wuko kɛ a nɛ ko kuti kula ni. Ĩ na, mɛ a wala gɛlɛ Sioni, a tata kɔ̃ a, nɛ a tɛ he mɔ do ala nu na: “Mi fia do'do, mi 'bànà gɔ, wa tɛa we gbɛ mi!”