Yeremi 25 - WE NU GALE 1995

Owi sɛnɛ Oyuda wa yolo sɛ si gbãlã ngɔ

¹ Yoakimɛ ɔa tɛ to nwa 'da a ngɔ nù Yuda sabɛlɛ nalɛ, nɛ nwa tumba mi na, mi tɔ̃ toe gɛ hã Oyuda vɛ̃. 'Da fala ni, mɛ zi a kuti sabɛlɛ dɛa to nwa 'da Nabukɔdɔnɔzɔrɛ, nwa ngɔ nù Babilonia.

² Nɛ mi tɔ̃a hã Oyuda do owi kɔ le Yeruzalɛmɛ na:

³ “Yolo tɛ ngba soe kɛ Yoziasi, be 'da Amoni dɛa to nwa 'da a sabɛlɛ 'bu ngɔ nɛ talɛ tɛ ngɔ nù Yuda, gbaa we hɔ sɔɛ gɛ ni, ma la 'bu sabɛlɛ bɔa ngɔ nɛ talɛ. Nɛ kɔ sabɛlɛnɔ ni vɛ̃, NWA Gale wila we hã mi, nɛ mi tɛ tɔ̃ hã nɛ tɔ̃a fai. Mi là fala gba ta zu nɛ ngɔ toe 'da NWA gɔ, nɛ nde nɛ kɔ̃̀ we zele ma gɔ.

⁴ NWA là fala tombo owi tonɔ 'da a we gba olo nu a hã nɛ gɔ, nɛ nde nɛ zélé wa gɔ, nɛ nɛ gɛ mbe zala nɛ hã wa gɔ.

⁵ Wa tɔ̃a hã nɛ na, nɛ lá fala 'dã dɛa mɔ tɛ nɛ, do 'dã mɛnɔ nɛ dɛa zi ni, sɛ nɛ nɛ 'bana sɛ dɛ ngɔ nùi kɛ NWA 'dɔla zi hã nɛ, do oyaa nɛ ni de.

⁶ Nɛ wa 'bɔ na, nɛ tɛ dɔ̀nggɔ̀ ogele galenɔ gɔ, nɛ tɛ gù nù ti wa gɔ, nɛ nɛ tɛ dɔnggɔ okpikimanɔ kɛ nɛ dɛa ma ni gɔ, da dɛ kɔ zã nwa nɔ̃́lɔ̃́ dɛ tɛ nɛ gɔ. Nɛ dɛ́ olo nu NWA, dɔ a hã etumbu hã nɛ gɔ.

⁷ Nɛ nde nɛ la fala zele we nu nwa, nɛ nɛ dɛa okpikima, nɛ ma nɔ̃lɔ̃ zã a. Na mɛ ni, nɛ gɔa etumbui 'da a dɛ tɛ nɛ wele nɛ.

⁸ “NWA ngɔ mɔ nyanga nza vɛ̃ tɔ̃a na: Ɔ nɛ kɛ nɛ kɔ̃ we zele we nu mi gɔ ni,

⁹ mi sa sɛ mɔ hã owinɔ si gbãlã ngɔ i vɛ̃, mba do wi toe 'da mi Nabukɔdɔnɔzɔrɛ, nwa ngɔ nù Babilonia na, wa tɛ. Nɛ mi tombo sɛ wa we bi nɛ, owi ngɔ nù Yuda, do onu kɔnggɔnɔ kɛ zã nɛ ni tɛ mɛ 'bɔ. Mi kumu sɛ nɛ vɛ̃, nɛ mi dɛ sɛ na, nùi gɛ ma hɔ olo tɔa. Winɔ wa zɔ sɛ ma, nɛ sila wa gɔnɔ, nɛ wa zɛ nu wa. Mi nwa, mi tɔ̃a ni.

¹⁰ Mi dɛ sɛ na, wa tɛ zèlè 'bɔ giti hiamɔ gbalimɔ, do hiamɔ yangga, do ozuma ba ngba wi kɔ lenɔ 'da nɛ gɔ. Nɛ wa zélé sɛ 'bɔ giti tua mɔ gɔ, nɛ wa zɔ́ sɛ nyɛa we di ni gɔ.

¹¹ Nùi gɛ ma 'danga sɛ vɛ̃, nɛ ma kifi sɛ olo tɔa. Nɛ onu kɔnggɔ winɔ ngɔ nɛ ni vɛ̃ wa sɛ a ngbá 'da nwa ngɔ nù Babilonia 'do 'bu sabɛlɛ sambo.

