Yeremi 33 - WE NU GALE 1995

Gale kpua mbé mbulu hã obe Israɛlɛ

¹ NWA Gale wila 'bɔ we hã mi do 'da fala mi 'bana zi kɔ bɔlɔkɛ tɛ kɔ ngboe 'da nwa Sedekiasi ni.

² NWA Gale kɛ wa sa li a na NWA, nɛ a a dɛa nùi do mɛnɔ ngɔ nɛ, nɛ a e mɔ kpo kpo do fala 'dɛ ɛ ni, a tɔ̃a hã mi na:

³ “Mɔ sa mɔ hã mi, nɛ mi gese sɛ nu nɛ hã mɔ. Mi be sɛ gulu ogã usu mɛnɔ kɛ mɔ ĩ ti ma gɔɛ ni hã mɔ.

^4-5 Mi, NWA Gale 'da obe Israɛlɛ, mi tɔ̃a na, otɔanɔ tɛ kɔ le Yeruzalɛmɛ, do otɔanɔ 'da onwa ngɔ nù Yuda, ma gbini sɛ kisi kisi. Gulu bi do osoda Babilɔnɛ, kɛ wa linggi le, kɔ wa 'dafa tɛ wa we ba ma ni bina. Ki ni mɛ a fa na, le ma dunu do wɔlɔ winɔ, kɛ gã nɔ̃lɔ̃ zã 'da mi nɛ gbɛ wa ni. Mi siki 'do mi lua do le gɛ, we duzu kɛ owi kɔ nɛ wa dɛ 'dã mɔ wena.

⁶ “Nɛ nde do 'do, nɛ mi kpasa sɛ wa, nɛ mi hã sɛ de mɔ hã wa wena. Nɛ mi dɛ sɛ 'bɔ na, wa kpa dungu fio, nɛ wele kpo tùlù sɛ 'bɔ wa gɔ.

⁷ Mi kala sɛ Oyuda do Oisraɛlɛ kɛ mi pɛsɛ zi wa ni, nɛ mi gese sɛ wa dɛ olo wa, nɛ wa sɛ 'bɔ do dia dungu nɛ́ kɛ zi dati ni.

⁸ Mi fo sɛ ku'da 'dã mɛnɔ kɛ wa dɛa zi do mi ni zu wa, nɛ mi ele sɛ ma do'do.

⁹ Le Yeruzalɛmɛ ma hɔ sɛ 'bɔ le dɔ̃lɔ̃ li, do le yangga kɛ mi dɔnggɔ sɛ tɛ mi do ma. Nɛ onu kɔnggɔ winɔ ngɔ nu gɛ vɛ̃, wa zele sɛ we dia mɛnɔ kɛ mi dɛa we owi Yeruzalɛmɛ, do dia dungi mi ba hã wa ni, nɛ wa tana sɛ kili.”

¹⁰ Nɛ NWA tɔ̃a 'bɔ na: “Owinɔ wa tɛ tɔ̃ na, le Yeruzalɛmɛ do lenɔ ngɔ nù Yuda vɛ̃ ma ɔ nɛ li go, kɛ wele tabi sa'de wa wè tɛ ɔ se'de gɔ ni. Nɛ mɛ a gbãlã we, we kɛ fo 'bɔ wele tabi sa'de tɛ kɔ lenɔ ni bina. Nɛ nde ĩ na, dɛ kpo kɔ lenɔ ni, nɛ zele sɛ 'bɔ

¹¹ giti hiamɔ gbalimɔ, do hiamɔ yangga, do zuma mɔ dɔ ba ngba wi. Nɛ zele sɛ 'bɔ giti gɛlɛ winɔ tɛ ga zuma, 'da fala kɛ wa tɛ do dɔnggamɛnɔ dɛ kɔ Tɛmpɛloe 'da mi ni. Nɛ wa tɔ̃ sɛ na: ‘Lɛ dɔ́nggɔ́ NWA ngɔ mɔ nyanga nza vɛ̃, we kɛ a de wena, nɛ kɔ̃a zã 'da a do ndɔti nɛ bina.’ Mi dɛ sɛ na, owinɔ ngɔ nùi gɛ wa dungu 'bɔ do dia nɛ ɔ nɛ kɛ zi dati ni. Mi NWA, mi tɔ́a ni.”

