Yeremi 31 - WE NU GALE 1995

Obe Israɛlɛ wa si dɛ nu di olo wa

¹ NWA tɔ́a na: “Mbe tũ kpo, nɛ mi sɛ a Gale 'da nu kpala Oisraɛlɛ vɛ̃, nɛ wa sɛ a owinɔ 'da mi.

² Aa nɛ, Oisraɛlɛ, mi bia zi dia zã 'da mi hã nɛ, nɛ nɛ kpasa zi li bolo tɛ li gba zɔ̃ i. Nɛ mi dɛ sɛ 'bɔ na, nɛ kpa gɛ̃a dungu.

³ Mi yula ndũu, nɛ mi tɛa 'da nɛ owinɔ 'da mi na nɛ zɔ mi. Mi kɔ̃a gɛnɛ nɛ, nɛ kɔ̃a zã 'da mi ma 'bana sɛ dɛ 'da nɛ fai, ma kɛ mi be dia zã 'da mi hã nɛ bia pii ni.

⁴ Aa nɛ, Oisraɛlɛ, mi 'dafa sɛ nɛ ɔ nɛ kɛ wa 'dafa do tɔa dɛ olo nɛ ni. Nɛ nɛ kala sɛ 'bɔ biã 'da nɛ, nɛ nɛ le kɔ yɔla do ongba nɛ, nɛ nɛ dɛ yangga.

⁵ Nɛ mi sɛ 'bɔ ofɔ vinɔnɔ 'da nɛ tɛ ngɔ kala Samaria i. Nɛ kpalɛnɔ nɛ mi sɛ ni, nɛ wele nɛ nɛ kala sɛ ma.

⁶ Mbe tũ kpo, nɛ Owi ɔ ngi'di lenɔ wa he sɛ mɔ ngɔ kala Efraimɛ i na: ‘Lɛ nɛ́, hã lɛ kũ dɛ 'da NWA Gale 'da lɛ tɛ ngɔ kala Sioni i!’ ”

⁷ NWA tɔ́a na: “Nɛ gá zuma do yangga hã Oisraɛlɛ, wa a onwa ngɔ gele nu kɔnggɔnɔ. Nɛ bá gɛlɛ zuma dɛ ngɔ, hã owinɔ wa zele. Nɛ nɛ tɔ̃ na: ‘NWA kpasa owinɔ 'da a, kɛ wa 'bana nza ni vɛ̃.’

⁸ Mi kala sɛ wa tɛ ngɔ nùi kɛ si gbãlã ngɔ, nɛ mi gese wa dɛ dɛ. Wanɔ tɛ ngɔ nùnɔ kɛ ma nyɛlɛ ndũu ni, mi ngɛmɛ sɛ li wa vɛ̃. Nɛ owi tandunɔ do owi mbi kunɔ wa mba sɛ ngba wa do wa, fala nɛ kpo do owi naa zãnɔ, do onaa nzɔ benɔ. Nɛ li owinɔ 'da mi ma we sɛ dɛ olo nɛ.

⁹ Wa kpolo sɛ tɛ wa do mili kɔ̃a li wa, nɛ wa ala sɛ nu wa tɛ si nɛ. Nɛ mi be sɛ wala hã wa, nɛ mi kã wa dɛ nu be wayanɔ. Wa la sɛ do li dia wala, nɛ wa kpá sɛ ngamɔ gɔ. Mi sɛ a baa Oisraɛlɛ, nɛ Efraimɛ sɛ a kutu bulu be 'da mi.

¹⁰ “Nɛ, ogele nu kɔnggɔnɔ, nɛ zélé mi, nɛ nɛ tɔ̃ hã owinɔ kɛ nùnɔ 'da wa nyɛlɛ ndũu ni na: Mi NWA, mi pɛsɛ zi Oisraɛlɛ, nɛ nde di ngangga ni, mi nɛ ngɛmɛ li wa we zɔ mɔ tɛ wa, ɔ nɛ kɛ wele zɔ do mɔ tɛ batanɔ 'dɛ ɛ ni.

