Yeremi 26 - WE NU GALE 1995

Winɔ wa ba Yeremi we gbɛ a

¹ 'Do kɛ Yoakimɛ, be 'da Yoziasi hɔa nwa ngɔ nù Yuda ni ma là ngboo gɔ, nɛ NWA tɔ̃a hã mi na:

² “Mɔ nɛ́ hã mɔ yolo li fanda tɔa Tɛmpɛloe, nɛ mɔ wélé wenɔ vɛ̃ kɛ mi nɛ ba nu mi na, mɔ tɔ̃ ni. Mɔ tɔ̃ sɛ ma hã owinɔ vɛ̃ kɛ wa yolo kɔ lenɔ tɛ ngɔ nù Yuda, nɛ wa tɛ we dɔnggɔ mi dɛ di ni ni. Mɔ tɔ̃ ma, nɛ mɔ tɛ là we kpo gɔ.

³ Nɛ mbe gɔ, nɛ wa zele sɛ, nɛ wa la sɛ fala 'dã mɛnɔ 'da wa. Fala kɛ wa dɛ ni, nɛ mi kpolo sɛ linggamɛ 'da mi, nɛ mi tómbó sɛ ngamɛ mi handa we tombo olo 'dã mɛnɔ wa dɛa ni gɔ.

⁴ “Mɔ tɔ̃ sɛ hã wa na: Mi NWA, mi tɔ̃a hã nɛ na, nɛ zélé we nu mi, nɛ nɛ dɛ̃ mbulanɔ mi ia hã nɛ ni.

⁵ Nɛ gɛ́ zala nɛ, nɛ nɛ zélé wenɔ 'da owi gba olo nu mi. Mi tombo wa hã nɛ fai, nɛ nde nɛ kɔ̃̀ we zele wa gɔ.

⁶ Hã fala kɛ nɛ zèlè mi gɔ, nɛ mi 'danga sɛ Tɛmpɛloe gɛ, kpasaa ɔ nɛ kɛ mi 'danga zi do fala dɔnggɔ do mi kɔ le Silo i ni. Nɛ owinɔ ngɔ nù gɛ vɛ̃, wa we sɛ le Yeruzalɛmɛ do we, nɛ wa sa sɛ li ma kɔ fɔmba.”

⁷ Mi nɛa tɛ li fanda tɔa Tɛmpɛloe i, nɛ mi tɔ̃a wenɔ NWA tɔ̃a hã mi ni vɛ̃ dɛ zala onganganɔ, do Owi gba olo nu NWA Gale, do owinɔ vɛ̃ wa zi di ni ni.

⁸ Kɔ mi nɛa we da nu mi tɛ lɛnggɛ ni, nɛ wa tɛ, nɛ wa ba mi, nɛ wa he mɔ na: “Mɔ wia do fio!

⁹ Gulu kɛ mɔ gba olo nu NWA Gale na, Tɛmpɛloe gɛ ma 'danga sɛ, ɔ nɛ kɛ fala dɔnggɔ do a tɛ kɔ le Silo, ma 'danga zi nɛ ni we ge nde? Gulu kɛ mɔ tɔ̃ na, le gɛ ma 'danga sɛ, nɛ ma dɛ olo tɔa ni we ge nde?” Nɛ owinɔ zi kɔ Tɛmpɛloe ni wa tɛa vɛ̃, nɛ wa linggi mi.

¹⁰ Kɔ Owi olo li nwa tɛ ngɔ nu Yuda, wa nɛa we zele we ma la ni, nɛ wa kulu ngɔ tɛ nu tɔa nwa i, nɛ wa tɛ, nɛ wa mba li ngba wa dɛ nu ngbo tɔa Tɛmpɛloe, kɛ wa sa li nɛ na, “Mbé nu ngbo” ni.

¹¹ Nɛ onganganɔ, do Owi gba olo nu Gale, wa tɔ̃ hã wa do owinɔ vɛ̃ na: “Wi gɛ, a wia do fio, we kɛ a tɔ̃a 'dã we dɛ ngɔ le Yeruzalɛmɛ. Nɛ do tɛ nɛ, nɛ zila wenɔ a tɔ̃a ni.”

¹² Nɛ mi tɔ̃a hã Owi olo li nwa, do owinɔ vɛ̃ na: “Wi tumba mi we wele 'dã wenɔ vɛ̃ kɛ nɛ zila dɛ ngɔ Tɛmpɛloe gɛ, do ngɔ le gɛ ni, wi a NWA.

