Yeremi 39 - WE NU GALE 1995

Osoda Babilɔnɛ wa ba le Yeruzalɛmɛ

¹ Sedekiasi dɛa to nwa 'da a ngɔ nù Yuda sabɛlɛ kusi, nɛ do zɛkɛ 'da 'bu, nɛ Nabukɔdɔnɔzɔrɛ, nwa ngɔ nù Babilonia kulu ngɔ do osodanɔ 'da a vɛ̃, nɛ wa tɛ, nɛ wa linggi le Yeruzalɛmɛ.

² Kɔ ma nɛa we hɔ kɔ̃ zɛkɛ kusi, zɛkɛ 'da nalɛ, tɛ kɔ sabɛlɛ kɛ 'bu ngɔ nɛ kpo, kɔ dɛa to nwa 'da Sedekiasi tɛ ngɔ nù Yuda ni, nɛ osoda Babilɔnɛ wa gbo li holo zã ngboe.

³ Nɛ ogã wi ngɔ osoda Babilɔnɛ vɛ̃ wa lia kɔ le, nɛ wa nɛ, nɛ wa yolo tɛ nu ngbo kɛ wa sa li nɛ na: “Nu ngbo kɛ gbogbo.” Winɔ ni zi a: Nɛrgalɛ-Sarɛsɛrɛ, gã wi ngɔ osodanɔ vɛ̃, do Samgarɛ-Nɛbo, do Sarɛ-Sɛkimɛ, wi ngɔ dɛa tonɔ 'da nwa, do tala gele ogã wi ngɔ osoda Babilɔnɛ vɛ̃.

⁴ Kɔ nwa Sedekiasi, do osodanɔ 'da a vɛ̃, wa nɛa we zɔ ní, nɛ wa fa we hɔ nza kɔ le do tũ. Wa ba do wala fɔɛ 'da nwa, nɛ wa la do nu ngbo kɛ ma tɛ ngbala gba ngbonɔ bɔa ni, nɛ wa yu si wala gbangɔlɔ̃ Yɔrdanɛ.

⁵ Nɛ osoda Babilɔnɛ wa ndaka 'do wa, nɛ wa kpa nwa Sedekiasi tɛ ngɔ mbɛ nù dɔ̃ɔ do Yeriko. Nɛ wa ba a, nɛ wa kã a hã nwa Nabukɔdɔnɔzɔrɛ. 'Da fala ni, nɛ nde nwa Nabukɔdɔnɔzɔrɛ zi tɛ kɔ le Ribla, tɛ ngɔ nù Hamatɛ, nɛ a 'bili ngbangga 'da nwa Sedekiasi dɛ di ni.

⁶ A ba nu a, nɛ wa 'bili gɛlɛ obulu benɔ 'da Sedekiasi dɛ gbali baa wa ni. Nɛ wa 'bili 'bɔ gɛlɛ okpasa winɔ tɛ ngɔ nù Yuda vɛ̃.

⁷ Dɛ 'do nɛ, nɛ a ba nu a, nɛ wa 'dɔ gbali Sedekiasi, nɛ wa ɛnzɛ a kiti kiti, nɛ wa la do a si tɛ Babilɔnɛ.

⁸ Do kpo 'da fala ni, nɛ osoda Babilɔnɛ, wa fi we tɛ tɔa 'da nwa Sedekiasi, do otɔanɔ 'da winɔ, nɛ wa gbini ongbo nu le Yeruzalɛmɛ dɛ nù.

⁹ 'Do nɛ, nɛ Nɛbuzaradanɛ, gã wi ngɔ Owi zɔ mɔ tɛ nwa Nabukɔdɔnɔzɔrɛ, a kala owinɔ vɛ̃ kɛ wa 'bana zi dɛ kɔ le ni, do owanɔ wa hã zi tɛ wa hã Owi Babilɔnɛ, mba do Owi dɛ si'bili dɛa to kɔ̃ winɔ, nɛ a tombo wa kɔlɔ 'duli dɛ Babilɔnɛ.

¹⁰ Nɛ a la tɛ ngɔ nù Yuda tati a Owi sãnɔ, kɛ wa zi do mɔ kpo bina ni, nɛ a kɛ̃ ofɔnɔ hã wa.

Wa da kɔ̃ wa tɛ Yeremi

¹¹ Nwa Nabukɔdɔnɔzɔrɛ ba zi nu a hã Nɛbuzaradanɛ, gã wi ngɔ Owi zɔ mɔ tɛ̃ a na:

¹² “Mɔ nɛ́, hã mɔ kpa Yeremi, nɛ mɔ 'dafa fala a. Mɔ tɛ zɛ̀lɛ̀ tɛ̃ a gɔ, nɛ mɔ dɛ́ kɛ vɛ̃ a kɔ̃a na mɔ dɛ ni.”

¹³ Ma kɛ Nɛbuzaradanɛ, fala nɛ kpo do Nɛbusazabanɛ, wi ngɔ dɛa tonɔ 'da nwa, do Nɛrgalɛ-Sarɛsɛrɛ, gã wi ngɔ osodanɔ vɛ̃, do tala gele ogã wi ngɔ soda Babilɔnɛ,

¹⁴ wa tumba wele we sa mɔ hã mi tɛ kɔ ngbo 'da Owi zɔ mɔ tɛ tɔa 'da nwa Sedekiasi. Nɛ wa ia mi dɛ kɔ̃ Gɛdalia, be 'da Ahikamɛ, do be yaa Safanɛ na, a kã mi dɛ nu tɔa 'da mi. Nɛ mi si wá dɛ sanga owinɔ.

NWA Gale tumba to hã Ebɛdɛ-Melɛkɛ

¹⁵ Do 'da fala zi mi 'bana kɔ bɔlɔkɔ tɛ kɔ ngbo 'da Owi zɔ mɔ tɛ tɔa 'da nwa Sedekiasi i ni, nɛ NWA Gale tɔ̃a hã mi na,

¹⁶ mi tɔ̃ hã Ebɛdɛ-Melɛkɛ wi Etiopi na: “We mi NWA ngɔ mɔ nganga nza vɛ̃, Gale 'da obe Israɛlɛ, mi tɔ̃a zi dɛ ngɔ le gɛ ni, ma dɛ sɛ tɛ̃ ɛ. Fo sɛ 'bɔ dia dungu bina. Mɛ sɛ tati a ngamɔ do zɛlɛ tɛ iko. Nɛ 'da fala ni, nɛ mɔ zɔ sɛ ma do li mɔ.

¹⁷ Nɛ nde mi NWA, mi fɔmɔ sɛ mɔ, nɛ mɔ té sɛ dɛ kɔ̃ owinɔ mɔ dɛ kili wa ni gɔ.

¹⁸ Mi kpasa sɛ mɔ kɔ fio, nɛ mɔ 'bana sɛ do ba tɛ mɔ. Mba gɔ, mɔ gbini zã mɔ do mi. Mi NWA, mi tɔ̃a ni.”