Yeremi 10 - WE NU GALE 1995

Gale a kpikima gɔ

¹ Nɛ, obe Israɛlɛ, nɛ zélé toe NWA tumba hã nɛ gɛ.

² A na: “Nɛ tɛ 'bã̀ olo kɔ̃ gele winɔ gɔ, nɛ nɛ tɛ dɛ̃ kili mbe mɛnɔ kɛ ma hɔ li nza i, nɛ nde nɛ zɔ̃ kuti nɛ gɔ ni gɔ. E kɔ gele winɔ wa dɛ kili ma.

³ Ogele winɔ ni wa dɔnggɔ tati a omɔ yala iko. Wa gɔmɔ te zamɔ i, nɛ wa ba ma, nɛ wa sɛ do kpikima,

⁴ nɛ wa nãlã mɔ mbali, tabi fɛ̃a mɔ bolo tɛ nɛ. Nɛ wa bɛ̃lɛ̃ ma nù, sɛ nɛ ma yolo do nyanga ɛ de.

⁵ Okpikimanɔ ni wa ɔ nɛ omaanggo kɛ wa zĩ ma kɔ fɔ sindo we ndaka onɔɛnɔ tɛ nɛ ni. Wa wélé we gɔ, wa 'bolo wa 'bula, sɛ nɛ wa zĩ wa de, tua kɛ 'dikita wa iko, wa wè we nɛ nɔ gɔ. Nɛ tɛ dɛ̃ kili wa gɔ, we duzu kɛ wa wè tɛ dɛ 'dã mɔ do nɛ gɔ, nɛ wa wè 'bɔ we dɛ dia mɔ do nɛ gɔ.”

⁶ Aa NWA, mbé gele gale kɛ a wia kɔ̃ do mɔ ni bina. Mɔ nganda wena, nɛ dɔ̃lɔ̃ li to nwa 'da mɔ ma gã wena.

⁷ Mɔ a nwa ngɔ onu kɔnggɔnɔ nù gɛ vɛ̃. Ma wia sɔ na, owinɔ wa ĩ ti mɔ, nɛ wa dɔnggɔ mɔ. Mbé gele nwa, tabi wi hã zã kɛ a wia kɔ̃ do mɔ tɛ sanga owinɔ ngɔ nù gɛ bina.

⁸ Wa vɛ̃ a onga yɔnda wele do owi bɔ iko. Wa dɔnggɔ okpikima kɛ fo gulu nɛ bina.

⁹ Wa oso fɛ̃a mɔ bolo tɛ kɔ le Tarsisi, tabi mɔ mbali tɛ Ufazi, nɛ wa si nɛ we 'dafa do tɛ okpikimanɔ. Wi sɛ te, a a sɛ okpikimanɔ ni, nɛ wi dolo mɔ nãlã mɔ mbali tɛ nɛ, nɛ wa yulu ofila tulu olo gã gole dɛ tɛ nɛ. Nɛ nde mɛnɔ ni vɛ̃ wele dɛa ma do kɔ̃ ɛ iko.

¹⁰ Nɛ nde ngbongbo Gale wele kpasi, wi tati a mɔ NWA. Mɔ a NWA kɛ fo ndɔti mɔ bina. Fala kɛ zã mɔ nɔ̃lɔ̃, nɛ nùi ma tana, nɛ onu kɔnggɔ winɔ wa wè tɛ yolo dati nɔ̃lɔ̃ zã 'da mɔ gɔ.

¹¹ Aa nɛ, obe Israɛlɛ, nɛ tɔ̃́ hã ogele winɔ na, mbe tũ kpo, nɛ NWA Gale a bisi sɛ ogalenɔ kɛ wa a wa dɛ̀ li nza do nùi gɛ gɔ ni, nɛ wele zɔ́ sɛ 'bɔ olo wa ngɔ nù gɛ gɔ.

¹² NWA Gale dɛa nùi gɛ do ngawi 'da a. A dɛa mɔ nyanga nza do hã zã, nɛ a dɛ 'bɔ li nza do ĩ ti mɛ 'da a.

¹³ A ba nu a kpo, nɛ lì ma ngɛmɛ ngbɛ ɛ tɛ li nza i, nɛ gba kutunɔ danga dɛ ngɔ, nɛ kolo nyɛa li ɛ, nɛ ma dĩ nɛ ma tɛ. Nɛ bũnɔ yolo tɛ falanɔ a usu do ma ni, nɛ ma hɔ nza, nɛ ma fi.

