Yeremi 32 - WE NU GALE 1995

Yeremi usa fɔ

¹ Do 'da fala kɛ Sedekiasi ɔa sabɛlɛ 'bu tɛ dɛa to nwa 'da a tɛ ngɔ nù Yuda, nɛ Nabukɔdɔnɔzɔrɛ ɔ tɛ mɛ 'bɔ sabɛlɛ 'bu ngɔ nɛ ngbɛ'dɛ'dɛ tɛ dɛa to nwa 'da a tɛ ngɔ nù Babilonia ni, nɛ NWA wila we hã mi Yeremi.

² Do 'da fala ni, nɛ nde osoda Babilɔnɛ wa linggi le Yeruzalɛmɛ we ba ma, nɛ mi zi a kɔ bɔlɔkɔ kɔ ngboe 'da nwa Sedekiasi.

³ Nwa Sedekiasi ba zi mi do bɔlɔkɔ, we duzu kɛ mi tɔ́a zi olo nu NWA Gale hã a ni. Mba gɔ, NWA tɔ́a zi na: “Mi NWA, mi 'dɔlɔ sɛ le Yeruzalɛmɛ hã nwa ngɔ nù Babilonia na, a ba ma.

⁴ Nɛ nwa Sedekiasi wé sɛ tɛ yu kɔ̃ osoda Babilɔnɛ gɔ, we kɛ mi kɔ̃a we 'dɔlɔ a hã nwa ngɔ nù Babilonia. Wa kã sɛ a hã nwa Nabukɔdɔnɔzɔrɛ, nɛ a zɔ sɛ a do li a, nɛ a tɔ̃ ngbangga dati a.

⁵ Wa ba sɛ nwa Sedekiasi nɛ wa si sɛ do a dɛ Babilɔnɛ, nɛ a 'bana sɛ dɛ i mɔ gbaa we 'bɔ 'da etumbu kɛ mi hã sɛ hã a ni. Gɛnɛ kɔ a bi do owi Babilɔnɛ gbaa, nɛ nde a nɛ́ sɛ ngɔ wa gɔ. Mi NWA, mi tɔ̃a ni.”

⁶ Nɛ NWA tɔ̃a 'bɔ hã mi na,

⁷ Hanameɛlɛ, be 'da nya baa mi Salumɛ, a tɛ sɛ 'da mi, we aka mi na, mi oso fɔɛ 'dɛ ɛ tɛ kɔ le Anatɔtɛ. Mba gɔ, mi a ngbongbo wi na 'da a, nɛ wi wia we oso ma tati a mi.

⁸ Nɛ Hanameɛlɛ hɔa 'da mi tɛ li fanda kɔ ngboe 'da nwa Sedekiasi i, ɔ nɛ kɛ NWA Gale tɔ̃a ni. Nɛ a aka mi na, mi oso fɔɛ 'dɛ ɛ. Nɛ mi ĩ wá na, NWA wila we hã mi do ngbongbo nɛ.

⁹ Na mɛ ni, nɛ mi usa fɔɛ 'da Hanameɛlɛ tɛ Anatɔtɛ i ni do mbili fɛ̃a mɔ bolo 'bu ngɔ nɛ sambo.

¹⁰ Mi kɔma mbɛti ngɔ usa fɔɛ ni bɔa. Nɛ mi ba mbe kpo, nɛ mi kasa, nɛ mi to kasɛ 'da mi nu nɛ dɛ gbali Otemɔɛnɔ ni. Nɛ mi e 'bɔ lã mbili ni ngɔ kilo we ĩ ti dĩ nɛ.

