Yeremi 29 - WE NU GALE 1995

Yeremi kɔma mbɛti hã Oyudanɔ tɛ ngɔ nù Babilonia

¹ Mi kɔma zi mbɛti hã owinɔ wa la kɔlɔ 'duli tɛ ngɔ nù Babilonia i ni. Wi a onganganɔ, do owi gba olo nu Gale, do okumunɔ, do otala winɔ vɛ̃ kɛ nwa Nabukɔdɔnɔzɔrɛ kala zi wa tɛ Yeruzalɛmɛ do ngbá, nɛ a si do wa ni.

² Mi dɛa mbɛti ni do 'do kɛ nwa Yɛkonia, do naa a, do ogã winɔ, do okpasa wi ngɔ nù Yuda do kɔ le Yeruzalɛmɛ, fala nɛ kpo do owi dɛ dulanɔ, do owi dɛ fungulanɔ, wa la zi kɔlɔ 'duli ni.

³ Nɛ mi hã mbɛti ni hã Elasa, be 'da Safanɛ, do Gɛmaria, be 'da Hilkia. Mba gɔ, Sedekiasi, nwa ngɔ nù Yuda, tumba zi wa hã nwa Nabukɔdɔnɔzɔrɛ tɛ ngɔ nù Babilonia i. Mi kɔma zi na:

⁴ “NWA ngɔ mɔ nyanga nza vɛ̃, Gale 'da Oisraɛlɛ, a tɔ̃ hã winɔ vɛ̃ kɛ a kala zi wa tɛ Yeruzalɛmɛ, nɛ a 'dɔlɔ wa dɛ ngɔ nù Babilonia i ni na:

⁵ ‘Nɛ dɛ́ tɔa, nɛ nɛ ɔ́ kɔ nɛ. Nɛ wá fɔ, nɛ nɛ kpásá do nyɔngɔmɔ li nɛ.

⁶ Nɛ bá wuko, nɛ nɛ kó obe zã nɛ. Nɛ bá ko hã obulu benɔ 'da nɛ, nɛ oboko benɔ 'da nɛ wa bá wili, nɛ wa ko be zã wa. Nɛ dɛ́lɛ́ dɛ i mɔ, nɛ nɛ sánzá!

⁷ Nɛ fá we 'dafa le kɛ mi nwa, mi 'dɔlɔ nɛ dɛ kɔ nɛ ni, hã ma de. Nɛ nɛ sámbálá mi we ma. Mba gɔ, fala kɛ le ni ma de, nɛ nɛ kpa sɛ tɛ mɛ 'bɔ dia dungu dɛ di ni.’

⁸ “NWA ngɔ mɔ nyanga nza vɛ̃, Gale 'da Oisraɛlɛ tɔ́a 'bɔ na: ‘Nɛ tɛ kɔ̃̀ gɛnɛ bɛlɛnɔ 'da owi gba olo nu mi Gale, kɛ wa sanga nɛ ni gɔ. Nɛ nɛ tɛ kɔ̃̀ 'bɔ gɛnɛ lɛnggɛ bɛlɛnɔ 'da owinɔ kɛ wa tɔ̃ gulu mɛnɔ ma hɔ sɛ 'do ni gɔ. Nɛ tɛ kɔ̃̀ gɛnɛ wenɔ 'da owi tɔ̃ gulu yalɛnɔ gɔ.

⁹ Wa 'bili bɛlɛ hã nɛ do zu li mi, nɛ nde mi tòmbò wa gɔ. Mi NWA, mi tɔ́a ni.’

¹⁰ “NWA tɔ́a 'bɔ na: ‘Onwa ngɔ nù Babilonia wa e sɛ mbula ngɔ nɛ 'do 'bu sabɛlɛ sambo. Kɔ sabɛlɛnɔ ni ma e, nɛ mi gbaka sɛ nɛ. Nɛ mi dɛ sɛ mbuli mi kpua zi hã nɛ ni. Mi gese sɛ nɛ dɛ tɛ Yeruzalɛmɛ.

