Yeremi 35 - WE NU GALE 1995

Yeremi bia dɛa to tɛ Orekabɛ do mbula

¹ 'Da fala kɛ Yoakimɛ, be 'da Yoziasi zi a nwa ngɔ nù Yuda ni, nɛ nwa wila we hã mi na:

² “Yeremi, mɔ kúlú ngɔ, hã mɔ nɛ 'da Owi nu fɛlɛ Rekabɛ, nɛ mɔ wele we do wa. Nɛ mɔ fa na, nɛ nɛ do wa dɛ kɔ mbe kpo tɔanɔ kɔ Tɛmpɛloe ni. Kɔ nɛ hɔ i mɔ, nɛ mɔ hã dɔ̃ hã wa na wa nɔ.”

³ Mi nɛa we zele ni, nɛ mi kulu ngɔ, nɛ mi nɛ we kpa Orekabɛ. Wi zi a Yazania, be 'da Irmeya, nɛ a a be yaa Habasinia, fala nɛ kpo do obenɔ 'da a, do onya a.

⁴ Nɛ lɛ nɛa do wa, nɛ lɛ le kɔ Tɛmpɛlo i, nɛ lɛ nɛ dɛ kɔ 'bili tɔa 'da Owi yambala mɛnɔ 'da Hananɛ, wi gba olo nu Gale, kɛ a a be 'da Igdalia ni. 'Bili tɔa ni, ma zi dɛ kɛ zã kɛ 'da Owi ngɔ wi dɛa tonɔ. Nɛ ma zi 'bɔ dɛ ngɔ kɛ 'da Maseya, be 'da Salumɛ, kɛ a a wi ngɔ Owi zɔ mɔ tɛ nu tɔa kɛ wa le do ma dɛ kɔ Tɛmpɛloe i ni.

⁵ Nɛ mi kala odaka dɔ̃ do obila, nɛ mi a dati Orekabɛ, nɛ mi tɔ̃ hã wa na: “Nɛ nɔ́ mbe dɔ̃ɛ gɛ!”

⁶ Nɛ wa gese hã mi na: “Lɛ nɔ dɔ̃ gɔ, we duzu kɛ yaa lɛ Yonadabɛ, be 'da Rekabɛ ba zi nu a hã lɛ na, lɛ do obe zã lɛ, lɛ tɛ nɔ dɔ̃ gɔ.

⁷ A tɔ̃a zi 'bɔ hã lɛ na, lɛ tɛ dɛ tɔa gɔ, lɛ tɛ wà fɔ gɔ, nɛ lɛ tɛ mì fɔ vinɔ tabi lɛ tɛ òsò ma gɔ. Nɛ nde lɛ ɔ fai kɔ tɔa tande, sɛ a 'do lɛ ma nyɛlɛ ngɔ nùi kɛ lɛ ɔ ngɔ nɛ nɛ́ ogɛnɛnɔ gɛ de.

⁸ Lɛ zila mbulanɔ 'da yaa lɛ Yonadabɛ vɛ̃. Nɛ lɛ do owukonɔ 'da lɛ, do obenɔ 'da lɛ vɛ̃, lɛ nɔ́ dɔ̃ gɔ.

⁹ Lɛ dɛ́ 'bɔ tɔa ɔi gɔ, lɛ wá fɔ gɔ, nɛ lɛ do fɔ vinɔ bina,

¹⁰ nɛ nde lɛ ɔ dɛ ti tande. Lɛ dɛ ni, we dɛ mbulanɔ vɛ̃ kɛ yaa lɛ Yonadabɛ ia zi hã lɛ ni.

¹¹ Nɛ nde fala kɛ Nabukɔdɔnɔzɔrɛ, nwa ngɔ nù Babilonia tɛa ngɔ nù Yuda we bi ma, nɛ lɛ yu osoda Babilɔnɛ, do osoda Siri dɛ kɔ le Yeruzalɛmɛ nga. Gulu kɛ lɛ ɔ kɔ le Yeruzalɛmɛ gɛ a ni.”

^12-13 Nɛ NWA ngɔ mɔ nyanga nza vɛ̃, Gale 'da obe Israɛlɛ tɔ̃a hã mi na, mi nɛ́ hã mi tɔ̃ hã Oyuda, do Owi kɔ le Yeruzalɛmɛ na: “Mi NWA, mi aka nɛ na, gulu kɛ nɛ bɛ̃ we zele nu mi, nɛ nɛ dɛ́ mbulanɔ 'da mi gɔ we ge nde?

¹⁴ Yonadabɛ, be 'da Rekabɛ ba zi nu a hã obenɔ 'da a na, wa tɛ nɔ dɔ̃ gɔ. Nɛ Owi nu fɛlɛ kula 'da Rekabɛ, wa ba mbulanɔ ni dɛ kɔ sila wa. Wa bɛ̃a dɔ̃ tia do sɔɛ gɛ. Mba gɔ, wa zila we nu yaa wa. Nɛ nde mi NWA, mi tɛ mbese nɛ mbisa fai, nɛ nde nɛ zélé mi gɔ.

¹⁵ Mi là fala tombo Owi tonɔ 'da mi, we gba olo nu mi hã nɛ fala kpo gɔ. Nɛ wa tɛ tɔ̃ hã nɛ na, nɛ lá fala 'dã dɛa to tɛ nɛ, nɛ nɛ dɛ́ mɔ kɛ ma wia ni, nɛ nɛ lá fala dɔnggɔ ogele galenɔ. Nɛ dɛ ni, nɛ nɛ 'bana sɛ dɛ ngɔ nùi kɛ mi ba hã nɛ do oyaa nɛ ni. Nɛ nde nɛ gɛ̃ mbe zala nɛ tɛ wenɔ 'da mi gɔ, nɛ nɛ kɔ̃̀ we zele ma gɔ.

¹⁶ Owi nu fɛlɛ kula 'da Rekabɛ, wa dɛa mbulanɔ kɛ yaa wa Yonadabɛ ia zi hã wa ni. Nɛ nde nɛ, Oyuda, nɛ kɔ̃̀ we dɛ mbula 'da mi gɔ.

¹⁷ Gulu nɛ a mi NWA ngɔ mɔ nyanga nza vɛ̃, Gale 'da obe Israɛlɛ, mi nɛ tombo ngamɛnɔ vɛ̃, kɛ mi tɔ̃a zi we ma ni dɛ ngɔ nɛ Oyuda, do Owi kɔ le Yeruzalɛmɛ. Mba gɔ, nɛ zèlè wenɔ kɛ mi tɔ̃a zi hã nɛ ni gɔ, nɛ nɛ gèsè nu sa mɛ 'da mi gɔ.”

¹⁸ 'Do ki ni, nɛ mi nɛa 'da Orekabɛ nɛ mi gba olo nu NWA ngɔ mɔ nyanga nza vɛ̃, Gale 'da obe Israɛlɛ hã wa na: “Nɛ zila wenɔ kɛ yaa nɛ Rekabɛ tɔ̃a zi hã nɛ ni, nɛ nɛ dɛa mbulanɔ 'da a vɛ̃ do wala olo nɛ.

¹⁹ Ma kɛ mi NWA ngɔ mɔ nyanga nza vɛ̃, Gale 'da obe Israɛlɛ, mi kpo mbulu hã nɛ na, mbe kpo kɔ obe zã Yonadabɛ, be 'da Rekabɛ, a sɛ sanga owi dɛa tonɔ 'da mi boe fai.”