¹⁴ Mɛnɔ ni ma ngɔ dɛ tɛ̃ ɛ, kɔ owinɔ wa nɛ zɔ ní, nɛ wa yolo te'dee, ɔ nɛ wa di dinda ni. Nɛ sape ma ngɔ ba li wanɔ kɛ wa dula okpikimanɔ we dɔnggɔ wa ni. Mba gɔ, okpikimanɔ ni a onga yia mɔ iko, ma do bũ kpasi kɔ nɛ bina.

¹⁵ Mɛ a onga mɔ gbɔlɔ mɔmu iko. Ma 'danga sɛ do fala kɛ NWA a gɔnɔ sɛ do ngbangga ni.

¹⁶ Nɛ nde NWA Gale 'da obe Israɛlɛ, a ɔ̀ nɛ wa ni gɔ. Wi dɛa mɔ nyanga nza vɛ̃, wi a a, nɛ a saka obe Israɛlɛ do owinɔ 'da a. Li a a NWA ngɔ mɔ nyanga nza vɛ̃.

Ngamɔ ma kpa sɛ owi kɔ le Yeruzalɛmɛ

¹⁷ Aa nɛ, Owi kɔ le Yeruzalɛmɛ, nɛ kálá tolenɔ 'da nɛ, hã nɛ yú. Mba gɔ, Owi bolonɔ wa linggi nɛ do'do!

¹⁸ NWA tɔ̃a na, ɛ nɛ ndaka nɛ ngɔ nùi 'da nɛ do'do. Ɛ mbɔtɔ sɛ nɛ vɛ̃, nɛ wele kpo 'báná sɛ gɔ.

¹⁹ Owi kɔ le Yeruzalɛmɛ wa hia mɔ na: “Kɛ nɛ kpa lɛ gɛ a ngamɔ ge nde? Lɛ lingga zi na, 'bakoe ma kpa lɛ gɛ, ma 'bana sanga iko, nɛ lɛ kunu sɛ sila lɛ ngɔ ma. Nɛ nde ma gã la li ngele.

²⁰ Tɔa tandenɔ 'da lɛ ma tia, nɛ Ofɛlɛnɔ kɛ wa kpo do ma ni, ma gɔnɔ vɛ̃. Obenɔ 'da lɛ wa yu, nɛ wa la. Wele kpo 'bànà, kɔ a zĩ tɔa tandenɔ ni dɛ olo nɛ hã lɛ gɔ, nɛ wi dɛ mbamba da hã lɛ bina.”

²¹ Nɛ mi gisa na: “Ogã winɔ 'da lɛ wa a oyɔnda wi iko, wa áká mbe NWA na, a be wala hã lo gɔ. Gulu nɛ a wa yɔa wala, nɛ owinɔ 'da lɛ wa pɛsɛ vɛ̃ ɔ nɛ obata kɛ fo wi zɔ mɔ tɛ wa bina ni.

²² Nɛ zélé giti nguma kɛ ma wele ngɔ nùi si gbãlã ngɔ i gɛ. Mɛ a nguma nyanga osoda, wa tɛ tɛ we 'danga olenɔ ngɔ nu Yuda. Wa dɛ sɛ na, lenɔ ni ma kifi li gba zɔ̃, nɛ osa'de zamɔ wa ɔ tɛ nɛ.”

Yeremi sambala Gale we owinɔ 'da a

²³ Aa NWA, mi ĩ na, wele wè tɛ ĩ ti mɛ kɛ ma hɔ sɛ hã a do 'do nza ni gɔ. Nɛ wele wè we ĩ ti wala kɛ a wia tɛ ba nɛ ni gɔ.

²⁴ Aa NWA, mɔ ha etumbu hã lɛ owinɔ 'da mɔ, nɛ ma we dɛ tɛ nɛ, mɔ tɛ ha do nɔ̃lɔ̃ zã gɔ. Mba gɔ, mɔ hã do nɔ̃lɔ̃ zã, nɛ mɔ kumu sɛ lɛ.

²⁵ E kɔ zã mɔ nɔ̃lɔ̃ dɛ tɛ ogele winɔ kɛ wa dɔ́nggɔ́ mɔ gɔɛ ni, do tɛ wanɔ kɛ wa bɛ̃a gɛnɛ mɔ ni. We duzu kɛ wa gbɛa lɛ owinɔ 'da mɔ, nɛ wa kumu lɛ vɛ̃, nɛ nùi 'da lɛ hɔa olo tɔa.