Yeremi 34 - WE NU GALE 1995

NWA Gale tumba to hã nwa Sedekiasi

¹ Nabukɔdɔnɔzɔrɛ, nwa ngɔ nù Babilonia kulu zi ngɔ do osodanɔ 'da a, mba do osodanɔ a kala wa tɛ ngɔ gele nùnɔ kɛ ma zi ti mbula 'da a ni, nɛ wa nɛ we bi le Yeruzalɛmɛ, do olenɔ kɛ zã nɛ ni.

² Do 'da fala ni, nɛ NWA Gale 'da obe Israɛlɛ ba nu a hã mi na, mi nɛ, hã mi tɔ̃ hã Sedekiasi, nwa ngɔ nù Yuda na: “Mi NWA, mi 'dɔlɔ sɛ le 'da mɔ hã nwa ngɔ nù Babilonia, nɛ a fi sɛ we tɛ nɛ.

³ Nɛ mɔ Sedekiasi, mɔ wé sɛ tɛ yu ti kɔ̃ a gɔ. Wa ba sɛ mɔ, nɛ wa 'dɔlɔ mɔ hã a. Mɔ kpa sɛ li ngba mɔ do a, nɛ mɔ tɔ̃ sɛ gulu we 'da mɔ dati a, sɛ nɛ mɔ la kɔlɔ 'duli tɛ Babilɔnɛ i de.

⁴ Nɛ nde mɔ Sedekiasi, mɔ zélé mi sɛ. Mɔ fé sɛ fio bolo gɔ.

⁵ Mɔ fe sɛ fio tɔa. Nɛ owinɔ wa dɔ sɛ fũ yɔmbɔ ngɔ wɔlɔ mɔ we dɔnggɔ mɔ, ɔ nɛ kɛ wa dɛa zi ngɔ wɔlɔ oyaa mɔ, kɛ wa dungu zi nwa dati mɔ ni. Nɛ wa ga sɛ zuma ngɔ fio mɔ na: ‘'Bako wena, nwa fia do'do!’ Mi nwa, mi tɔ̃a ni.”

⁶ Nɛ mi nɛa, nɛ mi tɔ̃ toe ni hã nwa Sedekiasi tɛ Yeruzalɛmɛ i.

⁷ 'Da fala ni nɛ nde, osodanɔ 'da nwa ngɔ nù Babilonia, wa tɛ bi le Yeruzalɛmɛ, mba do le Lakisi, do le Azeka. Lenɔ bɔa ni, mɛ zi a tala le gba ngbonɔ tɛ ngɔ nù Yuda, kɛ osoda Babilɔnɛ wa tɛ bà zi ma gɔ ni.

Owi kɔ le Yeruzalɛmɛ wa ɔkɔlɔ ongbánɔ 'da wa

⁸ Nwa Sedekiasi 'dafa zi do Owi kɔ le Yeruzalɛmɛ na, wa da kɔ̃ wa te ongbánɔ 'da wa.

⁹ Nɛ wa ia mbula na, wele do wele da kɔ̃ ɛ tɛ obe Hebre, wi wili tabi wuko, kɛ a a ngbá ni. Nɛ wele kpo tɛ bà 'bɔ nya a be Yuda do ngbá gɔ.

¹⁰ Owi Yeruzalɛmɛ vɛ̃, do ogã winɔ 'da wa, wa zila ni, nɛ wa kɔ̃a. Nɛ wa da kɔ̃ wa tɛ ongbánɔ 'da wa. Nɛ wa kɔ̃a zi na, lo kálá sɛ 'bɔ onya lo do ngbá gɔ, nɛ wa da kɔ̃ wa tɛ wa.

¹¹ Nɛ nde 'do nɛ nyɛlɛ gɔ, nɛ wa kpolo nu wa, nɛ wa gese 'bɔ owinɔ kɛ wa da zi kɔ̃ wa te wa ni dɛ kɔ ngbá.