¹¹ 'Do nɛ, nɛ mi ba mbɛti mi kpia nu nɛ do kasɛ ɔ nɛ kɛ mbula tɔ̃a ni, nɛ mi mba ma do kɛ mi kpè nu nɛ gɔɛ ni,

¹² nɛ mi hã ma hã Barukɛ, be 'da Neria, kɛ a a be yaa Maseya ni. Nɛ nde nya mi Hanameɛlɛ do Otemɔɛnɔ kɛ wa ia kɔ̃ wa ti mbɛti fɔɛ ni, wa zi boe. Nɛ Oyudanɔ vɛ̃ kɛ wa zi dɛ tɛ kɔ ngboe 'da nwa ni, wa zi 'bɔ boe.

¹³ Nɛ mi tɔ̃ hã Barukɛ dɛ gbali wa vɛ̃ na:

¹⁴ “NWA ngɔ mɔ nyanga nza vɛ̃, Gale 'da Israɛlɛ ba nu a hã mɔ na, mɔ kala mbɛtinɔ gɛ bɔa nɛ, nɛ mɔ usu ma kɔ kpana, nɛ ma ɔ sɛ wena.

¹⁵ Mba gɔ, NWA ngɔ mɔ nyanga nza vɛ̃, Gale 'da Israɛlɛ tɔ̃a 'bɔ na, mbe ngba soe kpo, nɛ wa oso sɛ 'bɔ otɔa, do ofɔ, do ofɔ vinɔ dɛ kɔ le gɛ.”

Yeremi sambala Gale

¹⁶ Mi hã mɛnɔ ni hã Barukɛ do'do, nɛ mi sambala NWA na:

¹⁷ “Aa NWA Gale, mɔ dɛa nùi gɛ do li nza, do ngawi 'da mɔ, do hã zã 'da mɔ. Mɔ kpo ngàndà li mɔ gɔ.

¹⁸ Mɔ be dia zã 'da mɔ hã owinɔ kɔ sabɛlɛ do sabɛlɛ, nɛ nde mɔ hã etumbu hã owinɔ olo 'dã mɛnɔ 'da oyaa wa. Mɔ a Gale kɛ mɔ gã wena, nɛ mɔ nganda 'bɔ wena. Mɔ a NWA ngɔ mɔ nyanga nza vɛ̃.

¹⁹ Mɔ do osaka linggamɔ wena, nɛ mɔ e ma fala dɛa to do kɔ̃a zã 'da mɔ. Mɔ soko mɛnɔ owinɔ wa dɛ ni do sɔ̃a li; nɛ mɔ si olo dɛa mɔ tɛ wele do wele hã a.

²⁰ “Zi dati, 'da fala oyaa lɛ wa 'bana zi tɛ ngɔ nu Ezipeto i ni, nɛ mɔ dɛa zi ogba sɔ̃mɔ do oɔngbamɔ wena. Nɛ mɔ 'bana 'bɔ tɛ dɛ ma sɔɛ gɛ. Mɔ dɛ́ ma tati nɛ hã obe Israɛlɛ na wa zɔ iko gɔ, nɛ nde ma kpa li ogele winɔ vɛ̃. Nɛ ngangga ni, wa ĩ ti mɔ falanɔ vɛ̃ ia.

²¹ Mɔ fua zi owinɔ 'da mɔ, obe Israɛlɛ tɛ ngɔ nù Ezipeto dɛ nza do wala ogba sɔ̃mɔ, do ɔngbamɛnɔ ni. Na mɛ ni, mɔ bia zi ngawi 'da mɔ do hã zã 'da mɔ hã owinɔ.

²² Mɔ kpua zi mbulu hã oyaa lɛ na, mɔ hã sɛ nùi kɛ lɛ ngɔ ma sɔɛ gɛ hã wa. Nɛ nùi kɛ mɔ hã zi hã wa gɛ, mɛ a nù kɛ ma do nyɔngɔmɔ la li ngele.

