Yeremi 27 - WE NU GALE 1995

Nwa Nabukɔdɔnɔzɔrɛ ia winɔ vɛ ti mbula 'da a

¹ 'Do kɛ Sedekiasi, be 'da Yoziasi hɔa nwa ngɔ nù Yuda ni, ma là ngboo gɔ, nɛ NWA tɔ̃ hã mi na,

² mi fa te do ndala, nɛ mi dɛ do te ngbangbo kɛ wa ɛnzɛ ngɔ gɛlɛ sa'de we mana do mɔ ni. Nɛ mi e ma ngɔ gɛlɛ mi we be na, mi a wi ti mbula.

³ Nɛ a tɔ̃ 'bɔ na, onwa ngɔ nù Edɔmɛ, Moabɛ, Amoni, Tirɛ do Sidoni wa tumba wi nɛ tonɔ 'da wa tɛ Yeruzalɛmɛ nga, we zɔ Sedekiasi, nwa ngɔ nù Yuda. Kɔ mi nɛ́, hã mi tómbó to ngbangboe mi ia ngɔ gɛlɛ mi ni do wa hã Onwanɔ 'da wa.

⁴ Nɛ NWA ba 'bɔ nu a hã mi na, mi tombo wa hã onwa ngɔ wa na, ɛ NWA Gale, ɛ tɔ̃a na:

⁵ “Mi, NWA ngɔ mɔ nyanga nza vɛ̃, Gale 'da Oisraɛlɛ, mi dɛa nùi, do owinɔ, do osa'denɔ vɛ̃ kɛ wa ɔ ngɔ nù gɛ ni do ngawi 'da mi wele nɛ. Nɛ mi hã wa hã wi kɛ mi kɔ̃a a ni.

⁶ Kɔ mi handa we 'dɔlɔ nùnɔ 'da nɛ vɛ̃ hã wi toe 'da mi, Nabukɔdɔnɔzɔrɛ, nwa ngɔ nù Babilonia. Nɛ mi dɛ sɛ na, gɛnɛ kɔ osa'de zamɔ, nɛ wa zele nu a.

⁷ Ogele nu kɔnggɔnɔ vɛ̃ wa hɔ sɛ ngbá ti a, do be 'da a, do be yaa a, gbaa we hɔ kɔ̃ tũi kɛ onga nwanɔ wa ba sɛ do nùi 'da a ni.

⁸ “Kɔ fala kɛ Owi nu kɔnggɔ kpo wa bɛ̃ we ɔ ngbá ti Nabukɔdɔnɔzɔrɛ, tabi we ɔ ti mbula 'da a, nɛ mi hã sɛ etumbu hã wa. Mi tombo sɛ bolo, do gba wɔ, do 'dã zɛlɛ hã wa, gbaa na Nabukɔdɔnɔzɔrɛ kumu wa vɛ̃.

⁹ Nɛ tɛ zèlè nu Owi gba olo nu mi Gale, do Owi zɔ gulu mɛnɔ, do Owi tɔ̃ gulu yalɛnɔ gɔ. Owinɔ ni wa tɔ̃ hã nɛ na, nɛ hɔ́ sɛ ngbá 'da nwa ngɔ nù Babilonia gɔ.

¹⁰ Nɛ nde wa 'bili bɛlɛ hã nɛ iko. Kɔ fala kɛ nɛ zele nu wa, nɛ owi sɛnɛ nɛ wa kala sɛ nɛ do ngbá, nɛ mi ndaka sɛ nɛ ngɔ nùi 'da nɛ, nɛ nɛ kumu sɛ.

¹¹ Nɛ nde Owi nu kɔnggɔnɔ kɛ wa kɔ̃ sɛ we ɔ ti mbula 'da nwa ngɔ nù Babilonia, we dɛ ngbá ti a ni, nɛ mi la sɛ wa dɛ ngɔ nùi 'da wa. Nɛ wa ɔ sɛ dɛ di ni, nɛ wa wa sɛ fɔnɔ 'da wa. Mi NWA, mi tɔ̃a ni.”

¹² Mi Yeremi, mi tɔ̃a 'bɔ kpo kpo toe ni hã Sedekiasi, nwa ngɔ nù Yuda na: “Mɔ, do owinɔ 'da mɔ, nɛ kɔ̃́ mbula 'da nwa ngɔ nù Babilonia, nɛ nɛ hɔ́ ngbá ti a, sɛ nɛ nɛ kpasa sɛ de.