¹² “Fala kɛ 'bu sabɛlɛ samboe ni ma e do'do, nɛ mi siki sɛ li mi dɛ tɛ nwa ngɔ nù Babilonia, do owinɔ 'da a. Nɛ mi hã sɛ etumbu hã wa olo 'dã mɛnɔ 'da wa. Mi 'danga sɛ nùi 'da wa, nɛ ma kifi sɛ li gba zɔ̃, nɛ ma 'bana sɛ ni fai.

¹³ Mi tombo sɛ ngamɛnɔ vɛ̃ kɛ mi tɔ̃a zi we nɛ, nɛ wa kɔma kɔ 'buki gɛ ni dɛ ngɔ nùi ni. Mi dɛ sɛ ɔ nɛ kɛ mi tumba zi do Yeremi ni.

¹⁴ Mi dɛ sɛ na, Owi ngɔ nù Babilonia wa hɔ ngbá 'da Onwanɔ kɛ wa nganda wena ni. Na mɛ ni, mi bili sɛ nu gbã 'dã mɛnɔ 'da wa vɛ̃ hã wa.”

Gale a gɔnɔ sɛ ngbangga 'da owinɔ

¹⁵ NWA Gale 'da Oisraɛlɛ tɔ̃a hã mi na: “Mɔ zɔ́ bila dɔɛ gɛ, ma dunu do nɔ̃lɔ̃ zã 'da mi. Mɔ bá ma, nɛ mɔ ísí dɛ nu onu kɔnggɔ winɔ vɛ̃ kɛ mi nɛ tombo mɔ hã wa ni.

¹⁶ Wa nɔ sɛ, nɛ ma zĩ zu wa. Hã fala kɛ mi tombo Owi bolonɔ we gbɛ wa, nɛ zu wa ma vĩ sɛ do'do.”

¹⁷ Nɛ mi ba bila kɛ NWA ɛfɛ hã mi ni, nɛ mi isi dɛ nu onu kɔnggɔ winɔ kɛ a tumba mi hã wa ni.

¹⁸ Mi ndua do Owi Yeruzalɛmɛ, do owanɔ kɔ lenɔ ngɔ nù Yuda, fala nɛ kpo do Onwanɔ, do Owi olo li wa. Nɛ wa nɔa, nɛ wa kumu, nɛ lenɔ 'da wa kifi olo tɔa kɛ wele zɔ ma, nɛ kili ba a ba ni. Ma kɛ tia do sɔɛ gɛ, owinɔ wa 'bana tɛ we wa do we, nɛ wa sa li wa kɔ fɔmba.

^19-26 Nɛ zélé li ogele nu kɔnggɔnɔ vɛ̃ kɛ wa wia we nɔ dɔɛ kɔ bila ni, wi a: NWA ngɔ nù Ezipeto, ogã wi ngɔ sodanɔ 'da a, owi olo li a, mba do owinɔ 'da a, do ogɛnɛnɔ vɛ̃; onwa ngɔ nù Usi vɛ̃; onwa Filisti vɛ̃, kɛ wa ngɔ lenɔ gɛ: Askaloni, Gaza, Ekroni, do tala Asdɔdɛ; Oedɔmɛ, Omoabɛ do Oamoni vɛ̃; onwa ngɔ le Tirɛ do Sidoni, do owanɔ ngɔ nùnɔ kulu gba lì Meditɛrane vɛ̃; owi kɔ le Dedanɛ, Tema, Buzɛ, do owanɔ kɛ wa kɛlɛ ti zu wa vɛ̃ ni; onwa ngɔ nù Arabi vɛ̃, do onwa ngɔ owinɔ kɛ wa ɔ li gba zɔ́ i ni vɛ̃; onwa ngɔ nù Zimri, Elamɛ, do Mɛdɛsi vɛ̃; Onwanɔ si gbãlã ngɔ, kɛ nùi 'da wa kɔlɔ dɔ́ɔ, tabi ma nyɛlɛ ndũu ni vɛ̃. Onu kɔnggɔ winɔ ngɔ nù gɛ vɛ̃, wa nɔ sɛ dɔɛ kɔ bila ni dɛ 'do ngba wa, nɛ tala nda go'do wa vɛ̃ sɛ a nwa ngɔ nù Babilonia.

