Yeremi 3 - WE NU GALE 1995

Obe Israɛlɛ wa ɔ nɛ la zala wuko ndumba ni

¹ NWA tɔ̃a na: “Fala kɛ wi wili bɛ̃ kɛnɛ ɛ, kɔ a la, hã a ba gele wili, nɛ kuti wili a wia we kpolo 'bɔ tɛ̃ ɛ 'da a nde? Gɔ! We kɛ wuke ni a hɔa wi ndi. Ma tɛ mɛ 'bɔ ni we nɛ, obe Israɛlɛ, nɛ yɛnggɛ 'dɔkɔlɔ ogele galenɔ ɔ nɛ wuko ndumba ni, nɛ nɛ kɔ̃a we kpolo 'bɔ tɛ nɛ 'da mi nde?

² Nɛ sókó okalanɔ vɛ̃, nɛ nɛ ĩ sɛ na, kala kɛ nɛ hɔ tɛ nɛ we dɔnggɔ ogele galenɔ gɔɛ ni, ma bina. Nɛ yolo zi dɛ li walanɔ, nɛ nɛ 'bɔ 'da ogalenɔ nɛ kɔ̃a wa ni. Nɛ dɛ zi ɔ nɛ Oarabɛnɔ kɛ wa nɛ tɛ li gba zɔ̃ i, nɛ wa dungu we 'bɔ 'da Owi la walanɔ we gbɛ wa ni. Nɛ dɛa zi na, nùi ma hɔ mɔ ndi li mi, we 'dã dɛa to tɛ nɛ, do vĩ zu dɛa mɛnɔ 'da nɛ.

³ Ma kɛ mi bɛ̃a zi na, kolo tɛ tɛ̃ gɔ, nɛ kolo tɛ̀ zi 'bɔ do li zɔlɔ nɛ gɔ. Nɛ nde nɛ 'bana dɛ nga zu ɔ nɛ ondumba ni, nɛ sape li nɛ bina.

⁴ “Nɛ ngangga ni, nɛ dɛ́ kili he mɔ do zu li mi gɔ, nɛ nɛ tɔ̃ na: ‘Mɔ a baa lɛ, nɛ yolo tɛ kɛ lɛ 'bana zi be ni, mɔ kɔ̃ zi lɛ wena!

⁵ Kɔ mɔ 'bana sɛ do nɔ̃lɔ̃ zã dɛ tɛ lɛ fai nde? Nɛ mɔ ba sɛ mãlã lɛ dɛ zã mɔ fai nde? Gɔ!’ Ki ni a wenɔ kɛ nɛ obe Israɛlɛ, nɛ tɛ tɔ̃ ma, nɛ nde nɛ 'bana tɛ dɛ 'dã mɛnɔ vɛ̃ kɛ ma wia do nɛ ni!”

Ma wia na Oisraɛlɛ do Oyuda wa gbala 'dã mɛnɔ 'da wa

⁶ Do 'da fala Yoziasi zi a nwa ngɔ nù Yuda ni, nɛ NWA tɔ̃ 'bɔ hã mi Yeremi na: “Mɔ zɔa mɛ Oisraɛlɛ wa dɛa ni nde? Wa siki 'do wa hã mi, nɛ wa nɛa 'dɔkɔlɔ ogele galenɔ tɛ ngɔ kalanɔ, do tɛ ti tenɔ vɛ̃ kɛ nwá nɛ 'bɔa nɛ ge nde ni. Nɛ wa dɛa mɔ tɛ wa ɔ nɛ owuko ndumba ni.

⁷ Nɛ mi lengge zi na, olo 'dã mɛnɔ 'da wa vɛ̃, nɛ wa kpolo sɛ tɛ wa 'da mi. Nɛ nde wa dɛ̃ ni kpo gɔ. Nɛ onya wa, Oyuda kɛ wa bɛ̃a 'bɔ gɛnɛ mi ni, wa zɔa mɛnɔ ni vɛ̃.

