Yeremi 22 - WE NU GALE 1995

¹ NWA Gale tumba mi na, mi nɛ dɛ nu tɔa 'da nwa ngɔ nù Yuda, kɛ a dungu olo Davidi ni,

² nɛ mi tɔ̃ hã a, do Owi olo li a, do Owi kɔ le Yeruzalɛmɛ na, wa zélé we kɛ NWA tɔ́a gɛ. A na:

³ “Mi NWA, mi ba nu mi hã nɛ na, nɛ dɛ bɔlɔ zu dɛa mɔ. Nɛ gɔ́nɔ́ zu owinɔ kɛ ongba wa wa kala mɛnɔ kɔ wa do 'dã hã ni. Nɛ tɛ zɛ̀lɛ̀ tɛ ogele winɔ kɛ wa tɛa we dɛ le do nɛ ni gɔ. Nɛ tɛ zɛ̀lɛ̀ 'bɔ tɛ obe gulanɔ, do Owi fio wilinɔ we kala mɛnɔ kɔ̃ wa gɔ. Nɛ nɛ lá fala gbɛ owinɔ kɛ wa dɛ̀ 'dã mɔ gɔɛ ni.

⁴ Fala kɛ nɛ dɛ nɛ́ kɛ mi tɔ́a ni do ngbongbo nɛ, nɛ obe zã Davidi wa dungu sɛ nwa ngɔ nù Yuda fai. Nɛ wa 'bana sɛ tɛ la do nu ngbo le gɛ dɛ kɔ ngilingilinɔ, do ngɔ mbalatanɔ 'da wa, fala nɛ kpo do owi olo li wa, do owinɔ 'da wa vɛ̃.

⁵ Kɔ fala kɛ nɛ zèlè we nu mi gɔ, nɛ mi NWA Gale, mi kana tɛ mi hã nɛ na, tɔa nwa gɛ ma dɛ sɛ olo tɔa.”

⁶ NWA Gale tɔ́a dɛ ngɔ tɔa 'da nwa ngɔ nù Yuda na: “Tɔa gɛ, ma dia li mi ɔ nɛ tenɔ tɛ ngɔ nù Galadɛ, tabi te ngɔ kala Libanɛ ni. Gɛnɛ kɔ na mɛ ni, nɛ mi dɛ sɛ na, ma hɔ ɔ nɛ li gba zɔ́ kɛ wele ɔ́ tɛ nɛ gɔ ni.

⁷ Mi tombo sɛ Owele na wa 'danga ma. Owinɔ ni wa kala sɛ kpɛnɛmɛnɔ 'da wa, nɛ wa gɔmɔ odia bɛlɛduma te sɛdrɛnɔ kɛ wa dɛa do tɔa ni dɛ nù. Nɛ wa kala sɛ ma, nɛ wa da li we.

⁸ “'Da fala kɛ gba gili owinɔ wa la sɛ wala do kɛ zã le gɛ ni, nɛ wa aka sɛ ngba wa na: ‘Gulu kɛ NWA dɛa do gã le gɛ 'danga ni we ge nde?’

⁹ Nɛ wa gese sɛ hã wa na: ‘NWA Gale dɛa ni, we duzu kɛ owinɔ 'da a kɔ le gɛ, wa 'danga gba tɔkɛ kɛ a gba zi do wa ni. Wa gu nù ti ogele gale, nɛ wa dɔnggɔ wa.’ ”

Lɛnggɛ ngɔ nwa Salumɛ, be 'da Yoziasi

¹⁰ Aa nɛ Oyuda, nɛ tɛ hè kɔ̃a fio nwa Yoziasi gɔ, nɛ nɛ tɛ dùngù gɛla a gɔ. Nɛ nde nɛ hé kɔ̃a be 'da a, nwa Salumɛ, kɛ a nɛ la kɔlɔ 'duli ni. We kɛ a kpóló sɛ tɛ̃ a gɔ, nɛ a zɔ sɛ 'bɔ le kua a ni gɔ.

¹¹ Mba gɔ, NWA Gale tɔ́a dɛ ngɔ Salumɛ, kɛ a dungu nwa ngɔ nù Yuda dɛ olo baa a Yoziasi ni na: “A la sɛ kɔlɔ 'duli, nɛ a kpóló sɛ tɛ̃ a gɔ.

¹² A fe sɛ dɛ ngɔ nùi wa 'dɔlɔ do a ni, nɛ a zɔ sɛ 'bɔ le olo a gɔ.”

Lɛnggɛ ngɔ nwa Yoakimɛ, mbe be 'da Yoziasi

¹³ 'Bako do mɔ Yoakimɛ! Mɔ dɛ̀ tɔa nwa 'da mɔ do bɔlɔ wala gɔ. Mɔ gbala 'da nɛ do etazɛnɔ, nɛ nde mɔ lénggé do winɔ wa dɛ toe ni gɔ. Mɔ ngbɔkɔ wa we dɛ to hã mɔ, nɛ nde mɔ fútá wa gɔ!

¹⁴ 'Bako do mɔ, we kɛ mɔ tɔ̃a zi na, ɛ dɛ sɛ gã tɔa nwa do etazɛ. Nɛ mɔ hũi ogã li holo tɛ tɔa ni, nɛ mɔ kele 'do dɛlɛ do ote sɛdrɛ, nɛ mɔ kɔ fila langi tɛ nɛ.

¹⁵ Mɔ lengge na, te sɛdrɛnɔ mɔ dɛa do tɔa gɛ, ma 'dafa sɛ dɛa to nwa 'da mɔ na, ma de dɛ dati nde? Baa mɔ nyɔngɔ zi mɔ de wena, nɛ nde a dɛa zi bɔlɔ zu dɛa mɔ, nɛ mɛnɔ vɛ̃ a dɛa ni, ma Sɔkpɔ do dia nɛ.

