Yeremi 13 - WE NU GALE 1995

Yeremi tɔ̃a gba we ngɔ 'dɛ̃ tulu linɛ

¹ NWA tɔ̃a hã mi na, mi nɛ hã mi oso 'dɛ̃ tulu linɛ, nɛ mi he'de ma dɛ 'dɛ tili mi. Nɛ a 'bɔ na, da dɛ kɔ mi fɔlɔ ma gɔ.

² Nɛ mi nɛa, nɛ mi oso ma, nɛ mi he'de dɛ 'dɛ tili mi, ɔ nɛ kɛ NWA tɔ̃a hã mi ni.

³ 'Do nɛ, nɛ NWA tɔ̃ 'bɔ hã mi na:

⁴ “Mɔ kúlú ngɔ, hã mɔ nɛ́ tɛ nu fua lì Fara. Mɔ hɔ i mɔ, nɛ mɔ bulu 'dɛ̃ 'dɛ tili mɔ ni, nɛ mɔ usu ma kɔ ta.”

⁵ Nɛ mi kulu ngɔ, nɛ mi nɛ nu fua lì Fara, nɛ mi usu 'dɛ̃ dɛ di ni, ɔ nɛ kɛ nwa ba do nu ɛ hã mi ni.

⁶ Olo nɛ la dɔa kɔ̃ tũ, nɛ NWA tɔ̃ hã mi na, mi kpolo tɛ mi nu lì Fara i we ba 'dɛ̃ zi mi usu ni.

⁷ Nɛ mi kpula tɛ mi i mɔ, nɛ mi fa ma, nɛ mi kpa. Nɛ mi ba, hã mi nɛ zɔ ma, nɛ nde ma mbulu do'do, nɛ ma wè 'bɔ mɔ hi hi'da gɔ.

⁸ Nɛ NWA tɔ̃ 'bɔ hã mi na:

⁹ “Tɛlɛ tɛ kɛ mi nɛ 'danga sɛ do omɔ hã dɔ̃lɔ̃ linɔ tɛ ngɔ nù Yuda, do kɔ le Yeruzalɛmɛ gɛ a ni.

¹⁰ Tua kɛ owinɔ ngɔ nùi ni, wa a o'dã wele, wa bɛ̃a we zele we nu mi. Wa dɛ yia nga zu ɔ nɛ kɛ zã wa kɔ̃a ni. Wa gu gba zu golo dati ogele galenɔ, nɛ wa dɔnggɔ wa. Ma kɛ wa mbulu sɛ ɔ nɛ kɛ 'dɛ̃ gɛ mbulu, nɛ ma wè 'bɔ mɔ hi hi'da gɔɛ ni.”

¹¹ Nɛ NWA tɔ̃ 'bɔ na: “Mi ba zi Oisraɛlɛ do Oyuda dɛ tɛ mi, ɔ nɛ kɛ 'dɛ̃ ɛnzɛ do 'dɛ tili wele ni. Mi dɛa zi ni takɔ wa hɔ winɔ 'da mi, nɛ Owele wa dɔnggɔ mi, nɛ wa tɔ̃ de sako li mi we wa, nɛ mi kpa dɔ̃lɔ̃ li. Nɛ nde wa dɛ̃ olo nu mi gɔ. Mi NWA, mi tɔ̃a ni.”

Yeremi tɔ̃a gba we ngɔ kpana dɔ̃

¹² NWA Gale tɔ̃a hã mi na: “Yeremi, mɔ nɛ́, hã mɔ aka Oisraɛlɛ na, kpana mɛ a mɔ a do dɔ̃ gɔ nde? Nɛ wa gese sɛ hã mɔ na, lo ĩ de wena na, mɛ a mɔ a do dɔ̃.

¹³ Nɛ mɔ tɔ̃ hã wa na, mi NWA, mi nɛ e dɔ̃ nu winɔ ngɔ nùi 'da wa gɛ vɛ̃. Onwanɔ kɛ wa a obe zã Davidi ni, onganganɔ, Owi gba olo nu mi, do tala Owi kɔ le Yeruzalɛmɛ gɛ vɛ̃, wa nɔ sɛ dɔ̃ɛ ni gbaa nɛ ma ba wa.

¹⁴ 'Do nɛ, nɛ mi kala sɛ wa vɛ̃, okpasa wi do obe, nɛ mi lo wa do ngba wa ɔ nɛ kɛ wa lo kpana do ngbɛ ɛ ngbɛnggɛ, nɛ ma o ni. Mi lá sɛ wele kpo gɔ, nɛ mi dɛ́ sɛ 'bako sĩ gɔ gbaa na wa kumu vɛ̃ nde. Mi NWA, mi tɔ̃a ni.”

Yeremi dãlã dɛ tɛ Oisraɛlɛ we ngatɛ 'da wa

¹⁵ Aa nɛ, Oisraɛlɛ, nɛ gɛ́ zala nɛ, we kɛ NWA tɛ wele we! Nɛ lá fala dɛ ngatɛ, hã nɛ zélé a!

