Yeremi 23 - WE NU GALE 1995

NWA dãlã we dɛ tɛ o'dã wi zɔ mɔ tɛ owinɔ 'da a

¹ NWA tɔ̃a na, 'bako do ogã wi ngɔ winɔ 'da ɛ! Wa ɔ nɛ o'dã wi zɔ mɔ tɛ bata ni. Wa la owinɔ 'da e, nɛ wa pɛsɛ, nɛ wa fe mbamba iko.

² NWA Gale 'da Oisraɛlɛ tɔ̃a dɛ ngɔ ogã winɔ ni na: “Nɛ la zi owinɔ 'da mi na wa pɛsɛ, nɛ wa yɔ wala. Nɛ zɔ̃ mɔ tɛ wa do dia nɛ gɔ. Nɛ nde mi nwa, mi bili sɛ nu gbã 'dã dɛa toe 'da nɛ hã nɛ.

³ Mi do tɛ mi, mi kala sɛ tala owinɔ 'da mi tɛ ngɔ nùnɔ vɛ̃ kɛ mi pɛsɛ do wa ni, nɛ mi ngɛmɛ sɛ li wa. Mi gese sɛ wa dɛ tɛ ngɔ nùi 'da wa. Wa ko sɛ obe zã wa, nɛ wa dɛlɛ.

⁴ Mi saka sɛ ongbongbo wi zɔ mɔ tɛ wa hã wa. Wa dɛ́ sɛ 'bɔ kili gɔ, nɛ wa kpá sɛ 'bɔ ngamɔ gɔ. Nɛ mbe kpo kɔ wa yɔ́ sɛ 'bɔ gɔ. Mi nwa, mi tɔ̃a ni.”

⁵ NWA tɔ̃a na: “Mbe tũ kpo, nɛ mi saka sɛ be zã Davidi ngboo, nɛ mi e a do nwa. A sɛ do dia hã zã, nɛ a dɛ sɛ to nwa 'da a vɛ̃ do bɔlɔ nɛ.

⁶ 'Da fala a dungu sɛ nwa ni, nɛ Oyuda wa kpasa sɛ, nɛ Oisraɛlɛ wa kpa sɛ gɛ̃a dungu. Wa sa sɛ li a na: ‘NWA, wele bɔlɔ zu.’ ”

^7-8 NWA tɔ̃a na: “Zi dati, nɛ kana zi tɛ nɛ do zu li mi, nɛ nɛ tɔ̃ na: ‘Mi kana tɛ mi do zu li NWA wele kpasi, kɛ a fua zi lɛ obe Israɛlɛ ngɔ nù Ezipeto dɛ nza’ ni. Nɛ nde mbe ngba soe kpo, nɛ nɛ tɔ̃́ sɛ 'bɔ ni gɔ. Nɛ tɔ̃ sɛ na: ‘Mi kana tɛ mi do zu li NWA wele kpasi, kɛ a 'dɔlɔ lɛ obe Israɛlɛ dɛ ngɔ nùi si gbãlã ngɔ, do ngɔ ogele nùnɔ, nɛ a kala 'bɔ lɛ, nɛ a gese lɛ dɛ ngɔ nùi 'da lɛ ni.’ Mba gɔ, mi gese sɛ nɛ obe Israɛlɛ dɛ ngɔ nùi 'da nɛ kɛ mi hã zi hã oyaa nɛ ni.”

Lɛnggɛ ngɔ owi gba olo nu Gale do bɛlɛ

⁹ Sila mi gɔnɔ zurr, nɛ tɛ mi vɛ̃ ma tana. Mi ɔ nɛ wi kɛ dɔ̃ tɛ̃ a ni, mi ɔ nɛ wi kɛ dɔ̃ vinɔ nɛa ngɔ a nɛa ni, we duzu NWA Gale, we duzu lɛnggɛ santoe kɛ a tɔ̃a hã mi ni.

¹⁰ Nùi ma dunu do owinɔ, kɛ wa yɛnggɛ 'dɔkɔlɔ ogele galenɔ ɔ nɛ owuko ndumba ni. Tɛ wa gbɛngɛ we dɛ 'dã mɔ iko, nɛ kili mbula bá wa gɔ. Gulu nɛ a nùi ma dunu do 'bako, nɛ dia wɔkɔsɔnɔ ma kula vɛ̃ ni.

¹¹ NWA tɔ̃a na: “Owi gba olo nu mi, do onganganɔ vɛ̃, wa lénggé 'bɔ mbula 'da mi gɔ. Wa dɛ 'dã mɛnɔ 'da wa gbaa do kɔ tɔa Tɛmpɛloe 'da mi i vɛ̃.