¹³ Gulu kɛ nɛ kɔ̃a we fe do gba wɔ, do 'dã zɛlɛ, tabi we fe li bolo ni we ge nde? Nɛ ĩ́ na, mɛ ma dɛ sɛ onu kɔnggɔ winɔ, kɛ wa bɛ̃ sɛ we ɔ ngbá ti nwa ngɔ nù Babilonia gɛ a ni. Ma dɛ sɛ tɛ̃ ɛ ɔ nɛ kɛ NWA tɔ́a ni.

¹⁴ Ombe wi gba olo nu Gale, wa tɔ̃ hã nɛ na, nɛ hɔ́ sɛ ngbá ti nwa ngɔ nù Babilonia gɔ. Kɔ nɛ tɛ zèlè we nu wa gɔ, we duzu kɛ wa 'bili bɛlɛ iko.

¹⁵ NWA do tɛ̃ a, a tɔ́a na, ɛ tòmbò wa gɔ, nɛ nde wa 'bili bɛlɛ do zu li ɛ iko. Kɔ nɛ zele we nu wa, nɛ ɛ ndaka sɛ nɛ tɛ fala gɛ do'do, nɛ nɛ do Owi gba olo nu ɛ Gale kɛ wa 'bili bele hã nɛ ni, nɛ kumu sɛ.”

¹⁶ Nɛ mi tɔ́a olo nu NWA hã onganganɔ, do owinɔ zi di ni ni na: “Nɛ tɛ zèlè nu owi gba olo nu Gale gɔ. Wa tɔ̃ hã nɛ na, Owi Babilonia wa kɔlɔ tɛ gese mbe mɔ dɛa tonɔ kɔ tɔa Tɛmpɛloe, kɛ wa si zi do ma dɛ Babilɔnɛ i ni ia. Ĩ na, wa 'bili bɛlɛ hã nɛ iko.

¹⁷ Nɛ tɛ zèlè nu wa gɔ. Nɛ kɔ̃ gɛnɛ mbula 'da nwa ngɔ nù Babilonia, nɛ nɛ kpasa sɛ. Gulu kɛ le Yeruzalɛmɛ nɛ 'danga nɛ, kɔ ma hɔ olo tɔa ni we ge nde?

¹⁸ Owinɔ wa tɔ̃ toe ni, wa a ngbongbo wi gba olo nu mi Gale nde? Mi a mi tumba wa nde? Fala kɛ mi a mi tombo wa kpaa nde, nɛ wa aka mi NWA ngɔ mɔ nyanga nza vɛ̃, kɔ mi ga owi Babilonia na, wa tɛ kàlà tala omɔ olo gã golenɔ kɛ ma 'bana kɔ tɔa Tɛmpɛloe, do kɔ tɔa 'da nwa ngɔ nu Yuda, do kɔ le gɛ, kɔ wa si do ma gɔ.”

^19-20 Nwa Nabukɔdɔnɔzɔrɛ ba zi nwa ngɔ nù Yuda kɛ li a a Yɛkonia, be 'da Yoakimɛ ni, nɛ a mba a do okumu kɔ le Yeruzalɛmɛ, do wanɔ ngɔ nù Yuda vɛ̃, nɛ a si do wa. 'Da fala ni, nɛ a 'bè zi tɛ obɛlɛdumanɔ, do mɛ ma ɔ nɛ gba sani ni, do ogã saninɔ kɛ ma si siki ni, do ombe mɔ dɛa tonɔ kɔ tɔa Tɛmpɛloe gɔ.

²¹ Kɔ NWA ngɔ mɔ nyanga nza vɛ̃, Gale 'da Oisraɛlɛ, tɔ̃a 'bɔ we ngɔ omɔ gã golenɔ kɛ ma 'bana kɔ tɔa Tɛmpɛloe, do kɔ tɔa 'da nwa ngɔ nù Yuda, do kɔ le Yeruzalɛmɛ ni na:

²² “Owi Babilɔnɛ wa kala sɛ ma vɛ̃, nɛ wa si nɛ. Nɛ ma 'bana sɛ dɛ i mɔ gbaa we hɔ kɔ̃ tũi mi nɛ hã do etumbui hã owi ngɔ nù Babilonia ni. Do 'da fala ni, nɛ mi kala sɛ ma, nɛ mi gese. Mi NWA, mi tɔ̃a ni.”