¹¹ Mi fo sɛ Oisraɛlɛ ti kɔ̃ nga wi sɛnɛ wa do'do.

¹² Nɛ wa kpolo sɛ tɛ wa dɛ ngɔ kala Sioni, do zuma yangga nu wa, mi hã sɛ ble, dɔ̃, nɔ, obata, odua, do ongɔmbɔ hã wa, nɛ bula li wa sɛ do yangga we nɛ. Wa ɔ sɛ nɛ kpalɛ li fɔ kɛ ma 'bɔ de wena ni, nɛ tɛ wa zɛ́lɛ́ sɛ 'bɔ mbé nɛ gɔ.

¹³ Obe zɔnga benɔ 'da wa wa yɔ sɛ yɔla yangga, nɛ ozagbãlãnɔ do ogbɛlɛnɔ wa mba sɛ do wa. Wa dúngú sɛ 'bɔ gɛla gɔ, nɛ fo sɛ 'bɔ 'bako bina, we kɛ mi mbɔkɔ sila wa, nɛ mi hã yangga hã wa.

¹⁴ Mi dɛ sɛ mɔ dɔ hã onganganɔ do kɛndɔ sa'denɔ kɛ wa gbɛ wa we dɔnggɔ do mi ni. Nɛ mi dɛ sɛ na, mɔ kpo tɛ zɔlɔ owinɔ 'da mi gɔ. Mi nwa, mi tɔ̃a ni.”

¹⁵ NWA tɔ̃a na: “Wa zila gɛlɛ wuko kɔ le Rama, a tɛ zɛ nu a do kɔ̃a fio. Wi a Rasɛlɛ, hã a he kɔ̃a benɔ 'da a ni. A kɔ̃̀ na, owele wa dungu do ɛ, hã wa mbɔkɔ sila ɛ gɔ, we duzu kɛ benɔ 'da a wa fia vɛ̃.”

¹⁶ Nɛ nde NWA tɔ̃a hã a na: “Mɔ ɔmɔ tɛ he kɔ̃a, mɔ dílí mili kɔ̃a li mɔ do'do, we kɛ mi si sɛ olo zɛlɛ tɛnɔ vɛ̃ kɛ mɔ kpa we obenɔ 'da mɔ ni hã mɔ. Wa yolo sɛ ngɔ nùi 'da Owi sɛnɛ wa, nɛ wa si sɛ.

¹⁷ Sila mɔ tɛ bà we gɔ, mɔ gbíní zã mɔ do mi, we kɛ obenɔ 'da mɔ wa kpolo sɛ tɛ wa dɛ ngɔ nùi 'da wa. Mi NWA, mi tɔ̃a ni.

¹⁸ Mi zila gɛlɛ Oisraɛlɛ tɛ bi tɛ wa na: ‘Aa NWA, mɔ hã etumbu hã lɛ, mɔ zɛa lɛ ɔ nɛ kɛ wa zɛ do sa'de kɛ a zélé nu wele a gɔ ni. Kɔ mɔ gálá lɛ, hã lɛ kpolo tɛ lɛ dɛ 'da mɔ, we kɛ mɔ a NWA, mɔ a Gale 'da lɛ.

¹⁹ Lɛ siki zi 'do lɛ hã mɔ, nɛ nde ngangga ni, lɛ dɛa 'bako, nɛ lɛ kɔ̃a we kpolo tɛ lɛ 'da mɔ. Mɔ fĩ li lɛ, nɛ lɛ ĩ ti 'dã mɛ 'da lɛ. Ngangga ni, sape ba li lɛ, nɛ lɛ bili zu lɛ nù we kɛ lɛ dɛa zi 'dã mɔ, 'da fala lɛ 'bana do be ni.’