⁸ Oyuda wa zɔa 'bɔ na, mi bɛ̃a gɛnɛ Oisraɛlɛ, ɔ nɛ kɛ wi wili bɛ̃ do wuko ni. Nɛ mi ndaka wa we 'dã dɛa to tɛ wa, ɔ nɛ kɛ wa ndaka do wuko ba wili, kɛ a ɔa do gele wili ni. Gɛnɛ kɔ Oyuda wa zɔa ma, nɛ nde wa dɛ̃ mbe kili kpo gɔ. Wa siki 'bɔ 'do wa hã mi, nɛ wa nɛa 'dɔkɔlɔ ogele galenɔ, ɔ nɛ owuko ndumba ni.

⁹ Wa dɛa mɔ tɛ wa ɔ nɛ wuko mɔ wili, kɛ a ɔa do gele wili ni. We duzu kɛ wa dɔnggɔ osɛa tenɔ, do kpikima tanɔ. Nɛ 'dã dɛa to tɛ wa, ma dɛa na, nùi hɔ mɔ ndi li mi Gale.

¹⁰ 'Do 'dã mɛnɔ ni vɛ̃, nɛ Oyuda, kɛ wa a nya Oisraɛlɛ ni, wa tɔ̃a we kpolo tɛ wa 'da mi. Nɛ nde wa tɔ̃a do nu wa iko, nɛ wa kìfì sila wa gɔ. Mi NWA, mi tɔ̃a ni.”

¹¹ Nɛ nwa tɔ̃ 'bɔ hã mi na: “Mi zɔa na, gɛnɛ kɔ Oisraɛlɛ wa dɛa 'dã mɔ, nɛ nde 'dã mɛ 'da wa ma ga ɔ nɛ kɛ 'da Oyuda gɔ.

¹² Kɔ mɔ lá si gbãlã ngɔ, hã mɔ sá mbula gɛ hã Oisraɛlɛ na, mi nwa, mi tɔ̃a na, wa kpolo tɛ wa 'da mi. Wa dɛ ni, nɛ mi dɛ sɛ 'bako hã wa, nɛ mi sɛ 'bɔ do nɔ̃lɔ̃ zã bina, nɛ mi bá sɛ 'bɔ mãlã wa dɛ zã mi gɔ.

¹³ Wa gbálá tati a 'dã mɛnɔ 'da wa, nɛ wa tɛ kàfà na, wa bɛ̃a zi gɛnɛ mi, NWA Gale 'da wa ni gɔ. Wa gbálá tɛ wa na, wa nɛa zi 'dɔkɔlɔ ogele galenɔ tɛ ti tenɔ kɛ nwá nɛ 'bɔa nɛ ge nde ni, nɛ wa zèlè zi we nu mi gɔ. Mi NWA, mi tɔ̃a ni.”

¹⁴ NWA tɔ̃a na: “Nɛ, Owi dɛ mɔ sapenɔ gɛ, nɛ kpóló tɛ nɛ 'da mi, we kɛ mi a wele nɛ! Tɛ kɔ lenɔ 'da nɛ kpo kpo, mi ba sɛ wele kpo, nɛ tɛ nu kpala nɛ kpo, mi kala sɛ Owele bɔa, nɛ mi gese sɛ wa dɛ tɛ ngɔ kala Sioni.

¹⁵ Mi fa sɛ owinɔ kɛ wa wia li mi ni, nɛ wa kã sɛ nɛ ɔ nɛ kɛ ma wia ni, do hã zã ngboo.

¹⁶ Nɛ 'da fala kɛ nɛ dɛlɛ sɛ ngɔ nùi ni, nɛ nde Owele wa tɔ̃́ sɛ 'bɔ we Sanduku Gba Tɔkɛ gɔ. Wi lengge sɛ 'bɔ do ma bina, nɛ ta zu wele gbá sɛ 'bɔ ngɔ nɛ gɔ. Wa dɛ́ sɛ 'bɔ wɔ tɛ ma gɔ, nɛ wa dɛ́ sɛ 'bɔ mbé nɛ gɔ.