¹² Ma kɛ NWA Gale 'da obe Israɛlɛ tumba mi we tɔ̃ hã wa na:

¹³ “Mi gba zi tɔkɔ do oyaa nɛ, 'da fala mi fua zi wa kɔ ngbá tɛ ngɔ nù Ezipeto i ni.

¹⁴ Nɛ mi tɔ̃ hã wa na, 'do sabɛlɛ sambo sambo, nɛ wa da kɔ̃ wa tɛ obe Hebrenɔ kɛ wa dɛa to ngbá hã wa 'do sabɛlɛ gazɛlɛ ia ni. Nɛ nde oyaa nɛ wa kɔ̃̀ zi we zele we mi tɔ̃a ni gɔ. Wa kɔ̃̀ zi we gɛ mbe zala wa tɛ nɛ iko gɔ.

¹⁵ Nɛ ngangga gɛ, nɛ kpula linggamɛnɔ 'da nɛ, nɛ nɛ dɛa mɔ kɛ ma dia tɛ mi ni. Nɛ vɛ̃, nɛ kɔ̃a zi do sila nɛ, nɛ nɛ da kɔ̃ nɛ tɛ onya nɛ be Yudanɔ. Nɛ nɛ kana tɛ nɛ dati mi tɛ kɔ Tɛmpɛloe wa dɔnggɔ do mi ni.

¹⁶ Nɛ nde nɛ kpula 'bɔ mbé nu nɛ, nɛ nɛ yɔnda sila mi. Nɛ vɛ̃, nɛ kala 'bɔ owinɔ kɛ nɛ da zi kɔ̃ nɛ tɛ wa ni, nɛ nɛ gese 'bɔ wa dɛ kɔ ngbá.

¹⁷ Ma kɛ mi NWA, mi tɔ̃ hã nɛ na, nɛ bɛ̃a we nu mi, nɛ nɛ dà kɔ̃ nɛ tɛ onya nɛ be Yudanɔ gɔ. Gulu nɛ a mi NWA, mi da sɛ tɛ mɛ 'bɔ kɔ̃ mi tɛ nɛ, nɛ bolo, do 'dã zɛlɛ, do gba wɔ ma gbɛ sɛ nɛ. Mi dɛ sɛ na, onu kɔnggɔ winɔ ngɔ nù gɛ vɛ̃, wa zɔ mɛ mi nɛ dɛ do nɛ ni, nɛ wa tana kili.

^18-19 “Ogã wi ngɔ nù Yuda, do wanɔ kɔ le Yeruzalɛmɛ, fala nɛ kpo do Owi ti nu nwa, do onganganɔ, do tala winɔ kɔ le ni vɛ̃, wa gba zi tɔkɔ do mi. Wa gbɛa zi be wili ngɔmbɔ, nɛ wa gba sanga nɛ dɛ gbogbo, nɛ wa la do sanga nɛ ni Nɛ nde wa yala gba tɔkɛ ni do'do, nɛ wa dɛ̃ mbula nɛ gɔ.

²⁰ Ma kɛ mi 'dɔlɔ sɛ wa hã Owi sɛnɛ wa, kɛ wa kɔ̃a we gbɛ wa ni. Nɛ wɔlɔ wa ma hɔ sɛ nyɔngɔmɔ nu oganakele, do o'banggo.

²¹ Mi 'dɔlɔ sɛ 'bɔ Sedekiasi, nwa ngɔ nù Yuda, do Owi olo li a hã Owi sɛnɛ wa, kɛ wa kɔ̃a we gbɛ wa ni. Mi 'dɔlɔ sɛ wa hã osodanɔ 'da nwa ngɔ nù Babilonia, kɛ wa la fala bi wa ni.

²² Mi ba sɛ nu mi hã osodanɔ ni na, wa kpolo tɛ wa hã wa bi le, nɛ wa ba ma, nɛ wa fi we tɛ nɛ. Mi dɛ sɛ na, ole ngɔ nù Yuda ma kifi li go, kɛ wele wè tɛ ɔ se'de gɔ ni. Mi nwa, mi tɔ̃a ni.”