Yeremi 1 - WE NU GALE 1995

¹ Lɛnggɛnɔ kɔ 'buki gɛ mɛ a wenɔ kɛ Yeremi, be 'da Hilkia a tɔ̃a zi ni. Hilkia zi a wi nu fɛlɛ onganganɔ kɛ wa ɔ zi tɛ Anatɔtɛ, tɛ ngɔ nùi 'da nu kpala Bɛnzamɛ ni.

² NWA wila zi we hã Yeremi. Ma zi do 'da fala kɛ Yoziasi, be 'da Amoni, a dɛa to nwa ngɔ nù Yuda we sabɛlɛ 'bu ngɔ nɛ talɛ ni.

³ A wila 'bɔ we hã a do 'da fala kɛ Yoakimɛ, mbe be 'da Yoziasi zi a nwa ni. Dɛ 'do nɛ, nɛ NWA wila 'bɔ we hã a 'do ngbɛ ɛ do 'do ngbɛ e, gbaa we hɔ tɛ sabɛlɛ kɛ 'bu ngɔ nɛ kpo kɔ dɛa to nwa 'da Sedekiasi, mbe be 'da Yoziasi. Ma nɛa we hɔ tɛ zɛkɛ 'da mɔlɔ kɔ kpo sabɛlɛ ni, nɛ wa kala Owi kɔ le Yeruzalɛmɛ, nɛ wa'dɔlɔ wa.

Gale sa mɔ hã Yeremi we gba olo nu a

⁴ NWA tɔ̃a we gɛ hã mi Yeremi na:

⁵ “Dati kɛ na, mi e kuli mɔ kɔ zã naa mɔ ni, nɛ nde mi ĩ zi ti mɔ ia. Nɛ dati kɛ na, naa mɔ ko mɔ ni, mi saka zi mɔ, nɛ mi ia mɔ do wi mɔ́ mi we dɛ to hã mi. Mi ia mɔ do wi gba olo nu mi hã onu kɔnggɔ winɔ.”

⁶ Nɛ mi gisa na: “Aa NWA, mi ĩ̀ fi wele we ngboo gɔ, mi a be zagbãlã iko.”

⁷ Nɛ nde NWA gisa na: “Mɔ tɛ tɔ̃̀ na, ɛ a be zagbãlã iko gɔ. Mɔ nɛ sɛ 'da owinɔ vɛ̃ kɛ mi tombo sɛ mɔ hã wa ni, nɛ mɔ tɔ̃ sɛ wenɔ kɛ mi tɔ̃a ni hã wa.

⁸ Mɔ tɛ dɛ̀ kili wa gɔ, tua kɛ mi sɛ do mɔ boe we fɔmɔ mɔ. Mi NWA, mi tɔ̃a ni.”

⁹ 'Do nɛ, nɛ NWA ɛfɛ kɔ̃ a, nɛ a tamba nu mi, nɛ a na: “Mi ia wenɔ 'da mi dɛ nu mɔ, takɔ mɔ tɔ̃ sɛ ma hã wa.

¹⁰ Mɔ zɔ́, mi saka mɔ sɔɛ gɛ, nɛ mi hã to hã mɔ na, mɔ nɛ 'da onu kɔnggɔ winɔ ngɔ nù gɛ. Nɛ winɔ ni wa ɔ sɛ li mɔ nɛ te, tabi tɔa ni. Mɔ zu'du sɛ te ni, nɛ mɔ gbini gbakɔ̃ nɛ. Mɔ zɛ sɛ tɔa dɛ nù, nɛ mɔ 'danga ma. Nɛ nde mɔ 'dafa sɛ 'bɔ tɔa ni, nɛ mɔ mi te dɛ olo nɛ.”

Gale bia mɔ bɔa li Yeremi kɔ yalɛ

¹¹ NWA aka mi na: “Yeremi, mɔ zɔ ge nde?” Nɛ mi gese na: “Mi zɔ gbakɔ̃ te amandɛ, te sɔ̃a li.”

¹² Nɛ NWA tɔ̃ hã mi na: “Mɔ zɔa de wena! Kɔ mi dɛ sɛ sɔ̃a li na, we mi tɔ̃a ni, ma dɛ tɛ̃ ɛ.”

¹³ Nɛ NWA aka 'bɔ mi na: “Di ngangga ni, mɔ zɔ ge nde?” Nɛ mi gese na: “Mi zɔ kpana, ma si gbãlã ngɔ, mɔ nɔ̃lɔ̃ kɔ nɛ, nɛ ma siki nu ɛ dɛ 'da mi.”

¹⁴ Nɛ NWA tɔ̃ hã mi na: “Ngamɔ ma yolo sɛ tɛ si gbãlã ngɔ, nɛ ma kpa sɛ owinɔ ngɔ nù Israɛlɛ gɛ vɛ̃.

¹⁵ Mba gɔ, mi nɛ sa mɔ hã owinɔ vɛ̃ kɛ wa ɔ si gbãlã ngɔ ni na, wa tɛ. Kɔ wa hɔ, nɛ Onwanɔ 'da wa, wa be sɛ ngawi nwa 'da wa tɛ nu ngba le Yeruzalɛmɛ. Wa linggi sɛ ngbonɔ nu le Yeruzalɛmɛ, do nu lenɔ ngɔ nù Yuda vɛ̃.

¹⁶ Mi hã sɛ etumbu hã owinɔ ngɔ nù Yuda, we duzu 'dã mɛnɔ vɛ̃ wa dɛa ni. Mba gɔ, wa bɛ̃a gɛnɛ mi do'do, nɛ wa hã dɔnggamɛnɔ hã ogele galenɔ. Nɛ wa gu gba zugolo dati okpikimanɔ kɛ wa dɛa do kɔ̃ wa ni.

¹⁷ Yeremi, mɔ 'dáfá tɛ mɔ! Mɔ kúlú ngɔ, hã mɔ nɛ́, hã mɔ tɔ̃ wenɔ vɛ̃ kɛ mi tɔ̃a ni hã wa. Mɔ tɛ dɛ̃ kili wa gɔ, ní gɔ, nɛ mi dɛ sɛ na, kili ba mɔ dati wa.

¹⁸ Yolo sɔɛ gɛ, mi dɛ sɛ na, gbãlã tɛ mɔ sɔ̃, ɔ nɛ le kɛ gba ngbo zĩ ma takpa ni. Mɔ sɔ̃ sɛ 'bɔ ɔ nɛ bɛlɛduma mɔ bolo, tabi ngbo kɛ wa dɛa do tũ mɔ bolo ni. Mɔ sɔ̃ sɛ na mɛ ni dati owinɔ ngɔ nùi gɛ vɛ̃: Dati onwa ngɔ nù Yuda, dati Owi olo li nwa, onganganɔ, do Owele nùnɔ ngɔ nùi gɛ.

¹⁹ Owinɔ ni wa bi sɛ do mɔ, nɛ nde wa wé sɛ we dɛ mɔ kpo do mɔ gɔ, tua kɛ mi do mɔ boe, we fɔmɔ mɔ. Mi NWA, mi tɔ̃a ni.”