SOFONI 3 - WE NU GALE 1995

Owi Yeruzalɛmɛ wa bɛ̃a we nu Gale

¹ 'Bako do Owi Yeruzalɛmɛ! Wa a Owi dɛ nga zu, wa kɔ̃a avoka, nɛ wa hã zɛlɛ tɛ hã onya wa.

² Wa lénggé do kɛ NWA Gale yaka zala wa ni gɔ, nɛ wa zélé mbulanɔ 'da a gɔ. Wa gbíní zã wa do a gɔ, nɛ wa áká 'bɔ a na, a gbaka lo gɔ.

³ Onwanɔ 'da wa wa dɛ dã ɔ nɛ ogbɔgbɔ ni, nɛ owi 'bili ngbangganɔ wa dɛ mɔ ɔ nɛ gbokologboe, kɛ a ba sa'de do gɛ̃a wese, nɛ a nyɔngɔ a vɛ̃, nɛ nde a é tala nɛ ngɔ gɔ ni.

⁴ Owi gba olo nu Gale kɔ le Yeruzalɛmɛ, wa a owi gã zu, wa faka toe 'da wa do'do. Nɛ onganganɔ kɔ le Yeruzalɛmɛ wa dɔ́nggɔ́ mɛnɔ kɛ wa ia hã Gale ni gɔ, wa 'danga mbulanɔ 'da Gale do'do.

⁵ Nɛ nde ĩ na, NWA Gale kɔ le Yeruzalɛmɛ boe. A kɔ̃a bɔlɔ zu dɛa mɔ, nɛ a bɛ̃ 'dã mɔ. Titole kpo kpo, nɛ a gɔnɔ wenɔ 'da owinɔ do bɔlɔ nɛ. Gɛnɛ kɔ na mɛ ni, nɛ nde o'dã winɔ wa dɛ tɛ mɛ 'dã mɔ dɛa fai, nɛ sape bá li wa gɔ.

⁶ NWA tɔ́a na: “Mi kumu ogele winɔ ngɔ nù gɛ vɛ̃, nɛ mi gbini ngala tɔanɔ do ngbo nu lenɔ 'da wa. Mi 'danga olenɔ 'da wa, nɛ mi dɛa na, mbé wele tɛ là 'bɔ li walanɔ kɔ lenɔ ni gɔ, nɛ mbé wele tɛ ɔ̀ 'bɔ kɔ nɛ gɔ.

⁷ Mi dɛa na mɛ ni, nɛ mi lingga na, mbe gɔ, nɛ Owi Yeruzalɛmɛ wa zɔ sɛ mɛnɔ mi dɛa we yaka zala wa ni, nɛ wa dɔnggɔ mi. Na mɛ ni, mi ha sɛ etumbu hã wa gɔ, nɛ mi 'dángá sɛ le 'da wa gɔ. Ĩ na, Owi Yeruzalɛmɛ wa ĩ kpo a ti wɛlɛ tɛ wa we dɛ 'dã mɔ iko.

⁸ Ma kɛ mi NWA, mi dãlã sɛ dɛ tɛ wa do kɔ̃ tũi kɛ mi gɔnɔ sɛ do ngbangganɔ 'da wa ni. Mi 'bili na, mi mba sɛ li winɔ ngɔ nù gɛ, nɛ dã 'da mi ma bɛlɛ sɛ wa ɔ nɛ we ni. Zã mi ma nɔ̃lɔ̃ sɛ nganda wena, nɛ ma bɛlɛ sɛ mɛnɔ nyanga nza gɛ vɛ̃ ɔ nɛ we ni.”

Opaganɔnɔ wa kifi sɛ sila wa

⁹ “Mi NWA, mi dɛ sɛ na, opaganɔnɔ wa kifi sila wa, nɛ wa sambala mi, nɛ wa dɔnggɔ mi do sila wa kpo.

¹⁰ Owi kɔ̃ zu li mi, kɛ mi pɛsɛ wa gbaa do kɔ lenɔ kulu gba lìnɔ tɛ Etiopi i ni, wa tɛ sɛ, nɛ wa hã odɔnggamɔ hã mi.

