Yeremi 11 - WE NU GALE 1995

Obe Yuda wa 'danga gba tɔkɛ 'da wa do Gale

¹ NWA tɔ́a hã mi na:

² “Mɔ zélé mbulanɔ mi nɛ tɔ̃ ma ngɔ gba tɔkɛ mi gba do nɛ ni. Nɛ mɔ tɔ̃́ hã obe Yuda, do Owi kɔ le Yeruzalɛmɛ na,

³ mi NWA Gale 'da nɛ obe Israɛlɛ, mi fɔmbɔ sɛ winɔ vɛ̃ kɛ wa dɛ́ mbula ngɔ gba tɔkɛ gɔ ni.

⁴ Gba tɔkɛ ni, mi gba zi ma do oyaa nɛ, 'da fala kɛ mi fua zi wa kɔ gã ngamɛ tɛ ngɔ nù Ezipeto dɛ nza ni. Mi tɔ́a zi hã wa na, wa zélé mbula 'da mi, nɛ wa dɛ mɛnɔ vɛ̃ kɛ mi ba nu mi na, wa dɛ ni. Wa dɛ na mɛ ni, nɛ wa sɛ a owinɔ 'da mi, nɛ mi sɛ a Gale 'da wa.

⁵ Nɛ mbuli kɛ mi kpua zi hã oyaa wa, nɛ mi hã nùi kɛ ma do nyɔngɔmɔ la li ngele hã wa, ɔ nɛ kɛ wa do ma sɔɛ gɛ ni, mi kpóló sɛ 'bɔ ma gɔ.” Nɛ mi gisa na: “Ĩi nwa, mi kɔ̃a.”

⁶ Nɛ nwa tɔ̃ 'bɔ hã mi na: “Mɔ nɛ́ hã mɔ tɔ̃ toe gɛ kɔ lenɔ ngɔ nù Yuda, do li walanɔ kɔ le Yeruzalɛmɛ na: ‘Nɛ zélé mbula kɔ gba tɔkɛ kɛ mi gba zi do nɛ ni, nɛ nɛ dɛ́ ma do wala olo nɛ.

⁷ Yolo tɛ kɔ tũi kɛ mi fua zi oyaa nɛ ngɔ nù Ezipeto dɛ nza ni, nɛ mi dala zi nu mi hã wa, ɔ nɛ kɛ mi tɛ dala do nu mi hã nɛ sɔɛ gɛ ni. Mi dɛ ni takɔ nɛ zélé wenɔ mi tɔ̃ hã nɛ ni.

⁸ Nɛ nde oyaa nɛ wa gɛ̀ zala wa hã mi gɔ, nɛ wa zèlè we nu mi gɔ. Wa dɛa yia nga zu, nɛ wa nɛa 'dɔkɔlɔ 'dã linggamɔ zu wa, nɛ wa dɛ̀ mbula ngɔ gba tɔkɛ kɛ lɛ gba zi do wa ni gɔ. Ma kɛ mi hã zi etumbu hã wa do 'da mbulanɔ kɔ gba tɔkɛ ni.’ ”

⁹ Nɛ nwa tɔ̃ 'bɔ hã mi na: “Obe Yuda do Owi Yeruzalɛmɛ, wa ba zã zu we dɛ ngɔ mi.

¹⁰ Wa kpula tɛ wa ngɔ 'dã mɔ olo oyaa wa, kɛ wa bɛ̃a zi we zele we nu mi ni. Wa yu 'dɔkɔlɔ ogele galenɔ, nɛ wa dɛ to hã wa. Oisraɛlɛ do Oyuda wa 'danga gba tɔkɛ mi gba zi do oyaa wa ni do'do.

¹¹ Ma kɛ mi nwa, mi tɔ́a na, mi nɛ tombo ngamɔ dɛ ngɔ wa, nɛ wa wé sɛ we yu ma gɔ. Kɔ fala kɛ wa sa mɔ hã mi we gbaka wa, nɛ nde mi zélé sɛ gɔ.

¹² Nɛ Owi kɔ lenɔ ngɔ nù Yuda do owi Yeruzalɛmɛ wa nɛ sɛ we ala nu wa hã ogalenɔ, kɛ wa hã zi dɔnggamɛnɔ hã wa ni. Nɛ nde 'da fala kɛ ngamɛ ni ma hɔ, nɛ ogalenɔ ni wa wé sɛ we kpasa wa gɔ.

