RUTI 4 - WE NU GALE 1995

Buzɛ ba Ruti do kɛnɛ a

¹ Nɛ Buzɛ kulu ngɔ, nɛ a nɛ tɛ nu ngba lé, tɛ nu di wa dungu we yɔlɔ do wenɔ ni, nɛ a dungu dɛ di ni. Nɛ wi na 'da Elimelɛkɛ, kɛ Buzɛ tɔ̃a zɛ we 'da a hã Ruti ni, a ma ngɔ la do di ni. Nɛ Buzɛ sa mɔ hã a na: “Aa mbaa, mɔ tɛ́, mɔ dúngú nù sɛ!” Nɛ wi ni tɛa, nɛ a dungu nù.

² Nɛ Buzɛ sa 'bɔ mɔ hã okumu le 'bu na, wa tɛ, kɔ wa dungu nù do wa. Wa dungu nù do'do,

³ nɛ Buzɛ tɔ̃ hã wi na 'da Elimelɛkɛ na: “Mɔ ĩ na Noemi yula Moabɛ i, kɔ a si. Nɛ nde di ngangga ni, a tɛ be gole fɔɛ olo Elimelɛkɛ, wi na 'da lɛ ni.

⁴ Mi kɔ̃a we tɔ̃ we nɛ hã mɔ na, ma we, nɛ mɔ oso ma, nɛ mɔ ba temɔɛ nɛ do okumunɔ, do ombe gele winɔ kɛ wa dungu gɛ. Mba gɔ, mɔ a wi dati kɛ mɔ wia we oso ma. Kɔ mɔ kɔ̃̀ we oso ma gɔ, nɛ mɔ tɔ̃ hã nu, we kɛ mi a wi bɔa dɛ 'do mɔ we oso ma.” Nɛ wi ni gese na: “Mi kɔ̃a we oso fɔɛ ni.”

⁵ Nɛ Buzɛ tɔ̃ 'bɔ na: “Fala mɔ oso fɔɛ 'da Noemi, nɛ mɔ ba sɛ Ruti, boko Moabɛ ni do kɛnɛ mɔ, takɔ fɔɛ 'bana dɛ kɔ nu fɛlɛ kula 'da wili a, kɛ a fia ni.”

⁶ Nɛ wi ni gese na: “Ma ɔ ni, nɛ nde mi wè we oso fɔɛ ni gɔ, mɔ oso ma olo mi. We kɛ mi oso ma, nɛ benɔ 'da mi ngboo wa kpá sɛ 'bɔ gã mɔ olo mi gɔ.”

⁷ Ĩ na, zɛ́ dati tɛ Israɛlɛ, fala winɔ wa be gole sanga tɛ ngba wa, tabi wa kpolo mɔ mɔ́ wa nde, nɛ mbe wele kpo kɔ winɔ ni hɔlɔ kpɔkpɔ nyanga a kpo, nɛ a hã ma hã ngba a we be na, wa usa gole sanga tɛ ngba wa. Ma be zi na, wa 'dafa we 'da wa ia.

⁸ We duzu ki ni, 'da fala wi ni tɔ̃a zi hã Buzɛ na, Buzɛ ósó fɔɛ olo Elimelɛkɛ ni, nɛ a hɔlɔ mbee kpɔkpɔ nyanga a kpo, nɛ a hã ma hã Buzɛ.

⁹ Buzɛ nɛa we zɔ ni, nɛ a tɔ̃ hã kumunɔ do owinɔ vɛ̃, kɛ wa zi di ni ni na: “Sɔɛ gɛ, nɛ a temɔɛnɔ 'da mi na, mi usa mɛnɔ olo Elimelɛkɛ do benɔ 'da a, Kilioni do Maloni ni ia.

¹⁰ Nɛ mi ba 'bɔ Ruti boko Moabɛ, kɛ wili a Maloni fia ni, do wuke 'da mi, sɛ a mɛnɔ kɛ mi usa ni, ma 'bana dɛ kɔ nu fɛlɛ kula 'da wele kɛ a fia ni, nɛ a kpa 'bɔ obe we anga li a de. Na mɛ ni, nɛ li a ma 'bana sɛ kɔ winɔ, do tɛ nu di kɛ wa yɔlɔ do wenɔ ni. Nɛ a otemɔɛ wenɔ gɛ.”

¹¹ Nɛ okumunɔ, do wanɔ vɛ̃ kɛ wa zi di ni ni, wa gese na: “Ĩi, lɛ kɔ̃a, lɛ a Otemɔɛnɔ 'da mɔ. E kɔ nwa wele nu a tɛ wuke mɔ nɛ ba a, we e a kɔ tɔa 'da mɔ ni. E kɔ a ɔ nɛ Rasɛlɛ do Lea, wukonɔ 'da Yakɔbɔ, kɛ wa kua lɛ obe Israɛlɛ vɛ̃ ni. E kɔ kpamɛ 'da mɔ ma gã kɔ nu fɛlɛ Efrata, nɛ sako li mɔ dɔ̃lɔ̃ kɔ le Bɛtleɛmɛ vɛ̃.

¹² E kɔ Gale hã sɛ obe hã mɔ do wala 'da be zɔnga ni, nɛ nu fɛlɛ kula 'da mɔ ɔ do dɔ̃lɔ̃ li, ɔ nɛ kɛ 'da Perɛsi, be kɛ Yuda kua zi a do Tamarɛ ni.”

Ruti kua bulu be

¹³ Buzɛ ba Ruti do kɛnɛ a. Nɛ nwa wele nu a tɛ Ruti, nɛ a ba zã, nɛ a ko bulu be.

¹⁴ Nɛ owuko Bɛtleɛmɛ wa tɔ̃ hã Noemi na: “E kɔ lɛ dɔnggɔ nwa, we kɛ sɔɛ gɛ, a hã be yaa wi hã mɔ, nɛ a fɔmɔ sɛ mɔ. E kɔ sako li a dɔ̃lɔ̃ ngɔ nù Israɛlɛ.

¹⁵ A hã sɛ mbé ngawi hã mɔ, nɛ a fɔmɔ sɛ mɔ kɔ dɛa gbɛlɛ 'da mɔ. Konduka 'da mɔ kɔ̃ gɛnɛ mɔ wena, a kua be yaa wi hã mɔ. Mɛ kɛ a dɛa hã mɔ gɛ, ma nɛa ngɔ kɛ na, mɔ ɔ sɔ do obulu be sambo ni.”

¹⁶ Nɛ Noemi ba be, nɛ a 'be a dɛ tɛ̃ a. Nɛ yolo do ngba soe ni, nɛ a zɔa mɔ tɛ̃ a.

¹⁷ Ongba Noemi wukonɔ wa ia zi li be na Obɛdɛ, nɛ wa na: “Noemi kpa be yaa wi.” Obɛdɛ gã zi, nɛ a kua bulu be, nɛ a e li a na Yɛse. Nɛ Yɛse kua Davidi.

Li oyaa Davidi

¹⁸ Kɛ gɛ a li oyaa Davidi, yolo 'da Perɛsi. Perɛsi kua zi Hɛsroni,

¹⁹ nɛ Hɛsroni ko Ramɛ, nɛ Ramɛ ko Aminadabɛ,

²⁰ nɛ Aminadabɛ ko Nasoni, nɛ Nasoni ko Salma,

²¹ nɛ Salma ko Buzɛ, nɛ Buzɛ ko Obɛdɛ,

²² nɛ Obɛdɛ ko Yɛse, nɛ Yɛse ko Davidi.