TITO 3 - WE NU GALE 1995

Dɛa mɔ tɛ Owi kɔ̃a wenɔ

¹ Mɔ gbá ta zu Owi kɔ̃a wenɔ vɛ̃ na, wa ba tɛ wa dɛ nù dati Onwanɔ, do ogã wi ngɔ wa. Wa dɛ́ do nu wa, nɛ wa fá we dɛ dia mɔ fai.

² Wa tɛ tɔ̃̀ tɛ wele gɔ, nɛ wa tɛ kpà we gɔ. Wa dɛ́ na do ngba wa, nɛ wa bé dia sila dɛ 'da winɔ vɛ̃.

³ Mba gɔ, zi dati, lɛ zi tɛ mɛ 'bɔ a oyɔnda wi, Owi nga zu. Lɛ yɔa zi wala, nɛ lɛ zi a ngbá 'da wɔ kɔ kili tɛ lɛ, do mɛnɔ kpi do kpi kɛ ma hã zi yangga hã lɛ ni. Lɛ zi a o'dã wi, Owi dɛ bɔnɛ dia mɔ mɔ ngba lɛ. Lɛ sɛnɛ zi ongba lɛ, nɛ wa sɛnɛ tɛ mɛ 'bɔ lɛ.

⁴ Nɛ nde Gale, Wi kpasa lɛ, a bia zi dia sila do kɔ̃a zã 'da a dɛ 'da lɛ Owele,

⁵ nɛ a kpasa lɛ. A kpàsà lɛ we dia dɛa to tɛ lɛ gɔ, nɛ nde a kpasa lɛ, we kɛ a ĩ 'bako hã lɛ. A fɔla 'dã mɔ kɔ sila lɛ, nɛ a kua lɛ fala bɔa, nɛ a hã mbé kpasi hã lɛ do wala 'da Hi Wi Santo.

⁶ Mba gɔ, Gale hã zi Hi Wi 'da a hã lɛ la li ngele do wala 'da Yezu Kristo, Wi kpasa lɛ.

⁷ Na mɛ ni, a dɛa na, lɛ hɔ wi bɔlɔ zu li a we duzu dia zã 'da a, nɛ lɛ kpa kpasi kɛ ma é sɛ gɔ, kɛ lɛ a sila lɛ ngɔ nɛ ni.

⁸ Wenɔ mi tɔ̃a gɛ a ngbongbo we. Kɔ mi kɔ̃a na, mɔ dala nu mɔ tɛ nɛ, takɔ wanɔ wa kɔ̃a zu li Gale ni, wa ba tɛ wa we dɛ de dɛa mɔ. Ki ni de wena, nɛ ma wia tɛ gala Owele.

⁹ Nɛ dɔ mɔ mbá do owinɔ kɛ wa ba kafi ngɔ nu fɛlɛ kula 'da oyaa lɛ, nɛ wa ba da nu ngba wa, nɛ wa mɔ̃lɔ̃ ngɔ mbula 'da Oyudanɔ ni gɔ. Mɔ yú mɛnɔ ni, we kɛ li zuma nɛ bina, nɛ ma gálá wele gɔ.

¹⁰ Wi kɛ a fa we gɔnɔ sanga eklezia, nɛ mɔ té mbula hã a fala kpo tabi fala bɔa. Kɔ fala kɛ a kɔ we zele nɛ gɔ, nɛ mɔ fó a sanga nɛ do'do.

¹¹ Mba gɔ, wi kɛ a dɛ ní ni, a yɔa wala ia. A dɛ mɔ kɛ ma dè gɔ ni, nɛ a wele nɛ, a fi tɛ̃ a li ngbangga.

Tala wenɔ

¹² Mi tombo sɛ Artemasi, tabi Tisikɛ hã mɔ. Kɔ wa hɔ, nɛ mɔ dɛ́ nganda na, mɔ tɛ we kpa mi tɛ Nikopolisi. Mba gɔ, mi lengge we ɔ di ni do zɔlɔ gɛ̃ɛ.

¹³ Mɔ gálá Zenasi, wi be gulu mbula, do Apolosi tɛ li gɛnɛ 'da wa, dɔ wa zɔlɔ mɔ kpo gɔ.

¹⁴ Nɛ ma wia 'bɔ na, winɔ 'da lɛ wa yambala we dɛ dia dɛa to fai, takɔ wa gala do winɔ do ngba soe kɛ sã ba wa ni. Na mɛ ni, nɛ dungu nza 'da wa sɛ yala iko gɔ.

¹⁵ Winɔ vɛ̃ kɛ wa fala nɛ kpo do mi i nga gɛ, wa tumba balɛ hã mɔ. Mɔ hã́ balɛ 'da lɛ hã oyali ngba lɛ wi kɔ̃a wenɔ i mɔ ni. E kɔ dia zã 'da Gale ma 'bana do nɛ vɛ̃!