Yeremi 21 - WE NU GALE 1995

NWA gisa nu aka we 'da nwa Sedekiasi

¹ Sedekiasi, nwa ngɔ nù Yuda tumba zi Pasɛhurɛ, be 'da Malkia, do nganga Sɛfania, be 'da Maseya, we tɔ̃ hã mi na:

² “Mɔ kɔ̃, nɛ mɔ aka NWA Gale we lɛ. We kɛ Nabukɔdɔnɔzɔrɛ, nwa ngɔ nù Babilonia, do osodanɔ 'da a, wa tɛ bi lɛ bi pii. Kɔ mbe gɔ, nɛ NWA a dɛ sɛ mbe gba sɔ̃ mɔ hã lɛ, nɛ Nabukɔdɔnɔzɔrɛ a la sɛ fala bi lɛ.”

³ Nɛ NWA wila we hã mi. Nɛ mi tɔ̃a olo nu a hã owinɔ Sedekiasi tumba wa ni na,

⁴ wa si, hã wa tɔ̃ hã Sedekiasi na, NWA Gale 'da Oisraɛlɛ na: “Nwa ngɔ nù Babilonia do osodanɔ 'da a, wa linggi le 'da mɔ, nɛ mɔ Sedekiasi do osodanɔ 'da mɔ, nɛ hɔa nza we bi do wa do 'do ngbo i. Nɛ nde mi dɛ sɛ na, osodanɔ 'da mɔ kɛ wa kpe dati bole ni, wa kpolo tɛ wa 'do dɛ kɔ le nga.

⁵ Nɛ mi do tɛ mi, mi be sɛ dã 'da mi, do gã nɔ̃lɔ̃ zã 'da mi hã nɛ, nɛ mi bi sɛ nɛ do ngawi 'da mi vɛ̃.

⁶ Mi gbɛ sɛ owinɔ do osa'denɔ kɔ le gɛ vɛ̃. Wa vɛ̃, wa fe sɛ do Sɔkpɔ tala 'dã zɛlɛ.

⁷ Nɛ nde mɔ Sedekiasi, do Owi olo li mɔ, do tala owinɔ vɛ̃ kɛ wa fè li bolo, tabi do gba wɔ, tabi do 'dã zɛlɛ gɔɛ ni, mi 'dɔlɔ sɛ nɛ hã nwa ngɔ nù Babilonia, do owi sɛnɛ nɛ, kɛ wa kɔ̃a we gbɛ nɛ ni. Nɛ Nabukɔdɔnɔzɔrɛ mbɔ́kɔ́ sɛ sila a we dɛ 'bako hã nɛ gɔ. A kumu sɛ nɛ vɛ̃, a lá sɛ wele kpo do tunu li a gɔ.”

⁸ Nɛ NWA tɔ̃a 'bɔ hã mi na, mi tɔ̃ hã owinɔ na: “Nɛ zélé! Mi NWA, mi a sɛ nɛ dɛ nu nzangba wala bɔa na, nɛ saka sanga nɛ. Mɛ a wala fio do wala kpasi.

⁹ Wi kɛ a 'bana sɛ dɛ kɔ le gɛ ni, nɛ a fe sɛ li bolo, tabi do gba wɔ, tabi do 'dã zɛlɛ. Nɛ wele kɛ a hɔ sɛ nza kɔ le we hã tɛ̃ a hã osoda Babilɔnɛ ni, wa gbɛ́ sɛ a gɔ.

¹⁰ Mi do linggamɔ we kpasa winɔ kɔ le gɛ bina, mi kɔ̃a we kumu wa iko. Mi e sɛ le gɛ dɛ kɔ̃ nwa ngɔ nù Babilonia, nɛ a fi sɛ we tɛ nɛ. Mi NWA, mi tɔ̃a ni.”

NWA tumba to hã Owi nu fɛlɛ nwa ngɔ nù Yuda

^11-12 NWA tumba mi na, mi tɔ̃ toe gɛ hã owi nanɔ 'da nwa ngɔ nù Yuda na: “Nɛ, obe zã Davidi, nɛ zélé we mi NWA mi nɛ tɔ̃ ma gɛ: Ma wia na, nɛ dɛ bɔlɔ zu dɛa mɔ tũ kpo kpo. Nɛ gɔ́nɔ́ zu owinɔ kɛ ongba wa wa kala mɛnɔ kɔ̃ wa do 'dã hã ni. Kɔ nɛ dɛ̃ ni gɔ, nɛ dã 'da mi ma za'da sɛ ɔ nɛ we ni, nɛ ma bɛlɛ sɛ mɛnɔ vɛ̃. Nɛ wele kpo wé sɛ we bi we ni gɔ. Mi dɛ sɛ ni we duzu 'dã mɛnɔ nɛ dɛa ni.

¹³ Nɛ, winɔ kɛ nɛ ɔ kɔ tɔa nwa, ti nyanga tɔa Tɛmpɛloe, tɛ ngɔ kala Sioni i ni, nɛ lengge na, owi sɛnɛ nɛ wa wè tɛ hɔ 'da nɛ i gɔ. Nɛ nde mi nwa, mi hɔ sɛ 'da nɛ i,

¹⁴ nɛ mi hã sɛ etumbu hã nɛ olo 'dã mɛnɔ nɛ dɛa ni. Mi fi sɛ we tɛ bɛlɛduma te sɛdrɛnɔ kɛ nɛ dɛa do tɔa nwa ni, nɛ ma bɛlɛ sɛ mɛnɔ kɛ zã nɛ ni vɛ̃. Mi NWA, mi tɔ́a ni.”