Yeremi 16 - WE NU GALE 1995

Yeremi 'bana zu a kpo

¹ NWA tɔ́a 'bɔ hã mi na:

² “Mɔ tɛ bà wuko, hã mɔ ko obe ngɔ nùi kɛ ɔ nɛ gɛ gɔ.

³ Mɔ zélé mɛ ma nɛ dɛ obenɔ, kɛ wa nɛ ko wa ngɔ nùi gɛ, do onaa wa, do obaa wa ni.

⁴ Wa fe sɛ 'dã zɛlɛ, nɛ fo sɛ wi he kɔ̃a wa, tabi wi mi wa bina. Wɔlɔ wa ma mbulu sɛ, nɛ ma dɛ sɛ zubu we 'dafa nùi. Wa fe sɛ li bolo, tabi gba wɔ ma gbɛ sɛ wa. Nɛ wɔlɔ wa ma dɛ sɛ nyɔngɔmɔ nu oganakele do osa'de zamɔ.”

⁵ NWA tɔ́a 'bɔ hã mi na: “Mɔ tɛ ɔ̀ ngɔ fio gɔ, nɛ mɔ tɛ hɔ̀ nu tɔa fio we dɛ 'bako do Owele fie ni gɔ. We duzu kɛ, mi fo sɛ dɛa na, do dungu fio sanga wa do'do. Mi wélé sɛ 'bɔ nu mi tɛ winɔ 'da mi gɔ, nɛ mi dɛ́ sɛ 'bɔ 'bako hã wa gɔ. Mi nwa, mi tɔ́a ni.

⁶ Owi kpamɔ do Owi sã wa fe sɛ dɛ ngɔ nùi gɛ, nɛ nde fo sɛ wi mi wa, do wi he kɔ̃a wa bina. Nɛ fo sɛ wi gɔnɔ dã tɛ̃ ɛ, tabi wi kɛlɛ zu ɛ we dungu gɛla wa bina.

⁷ Wele kpo tɛ́ sɛ we ɔ do wanɔ baa wa tabi naa wa fia ni gɔ. Nɛ wele kpo dúngú sɛ do wi kɛ wi mɔ́ a fia ni, we nyɔngɔ mɔ tabi nɔ dɔ́ do a, we mbɔkɔ zã a gɔ.

⁸ “Mɔ tɛ lè kɔ tɔa gbalimɔ gɔ. Mɔ tɛ dùngù nu we nyɔngɔ mɔ tabi nɔ dɔ́ do wele gɔ.

⁹ Mɔ zélé we kɛ mi, nwa ngɔ mɔ nyanga nza vɛ̃, Gale 'da nɛ obe Israɛlɛ, mi nɛ tɔ̃ ma ni. Mi kpe sɛ nu Owi zɛ kaliã, do owi he mɔ yangga. Nɛ mi kpe sɛ 'bɔ nu Owi ga zuma 'da fala mɔ dɔ ba ngba wi. Nɛ nɛ zɔ sɛ mɛnɔ ma nɛ dɛ tɛ̃ ɛ ni.

¹⁰ “Hã fala kɛ mɔ tɔ̃ sɛ wenɔ gɛ hã wa ni, nɛ mbe gɔ, nɛ wa aka sɛ mɔ na, lo gbɛa wio nde, nɛ 'dã mɛ lo dɛa do NWA Gale 'da lo ni a ge nde? Gulu kɛ a hã etumbu hã lo nganda ní we ge nde?

¹¹ Nɛ mɔ gese sɛ hã wa na, mi NWA, mi tɔ́a na: Oyaa nɛ wa la zi fala mi, nɛ wa dɔnggɔ ogele galenɔ, nɛ wa gu nù ti wa. Wa la fala mi, nɛ wa dɛ̀ mbulanɔ 'da mi gɔ.

¹² Nɛ nɛ dɛa 'bɔ mɔ tɛ nɛ 'danga nɛa ngɔ kɛ 'da oyaa nɛ. Nɛ vɛ̃ nɛ 'bana tɛ dɛ yia nga zui 'da nɛ, nɛ nɛ bɛ̃a we zele nu mi.

