Yeremi 14 - WE NU GALE 1995

Wila we 'da Gale 'da fala kɛ sabɛlɛ fila kerr ni

¹ 'Da fala kɛ sabɛlɛ fila kerr ni, nɛ NWA tɔ̃ hã mi na:

² “Oyuda wa tɛ dungu gɛla, lenɔ 'da wa ma 'danga vɛ̃, 'bako 'da winɔ ma gã wena, wa dungu dɛ bulu nù iko. Owi kɔ le Yeruzalɛmɛ wa tɛ ala nu wa hã mi Gale.

³ Ogã winɔ wa tombo owi tonɔ 'da wa we so lì. Kɔ wa nɛa we hɔ nu kɔ̃ lì i, nɛ nde ma ɔ̃sɔ̃ do'do, nɛ wa si do wila kɔ kpananɔ iko. Nɛ zu wa vĩ, nɛ 'bako ba wa, nɛ wa bili zu wa nù.

⁴ Kolo tɛ́ 'bɔ gɔ, nɛ nùi kula kpakala kpakala, nɛ zu owi kɔ lenɔ vĩ, nɛ 'bako ba wa, nɛ wa bili zu wa nù.

⁵ Odɛngbɛnɔ wa ko zamɔ i, nɛ wa yu, nɛ wa la obenɔ, we duzu kɛ fo dia wɔkɔsɔ bina.

⁶ Opundanɔ wa yolo dɛ zu kalanɔ, nɛ wa nɔ bũ ɔ nɛ otolo zamɔ ni. Li wa tũ do'do, we kɛ fo 'bɔ mbé wɔkɔsɔ na wa nyɔngɔ bina.

⁷ “Nɛ owinɔ 'da mi wa tɛ he mɔ na: ‘Aa NWA, lɛ dɛa 'dã mɔ gbãlã we, nɛ lɛ tia do ngbangga. Kɔ mɔ gálá lɛ, we duzu dɔ̃lɔ̃ li 'da mɔ. Lɛ bɛ̃a we nu mɔ fala dɔ wena, nɛ lɛ dɛa 'dã mɔ dɛ 'da mɔ.

⁸ Nɛ nde wi kɛ lɛ, obe Israɛlɛ, lɛ wia we gbini zã le do a ni, wi tati a mɔ zu mɔ kpo, we kɛ mɔ a wi kpasa lɛ kɔ ngamɔ. Kɔ gulu kɛ mɔ zɔ tɛ mɔ ngɔ nùi 'da lɛ ɔ nɛ kɛ mɔ a gele wi ni we ge nde? Gulu kɛ mɔ dɛ tɛ mɔ ɔ nɛ wi la wala, kɛ a ɛlɛ we fa fala ɔi iko ni we ge nde?

⁹ Ngawi 'da mɔ ma i ia nde? Gulu kɛ mɔ dɛ mɔ ɔ nɛ nwa bolo kɛ a mbɔkɔ do'do, nɛ a wè 'bɔ we kpasa winɔ 'da a gɔ ni we ge nde? Ĩ na mɔ NWA, mɔ a wele lɛ, nɛ lɛ a owinɔ 'da mɔ, mɔ tɛ fò tɛ mɔ 'do lɛ gɔ!’ ”

Gale bɛ̃a we zele sambala 'da Yeremi

¹⁰ Nɛ NWA tɔ̃a dɛ ngɔ winɔ ni na: “Owinɔ gɛ wa kɔ̃a we nɛ 'dɔkɔlɔ ogele galenɔ fai, wa ĩ ti kunu sila wa gɔ. Ma kɛ mi kɔ̃̀ 'bɔ gɛnɛ wa gɔ. Mi lengge sɛ 'dã mɛnɔ wa dɛ ni, nɛ mi hã sɛ etumbu hã wa.”

¹¹ NWA tɔ̃a 'bɔ hã mi na: “Mɔ tɛ àkà mi na, mi gala owinɔ gɛ gɔ.

¹² Gɛnɛ kɔ wa bɛ̃ nyɔngɔmɔ we dɔnggɔ do mi, nɛ nde mi zélé sɛ ala nui 'da wa gɔ. Gɛnɛ kɔ wa gbɛ sa'de we dɔnggɔ do mi, tabi wa hã gele dɔnggamɔ hã mi, nɛ nde mi kɔ̃́ sɛ gɛnɛ nɛ gɔ. Mi fa sɛ tɛ mɛ na, gba wɔ do 'dã zɛlɛ ma gbɛ wa, tabi wa fe li bolo.”

¹³ Nɛ mi gisa na: “Aa NWA Gale, Owi gba olo nu mɔ wa tɔ̃ hã wa na, wa fé sɛ li bolo gɔ, nɛ gba wɔ do 'dã zɛlɛ ma gbɛ̃ sɛ wa gɔ. Nɛ nde mɔ hã sɛ dia dungu hã wa ngɔ nùi gɛ fai.”