²³ Nɛ nde 'da fala kɛ wa tɛa, hã wa ba ma do mɔ́ wa do'do ni, nɛ wa zèlè 'bɔ we nu mɔ gɔ, nɛ wa dɛ̃ 'bɔ mbulanɔ 'da mɔ gɔ. Wa dɛ̃ mbe mɔ kpo kɔ mɛnɔ mɔ ba zi nu mɔ na, wa dɛ ni gɔ. Ma kɛ mɔ tumba ngamɛnɔ gɛ vɛ̃ dɛ ngɔ wa ni.

²⁴ “Mɔ zɔ́, osoda Babilɔnɛ wa linggi le gɛɔ do gɛɔ we ba ma, nɛ wa ndua bi ma ia. Bolo do gba wɔ, do 'dã zɛlɛ ma dɛ sɛ na, le te dɛ kɔ wa, ɔ nɛ kɛ mɔ zɔ ni. Wenɔ vɛ̃ kɛ mɔ tɔ́a zi ni, ma tɛ dɛ tɛ̃ ɛ.

²⁵ Aa NWA Gale, mɔ ĩ na, osoda Babilɔnɛ wa nɛ ba le ba. Kɔ gulu kɛ mɔ kɔ̃a na, mi oso fɔɛ, nɛ mi futa mbili nɛ dɛ gbali Otemɔɛnɔ do ti we ge nde?”

NWA gisa nu sambala 'da Yeremi

²⁶ Nɛ nwa tɔ́a hã mi na:

²⁷ “Mi nwa, mi a Gale 'da owinɔ vɛ̃. Fo mɔ gana mi bina.

²⁸ Gulu nɛ a mi tɔ̃ hã mɔ na, mi nɛ 'dɔlɔ le gɛ hã nwa Nabukɔdɔnɔzɔrɛ do osodanɔ 'da a ni.

²⁹ Osoda Babilɔnɛ kɛ wa tɛ bi le gɛ, wa le sɛ kɔ nɛ, nɛ wa fi we tɛ nɛ, nɛ ma bɛlɛ. Nɛ otɔanɔ kɛ winɔ wa dɔ zi nɔ yɔmbɛ hã gale Bala dɛ nu nɛ, nɛ wa hã 'bɔ odɔnggamɔ dɔɛ hã ogele galenɔ kɔ nɛ ni, ma ngutu sɛ vɛ̃. Mba gɔ, mɛnɔ kɛ wa dɛa zi ni, ma nɔ̃lɔ̃ zã mi wena.

³⁰ Ã kɛ zi belee ni, Oisraɛlɛ do Oyuda wa dɛ tati a mɔ kɛ ma dè li mi gɔ, nɛ wa nɔ̃lɔ̃ zã mi do dɛa mɔ tɛ wa fai.

³¹ Nɛ owi Yeruzalɛmɛ wa ndua zi nɔ̃lɔ̃ zã mi, yolo tɛ ngba soe wa dɛa do le ni gbaa we hɔ sɔɛ gɛ. Ma kɛ mi kɔ̃̀ 'bɔ we zɔ le ni ngɔ li mi gɔ.

³² Mba gɔ, Oisraɛlɛ, do Oyuda, mba do Onwanɔ 'da wa, do ogã winɔ do onganganɔ, do owi gba olo nu mi, wa tulu mi do 'dã mɛnɔ 'da wa wena.

³³ Wa siki 'do wa lua do mi. Nɛ gɛnɛ kɔ mi mbese wa 'da fala fai, nɛ nde wele kpo gɛ́ zala ɛ tɛ mbisa wenɔ 'da mi gɔ.

³⁴ Dɛ ngɔ nɛ, wa kala oyia kpikimanɔ 'da wa, nɛ wa a ma dɛ kɔ Tɛmpɛloe 'da mi, nɛ wa faka ma.

³⁵ Wa dɛa 'bɔ ofala we dɔnggɔ do gale Bala tɛ kɔ gbangɔlɔ̃ Hinɔmɛ, takɔ wa gbɛ obenɔ 'da wa dɛ di ni, we dɔnggɔ do gale Mɔlɛkɛ. Ĩ na, mi bà zi nu mi hã wa ni fala kpo gɔ, nɛ mi lènggè zi mbe fala kpo na, wa dɛ̃ sɛ gã 'dã mɔ na mɛ gɛ, nɛ wa le kɔla ni gɔ.”

