Yeremi 36 - WE NU GALE 1995

Barukɛ tɔlɔ lɛnggɛnɔ a kɔma ni kɔ Tɛmpɛlo i

¹ Ma nɛa we hɔ kɔ nalɛ sabɛlɛ dɛa to nwa 'da Yoakimɛ, be 'da Yoziasi tɛ ngɔ nù Yuda, nɛ NWA tɔ̃a hã mi Yeremi na:

² “Mɔ nɛ́, hã mɔ fa kasa ndala, nɛ mɔ kɔmɔ wenɔ vɛ̃ kɛ mi tɔ̃a zi hã mɔ si ngɔ Oisraɛlɛ, do Oyuda, do ogele winɔ vɛ̃ ni dɛ ngɔ nɛ. Mɔ kɔmɔ sɛ wenɔ vɛ̃ kɛ mi ndua zi tɔ̃ hã mɔ, yolo tɛ 'da fala dɛa to nwa 'da Yoziasi, gbaa we hɔ sɔɛ gɛ ni.

³ Mbe gɔ, nɛ Oyuda wa zele sɛ we ngamɛnɔ vɛ̃ kɛ mi lengge we tombo dɛ ngɔ wa ni, nɛ wa la sɛ fala 'dã dɛa to tɛ wa. Kɔ wa dɛ ni, nɛ mi fo sɛ ku'da 'dã mɛnɔ 'da wa zu wa.”

⁴ Mi nɛa we zele ni, nɛ mi sa mɔ hã Barukɛ, be 'da Neria, nɛ mi tɔ̃ wenɔ vɛ̃ kɛ NWA tɔ̃a zi hã mi ni hã a, nɛ a kɔmɔ ma dɛ ngɔ ndala mi fa ni.

⁵ 'Do nɛ, nɛ mi tɔ̃ hã Barukɛ na: “Wa bɛ̃a na, mi tɛ lè 'bɔ kɔ Tɛmpɛlo i gɔ.

⁶ Kɔ mi kɔ̃a na, mɔ nɛ olo mi. Mɔ nɛ do kɔ̃ tũi kɛ winɔ wa bɛ̃ do nyɔngɔmɛ we dɔnggɔ Gale ni, nɛ mɔ tɔlɔ wenɔ vɛ̃ kɛ mɔ kɔma ngɔ ndala gɛ ni hã wa. Mɔ tɔlɔ wenɔ vɛ̃ kɛ NWA tɔ̃a zi hã mi, nɛ mi tɔ̃a hã mɔ na, mɔ kɔmɔ ma ni. Mɔ tɔlɔ sɛ ma dɛ zala owinɔ kɔ Tɛmpɛloe, mba do owinɔ vɛ̃ kɛ wa yolo sɛ kɔ lenɔ tɛ ngɔ nù Yuda ni.

⁷ Nɛ mbe gɔ, nɛ wa ma sɛ ngɔ ala nu wa hã NWA, nɛ wa la sɛ fala 'dã dɛa to tɛ wa. Mba gɔ, zã NWA nɔ̃lɔ̃ dɛ tɛ wa wena, nɛ a handa we hã ngamɔ hã wa.”

⁸ Barukɛ dɛa ɔ nɛ kɛ mi tɔ̃a hã a ni. A nɛa kɔ Tɛmpɛlo i, nɛ a tɔlɔ wenɔ 'da NWA nɛ́ kɛ mi tɔ̃a hã a ni.

⁹ Mɛnɔ ni ma dɛa zi tɛ̃ ɛ do kɔ zɛkɛ 'da kusi, kɔ mɔlɔ sabɛlɛ dɛa to nwa 'da Yoakimɛ, be 'da Yoziasi tɛ ngɔ nù Yuda. 'Da fala ni, nɛ nde wa sa mɔ hã owinɔ kɔ le Yeruzalɛmɛ, do owanɔ kɔ lenɔ tɛ ngɔ nù Yuda ni, hã wa mba ngba wa, kɔ wa bɛ̃ nyɔngɔmɔ we dɔnggɔ do Gale.