²⁷ Nɛ NWA tɔ́a hã mi na: “Mi NWA ngɔ mɔ nyanga nza vɛ̃, Gale 'da Oisraɛlɛ, mi ba nu mi hã wa na, wa nɔ dɔɛ ni gbaa hã ma ba wa, nɛ wa ɔ́lɔ́, nɛ wa te nù, nɛ wa tɛ kùlù 'bɔ mbé ngɔ gɔ. We duzu kɛ mi nɛ tombo Owi bolo we kumu wa.

²⁸ Kɔ fala kɛ ombe sanga wa, wa bɛ̃ we ba bila mɔ ɛfɛ hã wa ni we nɔ dɔɛ, nɛ mɔ tɔ̃ hã wa na, mi nwa ngɔ mɔ nyanga nza vɛ̃, mi ba nu mi na, wa nɔ sɛ tɛ mɛ iko.

²⁹ Mi ndo sɛ hã etumbui do ngɔ owinɔ kɔ le 'da mi ngboo. Ni a ogele winɔ wa tɛ lènggè na, lo dungu sɛ do lɔa tɛ lo gɔ. Mi sa sɛ mɔ hã Owi bolo we bi do owinɔ ngɔ nù gɛ vɛ̃. Mi NWA ngɔ mɔ nyanga nza vɛ̃, mi tɔ́a ni.”

³⁰ Nɛ NWA tɔ̃a 'bɔ hã mi na: “Mɔ Yeremi, mɔ gba olo nu mi gɛ hã winɔ. Mɔ tɔ̃ hã wa na: ‘NWA a kɔ le santo 'da a tɛ li nza i, a he mɔ, nɛ a o dã, nɛ a dãlã do owinɔ 'da a. A he mɔ nganda wena, ɔ nɛ kɛ wi ma wala te vinɔ he do mɔ ni.

³¹ Hiamɛnɔ a he ni, ma wele, nɛ ma kpa nyanga nza vɛ̃. Mba gɔ, NWA tɛ gɔnɔ ngbangga 'da owinɔ 'da a. A sa mɔ hã wa vɛ̃, we gɔnɔ ngbangga 'da wa. Nɛ a 'dɔlɔ owi dɛ 'dã mɛnɔ na, wa fe li bolo. Mi NWA, mi tɔ̃a ni.’ ”

³² NWA ngɔ mɔ nyanga nza vɛ̃ tɔ̃a na: “Ngamɔ ma kpa sɛ onu kɔnggɔ winɔ kpo do kpo dɛ 'do ngba wa. Gã 'bako ma yolo sɛ ndũu tɛ ndɔti nùi, ma tɛ sɛ ɔ nɛ gba bũ kamba ni, nɛ ma te sɛ ngɔ winɔ.

³³ Do kɔ̃ tũi ni, wɔlɔ winɔ kɛ NWA a gbɛ sɛ wa ni, ma ɔ sɛ do ngɔ nù gɛ fatata we to ndɔti nùi. Fo wi he sɛ kɔ̃a wa, do wi mi wa bina. Wɔlɔ wa ma mbulu sɛ, nɛ ma dɛ zubu we 'dafa nùi.”

³⁴ Aa nɛ, ogã winɔ nù gɛ, nɛ gá zuma kɔ̃a fio. Nɛ, owi zɔ mɔ tɛ batanɔ, nɛ kímílí tɛ nɛ do nù, we kɛ ngba soe fie 'da nɛ ma wia ia. Wa 'bili sɛ gɛlɛ nɛ tɛ fala wa gbɛ do sa'denɔ ni. Nɛ wa gbɛ sɛ nɛ, ɔ nɛ kɛ wa gbɛ do owili batanɔ ni.

³⁵ Aa nɛ, ogã winɔ nù gɛ, fo mbé wala na nɛ yu do ma bina. Nɛ, owi zɔ mɔ tɛ batanɔ, wala kpasi we duzu nɛ bina.

³⁶ Mi zele giti gɛlɛ ogã winɔ, owi zɔ mɔ tɛ batanɔ, tɛ ala nu wa kɔ zɛlɛ tɛ, we kɛ nwa 'danga dia wɔkɔsɔnɔ 'da wa do'do.

³⁷ Lenɔ kɛ ma zi do dungu fio ni, gã nɔ̃lɔ̃ zã 'da nwa 'danga ma, nɛ ngɔ tɛ nɛ gɛ̃a kpi kpi kpi.

³⁸ NWA hɔa nza kɔ tɔa 'da a, ɔ nɛ kɛ gbɔgbɔ hɔ nza tɛ fala ɔi 'da a ni. A bia gã nɔ̃lɔ̃ zã 'da a, nɛ nùi kifi li go.