³⁶ NWA Gale 'da Israɛlɛ tɔ̃a 'bɔ hã mi na: “Yeremi, owinɔ wa tɛ tɔ̃ na, bolo, do gba wɔ do 'dã zɛlɛ ma dɛ sɛ na, le gɛ ma te dɛ kɔ̃ nwa ngɔ nù Babilonia. Kɔ ngangga ni, nɛ gɛ́ zala nɛ tɛ we mi nɛ tɔ̃ ma ni.

³⁷ Mi zi do dã, nɛ zã mi nɔ̃lɔ̃ zi dɛ tɛ owinɔ kɔ le gɛ nganda wena. Ma kɛ mi pɛsɛ zi wa dɛ ngɔ nùnɔ kpi do kpi ni. Nɛ nde mi ngɛmɛ sɛ 'bɔ li wa, nɛ mi gese sɛ wa dɛ olo wa, nɛ mi hã sɛ dungu fio hã wa.

³⁸ Wa sɛ 'bɔ a owinɔ 'da mi, nɛ mi sɛ a Gale 'da wa.

³⁹ Mi dɛ sɛ na, linggamɔ zu wa do dɛa mɔ tɛ wa ɔ kpo, takɔ wa dɛ olo nu mi, nɛ wa ɔ do yangga fala nɛ kpo do obe zã wa.

⁴⁰ Mi gba sɛ tɔkɔ do wa, nɛ ma 'bana sɛ fai. Mi síkí sɛ 'bɔ 'do mi hã wa gɔ, nɛ nde mi dɛ sɛ dia mɔ hã wa fai. Mi dɛ sɛ na, wa dɛ kili mi ngboo, nɛ wa tɛ sìkì 'bɔ 'do wa hã mi fala kpo gɔ.

⁴¹ Mi sɛ do yangga dɛ dia mɔ hã wa, nɛ mi dɛ sɛ na, wa ɔ dɛ ngɔ nùi gɛ fai.”

⁴² Nɛ NWA tɔ̃a 'bɔ na: “Mi zi a mi tumba ngamɛ hã owinɔ ngɔ nù Yuda. Nɛ nde mi 'bɔ a mi hã sɛ dia mɛnɔ kɛ mi kpua zi mbulu nɛ ni hã wa.

⁴³ Owinɔ wa tɔ̃ na, mi 'dɔlɔ nùi gɛ hã Obabilɔnɛ, kɔ ngangga ni, ma hɔa li go, kɛ Owele do osa'de wa wè tɛ ɔ se'de gɔ ni. Nɛ nde mi dɛ sɛ na, owinɔ wa oso 'bɔ ofɔ dɛ ngɔ nùi gɛ.

⁴⁴ Do gbãlã we, wa oso sɛ ofɔ. Wa kɔmɔ sɛ mbɛti usa fɔnɔ ni, nɛ wa e sɛ kasɛ ti nɛ dɛ li Otemɔɛnɔ. Mɛnɔ ni ma dɛ sɛ tɛ̃ ɛ tɛ ngɔ nùi 'da Bɛnzamɛ, do kɔ lenɔ kɛ zã Yeruzalɛmɛ, do kɛnɔ ngɔ nù Yuda, do kɔ lenɔ ngɔ kalanɔ, do ti nyanga kalanɔ, do tɛ li gba zɔ̃ Negɛvɛ. Mba gɔ, mi kala sɛ owinɔ ni tɛ falanɔ mi pɛsɛ zi do wa ni, nɛ mi gese sɛ wa dɛ ngɔ nùi 'da wa. Mi nwa, mi tɔ̃a ni.”