Yeremi 15 - WE NU GALE 1995

Gale gɔnɔ ngbangga 'da owinɔ 'da a

¹ NWA tɔ́a hã mi na: “Gɛnɛ kɔ Mɔizɛ do Samuɛlɛ wa hɔ sɔ dɛ, hã wa ala nu wa hã mi we owinɔ gɛ, nɛ nde mi dɛ́ sɔ 'bako hã wa gɔ. Kɔ mɔ nɛ́, hã mɔ tɔ̃́ hã wa na, wa fó tɛ wa li mi do'do.

² Kɔ wa aka mɔ na, lo fo tɛ lo, hã lo la dɛ do nde? Nɛ mɔ tɔ̃ hã wa na, mi NWA, mi 'dafa wala kɛ wele do wele nɛ la do ma ni ia. Ombe wa fe sɛ do 'dã zɛlɛ, nɛ ombe wa fe fio bolo. Ombe wa fe sɛ do wɔ, nɛ otala nɛ wa la sɛ kɔlɔ 'duli.

³ Mi NWA, mi 'dafa etumbunɔ nalɛ ni hã owinɔ 'da mi. Wa fe sɛ li bolo, nɛ otolo wa gbɔtɔ sɛ wɔlɔ wa nyɛlɛ ndũu, oganakele wa nyɔngɔ sɛ ma, nɛ osa'de zamɔ wa nyɔngɔ tala nɛ yerr.

⁴ Mi dɛ sɛ na, owinɔ ngɔ nù gɛ vɛ̃ wa zɔ fie wa fe ni, nɛ wa tana kili. Mi dɛ sɛ ni, we si olo 'dã mɛnɔ kɛ Manase, be 'da Ezekiasi dɛa zi tɛ kɔ le Yeruzalɛmɛ, do 'da fala kɛ a zi a nwa ngɔ nù Yuda ni.”

Gale bɛ̃a we dɛ 'bako hã owinɔ 'da a

⁵ NWA tɔ̃a na: “Nɛ, owi Yeruzalɛmɛ, wi nɛ dɛ sɛ 'bɔ 'bako hã nɛ a wio nde? Wi nɛ lengge sɛ 'bɔ do nɛ, we aka sakoe 'da nɛ a wio nde?

⁶ Nɛ bɛ̃a gɛnɛ mi, nɛ nɛ siki 'do nɛ hã mi. Ma kɛ mi nɛ hã etumbu hã nɛ gbaa ndɔti nɛ a kɛ nɛ kumu vɛ̃, we kɛ mi dɛa 'bako hã nɛ fala dɛlɛ wena, nɛ ma ngba mi do'do.

⁷ Mi nɛa kɔ le 'da nɛ kpo kpo, nɛ mi pɛsɛ nɛ, owinɔ 'da mi, nɛ nɛ pɛsɛ ɔ nɛ 'bulu wɔkɔsɔ ni. Mi pɛsɛ nɛ, nɛ mi gbɛa obenɔ 'da nɛ, nɛ nde nɛ kpòlò dɛa mɔ tɛ nɛ gɔ.

⁸ Mi dɛa na, owi fio wili wa dɛlɛ ngɔ nùi 'da nɛ, ɔ nɛ gbãlã kɛnzɛ nu gba lì ni. Mi gbɛa ozagbãlã sodanɔ 'da nɛ, nɛ 'bako kala nyanga naa wa, nɛ ma lo wa nù, nɛ wa tana kili nganda wena.

⁹ Naa ogba dɔa be, kɛ a zi do obenɔ 'da a sambo ni, a 'bɔa, nɛ hi a hã, we kɛ benɔ 'da a wa fia vɛ̃. We duzu a, ma ɔ nɛ kɛ wese gɛ̃a do nga kula gba wese ni. Sape ba li a, nɛ ma dĩlĩ a, nɛ zu a vĩ vɛ̃. Nɛ tala winɔ 'da nɛ wa 'bana ni, mi dɛ sɛ na, owi sɛnɛ wa wa gbɛ wa. Mi NWA, mi tɔ̃a ni.”

Yeremi ala nu a hã NWA

¹⁰ Aa nae, mi a wi 'bako! Gulu kɛ naa mi kua mi dɛ nza we ge nde? Owinɔ ngɔ nùi gɛ vɛ̃ wa bɛ̃a we nu mi, nɛ wa sɛnɛ mi, wa kɔ̃ we zele wala gɛlɛ mi gɔ. Owinɔ vɛ̃ wa 'danga nu wa hã mi, ĩ na, fo we mɔ́ mi tɛ wele bina, nɛ mi bà 'bɔ ku'da kɔ wele gɔ.

