Yeremi 30 - WE NU GALE 1995

Gale kpua mbulu hã owinɔ 'da a

¹ NWA Gale 'da Oisraɛlɛ tɔ̃a hã mi na:

² “Mɔ kɔ̀mɔ̀ wenɔ vɛ̃ kɛ mi tɔ̃a hã mɔ ni kɔ 'buku,

³ we duzu kɛ mbe tũ kpo, nɛ mi lengge sɛ owinɔ 'da mi, Oisraɛlɛ do Oyuda, nɛ mi gese sɛ wa dɛ ngɔ nùi mi hã zi hã oyaa wa ni, nɛ wa ba sɛ 'bɔ ma do mɔ́ wa. Mi NWA, mi tɔ́a ni.”

⁴ NWA tɔ́a hã Oisraɛlɛ do Oyuda na:

⁵ “Mi zila gɛlɛ owinɔ tɛ zɛ nu wa. Dungu fio 'bɔ bina, tati a kili do kili.

⁶ Nɛ áká tɛ nɛ, nɛ nɛ lénggé mɔ sɛ! Wi wili ko kula kua nde? Kɔ gulu kɛ mi zɔ owi wilinɔ vɛ̃, nɛ nde wa tɔɛ kɔ wa gbogbolo wa ɔ nɛ wuko kɛ a do zɛlɛ kula ni we ge nde? Gulu kɛ li winɔ vɛ̃ ma fila do kili ni we ge nde?

⁷ Kɔ tũi gɛ 'danga nɛa ngɔ gele kɔ̃ tũnɔ vɛ̃, mɛ a kɔ tũ zɛlɛ tɛ wi ngboo. Mɛ a 'da fala 'bako we obe zã Yakɔbɔ! Nɛ nde wa fé sɛ gɔ, wa hɔ sɛ nza kɔ nɛ do ba tɛ wa.”

⁸ NWA ngɔ mɔ nyanga nza vɛ̃ tɔ́a na: “Do kɔ̃ tũi ni, nɛ mi fo sɛ wa ti mbula 'da ogele winɔ kɛ ma dĩlĩ wa ɔ nɛ tole ngbangboe ni do'do, nɛ mi yala sɛ fɛlɛ nyanga wa. Wa ɔ́ sɛ 'bɔ ngbá ti ogele wele gɔ.

⁹ Nɛ nde wa dɛ sɛ olo nu mi, NWA Gale 'da wa, do olo nu be zã Davidi, kɛ mi e sɛ a do nwa 'da wa ni.

¹⁰ “Aa nɛ, owinɔ 'da mi, nɛ tɛ dɛ̃ kili gɔ, Nɛ, Oisraɛlɛ, nɛ tɛ zɛ̃ nu nɛ gɔ. Mba gɔ, mi nɛ kpasa nɛ do obe zã nɛ, tɛ ngɔ nùnɔ nyɛlɛ ndũu, kɛ wa 'dɔlɔ do nɛ ni. Nɛ, Oisraɛlɛ, nɛ si sɛ dɛ ngɔ nùi 'da nɛ, nɛ kpa sɛ gɛ̃a dungu, nɛ fo sɛ 'bɔ wi tulu nɛ bina.

¹¹ Mi do nɛ boe, mi kpasa sɛ nɛ. Mi kumu sɛ nu kɔnggɔ winɔ vɛ̃ kɛ mi pɛsɛ zi nɛ dɛ ngɔ nùi 'da wa ni. Nɛ nde kɛ 'da nɛ, mi kùmù sɛ nɛ gɔ. Mi hã sɛ etumbu hã nɛ do li zuma nɛ. Mba gɔ, nɛ wè do zɔlɔ kpa etumbu gɔ. Mi NWA, mi tɔ́a ni.”

¹² NWA tɔ́a hã owinɔ 'da a na: “'Bakoe 'da nɛ é sɛ gɔ, nɛ kpa sɛ ngamɔ fai.

¹³ Fo wi lengge do nɛ kɔ 'bakoe nɛ kpa ni bina. Daninɔ 'da nɛ ma dɛa ma do'do, fo ina a li nɛ na ma ɛ̃ bina.

