SOFONI 1 - WE NU GALE 1995

¹ Mbe 'da fala kpo, nɛ NWA wila we hã Sofoni, do 'da fala kɛ Yoziasi, be 'da Amoni zi a nwa ngɔ nù Yuda ni. Sofoni zi a bulu be 'da Kusi. Li baa Kusi a Gɛdalia. Kusi a be yaa Amaria, nɛ a 'bɔ a kanggadɔkɔ nwa Ezekiasi.

Gale a gɔnɔ sɛ ngbangga 'da owinɔ ngɔ nù gɛ vɛ

² NWA tɔ̃a na: “Mi kumu sɛ mɛnɔ nyanga nza gɛ vɛ̃.

³ Mi mbiti sɛ Owele, do osa'de, do onɔɛ do okɔyɔ. Mi gbɛ sɛ o'dã winɔ kɛ wa zɛlɛ tɛ ngba wa ni do'do, nɛ mi lá sɛ wele kpo ngɔ nù gɛ gɔ.”

Gale a gɔnɔ sɛ ngbangga 'da Oyuda

⁴ NWA tɔ̃a na: “Mi hã sɛ etumbu hã Owi Yeruzalɛmɛ, do Owi ngɔ nù Yuda vɛ̃. Mi mbiti sɛ tala winɔ kɛ wa sambala gale Bala ni vɛ̃, nɛ ta zu wele kpo gbá sɛ 'bɔ ngɔ nganganɔ 'da Bala gɔ.

^5-6 Mi kumu sɛ owinɔ kɛ wa kũ sɛ zu tɔanɔ we dɔnggɔ wese, do zɛkɛ do sɔlanɔ ni. Nɛ mi gbɛ sɛ 'bɔ owanɔ kɛ wa gu nù ti mi NWA, nɛ wa kana tɛ wa hã mi na, lo a owinɔ 'da mi, nɛ 'do nɛ, nɛ wa dɛ 'bɔ kpasaa na mɛ ni hã gale Milkɔmɛ ni. Mi mbiti sɛ owanɔ kɛ wa siki 'do wa hã mi NWA, nɛ wa kɔ̃̀ we tɛ 'da mi, we aka mi we tɔ̃ mbula hã wa gɔɛ ni.”

⁷ Ma wia na, ngɔ tɛ nɛ gɛ̃ dati NWA Gale, we kɛ kɔ̃ tũi a nɛ gɔnɔ do ngbangga 'da owinɔ ni kɔla ia. NWA a sa sɛ mɔ hã Owi sɛnɛ nɛ, nɛ a e nɛ dɛ kɔ̃ wa, ɔ nɛ kɛ wele hã do dɔnggamɔ ni.

⁸ NWA Gale tɔ̃a na: “Do ngba soe ni, nɛ mi hã sɛ etumbu hã Owi olo li nwa, do nu fɛlɛ kulanɔ 'da a, do owinɔ kɛ wa 'bã olo kɔ̃ gele winɔ ni vɛ̃.

⁹ Nɛ mi hã sɛ etumbu hã owinɔ kɛ wa dɛ mɔ tɛ wa ɔ nɛ opaganɔnɔ ni, do wanɔ kɛ wa zũ mɛnɔ, tabi wa kala kpamɛnɔ 'da gele winɔ do nga zu, we a kɔ tɔa 'da nwa 'da wa ni.”

¹⁰ NWA tɔ̃a 'bɔ na: “Do ngba soe ni, wa zele sɛ gã hiamɔ kɔ le Yeruzalɛmɛ do si nu ngbo Kɔyɔnɔ, nɛ owinɔ kɛ wa ɔ tɛ fala mbé dɛa tɔanɔ ni, wa ala sɛ nu wa. Nɛ giti ogbini tɔa ma wele sɛ ngɔ kalanɔ kɛ zã le Yeruzalɛmɛ ni.

¹¹ Aa nɛ owinɔ kɛ nɛ ɔ ti nyanga kala le Yeruzalɛmɛ gɛ, nɛ zɛ nu nɛ, we kɛ Owi be golenɔ vɛ̃ wa mbiti sɛ.

¹² Do ngba soe ni, mi NWA, mi ba sɛ mwinda, nɛ mi yɛnggɛ do ma kɔ le Yeruzalɛmɛ we fa owinɔ kɛ wa nyɔngɔ mɔ, nɛ wa nɔ dɔ̃, nɛ wa dungu do gɛ̃a sila, nɛ wa tɔ̃ na: ‘NWA wè we dɛ mɔ kpo gɔ, nɛ a wè we dɛ 'dã mɔ tabi dia mɔ do lɛ gɔ’ ni. Nɛ mi hã etumbu hã wa.

¹³ Nɛ owi sɛnɛ wa wa 'danga sɛ tɔanɔ 'da wa, nɛ wa kala sɛ okpamɛnɔ 'da wa. Nɛ tɔanɔ kɛ wa dɛ ma ni, wa ɔ́ sɛ kɔ nɛ gɔ, nɛ wa nɔ́ sɛ dɔ́ vinɔnɔ wa mi ni gɔ.”

Tũi kɛ NWA nɛ gɔnɔ do ngbangganɔ ni ma kɔla ia

¹⁴ Gã tũi kɛ nwa a gɔnɔ sɛ do ngbangga 'da owinɔ ni, ma kɔlɔ ia. Kɔ̃ tũi ni, ma 'bànà nyɛlɛ gɔ. Do kɔ tũi ni, nɛ owinɔ wa he sɛ hiamɔ ala nu, nɛ onga sodanɔ wa zɛ sɛ nu wa.

¹⁵ Mɛ sɛ a kɔ tũ dã 'da NWA, nɛ owinɔ wa dɛ sɛ kili, nɛ wa sɛ do gã 'bako, nɛ mɛnɔ vɛ̃ ma kumu sɛ. Mɛ sɛ a kɔ tũ gba tũ kpirr, nɛ li nza ma kpe sɛ do gba kutu kpã kpã.

¹⁶ Do kɔ tũi ni, osodanɔ wa he sɛ hiamɔ bolo, nɛ wa dama mɔtũlũ, nɛ wa bi lenɔ kɛ gba ngbo do ongala tɔa zĩ ma takpa ni.

¹⁷ NWA tɔ̃a na: “Mi la sɛ owinɔ dɛ kɔ 'bako, nɛ wa tamba sɛ ti wa tu tu ɔ nɛ Owi lɔa li ni, we kɛ wa bɛ̃a we nu mi Gale. Tɔkɔ tɛ wa ma fo sɛ ɔ nɛ lì ni, nɛ wɔlɔ wa ma mbulu sɛ ɔ nɛ wɔkɔsɔ ni.”

¹⁸ Do kɔ tũi kɛ Gale sɛ do dã ni, mbili 'da owinɔ do mɔ mbalinɔ 'da wa, ma kpásá sɛ wa gɔ. Dã 'da Gale ma bɛlɛ sɛ nùi vɛ̃, nɛ ma 'danga ɔ nɛ kɛ we bɛlɛ do wɔkɔsɔ ni. Mɛ a gbãlã we, ma 'danga sɛ. NWA a mbiti sɛ owinɔ nyanga nza gɛ vɛ̃.