Yeremi 37 - WE NU GALE 1995

Nwa Sedekiasi tumba wele we aka Yeremi do gulu we

¹ Nabukɔdɔnɔzɔrɛ, nwa ngɔ nù Babilonia fua zi Konia, be 'da Yoakimɛ ngɔ kpongbo nwa ngɔ nù Yuda, nɛ a e Sedekiasi, be 'da Yoziasi dɛ olo a.

² Nɛ nde nwa Sedekiasi, do owi olo li a, do Oyuda, wa kɔ̃̀ zi we zele wenɔ kɛ NWA Gale tɔ̃a zi hã wa, do wala 'da mi Yeremi, wi gba olo nu a ni gɔ.

³ Gɛnɛ kɔ na mɛ ni, nɛ nde nwa Sedekiasi tumba Yukalɛ, be 'da Selemia, do nganga Sɛfania, be 'da Maseya we aka mi Yeremi na, mi sambala NWA Gale 'da lɛ we lo.

⁴ 'Da fala ni, nɛ nde mi yɛnggɛ zi do ta zu mi iko, wa tɛ fì zi mi bɔlɔkɔ gɔ.

⁵ Do kpo 'da fala ni, nɛ nde osoda Ezipeto, wa hɔa nza ngɔ nùi 'da wa, kɔ wa tɛ tɛ we gala osodanɔ 'da nwa Sedekiasi. Kɔ osodanɔ 'da nwa ngɔ nù Babilonia, kɛ wa linggi zi le Yeruzalɛmɛ ni, wa nɛa we zele ní, nɛ wa gbɔtɔ tɛ wa dɛ 'do.

⁶ Nɛ NWA Gale 'da obe Israɛlɛ tumba mi

⁷ we mbese nwa Sedekiasi na: “Osodanɔ 'da nwa ngɔ nù Ezipeto, kɛ wa yula kɔ le 'da wa, kɔ wa tɛ tɛ we gala nɛ ni, wa kpolo sɛ tɛ wa 'do.

⁸ Nɛ osoda Babilɔnɛ, wa tɛ sɛ 'bɔ mbé nɛ we bi le. Wa ba sɛ ma, nɛ wa fi we tɛ nɛ.

⁹ Mi NWA, mi tɔ̃ hã nɛ na, osoda Babilɔnɛ wa sɛ boe fai, nɛ tɛ lènggè na wa si si gɔ. Nɛ lengge ní, nɛ nde nɛ ɔkɔlɔ tɛ nɛ iko!

¹⁰ Nɛ lengge na, nɛ we sɛ tɛ nɛ ngɔ owinɔ vɛ̃ kɛ wa tɛ bi nɛ gɛ nde? Gɛnɛ kɔ nɛ nɛ sɔ ngɔ wa, hã nɛ gbɛ sɔ sodanɔ 'da wa vɛ̃, hã nɛ la tati a owinɔ wa kpa dani ni iko, nɛ wanɔ ni wa kulu sɔ ngɔ kɔ tandenɔ 'da wa, nɛ wa tɛ we fi we tɛ le 'da nɛ, we dɔ ma vɛ̃.”

Wa fí Yeremi bɔlɔkɔ

¹¹ Osoda Babilɔnɛ wa gbɔtɔ zi tɛ wa tɛ le Yeruzalɛmɛ dɛ 'do, we kɛ osoda Ezipeto wa zi tɛ tɛ ma.

¹² Ma kɛ mi fa zi we hɔ nza kɔ le, we nɛ tɛ kɔ 'bili tɛ nùi 'da Bɛnzamɛ, takɔ lɛ kɛ̃ mɔ kɔ nu fɛlɛ kula 'da lɛ dɛ kɔ̃ wele do wele.

¹³ Kɔ mi nɛa we hɔ tɛ nu ngboe wa sa li nɛ na: “Nu ngboe 'da Bɛnzamɛ” ni, nɛ mi to sangbe do gã wi ngɔ owi zɔ mɔ tɛ nu ngbonɔ, kɛ li a a Iria ni. A a be 'da Selemia, do be yaa Hanania. A kpia wala ti mi, nɛ a tɔ̃ hã mi na: “Kafi bina, mɔ nɛ ni we hã tɛ mɔ hã osoda Babilɔnɛ!”

¹⁴ Nɛ mi gisa hã a na: “Ma a ni gɔ! Mi nɛ́ we hã tɛ mi hã wa gɔ.” Nɛ nde Iria kɔ̃̀ we zele mi gɔ. Nɛ a ba mi, nɛ a nɛ do mi hã ogã wi ngɔ sodanɔ.

¹⁵ Wa nɛa we zɔ mi, nɛ zã wa nɔ̃lɔ̃ dɛ tɛ mi, nɛ wa ba nu wa hã osodanɔ na, wa zɛ mi. 'Do nɛ, nɛ wa ba mi, nɛ wa fi mi kɔ tɔa 'da Yonatanɛ, wi kɔmɔ mbɛtinɔ 'da wa, nɛ wa kã nu tɔa dɛ ngɔ mi. Wa ia zi tɔa 'da Yonatanɛ do tɔa bɔlɔkɔ.

¹⁶ Wa fi mi kɔ 'bili tɔa bɔlɔkɔ kpo do ti nù i, nɛ mi ɔa dɛ di ni tũ dɛlɛ wena.

¹⁷ Nɛ mbe ngba soe kpo, nɛ nwa Sedekiasi sa mɔ hã mi dɛ kɔ tɔa nwa 'da a i, nɛ a aka mi do usu nɛ na: “nwa wèlè mbe we hã mɔ dɛ ngɔ mi gɔ nde?” Nɛ mi gese hã a na: “A wila we wila! A na: ‘Wa 'dɔlɔ sɛ mɔ hã nwa ngɔ nù Babilonia.’ ”

¹⁸ 'Do nɛ, nɛ mi aka a na: “Aa nwa, 'dã mɛ mi dɛa do mɔ, tabi do owi olo li mɔ, tabi do owinɔ kɔ le gɛ, hã nɛ ba mi, hã nɛ fi mi bɔlɔkɔ gɛ a ge nde?

¹⁹ Owi gba olo nu Gale, kɛ wa tɔ̃ zi hã nɛ na, nwa ngɔ nù Babilonia, a tɛ́ sɛ we bi nùi 'da nɛ gɔɛ ni, wa a i do nde?

²⁰ Kɔ aa nwa, mɔ kɔ̃, nɛ mɔ zele ala nui 'da mi. Mɔ tɛ gèsè mi dɛ kɔ tɔa bɔlɔkɔ 'da Yonatanɛ i gɔ. Ní gɔ, nɛ mi fe sɛ iko.”

²¹ Ma kɛ nwa Sedekiasi ba nu a na, wa e mi dɛ tɛ li fanda 'da Owi zɔ mɔ tɛ tɔa 'da a, nɛ mi 'bana zi dɛ di ni. Nɛ tũ kpo kpo wa oso zi mapa hã mi tɛ falanɔ wa dɔ do ma ni. Wa dɛa ni gbaa ndɔti nɛ a kɛ mapa ia zi kɔ le ni vɛ̃.