Yeremi 28 - WE NU GALE 1995

Yeremi do Hanania

¹ Mbe tũ kpo, kɔ zɛkɛ 'da mɔlɔ, kɔ kpo sabɛlɛ kɛ mɛ zi a nalɛ sabɛlɛ dɛa to nwa 'da Sedekiasi tɛ ngɔ nù Yuda ni, nɛ mbe wi gba olo nu Gale kpo tɛ kɔ le Gabaoni, li a a Hanania, be 'da Azurɛ, a wila we hã mi tɛ kɔ tɔa Tɛmpɛlo i. A wila we ni hã mi dɛ gbali onganganɔ, do owinɔ vɛ̃ na,

² NWA ngɔ mɔ nyanga nza vɛ̃, Gale 'da Oisraɛlɛ tɔ̃a na: “Mi nɛ fo dĩ tole mbula kɛ nwa ngɔ nù Babilonia ia zu nɛ ni do'do.

³ Ma 'bana sabɛlɛ bɔa na, mi gese omɔ dɛa tonɔ vɛ̃ kɛ nwa Nabukɔdɔnɔzɔrɛ kala zi kɔ tɔa Tɛmpɛloe, nɛ a si nɛ dɛ Babilɔnɛ i ni dɛ olo nɛ.

⁴ Mi sa sɛ 'bɔ mɔ hã Yɛkonia, nwa ngɔ nù Yuda, kɛ a a be 'da Yoakimɛ ni, fala nɛ kpo do Oyudanɔ vɛ̃ kɛ wa la zi kɔlɔ 'duli tɛ ngɔ nù Babilonia i ni, nɛ mi gese wa. Do gbãlã we, mi fo sɛ nɛ ti mbula 'da nwa ngɔ nù Babilonia do'do. Mi NWA, mi tɔ̃a ni.”

⁵ Mi zila ni, nɛ mi gese hã Hanania dɛ gbali onganganɔ, do owinɔ vɛ̃ kɛ wa zi kɔ tɔa Tɛmpɛlo ni na:

⁶ “Ma a dia! E kɔ NWA dɛ ɔ nɛ kɛ mɔ tɔ̃a ni. E kɔ a dɛ na, olo nu mɔ dɛ gbãlã we. E kɔ a kala omɔ dɛa tonɔ kɔ tɔa Tɛmpɛloe, do owinɔ vɛ̃ kɛ wa la zi kɔlɔ 'duli tɛ ngɔ nù Babilonia i ni, hã a gese wa dɛ dɛ.

⁷ Nɛ nde mɔ zélé we mi nɛ tɔ̃ hã mɔ do owinɔ vɛ̃ gɛ do dia nɛ:

⁸ Owi gba olo nu Gale kɛ wa hɔa zɛ́ dati hã lɛ do mɔ ni, wa tɔ̃a zɛ́ hã ogba gili nu kɔnggɔ winɔ na, bolo do gba wɔ, do 'dã zɛlɛ, ma gbɛ sɛ wa.

⁹ Nɛ nde fala kɛ wi gba olo nu Gale tɔ̃ hã owinɔ na, dungu fio sɛ boe, nɛ winɔ wa dɛ fala ĩ na, wi tumba a wi a nwa ni nɛ nde? Wa ĩ ní fala kɛ olo nu a dɛ tɛ̃ ɛ ni.”

¹⁰ Kɔ Hanania, wi gba olo nu Gale nɛa we zele ni, nɛ a ba te ngbangboe ngɔ gɛlɛ mi ni, nɛ a gbini sanga nɛ.

¹¹ Nɛ a tɔ̃ dɛ gbali winɔ vɛ̃ na: “nwa tɔ̃a na, ma 'bana sabɛlɛ bɔa, nɛ ɛ ba sɛ te ngbangboe kɛ nwa Nabukɔdɔnɔzɔrɛ ia ngɔ gɛlɛ onu kɔnggɔ winɔ vɛ̃ ni, nɛ ɛ gbini sɛ sanga nɛ kpasaa ɔ nɛ kɛ mi gbini do sanga te ngbangboe gɛ.” Mi zila ni, nɛ mi la wa dɛ di ni, nɛ mi si kɛ 'da mi.

¹² 'Do kɛ Hanania, wi gba olo nu Gale gbini sanga te ngbangboe ngɔ gɛlɛ mi ni la be sĩ, nɛ NWA tɔ̃ hã mi na:

¹³ “Mɔ nɛ́, hã mɔ tɔ̃̀ hã Hanania na, mi NWA, mi tɔ̃a na, a gbini sanga ngbangbo kɛ wa dɛa do te, nɛ nde mi e sɛ ngbangbo kɛ wa dɛa do mɔ bolo ni olo nɛ.

¹⁴ Mi NWA ngɔ mɔ nyanga nza vɛ̃, Gale 'da Oisraɛlɛ, mi tɔ̃a na, mi e sɛ ngbangbo mɔ bolo zu 'baka onu kɔnggɔ winɔ ngɔ nùi gɛ vɛ̃. Wa sɛ a ngbá ti nwa Nabukɔdɔnɔzɔrɛ tɛ ngɔ nù Babilonia. Nɛ mi dɛ sɛ 'bɔ na osa'de zamɔ wa zele nu a.”

¹⁵ Dɛ 'do nɛ, nɛ mi tɔ̃ 'bɔ hã Hanania na: “Mɔ, Hanania, mɔ zélé mi do dia nɛ! NWA tòmbò mɔ gɔ, nɛ mɔ dɛa na, owinɔ gɛ wa kɔ̃ gɛnɛ lɛnggɛ bɛlɛ.

¹⁶ Kɔ NWA do tɛ̃ a tɔ̃a na, ɛ nɛ fo mɔ ngɔ nù gɛ do'do. Mɔ fe sɛ dati na, sabɛlɛ gɛ Sɔkpɔ ni. Tua kɛ mɔ tɔ̃a hã winɔ na, zu wa nganda dɛ tɛ NWA.”

¹⁷ Ma hɔa tɛ zɛkɛ 'da sambo kɔ kpo kpo sabɛlɛ ni, nɛ Hanania fe.