¹³ Gulu nɛ a mi ndaka sɛ nɛ ngɔ nùi gɛ do'do, nɛ mi a sɛ nɛ tɛ ngɔ gele nù, kɛ nɛ do oyaa nɛ, nɛ zɔ̃ mbe kuti ma gɔ ni. Nɛ hɔ́ i mɔ, nɛ nɛ dɔnggɔ sɛ ogele galenɔ tũ do gba wese, nɛ mi dɛ́ sɛ 'bɔ 'bako hã nɛ sĩ gɔ!”

Obe Israɛlɛ wa si sɛ kɔlɔ 'duli

^14-15 NWA tɔ̃a na: “Zi dati, nɛ kana zi tɛ nɛ do zu li mi na: ‘Mi kana tɛ mi do zu li NWA wele kpasi, kɛ a fua zi lɛ obe Israɛlɛ ngɔ nù Ezipeto dɛ nza’ ni. Nɛ nde mbe ngba soe kpo, nɛ nɛ tɔ̃́ sɛ 'bɔ ni gɔ, nɛ tɔ̃ sɛ na: ‘Mi kana tɛ mi do zu li NWA wele kpasi, kɛ a 'dɔlɔ zi lɛ obe Israɛlɛ dɛ ngɔ nùi si gbãlã ngɔ, do ngɔ ogele nùnɔ, nɛ a kala 'bɔ lɛ, nɛ a gese lɛ dɛ ngɔ nùi 'da lɛ ni.’ Mba gɔ, mi gese sɛ nɛ, obe Israɛlɛ dɛ ngɔ nùi 'da nɛ kɛ mi hã zi hã oyaa nɛ ni.”

Owi dɛ 'dã mɛnɔ vɛ wa kpa sɛ etumbu

¹⁶ NWA tɔ̃a na: “Mi sa sɛ mɔ hã ogele soda, nɛ mi tombo wa dɛlɛ wena dɛ ngɔ owinɔ 'da mi, hã wa gbɛ wa ɔ nɛ kɛ Owi gbɛ kɔyɔnɔ, wa gbɛ do kɔyɔnɔ ni. Nɛ mi tombo sɛ 'bɔ mbé osoda, takɔ wa ndaka 'do wa tɛ ngɔ gã kalanɔ, do obe kalanɔ, do kɔ tanɔ, ɔ nɛ Owi yali zamɔ wa bi sa'de ni.

¹⁷ Mi zɔ mɛnɔ vɛ̃ wa dɛ ni zɔa, mɔ kpo là li mi gɔ. 'Dã mɛnɔ 'da wa ma be tɛ̃ ɛ dɛ gbali mi yerr.

¹⁸ Wa faka nùi 'da mi, we kɛ wa dɔnggɔ ofio kpikimanɔ. Nɛ wa ngɛmɛ ogba gili gale bɛlɛnɔ dɛ di ni. Ma kɛ mi dɛ sɛ na, wa kpa si olo 'dã mɛnɔ 'da wa, do yɔa ti dɛa mɛnɔ 'da wa fala bɔa.”

Winɔ vɛ wa ĩ sɛ ti ngbongbo Gale

¹⁹ Aa NWA, mɔ a wi fɔmɔ mi, nɛ mɔ a mɔ hã ngawi hã mi. Mɔ a wi kele zu mi 'da fala ngamɔ. Ogele nu kɔnggɔnɔ wa yolo sɛ tɛ ndɔti nùi, nɛ wa tɛ dɛ 'da mɔ. Nɛ wa tɔ̃ sɛ na: “Sambala 'da oyaa lɛ ma zi a gbãlã we sambala gɔ, mɛ zi a mɔ bɛlɛ kɛ ma do gulu nɛ bina.

²⁰ Owele wa wia we dɛ ogale nde? Gɔ, mɛnɔ wa dɛ dɛa ni, mɛ a ogale gɔ.”

²¹ Nɛ nwa tɔ̃a na: “Na mɛ ni, ngangga gɛ mi dɛ sɛ na, wa ĩ ti ngawi 'da mi. Wa ĩ sɛ na, li mi a NWA.”