SOFONI 2 - WE NU GALE 1995

Gale kɔ̃a na owinɔ wa kifi sila wa

¹ Aa nɛ, owinɔ kɛ fo sape li nɛ bina gɛ, nɛ gbésé zu nɛ, nɛ nɛ kifi sila nɛ

² dati ngba soe gɔnɔ ngbangga. Nɛ dɛ̃ ni gɔ, nɛ do ngba soe ni, zã NWA ma nɔ̃lɔ̃ sɛ, nɛ a kala sɛ nɛ, nɛ a pɛsɛ nɛ fala kpo, ɔ nɛ kɛ bũ pɛsɛ do 'bulu zɔ̃ ni.

³ Nɛ, owinɔ ngɔ nùi gɛ kɛ nɛ kɔ̃a gɛnɛ NWA Gale, nɛ nɛ dɛ mbulanɔ 'da a dɛa ni, nɛ síkí li nɛ dɛ 'da a. Nɛ bá tɛ nɛ dɛ nù dati a, nɛ nɛ dɛ mɔ do bɔlɔ nɛ. Nɛ mbe gɔ, nɛ do ngba soe kɛ dã ma ba sɛ a ni, nɛ nde a dɛ́ sɛ 'dã mɔ do nɛ gɔ.

Ofilisti wa kpa sɛ 'bako

⁴ Wele kpo 'báná sɛ kɔ le Gaza gɔ, nɛ le Askaloni ma hɔ sɛ olo tɔa. Aa nɛ Owi Asdɔdɛ, Owi sɛnɛ nɛ wa ndaka sɛ nɛ kɔ le 'da nɛ do gba wese, nɛ ogele wele wa ndaka 'bɔ Owi Ekroni kɔ le 'da wa.

⁵ Nɛ, owinɔ nɛ yula ngɔ nù Kaftɔrɛ, nɛ nɛ ɔ nu gba lì gɛ, nɛ kpa sɛ 'bako. Nɛ zélé ngbangga kɛ NWA 'bili dɛ ngɔ nɛ gɛ. A na: “Nɛ, Ofilisti, mi mbiti sɛ nɛ, nɛ mi 'danga sɛ nùi 'da nɛ.

⁶ Nùi 'da nɛ kɛ nu gba lì ni, ma hɔ sɛ fala dala do nadalamɔ. Owi fɔmɔ bata wa dɛ sɛ ba'de dɛ di ni we dala do sa'denɔ 'da wa.

⁷ Tala obe Yuda kɛ wa 'bana sɛ do tunu li wa ni, wa ba sɛ nùi 'da nɛ. Do gba wese, nɛ wa nɛ sɛ do sa'denɔ 'da wa dɛ di ni we nyɔngɔ wɔkɔsɔ. Kɔ wese gɛ̃, nɛ wa nɛ sɛ, nɛ wa ɔ kɔ aũ tɔa olo nɛ kɔ le Askaloni. Do 'da fala ni, wa sɛ 'bɔ a Owi 'bako mbé nɛ gɔ, we kɛ mi NWA Gale 'da wa, mi be sɛ dia zã 'da mi hã wa.”

Omoabɛ do Oamoni wa kpa sɛ 'bako

⁸ NWA tɔ̃a na: “Owi ngɔ nù Moabɛ do Amoni, wa zɔ owinɔ 'da mi, obe Israɛlɛ li wa yala iko. Mi zɔa tɛlɛ tɛ kɛ wa dã wa, nɛ wa mɔmɔ wa, nɛ wa ba 'bɔ nùi 'da wa dɛ ngɔ kɛ 'da wa ni.

⁹ Kɔ wa ĩ́ na, mi NWA Gale 'da obe Israɛlɛ, kɛ mi a NWA ngɔ mɔ nyanga nza vɛ̃ ni, mi kana tɛ mi na, olenɔ ngɔ nù Moabɛ do Amoni, ma 'danga sɛ ɔ nɛ ole Sodɔmɛ do Gomɔrɛ ni. Nùi ni ma dé sɛ 'bɔ do kpalɛ mbé nɛ gɔ. Wa kpa sɛ di ni tati a te tɛ̃, do nù dɛ do tɔ̃ iko. Nɛ tala owinɔ 'da mi kɛ wa 'bana do tunu li wa ni, wa ba sɛ nùi 'da wa, nɛ wa kala mɛnɔ olo wa ni vɛ̃.”

¹⁰ Nɛ zɔ́, etumbui kɛ Owi ngɔ nù Moabɛ do Amoni wa kpa sɛ olo gã zui 'da wa gɛ a ni. Mba gɔ, wa dã owinɔ 'da NWA ngɔ mɔ nyanga nza vɛ̃, nɛ wa ba nùi 'da owinɔ 'da a dɛ ngɔ kɛ 'da wa.

¹¹ Mɛnɔ kɛ NWA a dɛ sɛ ni, ma hã sɛ kili hã wa wena. A dɛ sɛ na, ogele galenɔ wa hɔ mɔ yala, nɛ winɔ vɛ̃, gɛnɛ kɔ wanɔ wa nyɛlɛ do nù Israɛlɛ wena ni, wa dɔnggɔ sɛ NWA Gale ngɔ nùi 'da wa.

Oetiopi wa kpa sɛ 'bako

¹² NWA tɔ̃a na: “Nɛ, Oetiopi tɛ mɛ 'bɔ, mi dɛ sɛ na, nɛ fe li bolo.”

Oasiri wa kpa sɛ 'bako

¹³ NWA a hã sɛ 'bɔ etumbu hã Oasiri kɛ wa ɔ do si gbãlã ngɔ ni. A 'danga sɛ nùi 'da wa, nɛ a dɛ 'bɔ na, le Ninivɛ 'danga, nɛ ma kolo kpakala kpakala, nɛ ma hɔ li go.

¹⁴ Onadalamɔ do osa'de kpi do kpi wa tɛ sɛ, nɛ wa ɔ dɛ kɔ bili tɔanɔ olo Owi Ninivɛ ni. Odili do opipili wa ɔ sɛ kɔ gbɛsɛ tɔanɔ, nɛ onɔɛ wa dungu sɛ li holo ã tɔanɔ, nɛ wa he mɔ. Wi kɛ a kɔlɔ do bili tɔanɔ olo owi Ninivɛ, nɛ a zɔ sɛ tati a Ogbɛsa tɔa iko. Owele wa tɛ sɛ, nɛ wa kala te sɛdrɛnɔ kɔ gbɛsa tɔanɔ ni, nɛ wa si do ma.

¹⁵ Nɛ zɔ́, mɛ ma kpa sɛ le Ninivɛ gɛ a ni. We kɛ owi kɔ nɛ, wa do wali wena, nɛ wa lengge na, mɔ kpo wè we dɛ lo gɔ, nɛ lo nɛa ngɔ ogele winɔ vɛ̃. Nɛ nde le 'da wa ma 'danga sɛ, nɛ osa'de zamɔ wa ngɛmɛ sɛ ngba wa dɛ di ni. Owinɔ vɛ̃ kɛ wa la sɛ do kɛ zã bili tɔanɔ ni, wa ɔngbɔ sɛ do ma, nɛ wa dama fãlĩ, nɛ wa mɔmɔ.