¹⁰ Barukɛ ba kasa ndala kɛ a kɔmɔ wenɔ mi tɔ̃a hã a dɛ ngɔ nɛ ni, nɛ a tɔlɔ ma dɛ ngɔ tɛ kɔ Tɛmpɛlo i dɛ dati owinɔ vɛ̃. 'Da fala ni, nɛ nde a do kɔ 'bili tɔa 'da Gɛmaria, be 'da Safanɛ, wi kɔmɔ mbɛtinɔ 'da nwa. Nɛ tɔa ni, ma zi tɛ li fanda tɔa Tɛmpɛloe, nɛ ma kɔlɔ zi dɔ̃ɔ do nu tɔa li nɛ a “Mbé nu Tɔa” ni.

Barukɛ tɔlɔ lɛnggɛnɔ hã owi olo li nwa

¹¹ Mika, be 'da Gɛmaria, nɛ a a be yaa Safanɛ. Mika nɛa we zele wenɔ 'da nwa kɛ Barukɛ tɔlɔ ma vɛ̃ ngɔ kasa ndala ni,

¹² nɛ a la dɛ kɔ tɔa dɛa toe 'da wi kɔmɔ mbɛtinɔ, tɛ kɔ tɔa 'da nwa i. 'Da fala ni nɛ nde, Owi olo li nwa, wa mba li ngba wa dɛ di ni. Winɔ zi di ni, wi a: Elisama, wi kɔmɔ mbɛtinɔ 'da nwa, Dɛlaya, be 'da Sɛmaya, Ɛlnatanɛ, be 'da Akbɔrɛ, Gɛmaria, be 'da Safanɛ, Sidɛkia, be 'da Hanania, do ogele owi olo li nwa vɛ̃.

¹³ Nɛ Mika mbisa wa do wenɔ vɛ̃ kɛ a zila nu Barukɛ, tɛ tɔlɔ ma hã owinɔ ni.

¹⁴ Nɛ owi olo li nwa, wa sa mɔ hã Yɛhudi, be 'da Nɛtania, be yaa Selemia, nɛ a 'bɔ a kanggadɔkɔ Kusi ni, nɛ wa tombo a na, a sa mɔ hã Barukɛ, kɔ a tɛ do kasa ndala ni hã lo. Barukɛ zila toe ni, nɛ a ba kasa ndala, nɛ a nɛ nɛ hã wa.

¹⁵ A hɔa i mɔ, nɛ wa tɔ̃ hã a na: “Mɔ dúngú nù, hã mɔ tɔlɔ wenɔ kɔ nɛ gɛ hã lɛ.” Nɛ Barukɛ dungu nù, nɛ a tɔlɔ wenɔ ni hã wa.

¹⁶ Kɔ owi olo li nwa wa nɛa we zele wenɔ ni vɛ̃, nɛ wa ka mɔ li ngba wa do kili, nɛ wa tɔ̃ hã Barukɛ na: “Ma wia na, lɛ mbese nwa do wenɔ gɛ.”

¹⁷ Nɛ wa aka Barukɛ na: “Mɔ tɔ̃́ hã lɛ sɛ, lɛnggɛnɔ vɛ̃ kɛ mɔ kɔma ni, mɔ kpa ma i do nde?”

¹⁸ Nɛ Barukɛ gese hã wa na: “Wi a Yeremi hã a tɔ̃a wenɔ ni, sɛ a mi ĩ ti kɔma ma dɛ ngɔ ndala de.”

¹⁹ Nɛ Owi olo li nwa wa tɔ̃ hã a na: “Mɔ do Yeremi, nɛ nɛ́, hã nɛ usu tɛ nɛ. Nɛ da dɛ kɔ wele ĩ́ fala nɛ gɔ.”

Nwa Yoakimɛ dɔa kasa ndala

²⁰ 'Do nɛ, nɛ owi olo li nwa, wa la kasa ndala dɛ kɔ tɔa dɛa toe 'da Elisama, wi kɔmɔ mbɛtinɔ 'da nwa, nɛ wa nɛ tɛ li fanda tɔa 'da nwa i, we tɔ̃ wenɔ ni vɛ̃ hã a.

²¹ Nwa nɛa we zele ni, nɛ a tombo Yɛhudi, we ba kasa ndala ni tɛ kɔ tɔa dɛa toe 'da Elisama. Yɛhudi nɛa, nɛ a tɛ do ma, nɛ a ma ngɔ tɔlɔ ma hã nwa, do owi olo li a vɛ̃ kɛ wa yula zi dɛ kɛ zã a ni.