²⁰ “Aa nɛ, Oisraɛlɛ, nɛ zélé! Nɛ a obenɔ 'da mi ngɔ sila mi, mi kɔ̃ gɛnɛ nɛ wena. 'Da fala kɛ mi dãlã do nɛ ia, nɛ nde sila mi fé ngɔ nɛ gɔ. Mi ba sila mi vɛ̃ hã nɛ, nɛ mi wè tɛ la fala dɛ 'bako hã nɛ gɔ.

²¹ Nɛ gbíní kasi li wala 'da nɛ, nɛ nɛ fá we kpa 'bɔ wala nɛ la zi nɛ ni. Nɛ, Oisraɛlɛ, nɛ kpóló tɛ nɛ 'do, nɛ sí dɛ kɔ lenɔ 'da nɛ.

²² Nɛ, owi nga zunɔ gɛ, nɛ si tɛ zĩ tɛ nɛ iko we ge nde? Nɛ kpolo sɛ tɛ nɛ 'da mi soe ki nge nde? Nɛ zɔ́, mi NWA, mi dɛa mbé mɔ ngɔ nù gɛ, nɛ wele zɔ̃ kuti mɛ ni gɔ. Ma ɔ nɛ wuko kɛ a fa wili do tɛ̃ a ni.”

Gale gba mbé tɔkɔ do owinɔ 'da a

²³ NWA ngɔ mɔ nyanga nza vɛ̃, Gale 'da Oisraɛlɛ tɔ̃a na: “'Da fala kɛ mi gese Oyuda dɛ kɔ lenɔ 'da wa, nɛ wa tɔ̃ sɛ 'bɔ tɛ ngɔ nù Yuda, do kɔ lenɔ 'da wa na: ‘E kɔ NWA Gale wele nu a tɛ kala santo kɔ le Yeruzalɛmɛ, we kɛ mɛ a fala kɛ a, wele bɔlɔ zu, a ɔ do ma ni!’

²⁴ Owi ngɔ nù Yuda vɛ̃, wanɔ kɔ gã lenɔ, do Owi wa fɔ, do Owi dala nadalamɔ, wa mba sɛ ngba wa, nɛ wa ɔ dɛ di ni.

²⁵ Mi nganda sɛ sila wanɔ wa mbɔkɔ ni, nɛ mi hã sɛ nyɔngɔmɔ hã wanɔ wa fe wɛ ni.

²⁶ Ma kɛ winɔ wa kulu sɛ ngɔ li yala, nɛ wa tɔ̃ na: ‘Mi ɔa yala de wena.’

²⁷ “Mi NWA, mi tɔ̃a na, mbe tũ kpo, nɛ mi dɛ sɛ na, ngɔ nù Israɛlɛ do Yuda, ma dunu do Owele do onadalamɔ.

²⁸ Kɛ di gbaa ni, mi tɛ hã etumbu hã wa. Wa ɔ li mi nɛ te tabi tɔa ni. Mi zu'du zi te ni dɛ nù, nɛ mi gbini gbakɔ̃ nɛ. Mi zɛa tɔa dɛ nù, nɛ mi 'danga ma. Nɛ nde ngangga gɛ, mi nɛ siki li mi dɛ tɛ ma, nɛ mi 'dafa sɛ 'bɔ tɔa ni, nɛ mi mi te dɛ olo nɛ.

²⁹ Wa tɔ̃ do gba we na: ‘Okpasa winɔ wa la'da zi wala yolo, nɛ nu benɔ fia gbato olo wa.’ Nɛ nde do kɔ̃ tũi ni, wa tɔ̃̀ sɛ 'bɔ gba we ni gɔ.

³⁰ Mba gɔ, wi kɛ a la'da wala yolo ni, nɛ nu a wele nɛ ma fe gbato. Na mɛ ni, wele do wele a fe sɛ fio 'dã mɛ 'da a wele nɛ.”