¹⁷ 'Da fala ni ma hɔ, nɛ wa sa sɛ li Yeruzalɛmɛ na: ‘Le 'da nwa’, we duzu kɛ mi Gale, mi dungu nwa di ni. Nɛ owinɔ vɛ̃ wa nɛ sɛ dɛ di ni we dɔnggɔ mi. Nɛ wa la sɛ fala dɛ yia nga zui 'da wa do'do.

¹⁸ Nɛ Oisraɛlɛ wa mba sɛ ngba wa do Oyuda, nɛ wa yolo sɛ kɔlɔ 'duli tɛ si gbãlã ngɔ, nɛ wa kpolo tɛ wa dɛ ngɔ nùi kɛ mi hã zi hã oyaa wa do mɔ́ wa ni.”

Owinɔ 'da Gale wa kpula tɛ wa dɛ 'da a

¹⁹ NWA tɔ̃a na: “Aa nɛ, obe Israɛlɛ, mi tɔ̃a zi na, nɛ a Okuti benɔ 'da mi, nɛ mi ba sɛ nùi kɛ ma nɛa ngɔ nùnɔ vɛ̃ ni hã nɛ! Mi lingga zi na, nɛ sa sɛ li mi na baa nɛ, nɛ nɛ síkí sɛ 'bɔ 'do nɛ hã mi gɔ.

²⁰ Nɛ nde nɛ bɛ̃a we nu mi, nɛ nɛ dɛa mɔ tɛ nɛ ɔ nɛ wuko kɛ a ɔa do gele wili ni. Mi NWA, mi tɔ́a ni.”

²¹ Mi Yeremi, mi zele gɛlɛ obe Israɛlɛ tɛ ngɔ kalanɔ i, nɛ nde wa tɛ he mɔ, nɛ wa tɛ ala nu wa, we kɛ wa yɔa wala, nɛ ta zu wa ila ngɔ NWA Gale 'da wa.

²² NWA tɔ̃a na: “Aa nɛ, owinɔ vɛ̃ kɛ nɛ siki zi 'do nɛ hã mi NWA ni, nɛ kpóló tɛ nɛ 'da mi. Mi kpasa sɛ nɛ, nɛ mi dɛ sɛ na, nɛ hɔ 'bɔ odia wele.” Nɛ nɛ tɔ̃ sɛ na: “Ĩi, lɛ kɔ̃a we kpolo tɛ lɛ 'da NWA, we kɛ a a NWA Gale 'da lɛ.

²³ Lɛ dɔnggɔ zi ogele galenɔ ngɔ kalanɔ i, nɛ ma gàlà lɛ sĩ gɔ. Ĩ na, wi kɛ lɛ, obe Israɛlɛ, lɛ wia we kpa kpasi kɔ̃ a ni, wi tati a NWA Gale 'da lɛ.

²⁴ Nɛ nde ba fili do gale Bala, kɛ a a gale sape ni, ma kɛ ma dɛa na, mɔ tɛ lɛ e vɛ̃. Obatanɔ do ongɔmbɔnɔ, obulu benɔ do oboko benɔ 'da lɛ wa ia dɛ kɔ̃ a. Omɛnɔ vɛ̃ kɛ oyaa lɛ wa kpa zi ni, ma ia.

²⁵ Ma wia na lɛ fe sape nɛ, nɛ lɛ kɔ̃ gɛnɛ 'dã dɔ̃lɔ̃ li nɛ. We kɛ lɛ do oyaa lɛ, lɛ dɛa 'dã mɔ gbali NWA Gale 'da lɛ, nɛ lɛ zèlè we nu a gɔ.”