¹³ Ogalenɔ 'da Oyuda wa dɛlɛ ɔ nɛ olenɔ 'da wa ni. Nɛ gbagalanɔ kɛ wa zĩ tɛ kɔ le Yeruzalɛmɛ we hã do dɔnggamɛnɔ hã gale sape, kɛ li a a Bala ni, ma dɛlɛ ɔ nɛ li walanɔ kɔ le ni.

¹⁴ Kɔ mɔ Yeremi, mɔ tɛ sàmbàlà mi, tabi mɔ tɛ àlà nu mɔ hã mi we duzu wa gɔ. 'Da fala kɛ wa ɔ kɔ ngamɔ, hã wa sa mɔ hã mi we gala wa, nɛ nde mi zélé sɛ wa gɔ.”

¹⁵ Nɛ NWA tɔ̃a na: “Owinɔ kɛ mi kɔ̃a gɛnɛ wa ni, wa dɛ́ mbe gbãlã we dɛa mɔ gɔ. Kɔ wa tɛ kɔ Tɛmpɛloe 'da mi we dɛ ge nde? Wa lengge na, mbulunɔ wa kpo hã mi ni, tabi odɔnggamɛnɔ wa hã ma hã mi ni, ma wia we amba zu wa, nɛ wa hɔ nza kɔ ngamɛ ni nde?

¹⁶ Mi ia zi li zu wa na: ‘Te olivɛ kɛ ma gã do dia nɛ, nɛ ma wala de wena.’ Nɛ nde mi tɛ sɛ ɔ nɛ ua dã kolo ni, nɛ mi fi we tɛ nwá te ni, nɛ ma bɛlɛ, nɛ gbakɔ̃ nɛ gbini dɛ nù.

¹⁷ “Mi NWA ngɔ mɔ nyanga nza vɛ̃, mi dala zi nɛ Oisraɛlɛ do Oyuda ɔ nɛ kɛ wele dala do te kɛ a mi ni. Nɛ nde di ngangga ni, mi nɛ tombo ngamɔ hã nɛ. Nɛ a nɛ fa ngamɛ ni dɛ tɛ nɛ wele nɛ, we duzu kɛ nɛ dɛa 'dã mɔ. Nɛ nɔ̃lɔ̃ zã mi, we kɛ nɛ hã dɔnggamɔ hã Bala.”

Onya Yeremi wa handa we gbɛ a

¹⁸ NWA tɔ̃a we mɛ kɛ Owi sɛnɛ mi wa handa we dɛ do mi ni hã mi, nɛ mi ĩ fala nɛ.

¹⁹ Mi ɔ zi nɛ be wili bata kɛ wa ba a we gbɛ a, nɛ nde a la do ta zu a iko ni. Nɛ mi ĩ̀ zi na, wa fa we dɛ mi do 'dã mɔ ni gɔ. Wa tɔ̃ zi dɛ ngɔ mi na: “Lɛ gɔ́mɔ́ te gɛ dɛ nù do 'da fala kɛ ma 'bana do tɔlɔ nɛ gɛ, nɛ lɛ gbɛ ma ngɔ nù gɛ do'do, da dɛ kɔ ta zu wele kpo gbá 'bɔ ngɔ ma gɔ.”

²⁰ Ma kɛ mi sambala na: “Aa NWA ngɔ mɔ nyanga nza vɛ̃, mɔ a wi gɔnɔ we do bɔlɔ nɛ, nɛ mɔ ĩ ti kɔ sila winɔ, do linggamɛnɔ 'da wa. Mi ia kili tɛ mi dɛ tambala kɔ̃ mɔ, nɛ mi 'bɔ we zɔ tɛlɛ tɛ kɛ mɔ nɛ bili do nu gbã hã owinɔ gɛ ni.”

^21-22 Owinɔ kɔ le 'da mi Anatɔtɛ wa fa zi zu mi, nɛ wa tɔ̃a hã mi na, mi lá fala gba olo nu NWA Gale do'do. Ní gɔ, nɛ lo gbɛ sɛ mi. Nɛ nwa ngɔ mɔ nyanga nza vɛ̃ tɔ̃a na: “Mi hã sɛ etumbu hã Owi Anatɔtɛ! Ozagbãlãnɔ 'da wa, wa fe sɛ li bolo, nɛ gba wɔ ma gbɛ sɛ obenɔ 'da wa.

²³ Hã sabɛlɛ mi nɛ hã do etumbui hã wa ni we, nɛ wele kpo 'báná sɛ do tunu li ɛ gɔ.”