¹⁶ Nɛ dɔ́nggɔ́ NWA Gale 'da nɛ, dati kɛ na a fi gba tũi kɔ nɛ kɔ zu nyanga nɛ ngɔ kalanɔ ni. Nɛ 'bɔ 'da tua wese, nɛ nde a kpolo sɛ ma do gba tũ, kɛ ma tũ kpirr, ɔ nɛ gba tũ kolo ni.

¹⁷ Fala kɛ nɛ zèlè mbisa we gɛ gɔ, nɛ mi gbɔtɔ sɛ tɛ mi sanga nɛ, nɛ mi la, nɛ mi usu tɛ mi, nɛ mi he kɔ̃a we duzu ngatɛ 'da nɛ. Mili kɔ̃a ma fo sɛ li mi yɛgbɛgbɛ we duzu kɛ wa kala nɛ, owinɔ 'da NWA do ngbá.

Gale tumba to hã nwa ngɔ nù Yuda

¹⁸ NWA tɔ̃a hã mi na: “Mɔ sá mɔ hã nwa ngɔ le gɛ do naa a, nɛ mɔ tɔ̃ hã wa na, wa kulu ngɔ ngɔ kpongbo nwa 'da wa, kɔ wa dungu dɛ bulu nù, we duzu kɛ dia ndasa nwa 'da wa, ma tia zu wa do'do.

¹⁹ Owi bolonɔ wa linggi lenɔ tɛ li gba zɔ̃ Negɛvɛ, nɛ wele kpo wè we hũi nu ngbonɔ gɔ. Wa kala Oyuda vɛ̃, nɛ wa la do wa kɔlɔ 'duli.”

Owi sɛnɛ Oisraɛlɛ wa yolo sɛ si gbãlã ngɔ

²⁰ Aa nɛ, owi kɔ le Yeruzalɛmɛ, nɛ bá li nɛ ngɔ, kɔ nɛ ka mɔ! Owi sɛnɛ nɛ wa yula si gbãlã ngɔ, kɔ wa tɛ tɛ ma! Hã mi aka nɛ na, owinɔ mi hã zi wa hã nɛ na, nɛ zɔ mɔ tɛ wa ni, wa a do nde? Owinɔ 'da nɛ kɛ nɛ dɔnggɔ zi tɛ nɛ do wa ni, wa a do nde?

²¹ Owinɔ kɛ nɛ lengge zi na, wa a oyali ngba nɛ ni, wa bi sɛ nɛ, nɛ wa ba le 'da nɛ, nɛ wa dungu nwa ngɔ nɛ. 'Da fala ni, nɛ nɛ tɔ̃ sɛ na ge nde? Tɛ nɛ ma zɛlɛ sɛ ɔ nɛ tɛ wuko kɛ a bi zɛlɛ kula ni.

²² Mbe gɔ, nɛ nɛ aka sɛ tɛ nɛ na, gulu kɛ lo kpa ngamɛnɔ gɛ we ge nde? Nɛ nde mɛ a we duzu gba gili 'dã mɛnɔ 'da nɛ, ma kɛ wa kala tulu tɛ nɛ dɛ ngɔ, nɛ wa 'danga nɛ ɔ nɛ kɛ wa wɛlɛ do be zɔnga ni.

²³ Tũ wi wia we kpolo ndala tɛ̃ ɛ nde? Nɛ gɔ̃̀ a wia we kpolo sala tɛ̃ a nde? Ma tɛ mɛ 'bɔ na mɛ ni we nɛ. Ɔ nɛ kɛ nɛ ili do dɛ 'dã mɔ ia ni, nɛ wé sɛ 'bɔ we dɛ de mɔ gɔ.

²⁴ NWA a pɛsɛ sɛ nɛ, ɔ nɛ kɛ bũ li gba zɔ̃ pɛsɛ do 'bulu zɔ̃ ni.

²⁵ NWA tɔ̃a na, tɛlɛ tɛ kɛ ɛ lingga na, ɛ bili do nu gbã 'dã mɛnɔ 'da nɛ gɛ a ni. We duzu kɛ ta zu nɛ ila ngɔ ɛ, nɛ nɛ gbini zã nɛ do ogale bɛlɛ.

²⁶ NWA a kala sɛ tulu tɛ nɛ dɛ ngɔ, nɛ ma a bula li nɛ, nɛ a la nɛ do kũlĩ tɛ nɛ.

²⁷ Nɛ dɛa wɔ tɛ gele galenɔ, nɛ nɛ nɛa 'dɔkɔlɔ wa, ɔ nɛ kɛ wɔ wili ba naa mbalata, nɛ a he mɔ tɛ yɛnggɛ 'dɔkɔlɔ a ni. Nɛ dɛa ndumba, nɛ ma hã sape hã NWA. A zɔa nɛ tɛ dɛ mɔ yɔnda ngɔ kalanɔ, do li zɔ̃nɔ kɛ nɛ dɔnggɔ do gele galenɔ ni. Aa nɛ, owi Yeruzalɛmɛ, nɛ kɔ 'bako! Ɔ nɛ kɛ nɛ kɔ̃̀ we dɔnggɔ NWA gɔɛ ni, nɛ nɛ hɔ sɛ sa wi li a soe ki nge nde?