Yeremi 38 - WE NU GALE 1995

Wa fí Yeremi kɔ kɔ̃ lì

¹ Sɛfatia be 'da Matanɛ, do Gɛdalia, be 'da Pasɛhurɛ, do Yukalɛ, be 'da Selemia, do Pasɛhurɛ, be 'da Malkia, wa zila na mi 'bana tɛ wele we do winɔ fai.

² Nɛ mi tɔ̃ olo nu nwa na: “Wi kɛ a 'bana sɛ dɛ kɔ le gɛ ni, a fe sɛ li bolo, tabi do gba wɔ, tabi do 'dã zɛlɛ. Nɛ nde wi kɛ a hɔ sɛ nza kɔ le we hã tɛ̃ a hã osoda Babilɔnɛ ni, wa gbɛ́ sɛ a gɔ, a 'bana sɛ do tunu li a.”

³ Nɛ mi 'bɔ na, nwa tɔ̃a na: “Mi 'dɔlɔ sɛ le gɛ hã osoda Babilɔnɛ na, wa ba ma.”

⁴ Ogã wi ti nu nwa Sedekiasi, wa nɛa we zele ní, nɛ wa nɛ, nɛ wa tɔ̃ hã a na: “Yeremi wia do fio. Mba gɔ, wenɔ a tɔ̃ gɛ, ma 'danga linggamɔ zu osodanɔ, do owinɔ kɔ le gɛ 'danga. A gálá winɔ gɔ, a fa gɛ we gã 'da zɛlɛ tɛ 'da wa iko.”

⁵ Nɛ nwa gese hã wa na: “Ma a dia, nɛ dɛ do a ɔ nɛ kɛ zã nɛ kɔ̃a ni, mi wè we ga nɛ gɔ.”

⁶ Ma kɛ wa ba mi, nɛ wa fi mi kɔ kɔ̃ lì 'da Malkia, be 'da nwa. Kɔ̃ lì ni, ma zi dɛ tɛ li fanda 'da owi zɔ mɔ tɛ tɔa 'da nwa. Wa kpua fɛlɛ 'baka mi, nɛ wa zumu mi dɛ kɔ kɔ̃ i. Lì zi kɔ nɛ bina, mɛ zi kɔ nɛ tati a 'bɛ̃tɛ̃ iko, nɛ mi lia dɛ kɔ nɛ.

⁷ Nɛ nde mbe wi Etiopi kpo, li a a Ebɛdɛ-Melɛkɛ, a dɛ zi toe kɔ ngboe 'da nwa. Nɛ a zila na, wa ba mi, nɛ wa fi mi kɔ kɔ̃ lì. Kɔ a nɛa we zɔ na, nwa tɛ yolo dɛ nu ngboe 'da Bɛnzamɛ ni,

⁸ nɛ a nɛ, nɛ a tɔ̃ hã a na:

⁹ “Aa nwa, mɛ kɛ winɔ gɛ wa dɛa ni, ma dè gɔ. Wa ba Yeremi, nɛ wa fi a kɔ kɔ̃ lì. Nɛ lɛ ĩ na, a fe sɛ wɛ iko, tua kɛ fo 'bɔ nyɔngɔmɔ le gɛ bina.”

¹⁰ Nɛ nwa ba nu a hã Ebɛdɛ-Melɛkɛ na, a kala Owele talɛ, hã a nɛ do wa, hã wa gbɔtɔ mi dɛ nza na, da dɛ kɔ mi fé gɔ.

¹¹ Ebɛdɛ-Melɛkɛ kala owinɔ talɛ ni, nɛ a nɛ do wa kɔ tɔa kɛ wa usu do mɛnɔ 'da nwa ni. Nɛ a kala ɛ̃a tulunɔ do ã kɛnɔ, nɛ a nɛ do ma, nɛ a kpo ma nu fɛlɛ, nɛ a zumu ma hã mi dɛ kɔ kɔ̃ i.

¹² Nɛ a tɔ̃ hã mi na, mi e ɛ̃a tulunɔ ni ti 'baka mi, nɛ mi fi fɛlɛ do ngɔ nɛ. Mi dɛa ni do'do,

¹³ nɛ wa gbɔtɔ mi kɔ kɔ̃ɛ dɛ nza. 'Do nɛ, nɛ mi 'bana dɛ kɔ ngbo 'da Owi zɔ mɔ tɛ tɔa 'da nwa.

Nwa Sedekiasi aka 'bɔ Yeremi ngɔ linggamɛ 'da a

¹⁴ Mbe ngba soe kpo, nɛ nwa Sedekiasi sa mɔ hã mi dɛ nu tɔa Tɛmpɛlo i, a zi tɛ nu tɔa kɛ talɛ. Nɛ a tɔ̃ hã mi na: “Mi nɛ aka mɔ do we kpo, kɔ mi kɔ̃a na, mɔ gese nu nɛ hã mi do ngbongbo nɛ.”

¹⁵ Nɛ mi gisa hã a na: “Fala kɛ mi tɔ̃ gbãlã we hã mɔ, nɛ mɔ gbɛ sɛ mi. Kɔ fala kɛ mi tɔ̃ 'bɔ mbula hã mɔ, nɛ nde mɔ lénggé sɛ do ma gɔ.”