¹¹ Mba gɔ, mi nwa, mi zu mi kpo, mi ĩ ti mɛ mi kɔ̃a we dɛ hã nɛ ni, Mi kɔ̃̀ na, nɛ kpa 'bako gɔ, nɛ nde nɛ ɔ do yangga. Mi kɔ̃a na, 'do gɛ, nɛ nɛ kpa dia dungu kɛ nɛ gbini ma do zã nɛ ni.

¹² Fala kɛ nɛ sa mɔ hã mi, kɔ nɛ sambala mi, nɛ mi zele sɛ sambala 'da nɛ.

^13-14 Mi NWA, mi tɔ́a na, fala kɛ nɛ fa mi do sila nɛ vɛ̃, nɛ mi dɛ sɛ na nɛ kpa mi. Mi fo sɛ nɛ tɛ ngɔ nùnɔ vɛ̃ mi pɛsɛ zi do nɛ ni. Mi ngɛmɛ sɛ li nɛ, nɛ mi gese nɛ dɛ tɛ fala mi kala zi nɛ tɛ nɛ, nɛ mi 'dɔlɔ nɛ ni. Nɛ nɛ kpa sɛ dia dungu. Mi NWA, mi tɔ́a ni.’

¹⁵ “Nɛ tɔ̃a na, NWA Gale tumba Owi gba olo nu a hã nɛ tɛ ngɔ nù Babilonia.

¹⁶ Kɔ nɛ zélé we a tɔ̃ dɛ ngɔ nwa kɛ a dungu dɛ olo Davidi, do onya nɛ kɛ wa là zi do nɛ kɔlɔ 'duli gɔ, nɛ wa 'bana dɛ kɔ le Yeruzalɛmɛ gɛ ni.

¹⁷ NWA ngɔ mɔ nyanga nza vɛ̃ tɔ̃a na: ‘Mi tombo sɛ bolo, do gba wɔ, do 'dã zɛlɛ na ma gbɛ wa. Mi 'danga sɛ wa vɛ̃, nɛ wa ɔ sɛ nɛ wala te figɛ kɛ ma mbulu, nɛ ma hɔ mɔ nyɔ nyɔnga gɔ ni.

¹⁸ Mi ndaka sɛ 'do wa do bolo, do gba wɔ, do 'dã zɛlɛ, do tɛlɛ tɛ kɛ na, owinɔ ngɔ nùi gɛ vɛ̃ wa zɔ wa, nɛ wa zɛ nu wa. Nɛ tɛ falanɔ vɛ̃ mi pɛsɛ sɛ do wa ni, owinɔ wa tana sɛ kili we zɔ mɛ ma dɛa wa ni. Wa mɔmɔ sɛ wa, nɛ wa sa li wa kɔ fɔmba.

¹⁹ Mi dɛ sɛ do wa ni, we duzu kɛ mi tumba zi owi gba olo nu mi hã wa 'do ngbɛ ɛ do 'do ngbɛ ɛ, nɛ wa kɔ̃̀ we zele wa gɔ.

²⁰ Nɛ vɛ̃ kɛ mi nwa, mi tumba zi nɛ kɔlɔ 'duli tɛ ngɔ nù Babilonia i ni, nɛ zélé we mi tɔ̃ ni.’

²¹ “Nɛ NWA ngɔ mɔ nyanga nza vɛ̃, Gale 'da Oisraɛlɛ tɔ̃a 'bɔ dɛ ngɔ Ahabɛ, be 'da Kolaya, do Sidɛkia, be 'da Maseya, kɛ wa gba olo nu a do bɛlɛ ni na: ‘Mi 'dɔlɔ sɛ wa hã nwa Nabukɔdɔnɔzɔrɛ tɛ ngɔ nù Babilonia, nɛ a gbɛ sɛ wa dɛ gbali nɛ.’

