Yeremi 17 - WE NU GALE 1995

NWA bia 'dã mɛ 'da Oyuda dɛ nza

¹ NWA tɔ̃a na: “Aa nɛ, Oyuda, wa kɔma 'dã mɛ 'da nɛ do 'bɛ̃lɛ̃ nu mɔ bolo dɛ ngɔ sila nɛ. Wa yɔla ma do 'bɛ̃lɛ̃ nu ta diamã dɛ li gbala gbagalanɔ kɛ nɛ dɛa we dɔnggɔ do mi Gale ni.

² Nɛ ma gba ta zu obenɔ 'da nɛ ngɔ ogbagalanɔ, do okpikimanɔ, do osɛa tenɔ kɛ nɛ zĩ ma tɛ ti o'bɔa tenɔ, tɛ ngɔ kalanɔ,

³ do ngɔ kusu falanɔ li zɔ̃ i ni. Mi dɛ sɛ na, Owi sɛnɛ nɛ wa tɛ, hã wa kala odia mɛnɔ 'da nɛ, do kpamɛnɔ 'da nɛ, we duzu 'dã mɛnɔ kɛ nɛ dɛa ma tɛ falanɔ nɛ dɔnggɔ do okpikimanɔ ni.

⁴ Nɛ gese sɛ nùi mi 'dɔlɔ zi hã nɛ ni hã Owele nɛ. Nɛ mi dɛ sɛ na, nɛ hɔ ongbá ti Owi sɛnɛ nɛ, tɛ ngɔ nù kɛ nɛ zɔ̃ kuti nɛ gɔ. We duzu kɛ nɛ nɔ̃lɔ̃ zã mi la li ngele, nɛ sila mi gɛ̃ sɛ fala kpo gɔ.”

Gale wila we kpi do kpi

⁵ NWA tɔ̃a na: “Wi kɛ a siki 'do a hã mi, hã a gbini zã a do wele, hã a fa ngawi 'da a kɔ̃ Owele yala iko ni, nɛ mi fɔmbɔ sɛ a.

⁶ Wi ni sɛ do yangga bina. A ɔ sɛ nɛ te kɛ ma hɔa tɛ li go tɛ ngɔ nù kɛ kolo tɛ́ se'de gɔ, nɛ kpalɛ kpásá tɛ nɛ gɔ ni.

⁷ Nɛ nde mi wele sɛ nu mi tɛ wele kɛ a gbini zã a do mi, nɛ a e sila a ngɔ mi ni.

⁸ A ɔ sɛ nɛ te kɛ wa mi ma tɛ nù lì, nɛ Hã nɛ le dɛ ti lì i ni. Te ni dɛ́ kili tua wese gɔ, nɛ nwá nɛ 'bɔ bɔa fai. Gɛnɛ kɔ 'da fala sabɛlɛ, nɛ nde ma kóló gɔ, nɛ ma ko kua fai.

⁹ “Wi wia we ĩ ti we kɔ sila wele wi a wio nde? Sila wi ɔkɔlɔ wele fai, nɛ fo mɔ amba ma bina, wele wè tɛ gbini zã ɛ do ma gɔ.

¹⁰ Nɛ nde mi NWA, mi zɔ kɔ sila winɔ zɔa, nɛ mi ĩ ti linggamɛnɔ 'da wa. Mi ĩ ti dungu 'da winɔ vɛ̃, nɛ mi si olo dɛa mɔ tɛ wele do wele hã a.”

¹¹ Wi kɛ a kpa mɔ do 'dã wala ni, a ɔ nɛ naa kɔla kɛ a si ngɔ kuli kɔkɔlɔ ni. Kpamɛnɔ 'da a ma e sɛ kɔ̃ a, nɛ nde a 'bana ngɔ nga tɛ̃ a, nɛ kɔ gbɛlɛ 'da a, a ɔ sɛ nɛ yia wi ni.

¹² Aa NWA, Tɛmpɛloe lɛ dɔnggɔ do mɔ ngɔ kala i ni, mɛ a kpongbo nwa 'da mɔ, ma do dɔ̃lɔ̃ li wena. Yolo do kɛ nùi ndua nɛ ni, ma gã la mɔ vɛ̃.

¹³ Aa NWA, mɔ a wi kɛ obe Israɛlɛ wa gbini zã wa do mɔ. Nɛ owanɔ wa la fala mɔ ni, wa kpa sɛ sape. Wa kumu sɛ ngɔ nù gɛ, nɛ wa bisi ɔ nɛ li wi kɛ wa kɔma ma ngɔ kɛnzɛ ni, we duzu kɛ wa la fala mɔ nwa, kɛ mɔ ɔ nɛ zu lì kɛ wa kpasa we nɛ ni.

Yeremi aka NWA na a gbaka ɛ

¹⁴ Aa NWA, mɔ kpásá mi, nɛ zɛlɛ 'da mi ma e sɛ. Mɔ gbáká mi, nɛ mi dungu sɛ do dia nɛ. We kɛ mɔ a wi kɛ mi dɔnggɔ tɛ mi do mɔ.

¹⁵ Owinɔ wa tɔ̃ hã mi na: “Ngamɛ nwa tɔ̃a we hã ma hã lɛ gɛ, ma a do nde? Lɛ kɔ̃a na a tombo ma ngangga ni!”