¹¹ Nɛ NWA tɔ́a na: “Mi kpasa mɔ, takɔ mi dɛ dia mɔ hã mɔ. Nɛ mi hã ngamɔ hã wi sɛnɛ mɔ, nɛ a kpa 'bako, nɛ kili ba a, nɛ a ala nu a hã mɔ.

¹² Wi wia we gbini sanga mɔ bolo do kɔ̃ a, wi a wio nde? Owi bolonɔ kɛ wa yolo si gbãlã ngɔ i ni, wa nganda ɔ nɛ mɔ bolo ni. Kɔ wi wia we yolo dati wa a wio nde?”

¹³ Nɛ NWA tɔ́a 'bɔ hã mi na: “Mi tombo sɛ Owi sɛnɛ Oyuda, takɔ wa kala kpamɛnɔ do odia mɛnɔ 'da wa. Ki ni sɛ a etumbui kɛ mi nɛ hã hã wa, we bili do gbã 'dã mɛnɔ wa dɛa ngɔ nùi 'da wa ni.

¹⁴ Mi dɛ sɛ na, owi sɛnɛ wa wa kala wa, nɛ wa si do wa ngɔ nù kɛ wa hɔ̀ kuti tɛ nɛ gɔ ni. We duzu kɛ nɔ̃lɔ̃ zã 'da mi ma ɔ nɛ nyɛa we ni, ma bɛlɛ sɛ mɛnɔ bɛla fai.”

¹⁵ Nɛ mi gisa na: “Aa nwa, mɔ ĩ ti mɛnɔ ma la gɛ. Mɔ lénggé do mi, mɔ gálá mi, nɛ mɔ hã́ etumbu hã owinɔ wa zɛlɛ tɛ mi ni. Da dɛ kɔ mɔ 'bɔ́ 'bɔa, hã wa gbɛ mi gɔ! Mɔ ĩ na, mi kunu sila mi ngɔ dɛlanɔ kɛ wa dã do mi ni we duzu mɔ.

¹⁶ Mɔ wila we hã mi, nɛ mi ba ma do ti. Wenɔ 'da mɔ ma gɛ̃ sila mi, nɛ ma hã yangga hã mi, we kɛ mi a wi mɔ́ mɔ Gale, NWA ngɔ mɔ nyanga nza vɛ̃.

¹⁷ Nɔ̃lɔ̃ zã 'da mɔ ma lia mi, nɛ mi kɔ̃̀ we yɛnggɛ tɛ dɛ sa iko do owinɔ kɛ wa dungu tɛ fi gbɛlɛgbɛsɛ ni gɔ. Mɔ dɛa na, mi ɛlɛ tɛ mi tɛ wa, nɛ mi dungu zu mi kpo.

¹⁸ Gulu kɛ tɛ mi zɛlɛ gbaa ni we ge nde? Gulu kɛ 'bakoe 'da mi ma ɔ nɛ dani kɛ ma 'bana fai, nɛ ma ɛ̃̀ gɔ ni we ge nde? Mɔ ɔ li mi nɛ be waya, kɛ ma ɔ̃sɔ̃ 'do ngbɛ ɛ do 'do ngbɛ ɛ, nɛ wele wè we gbini zã ɛ na, ɛ kpa sɛ lì di ni gɔ ni.”

¹⁹ Nɛ NWA gisa hã mi na: “Fala kɛ mɔ kpolo tɛ mɔ 'da mi, nɛ mi dɛ sɛ na, mɔ hɔ 'bɔ wi toe 'da mi. Fala kɛ mɔ la fala wele yia wila we, hã mɔ ndo tɔ̃ gbãlã we lɛnggɛ, nɛ mɔ hɔ sɛ 'bɔ wi gba olo nu mi. Nɛ Oyuda wa kifi sɛ sila wa, nɛ wa kɔ sɛ gɛnɛ we nu mɔ, nɛ nde mɔ nɛ́ sɛ 'do lɛnggɛnɔ 'da wa gɔ.

²⁰ Mi dɛ sɛ na, mɔ yolo dati wa ɔ nɛ ngbo tũ mɔ bolo kɛ ma yɛ́kɛ́ tɛ̃ ɛ gɔ ni. Wa bi sɛ do mɔ, nɛ nde wa nɛ́ sɛ ngɔ mɔ gɔ, we duzu kɛ mi sɛ do mɔ boe, nɛ mi kpasa sɛ mɔ ti kɔ wa.

²¹ Mi gbɔtɔ sɛ mɔ, nɛ mɔ hɔ sɛ nza ti kɔ̃ o'dã winɔ do Owi zɛlɛ tɛ winɔ. Mi NWA, mi tɔ́a ni.”