²² Oyudanɔ vɛ̃ kɛ wa la zi kɔlɔ 'duli tɛ ngɔ nù Babilonia i ni, wa we sɛ Ahabɛ do Sidɛkia do we kɔ fɔmba. Nɛ wa tɔ̃ sɛ na: ‘E kɔ NWA dɛ do mɔ ɔ nɛ kɛ a dɛa zi do Ahabɛ do Sidɛkia, kɛ nwa ngɔ nù Babilonia da zi wa li we do tunu li wa, nɛ wa ngutu ni!’

²³ Mɛnɔ ni ma dɛ sɛ wa ni, we duzu kɛ wa dɛa 'dã mɔ tɛ ngɔ nù Israɛlɛ. Wa ɔa do owukonɔ 'da ngba wa, nɛ wa tɔ̃a we do zu li mi NWA. Nɛ nde mi bà zi nu mi hã wa ni gɔ. Mi NWA, mi ĩ ti mɛnɔ ni vɛ̃, nɛ mi a temɔɛ nɛ. Mi NWA, mi tɔ̃a ni.”

Sɛmaya kɔma mbɛti hã nganga Sɛfania

^24-25 NWA ngɔ mɔ nyanga nza vɛ̃, Gale 'da Oisraɛlɛ tumba mi hã Sɛmaya, wi kɔ le Nehelamɛ. Mba gɔ, Sɛmaya kɔma zi mbɛti do zu li a wele nɛ, nɛ a tombo ma hã nganga Sɛfania, be 'da Maseya, do ogele nganganɔ, do owinɔ vɛ̃ kɛ wa 'bana zi dɛ tɛ Yeruzalɛmɛ nga ni na:

²⁶ “NWA ia zi mɔ do nganga dɛ olo Yoyada, nɛ mɔ hɔa gã nwa nganga kɔ tɔa Tɛmpɛloe. Kɔ ma wia na, li mɔ sɔ̃ tɛ oyia winɔ kɛ wa ba tɛ wa ɔ nɛ owi gba olo nu Gale ni. Mɔ kálá wa do bɔlɔkɔ, nɛ mɔ fí dɔkpɔ nyanga wa.

²⁷ Kɔ gulu kɛ Yeremi, wi kɔ le Anatɔtɛ ba tɛ̃ a ɔ nɛ wi gba olo nu Gale ni dɛ gbali mɔ, nɛ nde mɔ dɛ́ mɔ do a gɔ we ge nde?

²⁸ A tumba mbɛti hã lɛ tɛ Babilɔnɛ nga we mbese lɛ na, 'do lɛ ma nyɛlɛ sɛ kɔlɔ 'duli wena. Kɔ lɛ dɛ́ tɔa, nɛ lɛ ɔ̀ kɔ nɛ, lɛ wá fɔ, nɛ lɛ kpasa do nyɔngɔmɔ li nɛ.”

²⁹ Nɛ nganga Sɛfania tɔlɔ mbɛti ni hã mi.

³⁰ Nɛ nwa tɔ̃a hã mi na,

^31-32 mi tombo toe gɛ hã owinɔ kɔlɔ 'duli i ni do zu li Sɛmaya na: “Mi NWA, mi hã sɛ etumbu hã Sɛmaya do obe zã a vɛ̃. Mi tòmbò a gɔ, nɛ nde a tɛ wele we hã nɛ ɔ nɛ kɛ a a wi gba olo nu mi ni. A dɛa na, nɛ kɔ̃ gɛnɛ bɛlɛnɔ ɛ tɔ̃ ni. Kɔ be zã a kpo 'báná sɛ sanga obe Israɛlɛ gɔ. Nɛ be zã a kpo zɔ́ sɛ odia mɛnɔ kɛ mi dɛ sɛ we owinɔ 'da mi ni gɔ. Mba gɔ, a dɛa na owinɔ 'da mi wa bɛ̃ we nu mi. Mi nwa, mi tɔ̃a ni.”