Yeremi 12 - WE NU GALE 1995

Yeremi aka NWA do olɛnggɛ

¹ Aa nwa, mɔ a wi bɔlɔ zu ngboo, mi wè wi ba kafi nu mɔ gɔ. Nɛ nde mi kɔ̃a we aka mɔ do lɛnggɛ ngɔ bɔlɔ zui 'da mɔ. Gulu kɛ owi dɛ 'dã mɛnɔ wa kpasa de wena ni we ge nde? Nɛ gulu kɛ owi bɛ̃ we nu mɔ wa kpá etumbu gɔ we ge nde?

² Wa ɔ nɛ ote kɛ mɔ mi ma, nɛ liã nɛ ba nù, nɛ ma ngala, nɛ ma ko owala te ni. Wa tɔ̃ dia zu li mɔ fai, nɛ nde do kɔ sila wa wa lénggé do mɔ gɔ.

³ Nɛ nde mɔ NWA, mɔ ĩ ti mi, nɛ mɔ zɔ mɛ mi dɛ ni zɔa, mɔ ĩ ti tɛlɛ tɛ kɛ mi kɔ̃a do gɛnɛ mɔ ni. Mɔ kɔ̃, nɛ mɔ kálá o'dã winɔ, nɛ mɔ á wa do tɛ̃ ɛ, ɔ nɛ kɛ wa a do obata we gbɛ wa ni. Nɛ mɔ usu wa gbaa, we 'bɔ do 'da kɔ̃ tũi wa fe sɛ nɛ ni.

⁴ Gɛla nɛ e ngɔ nùi 'da lɛ soe ki nge nde? Kpalɛ kɔ fɔnɔ nɛ kolo fai nde? Osa'denɔ do onɔɛnɔ ngɔ nùi gɛ vɛ̃, wa tɛ fe nɛ, we duzu 'dã mɛ 'da owinɔ 'da lɛ. Nɛ winɔ wa tɔ̃ 'bɔ na, “Gale zɔ́ mɛ lɛ dɛ ni gɔ.”

⁵ NWA tɔ́a na: “Aa Yeremi, fala kɛ mɔ ndaka 'do Owi yu yu nyanga wi zãa, nɛ mɔ dɛ sɛ fala ndaka 'do Owi yu yu mbalata nɛ nde? Fala kɛ mɔ dɛ kili dungu gɛ̃a dungu dɛ 'da le, nɛ mɔ dɛ sɛ fala le kɔ dɛka lì Yɔrdanɛ nɛ nde?

⁶ Mba gɔ, mɔ ĩ́ na, gɛnɛ kɔ onya mɔ dɛ kɔ nu fɛlɛ kula 'da mɔ ngboo ni, wa vũ to tɛ mɔ. Wa ngɛmɛ li ogili wele, we ba zã zu we dɛ tɛ mɔ. Gɛnɛ kɔ wa to ɛ̃fɛ̃ lɛnggɛ hã mɔ, nɛ dɔ mɔ gbíní zã mɔ do wa gɔ.”

Gale la fala owinɔ 'da a

⁷ NWA tɔ́a na: “Mi bɛ̃a gɛnɛ obe Israɛlɛ, mi la fala owinɔ mi saka zi wa ni. Mi kɔ zi gɛnɛ wa wena, nɛ nde mi siki 'do mi hã wa, nɛ mi 'dɔlɔ wa hã Owi sɛnɛ wa.

⁸ Owinɔ mi saka zi wa ni, wa siki li wa dɛ tɛ mi, nɛ wa dɛ dã dɛ tɛ mi, ɔ nɛ ogbɔgbɔ ni. Gulu nɛ a mi kɔ̃̀ 'bɔ gɛnɛ wa gɔ.

⁹ Nɛ zɔ owinɔ mi saka zi wa ni, wa siki li wa dɛ tɛ mi. Wa ɔ nɛ ziki kɛ ongba a zikinɔ wa linggi a we gɔmɔ a ni. Nɛ nɛ́, hã nɛ ngɛmɛ li osa'de zamɛnɔ vɛ̃, hã wa tɛ we nyɔngɔ owinɔ 'da mi.

¹⁰ Gba gili ogã winɔ wa tɛa, nɛ wa 'danga fɔ vinɔ 'da mi. Wa ma ma do nyanga wa, nɛ gba dia fɔɛ 'da mi ma 'danga vɛ̃.

¹¹ Wa dɛa na, ma kifi fala 'bako. Nùi vɛ̃ ma hɔa li gba zɔ́, nɛ wi lengge do ma 'bɔ bina.

¹² Owi zũnɔ wa yula ngɔ kalanɔ li gba zɔ́ i, nɛ wa tɛa we zũ mɛnɔ 'da owinɔ 'da mi. Mi ba nu mi, nɛ owi sɛnɛ wa wa 'danga nùi, yolo tɛ ndɔti nɛ we hɔ Sɔkpɔ nɛ. Nɛ fo 'bɔ dungu fio do winɔ bina.

¹³ Owinɔ 'da mi, wa mi odia kpalɛ, nɛ ma kifi hɛlɛ vɛ̃. Wa dɛa to wena, nɛ wa kpà mɔ olo nɛ gɔ. E kɔ sape ba li wa, we kɛ zã mi NWA nɔ̃lɔ̃ dɛ tɛ wa, nɛ mi 'danga toe 'da wa.”

NWA kpua mbulu hã ogele nu kɔnggɔnɔ kɛ zã obe Israɛlɛ ni

¹⁴ NWA tɔ̃a na: “Mi kɔ̃a we tɔ̃ we hã ogele nu kɔnggɔnɔ kɛ zã Oisraɛlɛ ni. Wa 'danga nùi kɛ mi ba ma hã owinɔ 'da mi ni. Nɛ nde mi ndaka sɛ o'dã winɔ ni ngɔ nùi 'da owinɔ 'da mi do'do. Mi fo sɛ wa ɔ nɛ kɛ wa zu'du do 'dã wɔkɔsɔ ni, nɛ mi kala sɛ 'bɔ Oyuda sanga wa do'do.

¹⁵ Nɛ nde 'do kɛ mi ndaka sɛ wa do'do ni, nɛ mi dɛ sɛ 'bɔ 'bako hã wa, nɛ mi gese sɛ wele do wele dɛ ngɔ nùi 'da a.

¹⁶ Ogele winɔ wa bia zi hã owinɔ 'da mi na, wa kana tɛ wa do li gale Bala. Nɛ nde fala kɛ wa la fala nɛ, kɔ wa kana tɛ wa do zu li mi nwa wele kpasi, ɔ nɛ owinɔ 'da mi ni, nɛ mi dɛ sɛ na, wa mba do owinɔ 'da mi fala nɛ kpo.

¹⁷ Nɛ nde fala kɛ wa bɛ̃ we zele we nu mi, nɛ mi ndaka sɛ wa fai, nɛ wa kumu sɛ. Mi NWA, mi tɔ̃a ni.”