Tala obe Israɛlɛ wa kpa sɛ dia dungu

¹¹ “Do 'da fala ni, sape 'dã dɛa mɛnɔ 'da nɛ, do bɛ̃a we nɛ bɛ̃ zi nu mi ni, ma bá sɛ 'bɔ li nɛ owinɔ 'da mi gɔ. Mi fo sɛ owi walinɔ sanga nɛ, nɛ nɛ la sɛ fala dɔnggɔ tɛ nɛ tɛ ngɔ kala 'da mi, kɛ ma santo ni.

¹² Mi la sɛ dɛ sanga nɛ tati a owinɔ kɛ wa ba tɛ wa dɛ nù, nɛ wa dɔnggɔ mbula 'da mi, nɛ wa aka mi na, mi amba zu wa ni.

¹³ Tala obe Israɛlɛ kɛ wa 'bana sɛ do tunu li wa ni, wa dɛ sɛ mɔ tɛ wa do bɔlɔ nɛ, wa tɔ̃́ sɛ bɛlɛ gɔ, nɛ wa ɔ́kɔ́lɔ́ sɛ wele do lɛnggɛ nu wa gɔ. Wa kpa sɛ dia dungu, nɛ wa ɔ sɛ nù do gɛ̃a sila, nɛ nde fo sɛ wi a kili tɛ wa bina.”

Zuma yangga

¹⁴ Nɛ, obe Israɛlɛ, nɛ dɛ́ yangga, nɛ nɛ zɛ́ kɔ̃ nɛ! Owi Yeruzalɛmɛ, nɛ dɛ́ yangga do sila nɛ vɛ̃!

¹⁵ NWA fua etumbui kɛ ma dĩlĩ zi nɛ ni, a ndaka owi sɛnɛ nɛ ia. NWA Gale 'da nɛ obe Israɛlɛ do nɛ boe. Nɛ tɛ dɛ kili gɔ, we kɛ nɛ kpá sɛ 'bɔ 'bako gɔ.

¹⁶ Mbe ngba soe kpo, nɛ wa tɔ̃ sɛ hã nɛ owi Yeruzalɛmɛ na: “Owi Sioni, nɛ tɛ dɛ̀ kili gɔ, nɛ kpã́lã́ sila nɛ!

¹⁷ NWA Gale 'da nɛ do nɛ boe. A bi sɛ bolo zu nɛ do ngawi 'da a. A hã sɛ mbé dia dungu hã nɛ do kɔ̃a zã 'da a. A dɛ sɛ yangga dɛ 'da nɛ, nɛ sape bá sɛ 'bɔ li a we duzu nɛ gɔ. A ga sɛ zuma yangga we nɛ,

¹⁸ ɔ nɛ kɛ wa ga do kɔ̃ tũ ɛngga ni.” NWA tɔ̃a na: “Mi fo sɛ 'bakoe 'da nɛ, nɛ mbé sape dĩ́lĩ́ sɛ 'bɔ nɛ gɔ.

NWA a mba sɛ li obe Israɛlɛ dɛ ngɔ nùi 'da wa

¹⁹ Do 'da fala ni, mi hã sɛ etumbu hã owinɔ kɛ wa hã zi ngamɛ hã nɛ ni. Mi kpasa sɛ onya nɛ kɛ tɛ wa zɛ zɛla ni, nɛ mi kala sɛ wanɔ kɛ wa 'bana nza kɔlɔ 'duli ni si do wa. Mi hã sɛ dɔ̃lɔ̃ li hã nɛ olo sape kɛ ma ba zi li nɛ falanɔ vɛ̃ ni.

²⁰ Do 'da fala ni, mi mba sɛ li nɛ vɛ̃ dɛ ngɔ nùi 'da nɛ. Nɛ mi dɛ sɛ na, dungi 'da nɛ ma de, nɛ nɛ ɔ do dɔ̃lɔ̃ li sanga owinɔ ngɔ nù gɛ vɛ̃. Mi nwa, mi tɔ̃a ni.”