²² 'Da fala ni, nɛ nde gɛ̃ ba zi wena, nɛ nwa dungu kɛ zã we, tɛ kɔ tɔa kɛ a ɔ nɛ do zɔlɔ gɛ̃ɛ ni.

²³ 'Da fala kɛ Yɛhudi tɔlɔ zi fɛlɛ lɛnggɛ talɛ tabi nalɛ, kɔ a nɛ da nu a, nɛ nwa ba be kɔya 'da a, nɛ a 'bili fɛlɛ lɛnggɛnɔ ni, nɛ a fi ma li we. A dɛa ni do ni gbaa, nɛ a dɔ kasa ndala ni vɛ̃.

²⁴ Nwa do Owi olo li a, wa zila zi gulu lɛnggɛnɔ, kɛ Barukɛ kɔma ni de wena, nɛ nde wa dɛ̀ kili gɔ. Nɛ wa dɛ̀ mbe mbamba 'bako gɔ.

²⁵ Ĩ na, Ɛlnatanɛ, do Dɛlaya, do Gɛmaria, wa dala zi nu wa hã nwa na, a tɛ dɔ̃ ndala gɔ. Nɛ nde nwa zèlè zi wa gɔ.

²⁶ Nɛ a ba nu a hã be 'da a Yɛrameɛlɛ, fala nɛ kpo do Sɛraya, be 'da Azriɛlɛ, do Selemia, be 'da Abdeɛlɛ na, wa kala lɛ do Barukɛ, wi kɔmɔ mbɛti 'da mi do bɔlɔkɔ. Nɛ nde wa kpà lɛ gɔ, we kɛ NWA Gale usu zu lɛ.

Yeremi kɔma lɛnggɛnɔ ni dɛ ngɔ gele ndala

²⁷ 'Do kɛ nwa Yoakimɛ dɔa ndala kɛ mi tɔ̃a zi hã Barukɛ na, a kɔ́mɔ́ wenɔ 'da Gale dɛ ngɔ nɛ ni, nɛ NWA Gale tɔ́a hã mi na,

²⁸ mi bá gele ndala, hã mi kɔmɔ wenɔ vɛ̃ kɛ zi ngɔ ndala Yoakimɛ dɔa ni dɛ ngɔ nɛ.

²⁹ Nɛ NWA Gale tumba 'bɔ mi we tɔ̃ hã Yoakimɛ na: “Mɔ dɔa ndala, nɛ mɔ aka mi Yeremi na, gulu kɛ mi kɔma na, nwa ngɔ nù Babilonia a tɛ sɛ, nɛ a 'danga nùi gɛ, nɛ a gbɛ owinɔ do osa'denɔ ngɔ nɛ vɛ̃ ni we ge nde?

³⁰ Kɔ ngangga ni, ɛ NWA, ɛ tɔ̃ hã mɔ Yoakimɛ na, be zã mɔ kpo dúngú sɛ nwa tɛ ngɔ kpongbo nwa 'da Davidi olo mɔ gɛ gɔ. Mɔ fe sɛ, nɛ wa fi wɔlɔ mɔ dɛ li gba tua wese, nɛ ma ɔ dɛ kɔ gba gɛ̃ tũi.

³¹ Ɛ hã sɛ etumbu hã mɔ, do obe zã mɔ, do Owi olo li mɔ, we duzu 'dã mɛnɔ vɛ̃ kɛ nɛ dɛa ni. Nɛ, do Owi ngɔ nù Yuda, do owi kɔ le Yeruzalɛmɛ vɛ̃, nɛ zèlè mbisa wenɔ 'da ɛ gɔ. Ma kɛ, ɛ nɛ tombo ngamɛnɔ vɛ̃, kɛ ɛ tɔ̃a zi we nɛ ni dɛ ngɔ nɛ.”

³² Nɛ mi ba gele ndala, nɛ mi hã ma hã Barukɛ, wi kɔmɔ mbɛti 'da mi. Nɛ a kɔma wenɔ vɛ̃ kɛ mi tɔ̃a hã a ni dɛ ngɔ nɛ. A kɔma wenɔ vɛ̃ kɛ zi ngɔ ndala Yoakimɛ dɔa ni. Nɛ 'do nɛ, nɛ a kɔma 'bɔ mbé gele wenɔ kɛ mi tɔ̃a zi ni dɛ ngɔ nɛ.