¹⁴ Nɛ NWA gisa hã mi na: “Owinɔ wa gba olo nu mi ni wa ɔkɔlɔ winɔ do zu li mi iko. Mi a mi tòmbò wa gɔ. Mi bà nu mi hã wa gɔ, nɛ mi wèlè we kpo hã wa gɔ. Wenɔ wa tɔ̃ hã nɛ ni, mɛ a lɛnggɛ bɛlɛ kɛ ma do gulu nɛ bina, mɛ a olɛnggɛ kɛ wa do tɛ wa wa kũ ma we ɔkɔlɔ do winɔ iko.

¹⁵ Gulu nɛ a mi nwa, mi tɔ̃ dɛ ngɔ winɔ ni na, ɔ nɛ kɛ mi tòmbò wa gɔ, nɛ wa ɔkɔlɔ winɔ do zu li mi na, bolo sɛ bina, nɛ gba wɔ tabi 'dã zɛlɛ té sɛ ngɔ nùi gɛ gɔ ni, wa do tɛ wa ngboo wa fe sɛ li bolo, tabi do gba wɔ gbaa nɛ wa e vɛ̃.

¹⁶ Nɛ owinɔ kɛ wa zele lɛnggɛ bɛlɛnɔ 'da wa ni, wa fe sɛ tɛ mɛ 'bɔ na mɛ ni. Bolo tabi gba wɔ ma gbɛ sɛ wa, do owukonɔ 'da wa, do obulu benɔ do oboko benɔ 'da wa vɛ̃. Fo sɛ wi mi wa bina, nɛ wɔlɔ wa ma kpa sɛ do ngɔ walanɔ tɛ kɔ le Yeruzalɛmɛ fatata. Tɛlɛ tɛ kɛ mi dɛ sɛ na, wa futa ku'da 'dã mɛnɔ 'da wa gɛ a ni.”

¹⁷ NWA ba nu ɛ hã mi na, mi tɔ̃ gulu 'bakoe 'da mi hã owinɔ na: “E kɔ gbali mi dunu do mili kɔ̃a, nɛ ma si si fai, tũ do gba wese, tua kɛ owinɔ 'da mi, wa kpa ngamɔ kɛ ma gã la li ngele.

¹⁸ Fala kɛ mi nɛ tɛ li zɔ̃ i, nɛ mi kpa wɔlɔ winɔ kɛ wa fia li bole ni. Tabi mi hɔ kɔ lenɔ, nɛ mi kpa wɔlɔ winɔ kɛ wa fia do wɛ ni. Owi gba olo nu Gale do onganganɔ, wa yɛnggɛ ngɔ nùi gɛ, nɛ nde wa ĩ́ ti gulu mɛnɔ ma la ni gɔ.”

¹⁹ Oyuda wa tɔ̃a na: “Aa NWA, mɔ bɛ̃a gɛnɛ lɛ kpaa nde? Tili lɛ, owi kɔ le Sioni ba li mɔ nde? Mɔ hã ngamɔ hã lɛ gbaa, nɛ fo 'bɔ wala kpasi do lɛ bina, gulu nɛ we ge nde? Lɛ lengge zi na, mɛnɔ ma de sɛ dɛ olo nɛ, nɛ nde mɔ na mɛ ni bina. Lɛ 'bɔ zi 'da ngba soe kɛ zɛlɛ tɛnɔ 'da lɛ ma e sɛ nɛ ni, nɛ mɛ hɔa hã lɛ, mɛ a Sɔkpɔ tala kili.

²⁰ Aa NWA, lɛ ĩ na, lɛ dɛa 'dã mɔ dɛ 'da mɔ, nɛ oyaa lɛ, wa dɛa zi 'bɔ 'dã mɔ.

²¹ Kɔ mɔ lengge do dɔ̃lɔ̃ li 'da mɔ, nɛ mɔ tɛ zɔ̃ lɛ yala iko gɔ. Mɔ tɛ ha sape hã le Yeruzalɛmɛ gɔ. We kɛ mɛ a fala kɛ kpongbo nwa 'da mɔ kɛ ma do dɔ̃lɔ̃ li wena ni, ma ɔ tɛ nɛ. Mɔ tɛ 'dàngà gba tɔkɛ kɛ mɔ gba zi do lɛ ni gɔ.

²² Mɔ zɔ́ ogale bɛlɛnɔ 'da gele winɔ, mbe sanga wa ni wia we fi kolo nde? Li nza tombo kolo dɛ nù nga tumba nde? Ɔ̃ ɔ̃, wi a mɔ NWA Gale 'da lɛ, mɔ zu mɔ kpo a mɔ dɛ mɛnɔ ni vɛ̃. Ma kɛ lɛ gbini zã lɛ do mɔ ni.”