³¹ NWA tɔ̃a na: “Mbe tũ kpo, nɛ mi gba sɛ mbé tɔkɔ do Oisraɛlɛ, do Oyuda.

³² Nɛ gba tɔkɛ ni, ma wé sɛ kɔ̃ do kɛ mi gba zi do oyaa wa ni gɔ. Mi gba zi ma do wa, do 'da fala kɛ mi 'bia zi nu kɔ̃ wa, nɛ mi fua wa ngɔ nù Ezipeto dɛ nza ni. Nɛ nde gɛnɛ kɔ mi zi a nwa ngɔ wa ni, wa 'danga zi gba tɔkɛ ni do'do.

³³ Mbé gba tɔkɛ mi gba sɛ do Oisraɛlɛ ni, ma sɛ nɛ́: Mi dɛ sɛ na mbulanɔ 'da mi le dɛ zu wa, nɛ mi kɔmɔ sɛ ma dɛ kɔ sila wa, nɛ mi sɛ a Gale 'da wa, nɛ wa sɛ a owinɔ 'da mi.

³⁴ Wa bé sɛ 'bɔ wenɔ 'da mi hã ongba wa bia, sɛ nɛ wa ĩ ti mi NWA de gɔ. Mba gɔ, wa vɛ̃, yolo ngɔ be we hɔ ngɔ kpasa wi, wa ĩ sɛ ti mi. Mi ele sɛ 'dã mɛnɔ do yɔa ti dɛa mɛnɔ 'da wa, nɛ mi lénggé sɛ 'bɔ do ma gɔ. Mi NWA, mi tɔ̃a ni.” NWA tɔ̃a na:

³⁵ “Wi ia wese na ma gba, nɛ ma to do gba wese a wio nde? Wi ba nu ɛ hã zɛkɛ do osɔlanɔ na, ma to do tũi, wi a wio nde? Wi a mi NWA ngɔ mɔ nyanga nza vɛ̃.

³⁶ Mi kpua mbulu na, nu kɔnggɔ Oisraɛlɛ ma 'bana sɛ fai, ndɔti nɛ a kɛ li nza do nùi ma 'danga sɛ.

³⁷ “Fala kɛ mi zɔ wele kɛ a ĩ ti nyɛlɛ li nza dɛ ngɔ i, tabi 'da 'du nùi dɛ ti nɛ, sɛ nɛ mi kumu sɛ wá Oisraɛlɛ vɛ̃, we 'dã mɛnɔ da wa de. Mi NWA, mi tɔ̃a ni.”

³⁸ NWA tɔ̃a na: “Mbe tũ kpo, nɛ wa 'dafa sɛ ongbo nu le Yeruzalɛmɛ dɛ olo nɛ, nɛ ma sɛ a le mɔ́ mi. Wa 'dafa sɛ ma yolo do tɛ nu ngala tɔa li nɛ a Hananeɛlɛ ni, gbaa we hɔ tɛ nu ngboe li Gbala dɛlɛ ni.

³⁹ Wa zĩ sɛ ombé ngbala le, ndo do si 'biti gɛ̃a wese we la dɛ tɛ ngɔ kala Garɛbɛ. Nɛ wa yolo sɛ di ni, nɛ wa la si Goa.

⁴⁰ Falanɔ gɛ vɛ̃ ma le sɛ dɛ kɔ le. Mɛ sɛ a gbangɔlɔ̃ mi do winɔ, do kɛ we da do bũ dɔa sa'denɔ, mba do nùnɔ vɛ̃ kɛ zã nu fua lì Sedroni, gbaa we hɔ tɛ gbala nu ngbo Mbalatanɔ, tɛ si 'biti gba wese. Falanɔ ni vɛ̃ sɛ a mɔ́ mi. Wa 'dángá sɛ ma gɔ, nɛ wa gbíní sɛ 'bɔ ngboe gɔ.”