¹⁴ Nɛ ɔ nɛ wuko kɛ owi wili fa a wa lénggé 'bɔ do a gɔ, nɛ ta zu wa ila ngɔ a do'do ni. Mi hã etumbu hã nɛ gã wena, mi dɛa do nɛ ɔ nɛ kɛ mi a wi sɛnɛ nɛ ni. We kɛ nɛ dɛa yɔa ti dɛa mɔ, nɛ 'dã mɛnɔ 'da nɛ dɛlɛ wena.

¹⁵ Gulu kɛ nɛ ala nu nɛ we zɛlɛ tɛ nɛ kpa fai, nɛ ma mbɔ́kɔ́ mbe gɔɛ ni we ge nde? Mi a mi hã etumbui ni hã nɛ, we kɛ nɛ dɛa yɔa ti dɛa mɔ, nɛ 'dã mɛnɔ 'da nɛ dɛlɛ wena.

¹⁶ Nɛ nde ngangga gɛ, wa gbɛ sɛ tɛ mɛ 'bɔ owinɔ, kɛ wa gbɛ nɛ ni. Nɛ owinɔ wa sɛnɛ nɛ ni, wa la sɛ tɛ mɛ 'bɔ kɔlɔ 'duli. Wanɔ kɛ wa kala mɛnɔ kɔ̃ nɛ ni, owele wa kala sɛ tɛ mɛ 'bɔ mɔ kɔ̃ wa. Nɛ wanɔ kɛ wa zũ mɛnɔ 'da nɛ ni, owele wa zũ sɛ tɛ mɛ 'bɔ mɛnɔ 'da wa.

¹⁷ Owinɔ wa tɔ̃ na: ‘Mi NWA, mi bɛ̃a gɛnɛ le 'da nɛ Sioni, nɛ fo wi lengge 'bɔ do nɛ bina.’ Nɛ nde mi ba sɛ nɛ dɛ ngɔ, nɛ mi a sɛ daninɔ 'da nɛ na ma ɛ̃. Mi NWA, mi tɔ̃a ni.”

¹⁸ NWA tɔ̃a 'bɔ na: “Aa nɛ, onu kpala Israɛlɛ, mi dɛ sɛ 'bako hã nu fɛlɛ kulanɔ 'da nɛ, nɛ nɛ kpa sɛ dia dungu. Nɛ 'dafa sɛ gã lenɔ 'da nɛ, nɛ nɛ zĩ sɛ tɔanɔ 'da nɛ dɛ olo nɛ zi ni.

¹⁹ Nɛ owinɔ kɛ wa ɔ sɛ di ni ni, wa ga sɛ zuma sambala, nɛ wa he hiamɔ yangga. Mi wele sɛ nu mi tɛ nɛ, nɛ nɛ kó sɛ, nɛ nɛ dɛlɛ. Wa mɔ́mɔ́ sɛ 'bɔ nɛ gɔ, we duzu kɛ mi hã sɛ gã dɔ̃lɔ̃ li hã nɛ.

²⁰ Mi gese sɛ ngawi 'da nɛ zi ni dɛ olo nɛ, nɛ nɛ mba sɛ 'bɔ li ngba nɛ dɛ dati mi. Nɛ mi hã sɛ etumbu hã Owi zɛlɛ tɛ nɛ.

^21-22 Mbe nya nɛ ngboo dɛ sanga nɛ ni, a hɔ a sɛ nwa ngɔ nɛ. Mi hã sɛ wala hã a, nɛ a kɔlɔ sɛ do mi. Mba gɔ, wi kɛ mi hã wala hã a gɔ, kɔ a kɔlɔ do mi, nɛ nde a fa fio. Nɛ sɛ a owinɔ 'da mi, nɛ mi sɛ a Gale 'da nɛ. Mi nwa, mi tɔ́a ni.”

²³ Nɔ̃lɔ̃ zã 'da nwa, ma tɛ sɛ dɛ ngɔ owi dɛ 'dã mɛnɔ ɔ nɛ gba bũ kamba ni.

²⁴ Nɛ ma sɔ́kpɔ́ sɛ gɔ gbaa ndɔti nɛ a kɛ a dɛ mɛnɔ vɛ̃ a handa we dɛ ma ni. Nɛ mbe tũ kpo, nɛ owinɔ 'da a, wa zele sɛ gulu nɛ.