¹⁶ Nɛ nwa Sedekiasi gese hã mi do usu nɛ na: “Do zu li Gale wele kpasi, kɛ a hã kpasi hã lɛ gɛ, mi kana tɛ mi na, mi gbɛ́ sɛ mɔ gɔ, nɛ mi 'dɔ́lɔ́ sɛ 'bɔ mɔ hã winɔ kɛ wa kɔ̃a we gbɛ mɔ ni gɔ.”

¹⁷ Ma kɛ mi tɔ̃a hã Sedekiasi na, nwa ngɔ mɔ nyanga nza vɛ̃, Gale 'da obe Israɛlɛ tɔ̃a hã a na: “Fala kɛ mɔ hã tɛ mɔ hã ogã wi ngɔ osoda Babilɔnɛ, nɛ mɔ kpasa sɛ, nɛ wa fí sɛ we tɛ le gɛ gɔ. Nɛ mɔ do onu fɛlɛ kula 'da mɔ, nɛ kpasa sɛ.

¹⁸ Kɔ fala kɛ mɔ ha tɛ mɔ hã wa gɔ, nɛ le gɛ ma te sɛ dɛ kɔ̃ wa, nɛ wa fi sɛ we tɛ nɛ, nɛ mɔ yú sɛ ti kɔ̃ wa gɔ.”

¹⁹ Nɛ nwa Sedekiasi gisa na: “Mi dɛ kili nya lɛ Oyudanɔ kɛ wa lia kɔ osoda Babilɔnɛ ni. Mi dɛ kili na, fala kɛ mi te dɛ kɔ̃ wa, nɛ wa yɔndɔ sɛ mi.”

²⁰ Nɛ mi gese na: “Ma a ni gɔ, osoda Babilɔnɛ wa 'dɔ́lɔ́ sɛ mɔ hã wa gɔ. Mɔ zélé toe kɛ nwa tumba do mi ni, nɛ mɛnɔ ma la sɛ vɛ̃ do dia nɛ, nɛ mɔ kpasa sɛ.

²¹ Hã fala kɛ mɔ bɛ̃ we hã tɛ mɔ hã wa, nɛ ngamɛnɔ kɛ NWA bia hã mi li yalɛ ni, ma kpa sɛ mɔ.

²² Mi zɔa do li yalɛ na, wa kala sɛ owukonɔ kɛ wa 'bana kɔ tɔa 'da mɔ nwa ni vɛ̃, nɛ wa kã sɛ wa hã ogã wi ngɔ osoda Babilɔnɛ. Nɛ owukonɔ wa tɔ̃ sɛ dɛ ngɔ mɔ na: ‘Winɔ zi nwa lengge na, wa a ngbongbo yali ngba a ni, wa ɔkɔlɔ a, kɔ a nɛa we le 'bɛ̃tɛ̃ do'do, nɛ wa yu a gbɔrr’.”

²³ Nɛ mi tɔ̃ 'bɔ na: “Wa kala sɛ owukonɔ 'da mɔ, do obenɔ 'da mɔ, nɛ wa kã sɛ wa hã osoda Babilɔnɛ. Nɛ mɔ, mɔ yú sɛ ti kɔ̃ wa gɔ. Nwa ngɔ nù Babilonia a ba sɛ mɔ do bɔlɔkɔ, nɛ a fi sɛ we tɛ le gɛ.”

²⁴ Nɛ Sedekiasi gese na: “Dɔ wele zele we lɛ tɔ̃a do mɔ gɛ gɔ. Ni gɔ, nɛ mɔ fe sɛ.

²⁵ Ogã wi ngɔ sodanɔ wa zele sɛ na, mi wila we do mɔ. Nɛ wa tɛ sɛ we aka mɔ ngɔ lɛnggɛnɔ, kɛ lɛ tɔ̃a do mɔ ni. Nɛ wa kpo sɛ mbulu hã mɔ na, fala kɛ mɔ tɔ̃ wenɔ ni hã lo, nɛ lo gbɛ́ sɛ mɔ gɔ.

²⁶ Nɛ mɔ gese hã wa na, ɛ ala nu ɛ hã mi na, mi tɛ gèsè ɛ dɛ kɔ tɔa bɔlɔkɛ 'da Yonatanɛ i gɔ, da dɛ kɔ ɛ fé gɔ.”

²⁷ 'Do nɛ, nɛ ogã wi ngɔ sodanɔ wa tɛa we aka mi ní kpaa. Nɛ mi gisa hã wa ɔ nɛ kɛ nwa tɔ̃a hã mi ni. Wa nɛa we zele ni, nɛ ngɔ tɛ wa gɛ̃, we kɛ wele kpo zèlè zi wenɔ kɛ lɛ tɔ̃a do nwa ni gɔ.

²⁸ Nɛ mi 'bana zi dɛ tɛ li fanda 'da Owi zɔ mɔ tɛ tɔa 'da nwa, gbaa we hɔ kɔ̃ tũi kɛ osoda Babilɔnɛ, wa ba do le Yeruzalɛmɛ ni.