Yeremi 19 - WE NU GALE 1995

Lɛnggɛ ngɔ ua kpana

¹ NWA tɔ̃a hã mi na, mi nɛ́ hã mi oso kpana. Nɛ a tɔ̃ 'bɔ hã mi na, lɛ kulu ngɔ do ombe kpasa wi ngɔ nu fɛlɛ kulanɔ, do mbe kɔ onganganɔ,

² hã lɛ nɛ do wa tɛ nu ngboe wa sa li nɛ na “Ua kpana” tɛ kɔ gbangɔlɔ̃ Hinɔmɛ. Kɔ mi hɔ i mɔ, nɛ mi tɔ̃ toe ɛ nɛ tombo do mi ni hã winɔ.

³ Nɛ NWA tumba mi we tɔ̃ hã wa na: “Nɛ, onwa ngɔ nù Yuda, do owi kɔ le Yeruzalɛmɛ, nɛ zélé we mi NWA ngɔ mɔ nyanga nza vɛ̃, Gale 'da Oisraɛlɛ mi tɔ̃a gɛ. Mi tombo sɛ ngamɔ kpo dɛ fala gɛ, nɛ wele vɛ̃ kɛ a zele sɛ sako nɛ ni, nɛ a konggo sɛ kili.

⁴ Mi dɛ sɛ ni, we duzu kɛ Oyuda wa la fala mi, nɛ wa kifi fala gɛ, kɛ mɛ a fala 'da mi ni, nɛ ma hɔa gele mɔ do'do. Wa dɔa osa'de we dɔnggɔ ogele galenɔ, kɛ wa do oyaa wa, do onwa ngɔ wa wa ĩ̀ zi ti wa dati gɔ ni. Wa dɛa na, fala gɛ ma dunu do tɔkɔ tɛ Owele kɛ wa dɛ̃ 'dã mɔ gɔ ni.

⁵ Wa 'dafa fala dɛ di ni we dɔnggɔ do gale Bala. Nɛ wa dɔ 'bɔ obenɔ 'da wa do dɔnggamɔ hã a dɛ di ni. Ĩ na, mi bà zi nu mi hã wa ní fala kpo gɔ, nɛ mi lènggè zi 'bɔ mbe do mɔ ɔ ni fala kpo gɔ.

⁶ “Gulu nɛ hã mbe tũ kpo, nɛ wa sá sɛ 'bɔ li fala gɛ na ‘Tɔfɛtɛ’ tabi ‘Gbangɔlɔ̃ Hinɔmɛ’ gɔ. Nɛ nde wa sa sɛ li nɛ na ‘Gbangɔlɔ̃ kumu Owele.’

⁷ Nɛ mi 'danga sɛ mɛ kɛ Oyuda do Owi kɔ le Yeruzalɛmɛ, wa handa we dɛ ma ni dɛ kpo kɔ gbangɔlɛ̃ gɛ. Mi dɛ sɛ na, Owi sɛnɛ wa wa nɛ ngɔ wa, nɛ wa gbɛ wa li bolo. Mi dɛ sɛ 'bɔ na, wɔlɔ wa ma hɔ nyɔngɔmɔ mɔ oganakele do osa'de zamɔ.

⁸ Mi dɛ sɛ na le gɛ 'danga, nɛ ma hɔ mɔ hã kili hã wele. Owinɔ vɛ̃ kɛ wa la do di ni ni, wa zɔ ma, nɛ ma ba sɛ we nu wa, nɛ wa ɔ ɔngba.

⁹ Owi sɛnɛ wa wa linggi sɛ wa, nɛ wa wé sɛ we hɔ nza gɔ. Nɛ mɛ sɛ a gã 'bako, we kɛ wa zɔlɔ sɛ nyɔngɔmɔ, nɛ wa ma sɛ ngɔ gbɛ ngba wa, tabi gbɛ benɔ 'da wa, we nyɔngɔ sa'de wa.”

¹⁰ 'Do nɛ, nɛ nwa tɔ̃a hã mi na, mi o kpana dɛ gbali owinɔ wa kã mi ni,

¹¹ nɛ mi tɔ̃ hã wa na, NWA ngɔ mɔ nyanga nza vɛ̃ tɔ̃a na: “Mi gbɛ sɛ owinɔ kɔ le gɛ, nɛ mi 'danga le vɛ̃. Ma dé sɛ 'bɔ gɔ, ɔ nɛ kɛ wele o kpana, nɛ nde wa 'bó 'bɔ ma dɛ olo nɛ gɔ ni. Nɛ wa mi sɛ winɔ dɛ kɔ gbangɔlɔ̃ Tɔfɛtɛ gɛ, we kɛ mbé gele fala we mi do wa sɛ bina.

¹² Mi NWA, mi dɛ sɛ do le gɛ, do owinɔ kɔ nɛ kpasaa ɔ nɛ kɛ mi dɛa do gbangɔlɔ̃ Tɔfɛtɛ ni.

¹³ Mi dɛ sɛ na, tɔanɔ kɔ le Yeruzalɛmɛ, do tɔanɔ 'da onwa ngɔ nù Yuda, ma hɔ mɔ ndi li mi. We duzu kɛ owinɔ ni wa dɔa zi yɔmbɔ nu dinɔ 'da wa we dɔnggɔ do osɔla. Nɛ wa hã zi 'bɔ dɔ̃ do dɔnggamɔ hã ogele galenɔ dɛ di ni.”

¹⁴ 'Do nɛ, nɛ mi kulu ngɔ Tɔfɛtɛ, kɛ nwa tumba zi do mi we tɔ̃ toe ni, nɛ mi si. Nɛ mi nɛa, nɛ mi yolo dɛ li fanda tɔa Tɛmpɛloe, nɛ mi tɔ̃ hã owinɔ vɛ̃ na, NWA ngɔ mɔ nyanga nza vɛ̃, Gale 'da obe Israɛlɛ tɔ̃a na:

¹⁵ “Mi nɛ tombo ngamɛnɔ zi mi handa we tombo nɛ ni dɛ ngɔ le gɛ, do obe lenɔ kɛ zã nɛ ni vɛ̃. We duzu kɛ owinɔ kɔ nɛ wa bɛ̃a we zele we nu mi, nɛ wa dɛa nga zu.”