Yeremi 24 - WE NU GALE 1995

Yeremi zɔa sanggi wala te figɛ bɔa

¹ Nabukɔdɔnɔzɔrɛ, nwa ngɔ nù Babilonia ba zi nwa ngɔ nù Yuda, kɛ li a a Yɛkonia, be 'da Yoakimɛ ni do ngbá. Nɛ a si do a dɛ tɛ Babilɔnɛ i, mba do Owi olo li a do Owi dɛ dulanɔ do Owi dɛ fungulanɔ tɛ kɔ le Yeruzalɛmɛ ni. Do 'da fala nɛ ni, nɛ NWA bia sanggi wala te figɛ bɔa li mi. Sangginɔ ni, mbe wele kpo a zi ma dɛ dati tɔa Tɛmpɛloe.

² Sanggi kɛ dati ma dunu do odia wala te figɛ, kɛ ma fila dati. Nɛ sanggi kɛ bɔa ma dunu do 'dã wala te figɛ kɛ ma hɔ mɔ nyɔ nyɔnga gɔ ni.

³ Nɛ NWA aka mi na: “Yeremi, mɛ mɔ zɔ ni a ge nde?” Nɛ mi gese na: “Mi zɔ wala te figɛ. Ombe ma de wena, nɛ ombe nɛ ma dè gɔ, nɛ ma hɔ mɔ nyɔ nyɔnga gɔ.”

⁴ Nɛ NWA tɔ̃ hã mi na:

⁵ “Oyuda kɛ mi ndaka zi wa, nɛ wa la kɔlɔ 'duli tɛ ngɔ nù Babilonia i ni, wa dia li mi NWA Gale 'da Oisraɛlɛ ɔ nɛ odia wala te figɛnɔ gɛ ni.

⁶ Mi zɔ sɛ mɔ tɛ wa do dia li, nɛ mi gese sɛ wa dɛ ngɔ nùi gɛ. Mi 'dafa sɛ wa ɔ nɛ kɛ wa 'dafa do tɔa dɛ olo nɛ ni, nɛ mi gbɛ́ sɛ 'bɔ wa gɔ. Mi zĩ sɛ wa dɛ ngɔ ɔ nɛ kɛ wa zĩ do te ni, nɛ mi fí sɛ 'bɔ wa nù gɔ.

⁷ Mi 'dafa sɛ sila wa takɔ wa ĩ na, mi ngboo a NWA. Wa sɛ a owinɔ 'da mi, nɛ mi sɛ a Gale 'da wa, we duzu kɛ wa kpolo sɛ tɛ wa dɛ 'da mi do sila wa vɛ̃.

⁸ “Nɛ nde we Sedekiasi, nwa ngɔ nù Yuda, do Owi olo li a, do tala owi kɔ le Yeruzalɛmɛ, do owinɔ kɛ wa 'bana dɛ ngɔ nù Yuda gɛ, do owanɔ kɛ wa kulu zi dɛ Ezipeto i ni, wa ɔ sɛ li mi nwa nɛ 'dã wala te figɛnɔ kɛ ma hɔ mɔ nyɔ nyɔnga gɔɛ gɛ ni.

⁹ Mi tombo sɛ ngamɔ dɛ ngɔ wa, nɛ onu kɔnggɔ winɔ ngɔ nù gɛ vɛ̃ wa zɔ sɛ wa, nɛ wa zɛ nu wa do kili. Winɔ wa mɔmɔ sɛ wa, nɛ wa dã wa do dɛla, wa fi sɛ zuma do zu li wa, nɛ wa fɔmbɔ wa tɛ falanɔ vɛ̃ mi pɛsɛ sɛ do wa ni.

¹⁰ Mi tombo sɛ Owele na wa gbɛ wa li bolo, nɛ mi tombo sɛ 'bɔ gba wɔ do 'dã zɛlɛ hã wa gbaa, ndɔti nɛ a kɛ wa kumu ngɔ nùi mi hã zi hã wa do oyaa wa ni.”