¹² NWA ngɔ mɔ nyanga nza vɛ̃ tɔ́a 'bɔ na: “Mɛ a gbãlã we, nùi gɛ ma ɔ nɛ li go kɛ Owele tabi osa'de wa wè we ɔ se'de gɔ, nɛ nde mi dɛ sɛ na, winɔ wa kpa 'bɔ dia wɔkɔsɔ tɛ dɛ we dala do obatanɔ do oduanɔ 'da wa.

¹³ Nɛ Owele wa ma sɛ 'bɔ ngɔ tɔlɔ obatanɔ 'da wa tɛ nyanga kalanɔ, do li gba zɔ̃ Negɛvɛ, do kɔ 'bili tɛ nùi 'da Bɛnzamɛ, do kɔ lenɔ kɛ zã Yeruzalɛmɛ, do kɛnɔ ngɔ nù Yuda. Mi NWA, mi tɔ̃a ni.”

¹⁴ NWA tɔ̃a na: “Mbe ngba soe kpo, nɛ mi dɛ sɛ mbulunɔ kɛ mi kpua zi hã Oisraɛlɛ do Oyuda ni.

¹⁵ 'Da fala ni ma we, nɛ mi saka sɛ ngbongbo be zã Davidi, nɛ mi e a do nwa. Nɛ a dɛ sɛ mɔ kɛ ma a bɔlɔ, nɛ a gese sɛ bɔlɔ zu dɛa mɔ dɛ ngɔ nùi gɛ.

¹⁶ Nɛ Oyuda do Owi kɔ le Yeruzalɛmɛ wa si sɛ kɔlɔ 'duli, nɛ wa kpa sɛ gɛ̃a dungu. Nɛ wa sa sɛ li le Yeruzalɛmɛ na: ‘NWA, wele bɔlɔ zu.’

¹⁷ Mi NWA, mi kpua mbulu na, 'da fala fai, be zã Davidi kpo a dungu sɛ nwa ngɔ obe Israɛlɛ.

¹⁸ Nɛ 'da fala fai, obe zã Levi, wa dɛ sɛ to nganga hã mi. Wa gbɛ sɛ sa'denɔ, nɛ wa dɔ we dɔnggɔ do mi. Wa hã sɛ odɔnggamɔ kpalɛnɔ hã mi, nɛ wa gbɛ sɛ 'bɔ sa'de hã mi we be dɛa na.”

¹⁹ NWA tɔ̃a hã mi na:

²⁰ “Mi ia zi mbula ngɔ wese do tũ na, ma tɛ dɛ 'do ngbɛ ɛ, nɛ ma kpolo ngbɛ ɛ fai. Nɛ wele kpo wé sɛ we 'danga ma gɔ.

²¹ Na mɛ ni, wa wè tɛ mɛ 'bɔ we yala mbuli mi kpua zi hã wi toe 'da mi Davidi ni gɔ. Mi kpua zi mbuli ni na, 'da fala fai mbe kpo kɔ obe zã Davidi a dungu sɛ nwa tɛ Yeruzalɛmɛ. Nɛ 'da fala fai obe zã Levi wa dɛ sɛ to nganga hã mi.

²² Mi dɛ sɛ na, obe zã wi toe 'da mi Davidi, do obe zã Levi, wa dɛlɛ ɔ nɛ osɔlanɔ tɛ li nza, tabi gbãlã kɛnzɛ nu gba lì, kɛ wa wè we tɔlɔ ma gɔ ni.”

²³ NWA tɔ̃a 'bɔ hã mi na:

²⁴ “Mɔ zèlè we winɔ wa tɛ tɔ̃ ma ni gɔ nde? Wa tɛ tɔ̃ na, mi la fala nu kɔnggɔ Oisraɛlɛ do Oyuda, kɛ mi saka zi wa ni do'do! Winɔ wa tɔ̃ we ni, wa yɔndɔ winɔ 'da mi yɔnda, nɛ wa zɔ wa li wa yala iko.

²⁵ Nɛ nde mi nwa, mi ia mbula ngɔ wese do tũ, kpasaa ɔ nɛ kɛ mi ia 'bɔ ngɔ li nza do nùi ni.

²⁶ Na mɛ ni, mi wè tɛ mɛ 'bɔ we da kɔ̃ mi tɛ obe zã Yakɔbɔ do obe zã wi toe 'da mi Davidi gɔ. 'Da fala fai mi saka sɛ mbe kpo kɔ obe zã Davidi do nwa ngɔ nu fɛlɛ Abrahama, Izaka do Yakɔbɔ. Mi ĩ sɛ 'bako hã owinɔ 'da mi, nɛ mi kala sɛ wa kɔlɔ 'duli, nɛ mi gese wa dɛ olo wa.”