¹² Gulu nɛ a li wala 'da wa, ma dɛ sɛ dɔndɔ, nɛ wa kɔ sɛ zu nyanga wa kɔ tũ fala, nɛ wa te. Do kɔ̃ tũi ni, nɛ mi tombo sɛ ngamɔ hã wa, nɛ mi hã sɛ etumbu hã wa. Mi nwa, mi tɔ̃a ni.”

¹³ NWA tɔ̃a 'bɔ na: “Mi zɔa yɔnda dɛa mɛ kɛ Owi gba olo nu mi, wanɔ wa kɔ le Samaria wa dɛa ni, nɛ ma zɛlɛ mi wena. Wa gba olo nu gale Bala, nɛ wa ia Oisraɛlɛ, winɔ 'da mi, li 'dã wala.

¹⁴ Nɛ nde 'dã mɛ kɛ mi zɔ 'da owi gba olo nu mi, wanɔ wa kɔ le Yeruzalɛmɛ ni, ma 'danga 'bɔ la li ngele. Wa yɛnggɛ 'dɔkɔlɔ ogele galenɔ ɔ nɛ owuko ndumba ni, nɛ wa tɔ̃ tati a lɛnggɛ bɛlɛ iko. Wa gala Owi dɛ 'dã mɛnɔ, do tɛlɛ tɛ kɛ na, wele kpo wè tɛ kɔ̃ we la fala dɛ 'dã mɔ gɔ. Wa vɛ̃ a o'dã wi ɔ nɛ Owi Sodɔmɛ do Gomɔrɛ ni.”

¹⁵ NWA ngɔ mɔ nyanga nza vɛ̃ tɔ̃a 'bɔ dɛ ngɔ owi gba olo nu a, wanɔ wa kɔ le Yeruzalɛmɛ ni na: “Mi hã sɛ Sanggo kɛ ma a fã ni hã wa na, wa nyɔngɔ, nɛ mi hã 'dã ina hã wa na, wa nɔ. 'Dã mɔ yula kɔ̃ owi gba olo nu mi tɛ Yeruzalɛmɛ, nɛ ma yɛ'bɛ ngɔ nùi vɛ̃.”

¹⁶ NWA ngɔ mɔ nyanga nza vɛ̃ tɔ̃a hã owi kɔ le Yeruzalɛmɛ na: “Nɛ tɛ zèlè wenɔ owi gba olo nu mi wa tɔ̃ ni gɔ. Wa ɔlɔ nɛ iko. Wenɔ wa tɔ̃ hã nɛ ni, ma yòlò nu mi gɔ, ma yula kɔ zu wa wele nɛ.

¹⁷ Wa tɔ̃ hã owinɔ wa zɔ we nu mi li wa yala iko ni na: ‘Mɛnɔ vɛ̃ ma la sɛ ɔ dia.’ Nɛ wa tɔ̃ hã wanɔ wa 'bana dɛ yia nga zui 'da wa ni na: ‘Ngamɔ kpá sɛ nɛ gɔ!’

¹⁸ “'Da fala kɛ mi mba zi li Owi olo li mi, nɛ mi 'dafa mɛnɔ mi dɛ sɛ ni, nɛ nde fo zi wele kpo kɔ Owi gba olo nu mi bina. Mi wèlè mbe we hã wele kpo kɔ wa ni gɔ. Nɛ wele kpo gɛ̃ zala ɛ we zele gulu nɛ gɔ.”

¹⁹ Nɔ̃lɔ̃ zã 'da NWA ma tɛ sɛ dɛ ngɔ owi dɛ 'dã mɛnɔ ɔ nɛ gba bũ kamba ni.

²⁰ Nɛ ma sɔ́kpɔ́ sɛ gɔ gbaa, ndɔti nɛ a kɛ a dɛ mɛnɔ vɛ̃, a handa we dɛ ma ni. Nɛ mbe tũ kpo, nɛ owinɔ 'da a, wa zele sɛ gulu nɛ.

²¹ NWA tɔ̃a na: “Mi tòmbò Owi gba olo nu mi ni gɔ, nɛ nde wa nɛ tɛ mɛ do kɔ sila wa iko. Mi tɔ̃̀ lɛnggɛ kpo hã wa gɔ, nɛ nde wa tɛ wele we do zu li mi wila fai.

²² 'Da fala lɛ mba zi li ngba lɛ do owi olo li mi ni, kɔ wa ɔ zi boe, nɛ wa wia sɔ we gba olo nu mi hã owinɔ 'da mi. Nɛ wa dɛ sɔ na, owinɔ wa la fala 'dã mɛnɔ wa dɛ ni.”

²³ NWA tɔ̃a na: “Mi a Gale kɛ mi do nɛ fala nɛ kpo, nɛ mi falanɔ vɛ̃ boe.

²⁴ Gɛnɛ kɔ wele usu tɛ̃ ɛ, nɛ mi zɔ a iko. We kɛ mi tɛ falanɔ li nza i do nù gɛ vɛ̃ boe.

