TITO 1 - WE NU GALE 1995

¹ Wi a mi Polo, wi dɛa toe 'da Gale, do wi nɛ toe 'da Yezu Kristo, mi a mi kɔmɔ mbɛti gɛ. Gale tumba mi na, mi gã 'da kɔ̃a we 'da owinɔ kɛ a saka wa ni, nɛ mi be gbãlã we dɛa to tɛ wi kɛ ma wia do winɔ 'da Gale ni hã wa,

² takɔ wa gbini zã wa do kpasi kɛ ma é sɛ gɔ ni. Gale 'bílí bɛlɛ gɔ. A kpua zɛ́ mbulu kpasi ni dati kɛ a tɛ dè mɛnɔ vɛ̃ gɔ ni,

³ nɛ ma hɔa ngba soe kɛ a wia zi ni, nɛ a bia we nu a dɛ nza, nɛ a tumba mi na, mi tɔ̃ ma hã owinɔ. Wi a Gale, Wi kpasa lɛ hã a hã toe ni hã mi.

⁴ Mi kɔmɔ mbɛti gɛ hã mɔ Tito, kɛ mɔ a ngbongbo be 'da mi ni, we kɛ lɛ do mɔ, lɛ kɔ̃a zu li Kristo. E kɔ Baa lɛ Gale, do Wi kpasa lɛ Yezu Kristo, wa be dia zã 'da wa hã mɔ, nɛ wa dɛ na, mɔ dungu do gɛ̃a sila.

Dɛa toe 'da Tito ngɔ nù Krɛtɛ

⁵ Mi la zi mɔ dɛ Krɛtɛ ni, takɔ mɔ dɛ tala tonɔ kɛ ma 'bana zi ni, nɛ ma e do wala olo nɛ. Nɛ mɔ á Owi zɔ mɔ tɛ eklezia kɔ le kpo do kpo, ɔ nɛ kɛ mi bia hã mɔ ni.

⁶ Wi mɔ nɛ e a ni, a ɔ wi kɛ wa wè tɛ kɔ'dɔ a tɛ mɔ kpo gɔ ni. A ɔ do kɛnɛ a kpo, nɛ obenɔ 'da a wa ɔ owi kɔ̃a we, kɛ Owele wa wè tɛ kɔ'dɔ wa we yia dɛa mɔ, tabi we nga zu gɔ ni.

⁷ Mba gɔ, wi zɔ mɔ tɛ eklezia a wi dɛa toe 'da Gale, nɛ ma wè na, a dɛ mɔ kɛ wa sa kɔ'da tɛ̃ a we nɛ ni gɔ. A tɛ ɔ̀ wi dɛ gã zu tabi wi nɔ̃lɔ̃ zã gɔ. Nɛ a tɛ ò wi bá dɔ̃ tabi wi kpa we gɔ. A tɛ fà we kpa mbili do 'dã hã gɔ.

⁸ Nɛ nde ma wia na, a dɛ gɛnɛ owinɔ kɛ wa tɛ 'da a ni, nɛ a kɔ̃ gɛnɛ mɛnɔ vɛ̃ kɛ ma a dia ni. A ɔ wi kɛ gbãlã zã a boe, wi bɔlɔ zu, wi 'da Gale ngboo, nɛ a ĩ ti dĩlĩ fala tɛ̃ a.

⁹ Nɛ ma wia 'bɔ na, a kɔ̃ gɛnɛ wenɔ kɛ lɛ bia zi ma, nɛ mɛ a gbãlã we ngboo ni, nɛ sila a nɔ tɛ nɛ. Na mɛ ni, nɛ a we sɛ we nganda sila winɔ do ngbongbo we nu Gale a be hã wa ni, nɛ a we sɛ 'bɔ we kpe nu winɔ kɛ wa bɛ̃ gɛnɛ bia wenɔ 'da lɛ ni.

¹⁰ Mɔ ĩ na, Owi nga zu kɛ wa ɔlɔ winɔ do oyia lɛngge iko ni, wa dɛlɛ wena, nɛ gba dɔa wa dɛ sanga Oyudanɔ kɛ wa hɔa owi Kristo ni.

¹¹ Kɔ ma wia na, mɔ kpe nu wa, we kɛ wa fi kafi li sila ombe nu fɛlɛ kulanɔ vɛ̃, nɛ wa be wenɔ kɛ ma wè gɔ ni. Wa dɛ ní we kpa mbili olo nɛ do 'dã hã iko.

¹² Mbe wi Krɛtɛ kpo, kɛ a a wi gba olo nu gale 'da wa ni, a tɔ̃a na: “Okrɛtɛ wa zɛ́ fai a Owi 'bili bɛlɛ, wa a o'dã sa'de iko. Wa a osulu wele, kɛ wa lengge tati a nyɔngɔmɔ iko.”

¹³ Wenɔ kɛ a tɔ̃a ni, mɛ a gbãlã we. We duzu ki ni, ma wia na, mɔ kɔ'dɔ wa nganda wena, takɔ wa ɔ do kɔ̃a we kɛ ma wia ni.

¹⁴ Ma wè na, wa kɔ̃ gɛnɛ gba tonɔ 'da Oyudanɔ, do mbulanɔ 'da owinɔ kɛ wa bɛ̃a gɛnɛ gbãlã we 'da Gale gɔ.

¹⁵ Owinɔ kɛ sila wa a sa li Gale ni, mɛnɔ vɛ̃ li wa a sa. Nɛ nde wanɔ kɛ sila wa a sa gɔ, nɛ wa 'bɔ do kɔ̃a we bina ni, fo sa mɔ li wa bina, we kɛ hã zã 'da wa, do kɔ sila wa vɛ̃, ma dunu do 'dã mɔ.

¹⁶ Wa tɔ̃ do nu wa na, lo ĩ ti Gale, nɛ nde dɛa to tɛ wa vɛ̃ be na, wa Ĩ ti Gale gɔ. Wa a o'dã wele ngboo, Owi nga zu, nɛ wa ĩ́ ti dɛ mbe dia mɔ kpo gɔ.