Yeremi 18 - WE NU GALE 1995

Yeremi nɛa 'da wi 'bo kpana

¹ NWA tɔ̃a hã mi na:

² “Yeremi, mɔ kúlú ngɔ, kɔ mɔ nɛ́ 'da wi 'bo kpana. Mi wele sɛ we hã mɔ i mɔ.”

³ Nɛ mi kulu ngɔ, nɛ mi nɛ 'da wi 'bo kpana i, nɛ mi kpa a, nɛ nde a tɛ 'bo kpana.

⁴ Fala kɛ a zɔ kpana a 'bua ni, kɔ ma wè li a gɔ, nɛ a zɛ ma, nɛ a dɛ gili nɛ do mbé kpana kɛ ma wia li a ni.

⁵ Nɛ NWA tɔ̃ hã mi na:

⁶ “Aa nɛ, Oisraɛlɛ, mi wè we dɛ do nɛ ɔ nɛ kɛ wi 'bo kpana dɛ do gili ni gɔ nde? Nɛ dɛ tambala kɔ̃ mi, ɔ nɛ kɛ gili dɛ tambala kɔ̃ wi 'bo kpana ni.

⁷ Mbe 'da fala kpo, nɛ mi tɔ̃ hã mbe nu kɔnggɔ winɔ na: ‘Nɛ ɔ li mi nɛ te, tabi tɔa ni. Mi zu'du sɛ te ni, nɛ mi gbini gbakɔ̃ nɛ. Mi zɛ sɛ tɔa dɛ nù, nɛ mi 'danga ma.

⁸ Kɔ fala kɛ nu kɔnggɛ ni, wa la fala 'dã dɛa mɔ tɛ wa kɛ ma nɔ̃lɔ̃ zã mi ni, nɛ mi dɛ́ sɛ mɛ mi handa we dɛ do wa ni gɔ.

⁹ 'Da fala kpo, nɛ mi tɔ̃ hã mbe nu kɔnggɔ na: Mi 'dafa sɛ nɛ, ɔ nɛ kɛ wa 'dafa do tɔa ni, nɛ mi mi sɛ nɛ dɛ olo nɛ, ɔ nɛ kɛ wa mi do te ni.’

¹⁰ Nɛ nde fala kɛ nu kɔnggɔ winɔ ni wa zèlè nu mi gɔ, hã wa dɛ̃ mɔ kɛ mi kɔ̃a ni gɔ, nɛ mi kpolo sɛ linggamɔ dɛ dia mɛ, kɛ mi kɔ̃a zi we dɛ hã wa ni do'do.

¹¹ “Ngangga ni, Yeremi, mɔ tɔ̃ hã Owi ngɔ nù Yuda do Owi kɔ le Yeruzalɛmɛ na, mi NWA mi tɔ̃a na, mi handa we hã 'bako hã wa. Ma wia na, wele do wele la fala 'dã dɛa mɔ tɛ̃ ɛ, nɛ a dɛ́ mɔ tɛ a ɔ nɛ kɛ ma wia ni.

¹² Nɛ nde wa 'bana tɛ dɛ yia nga zui 'da wa, nɛ wa gese na: ‘Mɔ tɛ 'dàngà nu mɔ yala gɔ! Lɛ dɛ sɛ mɛ kɛ lɛ kɔ̃a we dɛ ma ni iko.’ ”

Ta zu Oisraɛlɛ ila ngɔ Gale 'da wa

¹³ NWA tɔ̃a na: “Nɛ áká ogele winɔ na, wa zila mbe kuti lɛnggɛ ɔ ni nde? Mɛ Oisraɛlɛ wa dɛa gɛ, ma 'danga la li ngele.

¹⁴ Kolo gbãlã mũlũ zɔla mbe 'da fala sabɛlɛ nde? Lì kɔ ta ma ɔ̃ ɔ̃sã nde?

¹⁵ Ĩ na, ta zu owinɔ 'da mi ila ngɔ mi, nɛ wa dɔ sa'de we dɔnggɔ oyia kpikima. Wa yɔa nyanga wa li walanɔ wa yɛnggɛ zi nɛ ni, nɛ wa la dia wala olo oyaa wa do'do, nɛ wa lia zamɔ, kɛ li wala se'de bina ni.

¹⁶ Wa dɛa na, nùi 'da wa 'danga, nɛ ma hɔ mɔ a kili tɛ wele. Owinɔ vɛ̃ kɛ wa la do di ni ni, wa zɔ ma, nɛ ma ba sɛ we nu wa, nɛ wa yaka zu wa.

¹⁷ Mi dɛ sɛ na, owi sɛnɛ owinɔ 'da mi wa tɛ, nɛ wa pɛsɛ wa yerr, ɔ nɛ kɛ bũ yolo si 'biti gba wese, nɛ ma tulu do butu kɛnzɛ ni. 'Da fala kɛ ngamɛ ma hɔ sɛ ni, nɛ mi siki sɛ 'do mi hã winɔ 'da mi, nɛ mi gálá sɛ wa gɔ.”

Owinɔ wa ba zã zu we dɛ ngɔ Yeremi

¹⁸ Owinɔ wa zila ní, nɛ wa tɔ̃ na: “Lɛ nɛ́, hã lɛ dɛ Yeremi 'danga. Lɛ zɔlɔ onganga we be mɔ hã lɛ gɔ. Lɛ zɔlɔ Owi hã zã we tɔ̃ mbula hã lɛ gɔ. Nɛ lɛ zɔ̀lɔ̀ 'bɔ Owi gba olo nu Gale gɔ. Lɛ tɛ zèlè 'bɔ wenɔ a tɔ̃ ni gɔ. Lɛ fá we 'danga zu li a, sɛ a toe 'da a 'danga de.”

¹⁹ Ma kɛ mi sambala na: “Aa NWA, mɔ gɛ́ zala mɔ tɛ wenɔ mi tɔ̃ gɛ, nɛ mɔ zele kɛnɔ owi sɛnɛ mi wa tɔ̃ dɛ ngɔ mi ni.

²⁰ Wele dɛ dia dɛa mɔ hã mɔ, nɛ mɔ wia we si olo nɛ do 'dã mɔ nde? Ĩ na, wa ndɔa bili we ba mi. Nɛ nde ta zu mɔ tɛ èlè ngɔ kɛ mi yolo zi dati mɔ, we wele we hã mɔ we wa, takɔ sila mɔ mbɔkɔ dɛ tɛ wa ni gɔ.

²¹ Ngangga ni, nwa mɔ dɛ́ na, obenɔ 'da wa wa fe do gba wɔ, nɛ mɔ gbɛ wa li bolo, nɛ owukonɔ wa dungu sã olo wili wa, do obenɔ 'da wa! Mɔ dɛ́ 'bɔ na, Owi wilinɔ wa fe fio 'dã zɛlɛ, nɛ ozagbãlãnɔ wa fe li bolo.

²² Mɔ tómbó Owi bolonɔ hã wa bi wa, hã wa zũ mɛnɔ 'da wa, hã wa he hiamɔ kili. We duzu kɛ wa ndɔa bili hã mi na ma ba mi.

²³ Nɛ nde mɔ NWA, mɔ ĩ ti tɛlɛ tɛ kɛ wa ba zã zu we gbɛ mi ni. Mɔ tɛ fò ku'da 'dã mɛ 'da wa gɔ. Mɔ bé nɔ̃lɔ̃ zã 'da mɔ, nɛ mɔ hã etumbu hã wa.”