¹⁶ A lengge zi do owi sãnɔ do owi 'bakonɔ, nɛ wa dɛ zi yangga we a. Wi kɛ a dɛ mɔ na mɛ ni, a be na, ɛ ĩ ti mi nwa ngboo.

¹⁷ Nɛ nde mɔ, mɔ fa tati a dia mɛ 'da mɔ wele nɛ. Mɔ gbɛ Owi dia gulu we, nɛ mɔ zɛlɛ tɛ owinɔ 'da mɔ.

¹⁸ Ma kɛ NWA Gale tɔ̃a dɛ ngɔ nwa Yoakimɛ, be 'da Yoziasi na: “Fala kɛ a fe sɛ nɛ ni, nɛ nde wa hé sɛ kɔ̃a a gɔ. Nɛ wele kpo tɔ̃́ sɛ na: ‘Aa nyae, nɛ zɔ́ 'bakoe’ gɔ. Wele kpo hé sɛ kɔ̃a a na: ‘Aa nwa 'daa, ee nwa 'daa’ ni gɔ.

¹⁹ Wa mi sɛ a ɔ nɛ sa'de ni. Wa gbɔtɔ sɛ wɔlɔ a, nɛ wa da ma dɛ 'do ngbo Yeruzalɛmɛ i.” Lɛnggɛ ngɔ Owi kɔ le Yeruzalɛmɛ

²⁰ Aa nɛ, Owi kɔ le Yeruzalɛmɛ, nɛ kũ dɛ ngɔ kala Libanɛ, nɛ nɛ hé mɔ do nga gɛlɛ. E kɔ kpangalã gɛlɛ nɛ, ma dɔ̃lɔ̃ tɛ ngɔ kala Basanɛ. Nɛ hé hiamɔ 'bako ngɔ kala Abarimɛ, we kɛ Onwanɔ kɛ wa dɛ zi na do nɛ ni, wa fia do'do!

²¹ NWA Gale yaka zi zala nɛ, do 'da fala kɛ ngamɔ zi bina ni, nɛ nɛ bɛ̃a zi zele we nu a. Yolo tɛ kɔ gã 'da nɛ, nɛ zèlè we nu NWA fala kpo gɔ.

²² Wa kala sɛ Owi kpe dati nɛ la do wa, ɔ nɛ kɛ bũ ma kala wɔkɔsɔ la do nɛ ni, nɛ Onwanɔ kɛ wa dɛ zi na do nɛ ni, wa la sɛ kɔlɔ 'duli. Sape ma ba sɛ li nɛ, we duzu 'dã mɛnɔ nɛ dɛa ni.

²³ Aa nɛ, kɛ nɛ dungu dia dungu dɛ kɔ tɔa te sɛdrɛnɔ kɛ ma yula tɛ ngɔ nù Libanɛ gɛ, nɛ ĩ na, nɛ gafa sɛ tɛ nɛ, do 'da fala kɛ ngamɔ ma hɔ sɛ do nɛ, ɔ nɛ ngamɔ mɔ́ wuko kɛ a do zɛlɛ kula ni.

Lɛnggɛ ngɔ nwa Konia, be 'da Yoakimɛ

²⁴ NWA tɔ̃a hã nwa ngɔ nù Yuda kɛ li a a Konia, be 'da Yoakimɛ ni na: “Mi kana tɛ mi na, gɛnɛ kɔ mɔ ɔ sɔ nɛ pɛtɛ, kɛ mi yulu zu kɔ̃ mi, we to do ti mbɛtinɔ ni, nɛ mi hɔlɔ sɔ mɔ zu kɔ̃ mi do'do.

²⁵ Mi 'dɔlɔ sɛ mɔ hã owinɔ kɛ wa fa we gbɛ mɔ, nɛ mɔ dɛ kili wa ni. Mi 'dɔlɔ sɛ mɔ hã Nabukɔdɔnɔzɔrɛ, nwa ngɔ nù Babilonia do osodanɔ 'da a.

²⁶ Mi 'dɔlɔ sɛ mɔ, do naa mɔ dɛ ngɔ nù kɛ wa kò nɛ ngɔ nɛ gɔ. Nɛ nɛ fe sɛ dɛ di ni.

²⁷ Nɛ sɛ do hɛ̃lɛ̃ wena we kpolo tɛ nɛ ngɔ nùi 'da nɛ, nɛ nde nɛ wé sɛ 'bɔ we kpolo tɛ nɛ gɔ.”

²⁸ Nɛ mi aka NWA na: “Ni a Konia gɛ a ɔ nɛ ua kpana, kɛ wa wè 'bɔ we dɛ ma do mɔ gɔ, nɛ wa da ma nù ni nde? Gulu kɛ wa ndaka a do obenɔ 'da a vɛ̃, nɛ wa 'dɔlɔ wa dɛ ngɔ nù kɛ wa zɔ̃ kuti nɛ gɔ ni we ge nde?”

²⁹ Mɛ a 'bako we nùi 'da mi! Aa nɛ winɔ ngɔ nùi 'da mi gɛ, nɛ gɛ́ zala nɛ hã nɛ zele we NWA tɔ̃a ni.

³⁰ A na: “Wa kɔmɔ sɛ li wi gɛ kɔ 'buku, ɔ nɛ kɛ a kò be zã a gɔ ni! A dɛ̀ gbãlã we mɔ li nù gɛ gɔ. A kpá sɛ wele kpo kɔ obe zã a na, a dungu nwa olo Davidi tɛ ngɔ nù Yuda ni gɔ.”