Yeremi 20 - WE NU GALE 1995

Nganga Pasɛhurɛ ba nu a na wa ɛnzɛ Yeremi

¹ Nganga Pasɛhurɛ, be 'da Imɛrɛ, kɛ a a gã wi ngɔ tonɔ kɔ tɔa Tɛmpɛloe ni, a nɛa we zele wenɔ mi tɔ̃ do zu li NWA ni,

² nɛ a kulu ngɔ, nɛ a zɛ mi. Nɛ a ba nu a na, wa ba mi, hã wa fi te nyanga mi, nɛ wa ɛnzɛ mi dɛ nu ngbo Bɛnzamɛ, kɛ wa le nɛ dɛ li fanda tɔa Tɛmpɛloe i ni.

³ Fala nɛa we sa 'do nɛ, nɛ Pasɛhurɛ ba nu a na, wa da kɔ̃ wa tɛ mi, nɛ mi tɔ̃ hã a na: “NWA sá sɛ 'bɔ li mɔ na Pasɛhurɛ gɔ, a sa sɛ li mɔ na, ‘Kili kpa falanɔ vɛ̃.’

⁴ NWA do tɛ̃ a, a tɔ̃a na: ‘Yolo do sɔɛ gɛ, mi dɛ sɛ na, mɔ tana kili fala nɛ kpo do ongba mɔ. Owi sɛnɛ wa, wa gbɛ sɛ wa, nɛ mɔ zɔ sɛ fie 'da wa do gbali mɔ. Mi 'dɔlɔ sɛ Oyuda vɛ̃ hã nwa ngɔ nù Babilonia, nɛ a kala sɛ wa si do wa, tabi a gbɛ sɛ wa.

⁵ Mi kala sɛ 'bɔ kpamɛnɔ 'da owinɔ kɔ le gɛ, do omɔ olo tonɔ 'da wa, do mɔ olo gã golenɔ, do okpamɛnɔ 'da onwa ngɔ nù Yuda, nɛ mi 'dɔlɔ ma hã Owi sɛnɛ wa. Owinɔ ni wa zũ sɛ ma, nɛ wa si nɛ dɛ tɛ Babilɔnɛ.

⁶ Mi 'dɔlɔ sɛ mɔ Pasɛhurɛ do Owi nanɔ 'da mɔ vɛ̃. Kɔ mɔ hɔ Babilɔnɛ i, nɛ mɔ fe sɛ, nɛ wa mi sɛ mɔ dɛ di ni, fala nɛ kpo do ongba mɔ kɛ mɔ gba zi olo nu mi Gale hã wa do bɛlɛ ni.’ ”

Yeremi bi tɛ ɛ dati Gale

⁷ Aa NWA, mɔ ɔlɔ mi, nɛ mi dɛa olo nu mɔ. Mɔ nganda nɛa ngɔ mi, nɛ mɔ ba mi do nga nɛ. Winɔ vɛ̃ wa tɛ mɔmɔ mi tũ kpo kpo, nɛ wa fi gbɛlɛgbɛsɛ zu mi.

⁸ 'Da fala fai, mi nɛ we tɔ̃ toe 'da mɔ, nɛ mi tɔ̃ tati a 'dã sako iko na: “Ngamɔ! Zɛlɛ tɛ!” Nɛ we duzu toe 'da mɔ NWA, kɛ mi tɔ̃ ni, gulu nɛ a owinɔ wa tɛ mɔmɔ mi tũ kpo kpo, nɛ wa tɛ dã mi do dɛla ni.

⁹ Nɛ nde fala kɛ mi bɛ̃ na, mi tɔ̃́ 'bɔ toe 'da mɔ gɔ, nɛ mi fí 'bɔ nu mi tɛ nɛ gɔ, nɛ lɛnggɛ 'da mɔ bɛlɛ kɔ zã mi ɔ nɛ we ni. Mi fa we kpe nu mi dɛ ngɔ nɛ, nɛ nde mi wè tɛ kunu sila mi ngɔ nɛ gɔ.

¹⁰ Mi zila gɛlɛ gba gili owele tɛ dã mi, wa tɛ tɔ̃ do zu li mi na: “Kili kpa falanɔ vɛ̃!” Ombe wa tɛ tɔ̃ na: “Nɛ dá a hã Onwanɔ!” Nɛ ombe wa na: “Lɛ da sɛ a ni kpaa!” Gɛnɛ kɔ oyali ngba mi ngboo ni, wa tɛ ngɛ'dɛ mi we fa 'dã mɛ 'da mi. Wa lengge na, mbe gɔ, nɛ wa kpa sɛ mi do yɔa ti dɛa mɔ, sɛ a wa ba mi, hã wa bili nu gbã nɛ hã mi de!

¹¹ Nɛ nde NWA, mɔ nganda wena, nɛ mɔ tɛ bi ngɔ mi. Owi zɛlɛ tɛ mi wa nɛ́ sɛ ngɔ mi gɔ, wa te sɛ dati mi. Sape ma ba sɛ li wa, we kɛ wa tia ni, nɛ sape ni ma 'bana sɛ fai, ta zu wele élé sɛ ngɔ nɛ gɔ.

¹² Mɔ, NWA ngɔ mɔ nyanga nza vɛ̃, mɔ ĩ ti wi kɛ a élé dɛ olo nu mɔ gɔ ni, nɛ mɔ ĩ ti kɔ sila a. Mi gbini zã mi do mɔ, nɛ mi lengge na, mi zɔ sɛ tɛlɛ tɛ kɛ mɔ nɛ bili do nu gbã hã Owi sɛnɛ mi ni.

¹³ Nɛ gá zuma hã NWA nɛ nɛ dɔ́nggɔ́ a, we kɛ a fua wi 'bako ti ɛ̃lɛ̃ kɔ̃ o'dã winɔ dɛ nza.

Yeremi hia kɔ̃a tɛ ɛ

¹⁴ Mi kana nu mi tɛ kɔ tũ kula 'da mi. Mi fɔmbɔ tũi kɛ naa mi kua zi do mi ni. Dɔ wele kpo tɔ̃̀ na, mɛ a dia kɔ̃ tũ gɔ.

¹⁵ E kɔ fɔmba zĩlĩ ngɔ wi kɛ a tɔ̃a zi hã baa mi na, “Mɔ kua bulu be” ni!

¹⁶ E kɔ wi ni kpa kpo ngamɛ kɛ Gale hã zi hã owinɔ kɔ lenɔ kɛ a 'danga zi ma, nɛ a dɛ̃ 'bako we nɛ gɔɛ ni. Wi ni a zele sɛ hia kɔ̃a do titole, nɛ a zele 'bɔ hiamɔ bolo do midi.

¹⁷ Ma dia zi fɛ̃ na, Gale gbɛ mi dɛ kɔ̃ zã naa mi i, nɛ mi tɛ hɔ nza hɔa gɔ! Ní, nɛ zunu mi sɔ a kɔ zã naa mi, nɛ a usu sɔ mi dɛ di ni kɔ sabɛlɛ do sabɛlɛ.

¹⁸ Gulu kɛ wa kua mi we ge nde? Wa kua mi we kpa ngamɔ do zɛlɛ tɛ, ndɔti nɛ a kɛ mi fe fio sape nde?