¹⁶ Nɛ nde nwa, mi a mi ngbɔkɔ mɔ na, mɔ tombo 'bako dɛ ngɔ wa gɔ. Mi kɔ̃ zi na, tũ ngamɔ hɔ hã wa gɔ. Mɔ ĩ ma de wena, mɔ ĩ ti wenɔ mi tɔ̃a ni vɛ̃.

¹⁷ Mɔ a wi kele zu mi tɛ 'da fala ngamɔ, kɔ mɔ kɔ̃, nɛ mɔ tɛ hɔ̀ wi a kili tɛ mi gɔ.

¹⁸ E kɔ sape bá li Owi zɛlɛ tɛ mi, nɛ ma tɛ bà li mi gɔ! E kɔ wa kpa ngamɔ, nɛ ngamɔ tɛ kpà mi gɔ! Mɔ tómbó ngamɛnɔ hã wa, nɛ mɔ kúmú wa yerr.

Mbulanɔ ngɔ kɔ̃ tũ ɔmɔ tɛ wi

¹⁹ NWA ba nu a hã mi na: “Yeremi, mɔ nɛ́, hã mɔ tɔ̃̀ toe gɛ tɛ nu ngboe wa sa li nɛ na: ‘Nu Ngboe 'da Owinɔ ni.’ Mɛ a fala kɛ onwa ngɔ nù Yuda, wa la do ma we le nɛ, tabi we hɔ nza kɔ le Yeruzalɛmɛ. 'Do nɛ, nɛ mo nɛ́ tɛ ogele nu ngbonɔ kɔ le ni vɛ̃.

²⁰ Nɛ mɔ tɔ̃̀ hã owinɔ vɛ̃ kɛ wa la do di ni ni na: Nɛ, Onwanɔ do owinɔ ngɔ nù Yuda, do kɔ le Yeruzalɛmɛ vɛ̃, nɛ zélé we NWA tɔ̃a gɛ.

²¹ A na: Do kɔ̃ tũ ɔmɔ tɛ wi, nɛ nɛ tɛ bà tole, tabi mɔ kpo, nɛ nɛ le nɛ do nu ngbonɔ tɛ Yeruzalɛmɛ gɛ gɔ.

²² Nɛ tɛ bà mɔ kpo kɔ tɔanɔ 'da nɛ, nɛ nɛ hɔ nɛ nza do kɔ̃ tũ ɔmɔ tɛ wi gɔ. Nɛ dɛ́ sɛ to do kɔ̃ tũi ni gɔ. Nɛ dungu sɛ ɛngga ni we dɔnggɔ do mi, ɔ nɛ kɛ mi ba zi do nu mi hã oyaa nɛ ni.

²³ Nɛ nde oyaa nɛ wa gɛ̀ zi zala wa we zele we nu mi gɔ. Wa dɛa nga zu, nɛ wa zèlè mi gɔ, nɛ wa bɛ̃a mbulanɔ 'da mi.

²⁴ “Mɔ dálá 'bɔ nu mɔ hã wa na: ‘Nɛ tɛ bà tole do kɔ̃ tũ ɔmɔ tɛ wi, nɛ nɛ la nɛ do nu ngbo le gɔ. Nɛ dúngú ɛngga ni we dɔnggɔ do mi, nɛ nɛ tɛ dɛ̃ to gɔ.

²⁵ Fala kɛ nɛ zele we nu mi, nɛ Onwanɔ kɛ wa dungu olo Davidi ni, wa 'bana sɛ tɛ la do nu ngbo le ni dɛ kɔ ngilingilinɔ, do ngɔ mbalatanɔ 'da wa, fala nɛ kpo do owi olo li wa, do owinɔ ngɔ nù Yuda, do Owi kɔ le Yeruzalɛmɛ. Nɛ Owele wa 'bana sɛ kɔ le Yeruzalɛmɛ fai.

²⁶ Nɛ owinɔ wa yolo sɛ kɔ lenɔ ngɔ nù Yuda, do kɛnɔ kɛ zã Yeruzalɛmɛ, do ngɔ nù Bɛnzamɛ, do ngɔ mbɛ nù nyanga kalanɔ, do ngɔ kalanɔ, do tɛ li gba zɔ̃ Negɛvɛ, nɛ wa tɛ sɛ dɛ kɔ tɔa Tɛmpɛloe we hã odɔnggamɔ kpi do kpi hã mi. Wa gbɛ sɛ sa'de, nɛ wa dɔ sɛ mbe nɛ we dɔnggɔ do mi. Wa dɔnggɔ sɛ mi do kpalɛ, do fũ yɔmbɔ, nɛ wa gbɛ 'bɔ sa'de we hã iɔ̃nae hã mi.

²⁷ Nɛ nde fala kɛ nɛ dùngù ɛngga ɔmɔ tɛ wi we dɔnggɔ mi gɔ, hã nɛ la do nu ngbonɔ kɔ le Yeruzalɛmɛ ni do otole dɛ li 'do nɛ do kɔ̃ tũ ɔmɔ tɛ wi, nɛ mi fi sɛ we tɛ nu ngbonɔ, nɛ ma bɛlɛ sɛ odia tɔanɔ kɔ le ni vɛ̃, nɛ fo sɛ wi bi ma bina.’ ”