TITO 2 - WE NU GALE 1995

Ngbongbo we nu Gale

¹ Kɛ 'da mɔ, ma wia na, mɔ be a ngbongbo we nu Gale.

² Mɔ té hã okpasa wi wilinɔ na, wa tɛ hã̀ tɛ wa we nɔ dɔ̃ gɔ, wa dĩlĩ fala tɛ wa, nɛ wa ɔ Owi kɛ gbãlã zã wa boe. Sila wa nɔ kɔ kɔ̃a we 'da wa, nɛ wa kɔ gɛnɛ ongba wa, nɛ wa ni sila wa kɔ ngamɔ.

³ Nɛ kɛ 'da okpasa wukonɔ, mɔ tɔ̃ 'bɔ hã wa na, wa dɛ mɔ tɛ wa we do kɛ Gale kɔ̃a gɛnɛ nɛ ni. Wa tɛ tɔ tɛ wele gɔ, nɛ wa tɛ hã̀ tɛ wa we nɔ dɔ̃ gɔ. Ma wia na, wa ɔ Owi tɔ̃ dia mbula,

⁴ takɔ wa be hã owuko ba wilinɔ kɛ wa 'bana do be zɔnga iko ni na, wa kɔ̃ gɛnɛ owili wa do benɔ 'da wa.

⁵ Wa bé hã wa na, wa ɔ Owi gbisa zu, do Owi kɛ sila wa a sa, nɛ wa ĩ́ ti dɛa to nu tɔa 'da wa do dia nɛ, nɛ wa ɔ do dia sila, nɛ wa zélé nu wili wa. Wa dɛ ní, nɛ wele kpo wé sɛ tɛ ya fala we nu Gale we duzu wa gɔ.

⁶ Mɔ té 'bɔ hã obe zagbãlãnɔ na, wa ɔ́ do gbisa zu kɔ mɛnɔ vɛ̃.

⁷ Nɛ mɔ do tɛ mɔ, mɔ 'dáfá dɛa mɔ tɛ mɔ we do kɛ na, ma be dia wala hã winɔ. Kɔ fala kɛ mɔ be we hã Owele, nɛ mɔ bé do wala olo nɛ, nɛ́ kɛ ma wia ni.

⁸ Mɔ bé ngbongbo we nu Gale, dɔ Owele wa kɔ'dɔ mɔ tɛ nɛ gɔ. Na mɛ ni, nɛ sape ma ba sɛ li Owi sɛnɛ lɛ, we kɛ wa kpá sɛ mɔ kpo we tɔ̃ tɛ lɛ we nɛ gɔ.

⁹ Ma wia na, ongbánɔ wa zele nu Owele wa, nɛ wa hã yangga hã wa kɔ mɛnɔ vɛ̃. Wa tɛ làkàlà we nu wa gɔ,

¹⁰ nɛ wa tɛ zu mɔ kɔ̃ wa gɔ. Nɛ nde ma wia na, wa dɛ tonɔ 'da wa we do kɛ na, Owele wa kɔ̃ gɛnɛ wa. Na mɛ ni, nɛ we nu Gale, Wi kpasa lɛ, ma kpa sɛ dɔ̃lɔ̃ li kɔ mɛnɔ vɛ̃ wa dɛ ni.

¹¹ Mba gɔ, Gale bia dia zã 'da a hã winɔ vɛ̃ na, a kɔ̃a we kpasa wa.

¹² Nɛ dia zã 'da Gale ni tombo lɛ na, lɛ tɛ bè we nu a gɔ, nɛ lɛ tɛ ɔ̃ 'bɔ do wɔ tɛ mɛnɔ nù gɛ gɔ. Lɛ dúngú ngɔ nù gɛ do sɔ̃a li, do bɔlɔ zu, nɛ lɛ dɛ́ mɔ kɛ ma dia tɛ Gale ni.

¹³ Nɛ lɛ dúngú na mɛ ni gbaa, we 'bɔ do 'da tũ yangga kɛ lɛ a sila lɛ ngɔ nɛ ni. Mɛ a tũi kɛ Yezu Kristo a hɔ sɛ do dɔ̃lɔ̃ li 'da a ni. A a Gale 'da lɛ, a gã wena, nɛ a a Wi kpasa lɛ.

¹⁴ A hã zi kili tɛ̃ a we duzu lɛ, takɔ a gɔnɔ zu lɛ kɔ 'dã mɛnɔ vɛ̃. Nɛ a fɔlɔ 'bɔ ndi kɔ sila lɛ do'do na, lɛ ɔ winɔ 'da a ngboo, nɛ lɛ hã tɛ lɛ we dɛ de mɔ.

¹⁵ Kɔ mɔ té wenɔ gɛ hã winɔ 'da mɔ. Mɔ kpala sila wa, nɛ mɔ kɔ'dɔ wa do ngawi kɛ Gale hã hã mɔ ni. Nɛ mɔ tɛ kɔ na, wele zɔ mɔ li a yala iko gɔ.