²⁵ Mi zila wenɔ owi gba olo nu mi wa tɔ̃ ni. Wa 'bili bɛlɛ do zu li mi na, mi bia mɔ hã wa do li yalɛ, nɛ nde mi bè mɔ hã wa gɔ.

²⁶ Wa nɛ la fala ɔkɔlɔ winɔ 'da mi do lɛnggɛ bɛlɛnɔ wa kũ ni soe ki nge nde?

²⁷ Wa lengge na, yalɛnɔ wa tɔ̃ sanga tɛ ngba wa ni, ma dɛ sɛ na, ta zu winɔ 'da mi ele ngɔ mi, ɔ nɛ kɛ ta zu oyaa wa ila zi ngɔ mi, nɛ wa nɛa 'do gale Bala ni nde?

²⁸ Fala kɛ wi gba olo nu mi kpo yala zu a, nɛ ma wia na, a tɔ̃̀ tati a yalɛ ni iko. Kɔ fala kɛ mi tombo a do to, nɛ a tɔ̃́ toe ni do wala olo nɛ. Mba gɔ, wɔkɔsɔ ma wè kɔ̃ do gbãlã kpalɛ gɔ.

²⁹ Lɛnggɛ nu mi ma ɔ nɛ we ni, nɛ ma ɔ 'bɔ nɛ dɔnɔ kɛ ma o sanga kpangba ta sikili sikili ni.”

³⁰ NWA tɔ̃a na: “Mi hã sɛ etumbu hã Owi gba olo nu mi, kɛ wa ba lɛnggɛ nu ngba wa, nɛ wa gba nu nɛ ɔ nɛ kɛ mɛ a lɛnggɛ nu mi ni.

³¹ Mi hã sɛ etumbu hã wanɔ kɛ wa ba lɛnggɛnɔ 'da wa wele nɛ, nɛ wa we ma do kɛ 'da mi ni.

³² Mi hã sɛ etumbu hã wanɔ wa 'bili bɛlɛ na, mi bia mɔ hã lo do li yalɛ ni. Lɛnggɛ bɛlɛnɔ wa tɔ̃ ni, ma dɛ na owinɔ 'da mi wa yɔ wala. Mi tòmbò wa do to gɔ, nɛ mi bà 'bɔ nu mi hã wa gɔ, nɛ wa dɛ̃ mɔ kpo we owinɔ 'da mi gɔ. Mi NWA, mi tɔ̃a ni.”

Lɛnggɛ nu NWA mɛ a dĩ tole nde?

³³ NWA tɔ̃a hã mi na: “Yeremi, fala kɛ wi gba olo nu mi kpo, tabi nganga, tabi wio nde aka mɔ na: ‘Mbé dĩ tole NWA ia zu lɛ ni a ge nde,’ nɛ mɔ gese na: ‘NWA tɔ̃a na, dĩ tole zu ɛ, wi a nɛ. Ɛ fi sɛ nɛ nù.’

³⁴ Fala kɛ wi gba olo nu mi, tabi nganga, tabi wio nde tɔ̃ na, lɛnggɛ nu mi NWA mɛ a dĩ tole we winɔ, nɛ mi hã sɛ etumbu hã a, do nu fɛlɛ kula 'da a.

³⁵ Ma wia na, nɛ aka ngba nɛ na: ‘NWA gisa na ge nde? A tɔ̃a na ge nde?’

³⁶ Kɔ nɛ tɛ tɔ̃́ 'bɔ na, NWA ia dĩ tole zu nɛ gɔ. Fala kɛ wele tɔ̃ ni, nɛ lɛnggɛ nu wi ni ma hɔ sɛ ngbongbo dĩ tole we a. We duzu kɛ owinɔ wa tɔ̃ na mɛ ni, wa kpolo lɛnggɛnɔ 'da mi NWA wele kpasi, kɛ mi a NWA ngɔ mɔ nyanga nza vɛ̃, Gale 'da Oisraɛlɛ ni.

³⁷ Yeremi, lɛnggɛ mɔ wia we aka do Owi gba olo nu mi ni, ma kɛ: ‘NWA gisa hã mɔ na ge nde? NWA tɔ̃a hã mɔ na ge nde?’

³⁸ Nɛ nde fala kɛ nɛ bɛ̃ we nu mi, hã nɛ 'bana tɛ tɔ̃ na, we nu mi mɛ a dĩ tole we nɛ,

³⁹ nɛ mi NWA, mi kala sɛ nɛ dɛ ngɔ 'baka mi ɔ nɛ dĩ tole ni, nɛ mi fi sɛ nɛ nù, fala nɛ kpo do le mi hã zi ma hã nɛ do oyaa nɛ ni.

⁴⁰ Nɛ mi hã sɛ gã sape kɛ ta zu wele élé sɛ ngɔ nɛ gɔ ni hã nɛ.”