¹³ Kɔ ma wia na, nɛ kífí sila nɛ, nɛ nɛ 'dáfá dɛa to tɛ nɛ, nɛ nɛ zélé wenɔ NWA tɔ̃a ni, sɛ nɛ a kpolo sɛ linggamɛ 'da a, nɛ a tómbó sɛ ngamɛ a handa we tombo hã nɛ ni gɔ de.

¹⁴ Nɛ nde mi kɛ 'da mi dɛ tambala kɔ̃ nɛ iko. Nɛ dɛ́ do mi ɔ nɛ kɛ ma wia li nɛ ni.

¹⁵ Kɔ fala kɛ nɛ gbɛ mi, nɛ Gale a hã sɛ etumbu hã nɛ, do owinɔ kɔ le gɛ vɛ̃. We duzu kɛ nɛ gbɛa wi kɛ a dɛ̀ 'dã mɔ gɔ. Tua kɛ nwa do tɛ̃ a, a tumba mi we tɔ̃ wenɔ ni vɛ̃ takɔ nɛ zele ma.”

¹⁶ Owi olo li nwa, do owinɔ vɛ̃ wa nɛa we zele ni, nɛ wa tɔ̃ hã onganganɔ, do owi gba olo nu Gale na: “Wi gɛ, a wè do fio gɔ, we duzu kɛ wenɔ a tɔ̃ hã lɛ gɛ, mɛ a we nu NWA Gale 'da lɛ ngboo.”

¹⁷ 'Do nɛ, nɛ ombe kɔ okpasa winɔ wa kulu ngɔ, nɛ wa tɔ̃ hã owinɔ wa mba ngba wa ni na:

¹⁸ “'Da fala Ezekiasi zi a nwa ngɔ nù Yuda ni, nɛ mbe wi gba olo nu Gale zi kpo tɛ kɔ le Moresɛtɛ, li a a Mike. A gba zi olo nu NWA ngɔ mɔ nyanga nza vɛ̃ hã Owi ngɔ nù Yuda na: ‘Kala Sioni ma hɔ sɛ mbé fɔ, le Yeruzalɛmɛ ma dɛ sɛ olo tɔa, nɛ owɔkɔsɔ ma kele sɛ ngɔ kala tɔa Tɛmpɛloe vɛ̃.’

¹⁹ Nɛ nwa Ezekiasi do Oyuda wa gbɛa zi Mike, wi gba olo nu Gale nde? Wa gbɛ̃ a gɔ, nɛ nde wa dɛa zi kili nwa, nɛ wa fa we mbɔkɔ sila a. Ma kɛ nwa kpula linggamɔ tombo ngamɛ a handa zi we tombo hã wa ni. Kɔ fala kɛ lɛ gbɛ wi gɛ, nɛ nde lɛ dɛa gã 'dã mɔ.”

Wa gbɛa Uria wi gba olo nu Gale

²⁰ 'Da fala ni, nɛ mbe gele wi gba olo nu Gale zi kpo, li a a Uria, be 'da Sɛmaya, wi kɔ le Kiriatɛ-Yearimɛ. Nɛ a wele zi we do zu li NWA Gale, nɛ a tɔ̃a zi tɛ mɛ 'bɔ 'dã lɛnggɛ ɔ na mɛ ni dɛ ngɔ le Yeruzalɛmɛ do nù Yuda.

²¹ Nɛ nwa Yoakimɛ, do osoda zɔ mɔ tɛ̃ a, do Owi olo li a, wa zila wenɔ Uria tɔ̃a ni, nɛ wa fa we gbɛ a. Kɔ Uria nɛa we zele ní, nɛ a dɛ kili, nɛ a yu dɛ ngɔ nù Ezipeto.

²² Nɛ nwa Yoakimɛ tumba Ɛlnatanɛ, be 'da Akbɔrɛ, do ombe wele tɛ ngɔ nù Ezipeto i we ba Uria.

²³ Wa nɛa, nɛ wa ba Uria, nɛ wa si do a hã nwa Yoakimɛ. Nɛ nwa ba nu a, nɛ wa gbɛ Uria, nɛ wa da wɔlɔ a kɔ 'du kɔ̃ɛ kɛ wa da gba gili owɔlɔnɔ dɛ kɔ nɛ ni.

²⁴ Nɛ nde Ahikamɛ, be 'da Safanɛ, yolo zi 'do mi. Nɛ we duzu a, ma kɛ owinɔ wa gbɛ̀ mi gɔ, nɛ mi kpasa kɔ fio ni.